1 Thessalonians 4

Lao Bible 2012 (ພຣະຄຳພີສັກສິ)

← Chapter 3 Jump to: Chapter 5 →

1ພີ່ນ້ອງທັງຫລາຍເອີຍ, ທ້າຍສຸດນີ້ ພວກເຮົາວອນຂໍ ແລະເຕືອນສະຕິພວກເຈົ້າໃນພຣະນາມຂອງອົງພຣະເຢຊູເຈົ້າວ່າ ພວກເຈົ້າໄດ້ຮຽນຮູ້ຈາກເຮົາແລ້ວວ່າ ຈຳເປັນຕ້ອງດຳເນີນຊີວິດຢ່າງໃດ ຈຶ່ງຈະເປັນທີ່ພໍພຣະໄທພຣະເຈົ້າ ເໝືອນດັ່ງພວກເຈົ້າກຳລັງປະຕິບັດຢູ່ແລ້ວ ກໍຈົ່ງປະຕິບັດດັ່ງນັ້ນໃຫ້ຫລາຍກວ່າເກົ່າອີກ.

2ດ້ວຍວ່າ, ພວກເຈົ້າຮູ້ຈັກຄຳແນະນຳ ຊຶ່ງພວກເຮົາໄດ້ມອບໃຫ້ພວກເຈົ້າ ໂດຍສິດອຳນາດຂອງອົງພຣະເຢຊູເຈົ້າ.

3ສິ່ງນີ້ແຫຼະ ແມ່ນນໍ້າພຣະໄທຂອງພຣະເຈົ້າ ຄືໃຫ້ພວກເຈົ້າເປັນຄົນບໍຣິສຸດ ແລະເວັ້ນຈາກການຜິດສິນທຳທາງເພດທຸກຮູບແບບ.

4ໃຫ້ພວກເຈົ້າແຕ່ລະຄົນ ຮູ້ຈັກເອົາເມຍໃນທາງບໍຣິສຸດ ແລະໃນທາງທີ່ໜ້ານັບຖື

5ບໍ່ແມ່ນດ້ວຍຣາຄະຕັນຫາຊົ່ວຕາມຄວາມຕ້ອງການ ເໝືອນດັ່ງຄົນທີ່ບໍ່ນັບຖືພຣະເຈົ້າ.

6ໃນເລື່ອງນີ້ ຢ່າໃຫ້ຄົນໃດລ່ວງເຮັດຜິດຕໍ່ພີ່ນ້ອງຄຣິສຕຽນຂອງຕົນ ຕາມທີ່ພວກເຮົາໄດ້ບອກພວກເຈົ້າໄວ້ກ່ອນແລ້ວ ແລະພວກເຮົາກໍໄດ້ເຕືອນພວກເຈົ້າຢ່າງໜັກແໜ້ນວ່າ ອົງພຣະຜູ້ເປັນເຈົ້າຈະລົງໂທດຄົນທີ່ເຮັດຜິດໃນເລື່ອງນີ້.

7ເພາະວ່າ ພຣະເຈົ້າບໍ່ໄດ້ເອີ້ນເອົາພວກເຮົາໃຫ້ໃຊ້ຊີວິດໃນທາງຜິດສິນທຳ ແຕ່ໃຫ້ໃຊ້ຊີວິດໃນທາງບໍຣິສຸດ.

8ດ້ວຍເຫດນີ້ ຜູ້ທີ່ຝ່າຝືນນັ້ນກໍບໍ່ໄດ້ຝ່າຝືນຕໍ່ມະນຸດ ແຕ່ຝ່າຝືນຕໍ່ພຣະເຈົ້າ ຜູ້ຊົງໂຜດປະທານພຣະວິນຍານບໍຣິສຸດເຈົ້າຂອງພຣະອົງໃຫ້ແກ່ເຈົ້າທັງຫລາຍ.

9ສ່ວນເລື່ອງການຮັກພີ່ນ້ອງທັງຫລາຍນັ້ນ ເຮົາບໍ່ຈຳເປັນຈະຂຽນຝາກມາໃຫ້ພວກເຈົ້າ ເພາະເຈົ້າເອງກໍໄດ້ຮັບການຊົງສັ່ງສອນຈາກພຣະເຈົ້າແລ້ວວ່າ ໃຫ້ຮັກກັນແລະກັນ.

