Ezekiel 20

Lao Bible (ฉบับอักษรลาว)

1ຢຽມ ຕສຸ ກວ໊າດ ມີ່ງ ເຍີຍ ຕະທສຽດ ຫຮຍັງ, ຮມ໌ ຫຮລາ ແຊງ-ຕສຽບ, ມ່າຍ ເຕີ໋ຍ ອິສະລາເອນ ເຍີຍ ມ່ຽນ ໂກ໋ ຕ້າຍ ໜ່າຍ ຕສ໊ຽວ ຕສ່ຽວ ເຕສວີ໌ຍ ຈ໊ຽນ ເຢຍ ເຍີຍ ດສະຮມຽນ.

2ເຢຍ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

3“ປ້າມ ມ່ຽນ ອ້າ! ເມີ່ຍ ອ໋ອຍ ຕສຸ ກ໊ອງ ບົ໋ວ ອິສະລາເອນ ເຍີຍ ມ່ຽນ ໂກ໋, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ເມີ່ຍ ບົວ ຕ້າຍ ເຊ ເຫວີ່ຍ ໜ່າຍ ເຢຍ ໄຟ?” ຕສ໊ຽວ ທິນ-ຮູ່ງ ກ໊ອງ, “ເຢຍ ຕສຢັ໊ງ ຈ໊ຽນ ເຢຍ ກັ້ນ ເຍີຍ ແໝ່ງ ກ໊ອງ, ເຢຍ ຕສູ໊ງ ໄມ້ ປຸນ ເມີ່ຍ ບົວ ໜ່າຍ ເຢຍ.”’

4“ປ້າມ ມ່ຽນ ອ້າ! ເມີ່ຍ ອ໋ອຍ ຊ້ຽມ ນິ່ນ ບົວ ໄຟ? ເມີ່ຍ ອ໋ອຍ ຊ້ຽມ ນິ່ນ ບົວ ໄຟ? ເມີ່ຍ ອ໋ອຍ ຕສຸ ປຸນ ນິ່ນ ບົວ ຮິ້ວ ຕຸ໊ ນິ່ນ ບົວ ເຍີຍ ອົງ-ຖາຍ ໂຕສ໋ວ ວົ້ວ ເຕີ໋ຍ ກ້ຳ ເດສ໊ຍ ໄຫ່ ເຍີຍ ສີ່.

5ບົ໋ວ ນິ່ນ ບົວ, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ. “ຕົ້ງ ເຢຍ ກິ໊ນ ອິສະລາເອນ ວົ້ວ ຮນອຍ, ເຢຍ ໂຮ້ວ ຈ໊ຽນ ເຖສົາ ຢາໂຄບ ເຍີຍ ໂຕ້ວ ຕສົງ ເຍີຍ ເຕສີ໊ຍ-ຟຸນ ແລ໌ງ ຫວ່າ, ຢ່າ ປຸນ ນິ່ນ ບົວ ຢຽມ ອີຢິ໊ບ ເຕີ່ຍ-ປູງ ຮິ້ວ ຕຸ໊ ເຢຍ. ເຢຍ ໂຮ້ວ ຈ໊ຽນ ບົ໋ວ ນິ່ນ ບົວ, ‘ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.’

6ວົ້ວ ຮນອຍ ເຢຍ ໂຮ້ວ ຈ໊ຽນ ແລ໌ງ ຫວ່າ ບົ໋ວ ນິ່ນ ບົວ, ເຢຍ ອ໋ອຍ ຕໍ້ ນິ່ນ ບົວ ທສວດ ອີຢິ໊ບ, ຕໍ້ ນິ່ນ ບົວ ເປັຍ ເຢຍ ເຫວີ່ຍ ນິ່ນ ບົວ ລໍ໌ ເຍີຍ ເຕີ່ຍ-ປູງ, ເຊ ເດົາ-ໂທ້ວ ຫລົງ ເຍີຍ ເຕີ່ຍ-ປູງ. ເປີ໊ຍ ໝ່ານ ກົ໊ວະ, ນ້າຍ ນອມ ເຕີ່ຍ-ປູງ ເກົ້າ ເດສວີ່ຍ ເຈ໋ຍ.

7ເຢຍ ຢ່າ ກ໊ອງ ບົ໋ວ ນິ່ນ ບົວ, ‘ເມີ່ຍ ບົວ ເກ໊າະ-ມ່ຽນ ອ໋ອຍ ຕສຸ ກວັ່ງ ຕົ້ງ ເມີ່ຍ ບົວ ເຍີຍ ມຕສີງ ອະເຮນີ້ຍ ໝັ່ງ ວົ້ວ ເຕີ໋ຍ ກ້ຳ ເດສ໊ຍ ເຍີຍ ໝິ່ວ-ຝັງ. ໄມ້ ຕູ໋ງ ຫລາຍ ອີຢິ໊ບ ມ່ຽນ ເຍີຍ ໝິ່ວ-ຝັງ ປຸນ ກັ້ນ ມ່າຍ ຫວຸຍ. ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.’

