1 Thessalonians 2

Lao Bible (ฉบับอักษรลาว)

← Chapter 1 Jump to: Chapter 3 →

1ຕສວັ໋ງ ກໍ໋-ໂຢ໌ວ ອ່າ, ເມີ່ຍ ບົວ ກັ້ນ ຮິ້ວ ຕຸ໊, ເຢຍ ບົວ ມີ່ງ ເມີ່ຍ ບົວ ໜ່າຍ ເຊ ໄມ້ ເຕສີ໌ຍ ມີ່ງ ໄມ້ ລ່ຳ ຫລົ່ງ.

2ເມີ່ຍ ບົວ ຮິ້ວ ຕຸ໊ ຕສິ້ນ ດ່າງ ໄມ້ ແກ້ງ ມີ່ງ ວົ້ວ ຕສັ່ນ, ເຢຍ ບົວ ຢຽມ ຟີລິບພອຍ ຕສີ້ງ ຕສຸ ສ່ຽວ ໂຄ້ວ, ຕສຸ ມ່ຽນ ໂຕສ໋ວ ໂຕະ, ກ໊ອງ ໂຕະ ປຸນ ເຢຍ ບົວ ຕສຸ ໄຍ້. ມປ່າ ໄມ້ ກຸ໊ນ ມ່ຽນ ເຖສົາ ເຢຍ ບົວ ຕ໋ອຍ-ເຕກ ດົ່ງ ໜ່າຍ ທສ້ຳ, ເຢຍ ບົວ ເຂົາ ທິນ-ຮູ່ງ ປຸນ ເຢຍ ບົວ ຕ໊າມ ໂຮລ ເຍີຍ ຕສຸ້ນ ທິນ-ຮູ່ງ ເຍີຍ ຄູ້ ຝຽນ ປຸນ ເມີ່ຍ ບົວ.

3ເຢຍ ບົວ ຂວິນ ມ່ຽນ ສຽນ ເຢຊູ, ເຢຍ ບົວ ໄມ້ ເຕສີ໌ຍ ກ໊ອງ ຈ໊າ ໄຟ ຮນ້ຳ ທສວດ ໄມ້ ທສີງ-ເດສ່ງ ເຍີຍ ເຈົ໊າ, ໄຟ ຫລົ່ງ ກູ໊ ໄກວ໋ ເຍີຍ ຕສະເອີ໋ຍ ດົ໊ວ ມ່ຽນ.

4ຕ໋າວ ດສ໋ວນ ທິນ-ຮູ່ງ ເສີຍ ລິ໌ວ ເຢຍ ບົວ, ປວັດ ເຢຍ ບົວ ຫອບ ນິ່ນ ເຍີຍ ໂຮຍ້ວ, ຕສ່ຽວ ຈິວ ຄູ້ ຝຽນ ປຸນ ເຢຍ ບົວ. ເຢຍ ບົວ ຕສ່ຽວ ຕສຸ້ນ ຄູ້ ຝຽນ ໄມ້ ເຕສີ໌ຍ ເຫວີ່ຍ ປຸນ ມ່ຽນ ອະເຮນີ້ຍ. ເຢຍ ບົວ ອ໋ອຍ ໂຕສ໋ວ ເຫວີ່ຍ ປຸນ ທິນ-ຮູ່ງ ອະເຮນີ້ຍ, ຕົ້ງ ເສີຍ ເຢຍ ບົວ ເຍີຍ ໂຮຍ້ວ ວົ້ວ ເຕົ້າ.

5ເມີ່ຍ ບົວ ຢ່າ ຮິ້ວ ຕຸ໊, ເຢຍ ບົວ ມີ່ງ ເມີ່ຍ ບົວ ໜ່າຍ ເຢຍ ບົວ ໄມ້ ກ໊ອງ ຫວ່າ ກາມ ດົ໊ວ ເຈ໋ຍ ມ່ຽນ, ຢ່າ ໄມ້ ມ່າຍ ອ້ອມ ໂຮຍ້ວ ເມົ້າ ກະນ້າຍ. ນ້າຍ ທິນ-ຮູ່ງ ກັ້ນ ເຖງ ເຢຍ ບົວ ໂຕສ໋ວ ຕສອງ-ເຕສ໋ງ.

6ເຢຍ ບົວ ໄມ້ ລໍ໌ ມ່ຽນ ເທສງ ເຢຍ ບົວ. ໄມ້ ລໍ໌ ເມີ່ຍ ບົວ ຢ່າ ໄມ້ ລໍ໌ ຫາຍ ເຕົ້າ ເທສງ ເຢຍ ບົວ.

7ໄມ້ ກຸ໊ນ ເຢຍ ບົວ ໂຕສ໋ວ ກີຕູ່ ເຍີຍ ກົງ-ໂຕສ້ ຕສ່ຽວ ມ່າຍ ເລີ໌ຍ ເຝີຍ ຫລຸ່ຍ ເມີ່ຍ ບົວ, ເຢຍ ບົວ ຢຽມ ເມີ່ຍ ບົວ ໜ່າຍ ເຍີຍ ຕສຢັ້ງ ໂຫ່ ເຢຍ ບົວ ໂຕສ໋ວ ສ່ວນ ເຍີຍ, ຮນັ້ງ ມາ ໂກ໋ວ ຫລົງ ກັ້ນ ເຍີຍ ຝຸຈ໊ວຍ ນໍ.

8ເຢຍ ບົວ ຮນ້ຳ ໄຫ່ ເມີ່ຍ ບົວ ຕສ່ຽວ ໄມ້ ຕານ ຕສຸ້ນ ທິນ-ຮູ່ງ ເຍີຍ ຄູ້ ຝຽນ ປຸນ ເມີ່ຍ ບົວ, ລ່ຽມ ເຢຍ ບົວ ກັ້ນ ເຍີຍ ແໝ່ງ ຢ່າ ອະເຮນີ້ຍ ປຸນ ເມີ່ຍ ບົວ, ເຫວີ່ຍ ຕສຸ ເມີ່ຍ ບົວ ຕສະເກ້ງ! ໂຕສ໋ວ ເຢຍ ບົວ ຮນ້ຳ ໄຫ່ ເຍີຍ ມ່ຽນ.

9ກໍ໋-ໂຢ໌ວ ອ່າ, ເມີ່ຍ ບົວ ຕສູ໊ງ ຈັ໋ງ ຕຸ໊ ເຢຍ ບົວ ທສວດ ທຈະ ໂຕສ໋ວ ກົງ ໂຄ້ວ. ເຢຍ ບົວ ຕສຸ້ນ ທິນ-ຮູ່ງ ເຍີຍ ຄູ້ ຝຽນ ປຸນ ເມີ່ຍ ບົວ ວົ້ວ ຕສັ່ນ, ເຢຍ ບົວ ຮນອຍໆ ມ໌ວນໆ ຢ່າ ໂຕສ໋ວ ກົງ ໂຄ້ວ ເຫວີ່ຍ ໄມ້ ອ໋ອຍ ເຝີຍ ຫລຸ່ຍ ເມີ່ຍ ບົວ ຫາຍ ເຕົ້າ.

10ເມີ່ຍ ບົວ ເຖງ ເຢຍ ບົວ ໂຕສ໋ວ ຕສອງ-ເຕສ໋ງ, ທິນ-ຮູ່ງ ຢ່າ ເຖງ ເຢຍ ບົວ ໂຕສ໋ວ ຕສອງ-ເຕສ໋ງ, ເຊ ເຢຍ ບົວ ຢຽມ ເມີ່ຍ ບົວ ສຽນ ເຢຊູ ເຍີຍ ມ່ຽນ ບຸດົ໋ງ ໂຕສ໋ວ ທສີງ-ເດສ່ງ ເຍີຍ, ຫອບ ເຍີຍ, ໄມ້ ລ່ຳ ຕ້ານ ຕ໋ອງ.

11ເມີ່ຍ ບົວ ຮິ້ວ ຕຸ໊ ເຢຍ ບົວ ຕ໋າຍ ເມີ່ຍ ບົວ ຮນັ້ງ ເຕຍ ຕ໋າຍ ນິ່ນ ກັ້ນ ເຍີຍ ຝຸຈ໊ວຍ ນໍ.

12ເຢຍ ບົວ ເຖງ ເມີ່ຍ ບົວ ຕສູ໋ງ ທຈະ, ນຸ໌ນ ເມີ່ຍ ບົວ ເຍີຍ ໂຮຍ້ວ, ຕສັ່ນໆ ຂວິນ ເມີ່ຍ ບົວ ຢຽມ ເສີຍ ຕສັ່ງ ອ໋ອຍ ຕສຸ ຢຽມ ຜຸຍ ທິນ-ຮູ່ງ, ຕົ້ງ ເຫ່ວ ເມີ່ຍ ບົວ ຕ້າຍ ເປັຍ ນິ່ນ ເຍີຍ ກົ໊ວະ ຢ່າ ຈວັ່ງ ນິ່ນ ເຍີຍ ອຈັງ-ຫລ່າງ ວົ້ວ ເຕົ້າ.

13ແອ໋ງ ມ່າຍ ຢຽດ ຕິ່ວ ປຸນ ເຢຍ ບົວ ຕສັ່ນໆ ແລ໌ງ ຕສີ້ງ ທິນ-ຮູ່ງ. ເຊ ເຫວີ່ຍ ຕສຸ ເຢຍ ບົວ ຕສຸ້ນ ທິນ-ຮູ່ງ ເຍີຍ ໂຕ໌, ເມີ່ຍ ບົວ ໝວັງ ລິ໌ວ ຢ່າ ຕສິ໊ບ. ເມີ່ຍ ບົວ ຢ່າ ຮິ້ວ ຕຸ໊ ເຊ ໄມ້ ເຕສີ໌ຍ ປ້າມ ມ່ຽນ ເຍີຍ ໂຕ໌, ເຊ ຕສະເກ້ງ ທິນ-ຮູ່ງ ເຍີຍ ໂຕ໌, ຕົ້ງ ຢຽມ ເມີ່ຍ ບົວ ສຽນ ເຢຊູ ເຍີຍ ມ່ຽນ ກະຍົ໌ວ ໂຕສ໋ວ ກົງ ເຍີຍ ໂຕ໌.

