Ecclesiastes 7

Lao Bible (ฉบับอักษรลาว)

← Chapter 6 Jump to: Chapter 8 →

1ເມ່ງ ເຕົ້າ ຫລົງ ເຊ ເກົ້າ ຈ໋າຍ ເຈ໋ຍ ໂຢ້ວ ດາງ, ມ່ຽນ ເກວີຍ ເສີຍ ເຍີຍ ຮນອຍ ເຊ ເກົ້າ ຫລົງ ມ່ຽນ ທສວດ ເສີຍ ເຍີຍ ຮນອຍ.

2ມີ່ງ ມ່ຽນ ເດສົ້າ ຍ້ຽມ ເຍີຍ ເປຢົ໊າ ເກົ້າ ຫລົງ ມີ່ງ ມ່ຽນ ເບ່ນ ຫຍັ່ນ ຮົບ ໂຮລ ເຍີຍ ເປຢົ໊າ, ເຫວີ່ຍ ຕສຸ ເຕົ້າໆ ມ່ຽນ ເຍີຍ ເຊດ ເມວີ໌ຍ ເຊ ອ໋ອຍ ຕສຸ ໄຕ່. ຕສຢັ້ງ ຈ໊ຽນ ເຍີຍ ມ່ຽນ ອ໋ອຍ ຕສຸ ເຕສ໊າະ ນ້າຍ ເຕີ໋ຍ ສີ່ ອັນ ຈ໊ຽນ ໂຮຍ້ວ ຮນ້ຳ.

3ໂຮຍ້ວ ເດສົ້າ ເກົ້າ ຫລົງ ຈັ໊ດ, ເຫວີ່ຍ ຕສຸ ຮມຽນ ເດສົ້າ, ເຊດ ເມວີ໌ຍ ປຸນ ໂຮຍ້ວ ອຈຽນ-ໂຢ້ວ.

4ທສົງ-ເມ່ງ ມ່ຽນ ເຍີຍ ໂຮຍ້ວ ຢຽມ ມ່ຽນ ເດສົ້າ ຍ້ຽມ ເຍີຍ ເປຢົ໊າ. ມປ່າ ມ່ຽນ ຫຮງົງ ມ່ຽນ ເຍີຍ ໂຮຍ້ວ ຢຽມ ມ່ຽນ ໂຕສ໋ວ ເໜົ່າ ຫຍິດ ເຍີຍ ເປຢົ໊າ.

5ໝວັງ ທສົງ-ເມ່ງ ເຍີຍ ມ່ຽນ ກ໊ອງ-ເຫມ ອຈ໋າວ ບົວ, ເຊ ເກົ້າ ຫລົງ ໝວັງ ມ່ຽນ ຫຮງົງ ມ່ຽນ ປ໋າວ ດສູງ.

6ມ່ຽນ ຫຮງົງ ມ່ຽນ ຈັ໊ດ ເຍີຍ ເຖຈຍ ເຊ ຮນັ້ງ ປົ໊ວ ອຈິ໊ມ-ຍັງ ບຸຍ ເຍີຍ ເຖຈຍ. ນ້າຍ ເຊ ຂູງ-ມ່ອງ ເຍີຍ ສີ່.

7ຕສຽນ ເຍີຍ, ຕສຸ ເຕສີ໋ຍ ເຍີຍ ສີ່ ໄຮ່ ປຸນ ທສົງ-ເມ່ງ ມ່ຽນ ຫຮງົງ ມີ່ງ, ຫຍັ່ນ ຍ່ານ ຫຮມວັງ ຢ່າ ປຸນ ມ່ຽນ ເຍີຍ ໂຮຍ້ວ ຫວ່າຍ.

8ຫຍູ່ງໆ ສີ່ ເຍີຍ ເຊດ ເມວີ໌ຍ ເຊ ເກົ້າ ຫລົງ ວົ້ວ ຫຍູ່ງ ເຈ໌ຍ ກອນ. ມ່າຍ ໂຮຍ້ວ ດ໊າວ ເກົ້າ ຫລົງ ໂຮຍ້ວ ເໝົາ.