8“‘ມປ່າ ນິ່ນ ບົວ ແຫງ່ງ ເຢຍ, ໄມ້ ຄັ້ງ ໝວັງ ເຢຍ. ນິ່ນ ບົວ ຢ່າ ໄມ້ ກວັ່ງ ຕົ້ງ ນິ່ນ ບົວ ເຍີຍ ມຕສີງ ອະເຮນີ້ຍ ວົ້ວ ເຕີ໋ຍ ກ້ຳ ເດສ໊ຍ ເຍີຍ ກະນ້າຍ, ຢ່າ ໄມ້ ກວັ່ງ ອີຢິ໊ບ ມ່ຽນ ເຍີຍ ໝິ່ວ-ຝັງ. ເຢຍ ຕສ່ຽວ ກ໊ອງ, ເຢຍ ອ໋ອຍ ຢຽມ ອີຢິ໊ບ ເຕີ່ຍ-ປູງ ໂນ໌ວ ນິ່ນ ບົວ, ປຸນ ເຢຍ ເຍີຍ ກະເຖຈຍ ແປ໊ດ ທສວດ ໂຕສ໋ວ ປຸນ ນິ່ນ ບົວ.

9ມປ່າ ເຢຍ ເຫວີ່ຍ ເຢຍ ກັ້ນ ເຍີຍ ເມ່ງ ໄມ້ ຮນັ້ງ ໜ່າຍ ໂຕສ໋ວ. ໄມ້ ອ໋ອຍ ປຸນ ເຢຍ ເຍີຍ ເມ່ງ ຢຽມ ຕົ້ງ ເຢຍ ເຍີຍ ມ່ຽນ ຢຽມ ວົ້ວ ເຕີ໋ຍ ກົ໊ວະ ເຍີຍ ມ່ຽນ ເຍີຍ ດສະຮມຽນ ຕສຸ ມ່າຍ ຫວຸຍ. ເຢຍ ຕອງ ຈ໊ຽນ ນ້າຍ ເຕີ໋ຍ ນອມໆ ກົ໊ວະ ເຍີຍ ມ່ຽນ ປຸນ ນິ່ນ ບົວ ຮິ້ວ ຕຸ໊ ເຢຍ, ເຫວີ່ຍ ຕສຸ ເຢຍ ຕໍ້ ເຢຍ ເຍີຍ ແປະ ຝີງ ທສວດ ອີຢິ໊ບ ເຕີ່ຍ-ປູງ.

10ຮນັ້ງ ໜ່າຍ ເຢຍ ຕໍ້ ນິ່ນ ບົວ ທສວດ ອີຢິ໊ບ ເຕີ່ຍ-ປູງ ແອ໋ງ ຕໍ້ ນິ່ນ ບົວ ເປັຍ ເຕີ່ຍ-ປູງ-ຮວາງ.

11ເຢຍ ເຕສ໊າະ ເຢຍ ເຍີຍ ເລີ໌ຍ-ຫລັດ ຈິວ ປຸນ ນິ່ນ ບົວ ຢ່າ ປຸນ ນິ່ນ ບົວ ຮິ້ວ ຕຸ໊ ເຢຍ ເຍີຍ ເລີ໌ຍ. ເຊ ກ໊ອງ ມ່ຽນ ເອີຍ ຈ໊ຽນ ໂຕສ໋ວ ຕສ່ຽວ ຕຸ໊ ຕສຢັ້ງ ຈ໊ຽນ.

12ເຢຍ ແອ໋ງ ເຕສ໊າະ ເຢຍ ເຍີຍ ຕີ້ງ ກົງ ຮນອຍ ຈິວ ປຸນ ນິ່ນ ບົວ ເຫວີ່ຍ ໂຕສ໋ວ ຈັ໋ງ-ໂຫ່ ຢຽມ ເຢຍ ເຖສົາ ນິ່ນ ບົວ ບຸດົ໋ງ, ເຫວີ່ຍ ປຸນ ນິ່ນ ບົວ ຮິ້ວ ຕຸ໊ ເຊ ເຢຍ, ຕສ໊ຽວ, ປຸນ ນິ່ນ ບົວ ທສີງ-ເດສ່ງ.