10ທີ່ຈິງແລ້ວ ພວກເຈົ້າກໍໄດ້ເຮັດດັ່ງນັ້ນຢູ່ແລ້ວ ຕໍ່ພີ່ນ້ອງທັງໝົດໃນທົ່ວແຂວງມາເກໂດເນຍ. ພີ່ນ້ອງທັງຫລາຍເອີຍ ພວກເຮົາຂໍເຕືອນສະຕິພວກເຈົ້າໃຫ້ເຮັດດັ່ງນັ້ນຫລາຍກວ່າເກົ່າ.

11ຈົ່ງຕັ້ງເປົ້າໝາຍທີ່ຈະໃຊ້ຊີວິດຢູ່ຢ່າງສະຫງົບສຸກ ທີ່ຈະເອົາໃຈໃສ່ຕໍ່ກິດທຸລະຂອງຕົນເອງ ແລະທີ່ຈະທຳມາຫາກິນລ້ຽງຊີບດ້ວຍມືຂອງຕົນເອງ ຕາມທີ່ພວກເຮົາໄດ້ສັ່ງພວກເຈົ້າໄວ້ແລ້ວນັ້ນ.

12ເພື່ອການດຳເນີນຊີວິດຂອງພວກເຈົ້າຈະເປັນທີ່ນັບຖືແກ່ຄົນພາຍນອກ ແລ້ວພວກເຈົ້າຈະບໍ່ຕ້ອງເອື່ອຍອີງຄົນອື່ນ.

13ພີ່ນ້ອງທັງຫລາຍເອີຍ, ພວກເຮົາຢາກໃຫ້ພວກເຈົ້າຮູ້ຄວາມຈິງ ເຖິງພວກທີ່ຫລັບໄປແລ້ວນັ້ນ ເພື່ອວ່າພວກເຈົ້າຈະບໍ່ໄດ້ເສົ້າໂສກ ເໝືອນດັ່ງຄົນອື່ນທີ່ບໍ່ມີຄວາມຫວັງ.

14ເພາະໃນເມື່ອພວກເຮົາເຊື່ອວ່າ ພຣະເຢຊູເຈົ້າໄດ້ສິ້ນພຣະຊົນ ແລະໄດ້ຄືນພຣະຊົນແລ້ວ ໂດຍພຣະເຢຊູເຈົ້ານັ້ນແຫຼະ ພຣະເຈົ້າຈະນຳຄົນຜູ້ທີ່ຫລັບໄປແລ້ວນັ້ນຄືນມາກັບພຣະອົງ.

15ໃນຂໍ້ນີ້ ເຮົາບອກເຈົ້າທັງຫລາຍຕາມພຣະທຳຂອງອົງພຣະຜູ້ເປັນເຈົ້າວ່າ ພວກເຮົາຜູ້ຍັງມີຊີວິດຢູ່ ແລະຄອຍຖ້າການສະເດັດມາຂອງອົງພຣະຜູ້ເປັນເຈົ້າ ເຮົາຈະລ່ວງໜ້າໄປກ່ອນພວກຄົນທີ່ຫລັບໄປແລ້ວນັ້ນກໍບໍ່ໄດ້ແທ້.

16ດ້ວຍວ່າ, ຈະມີສຽງຮ້ອງບັນຊາອັນດັງ, ສຽງຂອງອັກຄະເທວະດາ ສຽງແກຂອງພຣະເຈົ້າ ແລະອົງພຣະຜູ້ເປັນເຈົ້າເອງຈະສະເດັດລົງມາຈາກສະຫວັນ ພວກທີ່ເຊື່ອໃນພຣະຄຣິດທີ່ຕາຍໄປແລ້ວ ກໍຈະເປັນຄືນມາສູ່ຊີວິດກ່ອນ.

17ແລ້ວພວກເຮົາຜູ້ທີ່ຍັງມີຊີວິດຢູ່ໃນເວລານັ້ນ ກໍຈະຖືກຮັບຂຶ້ນໄປໃນເມກພ້ອມກັບຄົນພວກນັ້ນ ເພື່ອພົບກັບອົງພຣະຜູ້ເປັນເຈົ້າໃນຟ້າອາກາດ. ຢ່າງນັ້ນແຫຼະ ພວກເຮົາຈຶ່ງຈະຢູ່ກັບອົງພຣະຜູ້ເປັນເຈົ້າຕະຫລອດໄປເປັນນິດ.

18ດ້ວຍເຫດນີ້ ຈົ່ງເລົ້າໂລມອອຍໃຈຊຶ່ງກັນແລະກັນ ດ້ວຍຂໍ້ຄວາມເຫຼົ່ານີ້ເທີ້ນ.

← Chapter 3 Jump to: Chapter 5 →