9ໄມ້ ຕູ໋ງ ເຖຈຍ ເຈ໌ຍ ຊຽບ, ເຫວີ່ຍ ຕສຸ ເຖຈຍ ເຈ໌ຍ ເຍີຍ ເຈົ໊າ ມຕ້າຍ ຢຽມ ມ່ຽນ ຫຮງົງ ມ່ຽນ ເຍີຍ ໂຮຍ້ວ.

10ໄມ້ ຕູ໋ງ ໜ່າຍ, “ຕສິ້ນ ດ່າງ ເຍີຍ ຮນອຍ-ເຫຍັຍ ເຫວີ່ຍ ຫາຍ ຕິ່ວ ເກົ້າ ຫລົງ ອີ້ ຈ໋າ ເຍີຍ ຮນອຍ?” ຮນັ້ງ ນ້າຍ ນໍ ໜ່າຍ ເຊ ໄມ້ ຫລົ່ງ ທສົງ-ເມ່ງ ໜ່າຍ.

11ທສົງ-ເມ່ງ ເຊ ຫລົງ, ດົ່ງ ດສິບ ກະນ້າຍ, ຢ່າ ເຖງ ເຕົ້າໆ ຕສຢັ້ງ ຈ໊ຽນ ຕຸ໊ ປວັດ ບະຮນອຍ ເຍີຍ ມ່ຽນ.

12ທສົງ-ເມ່ງ ຮນັ້ງ ຫາຍ ນໍ ໄຮ່ ເປວ ຈ໊ຽນ ມ່ຽນ, ຍ່ານ ຢ່າ ຮນັ້ງ ວົ້ວ ນໍ ເປວ ຈ໊ຽນ. ມປ່າ ມ່າຍ ທສົງ-ເມ່ງ ເກົ້າ ຫລົງ ເຈ໋ຍ ເຊ ເຫວີ່ຍ ຕສຸ ທສົງ-ເມ່ງ ໄຮ່ ເປວ ມ່າຍ ທສົງ-ເມ່ງ ວົ້ວ ເຕົ້າ ເຍີຍ ແໝ່ງ.

13ຕສ້າ ໝັ່ງ ກ໋າ ທິນ-ຮູ່ງ ໂຕສ໋ວ ເຍີຍ ສີ່. ທິນ-ຮູ່ງ ປຸນ ຫາຍ ຫຍູ່ງ ເງົາ ອຈ໊ວດ, ຫາຍ ເຕົ້າ ໄຮ່ ໂຕສ໋ວ ປຸນ ຕສະ ຕ້າຍ?

14ປວັ້ງ ຕສຸ ອຈຽນ-ໂຢ້ວ ເຍີຍ ຕສຢັ້ງ ໂຫ່ ອ໋ອຍ ຕສຸ ອອນ-ເຫລາະ. ປວັ້ງ ຕສຸ ໂຄ້ວ ເຍີຍ ຕສຢັ້ງ ໂຫ່, ອ໋ອຍ ຕສຸ ຫລົງໆ ເຍີຍ ຮນ້ຳ. ອຈຽນ-ໂຢ້ວ ເຖສົາ ໂຄ້ວ ໜ່ານ, ອີ ຫຍູ່ງ ຕສູ໊ງ ທິນ-ຮູ່ງ ປຸນ ຕ້າຍ, ເຫວີ່ຍ ປຸນ ມ່ຽນ ຕສ້າ ໄມ້ ທສວດ, ຢຽມ ນິ່ນ ເຍີຍ ໂຮ໌ ອກາງ ອ໋ອຍ ມ່າຍ ຫາຍ ຫຍູ່ງ ສີ່.

15ຢຽມ ເຢຍ ຂູງ-ມ່ອງ ເຍີຍ ແໝ່ງ ເຢຍ ປວັດ ຫຍູ່ງໆ ສີ່. ປວັດ ຄູ້ ມ່ຽນ, ໄມ້ ກຸ໊ນ ນິ່ນ ໂຕສ໋ວ ຄູ້ ສີ່, ນິ່ນ ໄຕ່ ໝີ່ ອ໊ະ. ຢ່າ ປວັດ ເອ໊າະ ມ່ຽນ, ໄມ້ ກຸ໊ນ ນິ່ນ ໂຕສ໋ວ ເອ໊າະ ສີ່, ນິ່ນ ຕສຢັ້ງ ຕຸ໊ ດ໊າວ.

16ໄມ້ ຕູ໋ງ ໂຕສ໋ວ ຄູ້ ມ່ຽນ ຫລົງ ເຈ໋ຍ ດ່າງ, ຢ່າ ໄມ້ ຕູ໋ງ ໄກວ ເຈ໋ຍ ຈ໋າ. ເຫວີ່ຍ ຫາຍ ຕິ່ວ ອ໋ອຍ ປຸນ ກັ້ນ ຕສຸ ໝຽດ?

17ໄມ້ ຕູ໋ງ ໂຕສ໋ວ ເອ໊າະ ເຈ໋ຍ ດ່າງ, ຢ່າ ໄມ້ ຕູ໋ງ ເປ໋ນ ມ່ຽນ ຫຮງົງ ມ່ຽນ. ເມີ່ຍ ເຫວີ່ຍ ຫາຍ ຕິ່ວ ອ໋ອຍ ໄຕ່ ດ່າງ ເມີ່ຍ ເຍີຍ ຕສຢັ້ງ ໂຫ່?

18ເມີ່ຍ ອ໋ອຍ ຕສຸ ນັ້ນ ຈ໊ຽນ ນ້າຍ ຫຍູ່ງ ຢ່າ ໄມ້ ຕູ໋ງ ປູ໋ງ ກວັ່ງ ວົ້ວ ຫຍູ່ງ. ເຫວີ່ຍ ຕສຸ ທ່າຍ ທິນ-ຮູ່ງ ເຍີຍ ມ່ຽນ ອ໋ອຍ ເປຢົ໋າ ຕຸ໊ ດຸ໊ດ ນ້າຍ ເຕີ໋ຍ ຢຽດ ຕສູ໊ງ.

19ທສົງ-ເມ່ງ ປຸນ ທສົງ-ເມ່ງ ມ່ຽນ ມ່າຍ ທຈະ ເກົ້າ ເຮ້ນ ຢຽມ ນອມ ຕສີ້ງ ເຍີຍ ຕສຽບ ເຕົ້າ ຈຽນ.

20ຢຽມ ນ້າຍ ລູ່ງ ເດ໊ຍ ໄມ້ ມ່າຍ ຢຽດ ເຕົ້າ ຄູ້ ມ່ຽນ ຂູງ ໂຕສ໋ວ ຫອບ ເຍີຍ ເຈົ໊າ, ຢຽດ ລິ໌ວ ໄມ້ ປ໌າມ ຕສຸ໌ຍ.

21ໄມ້ ຕູ໋ງ ໝວັງ ເຕົ້າໆ ມ່ຽນ ກ໊ອງ ເຍີຍ ຢຽດ ຕສູ໊ງ ຫວ່າ, ເດສ໋ຍ ເມີ່ຍ ໝວັງ ໄຮ໌ ເມີ່ຍ ເຍີຍ ໂປວ ຕສ໋ຽວ ເມີ່ຍ,

22ເຫວີ່ຍ ຕສຸ ຢຽມ ເມີ່ຍ ກັ້ນ ເຍີຍ ໂຮຍ້ວ ເມີ່ຍ ຮິ້ວ ຕຸ໊, ເຕສ໋ຍ ດສຸ່ນ ເມີ່ຍ ກັ້ນ ຢ່າ ຕສ໋ຽວ ມ່ຽນ.

23ເຢຍ ຫລົ່ງ ທສົງ-ເມ່ງ ເຄົ້າ ນ້າຍ ເຕີ໋ຍ ຢຽດ ຕສູ໊ງ. ເຢຍ ກ໊ອງ, “ເຢຍ ຕີ່ງ ໂຮຍ້ວ ອ໋ອຍ ຕຸ໊ ທສົງ-ເມ່ງ,” ມປ່າ ທສົງ-ເມ່ງ ເລີ່ຍ ເຢຍ ໂກ.

24ມ່າຍ ຈ໊ຽນ ເຍີຍ ຫຍູ່ງໆ ເລີ່ຍ ຕຸ໊ ໂກ ຢ່າ ຢຽມ ຕຸ໊ ໂດ ໄຫ່. ຫາຍ ເຕົ້າ ໄຮ່ ຕສ້າ ຕຸ໊ ໂຖວ?