13“‘ມປ່າ ອິສະລາເອນ ເຍີຍ ເຕສີ໊ຍ-ຟຸນ ຢຽມ ເຕີ່ຍ-ປູງ-ຮວາງ ແຫງ່ງ ຈ໊ຽນ ເຢຍ. ນິ່ນ ບົວ ໄມ້ ເອີຍ ເຢຍ ເຍີຍ ເລີ໌ຍ-ຫລັດ, ຕສູ໊ງ ແຫງ່ງ ຈ໊ຽນ ເຢຍ ເຍີຍ ເລີ໌ຍ. ເຊ ກ໊ອງ ມ່ຽນ ເອີຍ ຈ໊ຽນ ນ້າຍ ເຕີ໋ຍ ເລີ໌ຍ ໂຕສ໋ວ, ຕສ່ຽວ ຕຸ໊ ຕສຢັ້ງ ຈ໊ຽນ. ນິ່ນ ບົວ ຢ່າ ໂຕສ໋ວ ປຸນ ເຢຍ ເຍີຍ ຕີ້ງ ກົງ ຮນອຍ ມ່າຍ ຫວຸຍ ໂຮລ ໄຫ່. ເຢຍ ຕສ່ຽວ ກ໊ອງ ເຢຍ ອ໋ອຍ ຢຽມ ເຕີ່ຍ-ປູງ-ຮວາງ ປຸນ ເຢຍ ເຍີຍ ກະເຖຈຍ ແປ໊ດ ທສວດ ໂຕສ໋ວ ປຸນ ນິ່ນ ບົວ ຕສຸ ໝຽດ ເດສ່ງ.

14ມປ່າ ເຢຍ ເຫວີ່ຍ ເຢຍ ກັ້ນ ເຍີຍ ເມ່ງ ໄມ້ ຮນັ້ງ ໜ່າຍ ໂຕສ໋ວ. ໄມ້ ອ໋ອຍ ປຸນ ເຢຍ ເຍີຍ ເມ່ງ ຢຽມ ຕົ້ງ ເຢຍ ຕໍ້ ນິ່ນ ບົວ ທສວດ ອີຢິ໊ບ ເຕີ່ຍ-ປູງ ວົ້ວ ເຕີ໋ຍ ຝີງ ເຍີຍ ດສະຮມຽນ ຕສຸ ມ່າຍ ຫວຸຍ.

15ເຢຍ ແອ໋ງ ຢຽມ ເຕີ່ຍ-ປູງ-ຮວາງ ເຖສົາ ນິ່ນ ບົວ ໂຮ້ວ ຫວ່າ ກ໊ອງ, ເຢຍ ໄມ້ ຕໍ້ ນິ່ນ ບົວ ເປັຍ ເຢຍ ເຖສີຍ ປຸນ ນິ່ນ ບົວ ວົ້ວ ນອມ ເດົາ-ໂທ້ວ ຫລົງ ເຍີຍ ເຕີ່ຍ-ປູງ, ເຊ ເປີ໊ຍ ໝ່ານ ກົ໊ວະ, ເກົ້າ ເດສວີ່ຍ ເຈ໋ຍ ເຍີຍ ກົ໊ວະ,

16ເຫວີ່ຍ ຕສຸ ນິ່ນ ບົວ ແຫງ່ງ ເຢຍ ເຍີຍ ເລີ໌ຍ, ໄມ້ ກັນ ເຢຍ ເຍີຍ ເລີ໌ຍ-ຫລັດ ຢ່າ ປຸນ ເຢຍ ເຍີຍ ຕີ້ງ ກົງ ຮນອຍ ມ່າຍ ຫວຸຍ, ຫລາຍ ນິ່ນ ບົວ ເຍີຍ ໂຮຍ້ວ ກັນ ຈ໊ຽນ ນິ່ນ ບົວ ເຍີຍ ໝິ່ວ-ຝັງ.

17ໄມ້ ກຸ໊ນ ຮນັ້ງ ໜ່າຍ, ເຢຍ ໝັ່ງ ຈ໊ຽນ ນິ່ນ ບົວ, ຄໍ້-ລ່ຽນ ນິ່ນ ບົວ, ຕສ່ຽວ ໄມ້ ໝຽດ ນິ່ນ ບົວ, ໄມ້ ປຸນ ນິ່ນ ບົວ ຢຽມ ເຕີ່ຍ-ປູງ-ຮວາງ ຕສຸດ ເດສ່ງ.

