2 Corinthians 13

Lao Bible (ฉบับอักษรลาว)

← Chapter 12 Jump to:

1ນ້າຍ ເຊ ເຢຍ ອ໋ອຍ ມີ່ງ ເມີ່ຍ ບົວ ໜ່າຍ ຕະຟາມ ດສຸ່ນ. ກີງ-ໂຊວ ກ໊ອງ, “ໂກ໋ ມ່ຽນ ເຍີຍ ສີ່ ອ໋ອຍ ຕສຸ ມ່າຍ ອີ ປົວ ລ່ານ ຕສອງ-ເຕສ໋ງ ມ່ຽນ ຕົ້ງ ໂຈ໋ວ ຫວ່າ ກ໊ອງ ຖສີງ ຝຸນ ຕສຽນ.”

2ເຢຍ ຕົ໊ນ ເຈ໋ຍ ຕສິ້ນ ດ່າງ ປ໌າມ ຕສຸ໌ຍ ວົ້ວ ເຕີ໋ຍ ເຖສົາ ຕສວັ໋ງ ມ່ຽນ. ອີ້ ຕສັ່ນ ເຢຍ ໄມ້ ເຖສົາ ເມີ່ຍ ບົວ ຢຽມ ໜ່າຍ, ເຢຍ ແອ໋ງ ຕົ໊ນ ດສຸ່ນ, ຮນັ້ງ ເຢຍ ມີ່ງ ຕະເຫຍີ່ຍ ດສຸ່ນ ຕົ໊ນ ເຈ໋ຍ ວົ້ວ ນໍ. ເຊ ເຢຍ ແອ໋ງ ມີ່ງ ດສຸ່ນ ເມີ່ຍ ບົວ ໜ່າຍ, ເຢຍ ຕສູ໊ງ ໄມ້ ຫຍ່າງ ນິ່ນ ບົວ ຫາຍ ເຕົ້າ ປ໌າມ ຕສຸ໌ຍ ເຍີຍ ມ່ຽນ ອ໊ະ.

3ຮນັ້ງ ໜ່າຍ, ເມີ່ຍ ບົວ ໄຮ່ ສຳ ຕຸ໊ ທສວດ ກີຕູ່ ຫລົ່ງ ເຢຍ ກ໊ອງ ນິ່ນ ເຍີຍ ຫວ່າ. ກີຕູ່ ເບ່ນ ເມີ່ຍ ບົວ ເຍີຍ ສີ່ ນິ່ນ ຢ່າ ໄມ້ ເມົາ. ຕ໋າວ ດສ໋ວນ ນິ່ນ ອ໋ອຍ ຢຽມ ເມີ່ຍ ບົວ ບຸດົ໋ງ ທສວດ ນິ່ນ ເຍີຍ ຕົ້ມ ທຈະ.

4ໄມ້ ກຸ໊ນ ກີຕູ່ ເຫວີ່ຍ ເມົາ ຕສຸ ຕີງ ຕສຽບ ດສັ່ງ ຈ໋າ, ທິນ-ຮູ່ງ ເຍີຍ ຕົ້ມ ທຈະ ປຸນ ນິ່ນ ຕສຢັ້ງ ຈ໊ຽນ. ເຢຍ ບົວ ຢ່າ ຮນັ້ງ ນິ່ນ ນໍ ເມົາ. ມປ່າ ເຢຍ ບົວ ເຫວີ່ຍ ທິນ-ຮູ່ງ ເຍີຍ ທຈະ ຕຸ໊ ເຖສົາ ກີຕູ່ ຕສຢັ້ງ ຈ໊ຽນ ຕສ່ຽວ ເຂົາ ນິ່ນ ເບ່ນ ເມີ່ຍ ບົວ ເຍີຍ ສີ່.

5ເມີ່ຍ ບົວ ອ໋ອຍ ຕສຸ ຕສ້າ ກັ້ນ ໝັ່ງ ກ໋າ, ເມີ່ຍ ບົວ ຕສະເກ້ງ ສຽນ ເຢຊູ ກີຕູ່ ໄຟ ໄມ້ ສຽນ. ອ໋ອຍ ຕສຸ ເຄົ້າ ເມີ່ຍ ບົວ ກັ້ນ. ເມີ່ຍ ບົວ ໄມ້ ຮິ້ວ ຕຸ໊ ກີຕູ່ ເຢຊູ ຢຽມ ເມີ່ຍ ບົວ ກະຍົ໌ວ ໄຟ? ທສວດ ລິ໌ວ ເມີ່ຍ ບົວ ເຄົ້າ ໄມ້ ຕຸ໊ ນໍ, ເມີ່ຍ ບົວ ຮິ້ວ ເຍີຍ.

6ເຢຍ ສຽນ ເມີ່ຍ ບົວ ຮິ້ວ ຕຸ໊ ເຢຍ ບົວ ຢ່າ ເຄົ້າ ຕຸ໊ ເຍີຍ.