25ເຢຍ ຕສ່ຽວ ຫລຽບ ຕີ່ງ ໂຮຍ້ວ ອ໋ອຍ ໂຫະ ຮິ້ວ, ອ໋ອຍ ລໍ໌ ທສົງ-ເມ່ງ ເຖສົາ ໝ່ານ ສີ່ ເຍີຍ ເຈົ໊າ-ໂຫລ່ວ, ແອ໋ງ ອ໋ອຍ ຮິ້ວ ຕຸ໊ ເອ໊າະ ເຍີຍ ເປ໋ນ ຫຮງົງ ເຍີຍ ສີ່, ຫຮງົງ ເຍີຍ ເຈົ໊າ ເຊ ປູ໊ ລົ່ງ ປູ໊ ຕັ໊ງ ເຍີຍ.

26ເຢຍ ປວັດ ຫຍູ່ງ ເກົ້າ ອິມ ເຈ໋ຍ ໄຕ່, ເຊ ມເຊັຍ ຕອນ, ນິ່ນ ເຍີຍ ໂຮຍ້ວ ເປ໋ນ ໂຂວ ເປ໋ນ ມູ໌ງ. ນິ່ນ ເຍີຍ ປົ໌ວ ຢ່າ ຮນັ້ງ ຕິ້ວ ຫລິ່ມ. ຕະຟ່ານ ຫອບ ທິນ-ຮູ່ງ ເຍີຍ ໂຮຍ້ວ ເຍີຍ ມ່ຽນ ໄຮ່ ເປຢົ໋າ ດຸ໊ດ ນ້າຍ ຫຍູ່ງ ມເຊັຍ ຕອນ. ມປ່າ ຕສຸ໌ຍ-ມ່ຽນ ຕສູ໊ງ ຕສຸ ນິ່ນ ເຕສ໊າະ ມີ່ງ.

27ທສົງ-ເມ່ງ ຟິນ-ແຊງ ກ໊ອງ, “ໝັ່ງ ມ່າະ! ນ້າຍ ເຊ ເຢຍ ລໍ໌ ປວັດ ເຍີຍ.” “ເຢຍ ເຕສ໊າະ ນ້າຍ ຫຍູ່ງ ສີ່ ເປ໊າະ ວົ້ວ ຫຍູ່ງ ສີ່, ເຫວີ່ຍ ລໍ໌ ທສວດ ນິ່ນ ເຍີຍ ກອນ-ແປ໋ງ.

28ເຢຍ ເຍີຍ ໂຮຍ້ວ ລໍ໌ ລິ໌ວ ແອ໋ງ ລໍ໌ ຢ່າ ລໍ໌ ໄມ້ ປວັດ. ຢຽມ ຢຽດ ທສິນ ເຕົ້າ ມ່ຽນ ບຸດົ໋ງ, ເຢຍ ລໍ໌ ປວັດ ຢຽດ ເຕົ້າ ໂຮຍ້ວ ຕສີ໋ງ ເຍີຍ ມຈັ່ງ ຕອນ, ມປ່າ ຢຽມ ນ້າຍ ເຕີ໋ຍ ຢຽດ ຕສູ໊ງ ບຸດົ໋ງ, ລໍ໌ ໄມ້ ຕຸ໊ ຢຽດ ເຕົ້າ ໂຮຍ້ວ ຕສີ໋ງ ເຍີຍ ມເຊັຍ ຕອນ.

29ໝັ່ງ ມ່າະ! ເຢຍ ລໍ໌ ປວັດ ນ້າຍ ດຸ ຫຍູ່ງ. ທິນ-ຮູ່ງ ເຕສີ໋ຍ ມ່ຽນ ຕ້າຍ ໂຮຍ້ວ ຕສີ໋ງ, ມປ່າ ນິ່ນ ບົວ ກັ້ນ ຕ໊າ ທສວດ ກູ໊ ໄກວ໋ ເຍີຍ ຕສະເອີ໋ຍ ທສ້ຳ ໄຫ່.”

← Chapter 6 Jump to: Chapter 8 →