14ກໍ໋-ໂຢ໌ວ ອ່າ, ເມີ່ຍ ບົວ ປວັ້ງ ເຍີຍ ສີ່ ເຊ ຮນັ້ງ ຢຽມ ຢິວໄທ ແຊ້ງ, ທິນ-ຮູ່ງ ເຍີຍ ຈິວ-ປາງ, ຕົ້ງ ສຽນ ກີຕູ່ ເຢຊູ ວົ້ວ ເຕີ໋ຍ ປວັ້ງ ເຍີຍ ນໍ, ເຫວີ່ຍ ຕສຸ ເມີ່ຍ ບົວ ຕສຸ ກັ້ນ ເຍີຍ ປ໊ວນ-ຝີງ ມ່ຽນ ໂຕສ໋ວ ໂຕະ ຮນັ້ງ ນິ່ນ ບົວ ຕສຸ ຢິວໄທ ມ່ຽນ ໂຕສ໋ວ ໂຕະ ວົ້ວ ນໍ.

15ຢິວໄທ ມ່ຽນ ໄຕ໋ ຕສ໊ຽວ ເຢຊູ, ຢ່າ ໄຕ໋ ໂຕ່ວ ຫວ່າ ມ່ຽນ, ຢ່າ ຕສຸ່ນ ເຢຍ ບົວ ທສວດ ມີ່ງ. ນິ່ນ ບົວ ໂຕສ໋ວ ໄມ້ ຫອບ ທິນ-ຮູ່ງ, ຢ່າ ເຖສົາ ໝ່ານ ມ່ຽນ ມ່າຍ ວິນ.

16ນິ່ນ ບົວ ຕັ໊ງ ຈ໊ຽນ ໄມ້ ອ໋ອຍ ປຸນ ເຢຍ ບົວ ຕສຸ້ນ ໂຕ໌ ປຸນ ຈັ໋ນ ເຫວີ່ຍ ປຸນ ຈັ໋ນ ຕຸ໊ ໂອຈ໋ວ. ຮນັ້ງ ໜ່າຍ, ນິ່ນ ບົວ ຕສັ່ນໆ ປ໌າມ ຕສຸ໌ຍ ຢ່າ ປ໌າມ ເຖົາ ປວັ໊ງ ໂສວ ໂໝ່ວ. ອີ້ ຕສັ່ນ ນິ່ນ ບົວ ຕສູ໊ງ ຕສຸ ທິນ-ຮູ່ງ ໂນ໌ວ ຈ໊ຽນ ອ໊ະ.

17ຕສວັ໋ງ ກໍ໋-ໂຢ໌ວ ອ່າ, ເຢຍ ບົວ ຕສຸ ເລີ່ຍ ອກອຍ ຖສາມ ປ໊າ ເມີ່ຍ ບົວ ວົ້ວ ຕສັ່ນ, ເຊ ຊິນ ເລີ່ຍ ຮນັ້ງ, ໂຮຍ້ວ ໄມ້ ເລີ່ຍ. ເຢຍ ບົວ ຕສະເກ້ງ! ຈັ໋ງ ໄຫ່ ເມີ່ຍ ບົວ ຢ່າ ອ໋ອຍ ປວັດ ໄຫ່ ເມີ່ຍ ບົວ ເຍີຍ ຮມຽນ.

18ເຢຍ ບົວ ເກ້ງ ອ໋ອຍ ມີ່ງ ເມີ່ຍ ບົວ ໜ່າຍ. ເຢຍ, ເປົາໂລ, ຕສູ໊ງ ເຈ໌ຍ ຢຽດ ອີ ດສຸ່ນ ໂຮຍ້ວ ອ໋ອຍ ມີ່ງ, ມປ່າ ຊາຕານ ຕັ໊ງ ຈ໊ຽນ ເຢຍ ບົວ.

19ຕສ໊ຽວ ເຢຊູ ແອ໋ງ ຕ້າຍ ວົ້ວ ຕສັ່ນ, ຫາຍ ຫຍູ່ງ ປຸນ ເຢຍ ບົວ ມ່າຍ ລ່ຳ ຮນ້ຳ, ຢ່າ ໂຕສ໋ວ ປຸນ ເຢຍ ບົວ ອອນ-ເຫລາະ, ຢ່າ ປຸນ ເຢຍ ບົວ ອະເຮນີ້ຍ ເຫວີ່ຍ ໂຕສ໋ວ ເຢຍ ບົວ ເຍີຍ ນີ້ງ? ເຊ ເມີ່ຍ ບົວ ໄມ້ ເຕສີ໌ຍ?

20ເມີ່ຍ ບົວ ຕສະເກ້ງ! ໂຕສ໋ວ ເຢຍ ບົວ ເຍີຍ ອຈັງ-ຫລ່າງ, ຢ່າ ໂຕສ໋ວ ເຢຍ ບົວ ເຍີຍ ອອນ-ເຫລາະ.

← Chapter 1 Jump to: Chapter 3 →