7ເຢຍ ບົວ ເຕົ໋າ ເກົ໋າ ເຖງ ເມີ່ຍ ບົວ ໂທ້ ທິນ-ຮູ່ງ, ໄມ້ ອ໋ອຍ ເມີ່ຍ ບົວ ໂຕສ໋ວ ຫາຍ ຫຍູ່ງ ຫວ່າຍ ສີ່. ນ້າຍ ໄມ້ ເຕສີ໌ຍ ເຫວີ່ຍ ປຸນ ທສີງ ເຢຍ ບົວ ເຄົ້າ ຕຸ໊ ຫລົງ, ເຊ ເຫວີ່ຍ ປຸນ ເມີ່ຍ ບົວ ໂຕສ໋ວ ຕຸ໊ ຫອບ, ໄມ້ ກຸ໊ນ ປວັດ ຮນັ້ງ ເຢຍ ບົວ ເຄົ້າ ໄມ້ ຕຸ໊.

8ເຢຍ ບົວ ໄມ້ ໄຮ່ ໂຕສ໋ວ ຫາຍ ຫຍູ່ງ ແຕສ໊ະ ຕສຽນ ເລີ໌ຍ, ຂູງ ເຫວີ່ຍ ຕສຽນ ເລີ໌ຍ ໂຕສ໋ວ ຮນັ້ງ.

9ເຢຍ ບົວ ຫາຍ ຕສັ່ນ ເມົາ, ເມີ່ຍ ບົວ ເຮ້ນ, ເຢຍ ບົວ ອະເຮນີ້ຍ ເຍີຍ, ຕສ່ຽວ ເຕົ໋າ ເກົ໋າ ໂທ້ ທິນ-ຮູ່ງ ປຸນ ເມີ່ຍ ບົວ ເປ໋ນ ຕຸ້ນ ຢຸ້ນ ເຍີຍ ມ່ຽນ.

10ເຫວີ່ຍ ນ້າຍ ເຢຍ ໄມ້ ເຖສົາ ເມີ່ຍ ບົວ ຢຽມ ເຍີຍ ຕສຢັ້ງ ໂຫ່ ເຢຍ ຖສີງ ເຟ້ຍ ນ້າຍ ເຕສີ໊ຍ ຝຽນ. ຕສົ໊ວ ເຢຍ ເຖົາ ເມີ່ຍ ບົວ ໜ່າຍ ເຢຍ ຕສ່ຽວ ໄມ້ ຕສຸ ຫລົ່ງ ຕສ໊ຽວ ປຸນ ເຢຍ ເຍີຍ ຫັດ ມ໌າ ເຮນ້ຍໆ ເຍີຍ ເບ່ນ ເມີ່ຍ ບົວ ເຍີຍ ສີ່. ຕສ໊ຽວ ປຸນ ເຢຍ ເຍີຍ ຫັດ ມ໌າ ເຊ ເຫວີ່ຍ ເຖສີຍ ເມີ່ຍ ບົວ, ໄມ້ ເຕສີ໌ຍ ເຫວີ່ຍ ແທສະ ເມີ່ຍ ບົວ.

11ເຊດ ເມວີ໌ຍ ເຢຍ ແອ໋ງ ມ່າຍ ເຕີ໋ຍ ຫວ່າ. ຕສວັ໋ງ ກໍ໋-ໂຢ໌ວ ອ່າ, ແປ້ງ ອອນ ເຍີຍ ຢຽມ ໂອ່. ອ໋ອຍ ຕສຸ ໂຕສ໋ວ ເຖົາ ເປ໋ນ ຕຸ້ນ ຢຸ້ນ ເຍີຍ ມ່ຽນ. ອ໋ອຍ ຕສຸ ເອີຍ ຈ໊ຽນ ເຢຍ ຂວິນ ເຍີຍ ຫວ່າ ໂຕສ໋ວ. ອ໋ອຍ ຕສຸ ຫອບ ຟິມ ຕົ້ງ ເອີ໋ຍ, ແປ້ງ ອອນ ເຍີຍ ຢຽມ. ຮນ້ຳ ບົວ ຢ່າ ເຖສີຍ ແປ້ງ ອອນ ປຸນ ບົວ ເຍີຍ ທິນ-ຮູ່ງ ຕສ່ຽວ ເຖສົາ ເມີ່ຍ ບົວ ຢຽມ.

12ເມີ່ຍ ບົວ ອ໋ອຍ ຕສຸ ໂຕສ໋ວ ໂຮຍ້ວ ທສີງ-ເດສ່ງ, ຫລົ່ງ ຕສົມ ຮມຽນ ໜ່າຍ ແປ້ງ ອອນ.

13ສຽນ ທິນ-ຮູ່ງ ເຍີຍ ຕສວັ໋ງ ມ່ຽນ ຈັ໋ງ ເຖົາ ເມີ່ຍ ບົວ.

14ໂທ້ ຕສ໊ຽວ ເຢຊູ ກີຕູ່ ເຖສີຍ ເອນ ປຸນ ເມີ່ຍ ບົວ ຕສວັ໋ງ ມ່ຽນ. ໂທ້ ປຸນ ເມີ່ຍ ບົວ ຮິ້ວ ຕຸ໊ ທິນ-ຮູ່ງ ຮນ້ຳ ເມີ່ຍ ບົວ, ຢ່າ ໂທ້ ສີງ ລີ່ງ ປຸນ ເມີ່ຍ ບົວ ລ່ານ ເຖສົາ ລ່ານ ຈິວ ທົງ.

← Chapter 12 Jump to: