Zechariah 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Awˬ nu ve awˬ ha teˇ maˬ awˬ hkʼaw lo, tehˆ nyi tuˬ ve suhˆ taˬ teˇ maˬ yuˬ taˍ ve chaw teˇ gʼaˇ hta‸ ngaˬ gʼa kʼaw‸ mawˬ ve yoˬ.

2Nawˬ hkʼaˬ lo kʼai toˇ ve le, teh‸ ngaˬ yawˇ hta‸ na nyi ve yoˬ. Yeˍruˆsaˍlehnˍ venˇ lo kʼai leh, venˇ oˇ ve hkʼaˬ ma zuhˬ, hkʼaˬ ma kʼehˬ ve hta‸ ca tehˆ nyi tuˬ kʼai toˇ ve yoˬ, teh‸ ngaˬ hta‸ kʼoˆ laˇ ve yoˬ.

3Oˇ ve hkʼaw‸ nawˉ, mvuhˇ naw ma tcuh yaˇ oˇ ve geh awˬ nu ve mvuhˇ naw tcuh yaˇ teˇ gʼaˇ laˬ chehˇ ve hta‸ ngaˬ gʼa mawˬ ve yoˬ.

4Oˇ htaˇ, awˉ lawˉ peuˇ ve mvuhˇ naw ma tcuh yaˇ yawˇ hta‸ kʼoˆ piˇ ve, Tehˆ nyi tuˬ suhˆ taˬ yuˬ taˍ ve chaw oˇ ve geh haˆ kʼai leh chi hkʼe ca kʼoˆ piˇ-oˆ. Yeˍruˆsaˍlehnˍ venˇ hkʼaw chaw yaˇ leh ceˇ caˬ cawˬ la maˇ jaˇ tuˬ ve pa taw, venˇ oˇ ve hkʼaw ca chehˇ maˇ daw taˬ. Lanˇ venˇ hta‸ htawˇ ca ko maˇ zuhˇ taˬ, teh‸ ca kʼoˆ piˇ tcuh ve yoˬ.

5Gʼuiˬsha lehˬ venˇ oˇ ve hta‸ aˬ miˍ yuˬ leh ko taˍ ve lanˇ venˇ hkʼa shuˍ ha‸ shaˉ piˇ leh, Yawˇ ve awˬ me‸ awˬ hponˇ tawˆ la piˇ tuˬ ka ti‸ te taˍ peuˬ ve yoˬ.

6Gʼuiˬsha yawˇ ve chaw teˇ hpaˍ hta‸ kʼoˆ piˇ ve, Ngaˬ nawˬ hui hta‸ hkʼaˬ ti chi ti lo hpaˆ da‸ kʼai piˇ taˍ ve yoˬ.

7Ya‸ hkʼaˇ, shu ve mvuhˇmiˬ hkʼaw chehˇ taˍ ve chaw hui-oˬ, chi beu‸ Baˍbuˍlonˍ mvuhˇmiˬ hkʼaw tawˆ la leh, Yeˍruˆsaˍlehnˍ venˇ lo kʼaw‸ la-o, teh‸ kʼoˆ ve yoˬ.

8Oˇ ve hkʼaw‸ nawˉ, Gʼuiˬsha lehˬ yawˇ ve chaw teˇ hpaˍ hta‸ hpaˆ da‸ guiˇ da‸ kʼai tuˬ te piˇ ve chaw hui geh ngaˬ hta‸ kʼai peu laˇ leh chi hkʼe ca kʼoˆ piˇ tcuh laˇ ve yoˬ. Gʼuiˬsha ve chaw hta‸ ca ya‸ ve chaw lehˬ, Gʼuiˬsha ve awˬ hpfuhˇ hkʼaˆ jaˇ ve mawˇ hta‸ ya‸ ve chaw hpeh‸ ve yoˬ.

9Gʼuiˬsha awˬ to nawˬ hui hta‸ ma‸ bawˆ leh, teˇ pawˆ htaˇ nawˬ hui ve awˬ ceˬ te jaw ve chaw teˇ hpaˍ, nawˬ hui hta‸ kʼaw‸ te luˬ laˇ tuˬ yoˬ. Chi hkʼe hpeh‸ la ve teˇ yanˇ, Gʼuiˬsha ngaˬ hta‸ peu laˇ taˍ ve hta‸ chaw hkʼa peu-eˬ gʼa shiˍ tuˬ yoˬ.

10Gʼuiˬsha kʼoˆ ve, Yeˍruˆsaˍlehnˍ venˇ yaˇ teˇ hpaˍ-oˬ, ha lehˬ leh kʼa muiˬ chehˇ-oˆ. Ngaˬ nawˬ hui geh ca chehˇ la tuˬ yoˬ, teh‸ kʼoˆ ve yoˬ.

11Awˬ yanˇ oˇ ve gaˬ la kʼo, awˬ nu ve chaw ceuˬ teˇ hpaˍ Gʼuiˬsha geh laˬ leh, Yawˇ ve chaw hpeh‸ la tuˬ yoˬ. Yawˇ nawˬ hui geh chehˇ leh, nawˬ hui geh Yawˇ ngaˬ hta‸ peu laˇ taˍ ve hta‸ nawˬ hui shiˍ la tuˬ yoˬ.

12Yuˇda‸ mvuhˇmiˬ lehˬ, da‸ kehˬve Gʼuiˬsha ve mvuhˇmiˬ teˇ pawˆ kʼaw‸ hpeh‸ la leh, Yeˍruˆsaˍlehnˍ venˇ lehˬ Gʼuiˬsha ha‸ jaˇ ve venˇ hpeh‸ la tuˬ yoˬ.

13Chaw hkʼa peu-eˬ Gʼuiˬsha mehˆ gʼuˇ suhˍ ta‸ iˉ gawˬ lehˍ chehˇ taˍ-o‸. Gʼuiˬsha lehˬ, Yawˇ ve da‸ kehˬ jaˇ ve chehˇ kuiˬ lo tawˆ la chehˇ ve yoˬ.

← Chapter 1 Jump to: Chapter 3 →