18ເຢຍ ຢຽມ ເຕີ່ຍ-ປູງ-ຮວາງ ບົ໋ວ ນິ່ນ ບົວ ເຍີຍ ນ່າມ ໂຍ໌ວ, “ໄມ້ ຕູ໋ງ ເອີຍ ເມີ່ຍ ບົວ ເຍີຍ ອົງ-ຖາຍ ເຍີຍ ເລີ໌ຍ-ເຫຍີ່ຍ, ຢ່າ ໄມ້ ຕູ໋ງ ກັນ ນິ່ນ ບົວ ເຍີຍ ເລີ໌ຍ. ໄມ້ ຕູ໋ງ ຫລາຍ ນິ່ນ ບົວ ເຍີຍ ໝິ່ວ-ຝັງ ປຸນ ກັ້ນ ຕສຸ ມ່າຍ ຫວຸຍ.

19ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ. ອ໋ອຍ ຕສຸ ກັນ ເຢຍ ເຍີຍ ເລີ໌ຍ-ຫລັດ, ໝວັງ ເຢຍ ເຍີຍ ເລີ໌ຍ ຢ່າ ເອີຍ ຈ໊ຽນ ໂຕສ໋ວ.

20ຊຽວ ເຢຍ ເຍີຍ ຕີ້ງ ກົງ ຮນອຍ ເປ໋ນ ທສີງ-ເດສ່ງ ຮນອຍ. ນ້າຍ ຮນອຍ ຢຽມ ເຢຍ ເຖສົາ ເມີ່ຍ ບົວ ບຸດົ໋ງ ໂຕສ໋ວ ຈັ໋ງ-ໂຫ່ ເຫວີ່ຍ ປຸນ ເມີ່ຍ ບົວ ຮິ້ວ ຕຸ໊ ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.”

21“‘ມປ່າ ວົ້ວ ເຕີ໋ຍ ນ່າມ ໂຍ໌ວ ແຫງ່ງ ເຢຍ. ນິ່ນ ບົວ ໄມ້ ກັນ ເຢຍ ເຍີຍ ເລີ໌ຍ-ຫລັດ, ຢ່າ ໄມ້ ໝວັງ ເຢຍ ເຍີຍ ເລີ໌ຍ, ໄມ້ ເອີຍ ຈ໊ຽນ ໂຕສ໋ວ. ເຊ ກ໊ອງ ມ່ຽນ ເອີຍ ຈ໊ຽນ ນ້າຍ ເຕີ໋ຍ ເລີ໌ຍ ໂຕສ໋ວ ຕສ່ຽວ ຕຸ໊ ຕສຢັ້ງ ຈ໊ຽນ. ນິ່ນ ບົວ ຢ່າ ປຸນ ເຢຍ ເຍີຍ ຕີ້ງ ກົງ ຮນອຍ ມ່າຍ ຫວຸຍ. ເຢຍ ຕສ່ຽວ ກ໊ອງ ເຢຍ ອ໋ອຍ ຢຽມ ເຕີ່ຍ-ປູງ-ຮວາງ ໂນ໌ວ ນິ່ນ ບົວ, ປຸນ ເຢຍ ເຍີຍ ກະເຖຈຍ ແປ໊ດ ທສວດ ໂຕສ໋ວ ປຸນ ນິ່ນ ບົວ.

22ມປ່າ ເຢຍ ເຫວີ່ຍ ເຢຍ ເຍີຍ ເມ່ງ ຮລວດ ປົ໌ວ, ໄມ້ ຮນັ້ງ ໜ່າຍ ໂຕສ໋ວ. ເຢຍ ໄມ້ ອ໋ອຍ ປຸນ ເຢຍ ເຍີຍ ເມ່ງ ຢຽມ ຕົ້ງ ຕໍ້ ນິ່ນ ບົວ ທສວດ ອີຢິ໊ບ ເຕີ່ຍ-ປູງ ວົ້ວ ເຕີ໋ຍ ກົ໊ວະ ເຍີຍ ມ່ຽນ ເຍີຍ ດສະຮມຽນ, ຕສຸ ມ່າຍ ຫວຸຍ.

23ເຢຍ ຢ່າ ຢຽມ ເຕີ່ຍ-ປູງ-ຮວາງ ເຖສົາ ນິ່ນ ບົວ ໂຮ້ວ ຫວ່າ ກ໊ອງ ເຢຍ ອ໋ອຍ ປຸນ ນິ່ນ ບົວ ຟາດ ດສ໋ານ, ປຸນ ນິ່ນ ບົວ ຢຽມ ເຕສ໋ຍ ຝີງ ເຕສ໋ຍ ກົ໊ວະ ມ່ຽນ ບຸດົ໋ງ,

24ເຫວີ່ຍ ຕສຸ ນິ່ນ ບົວ ໄມ້ ກັນ ເຢຍ ເຍີຍ ເລີ໌ຍ, ຕສູ໊ງ ເອກ້ມ ເຢຍ ເຍີຍ ເລີ໌ຍ-ຫລັດ ຢ່າ ປຸນ ເຢຍ ເຍີຍ ຕີ້ງ ກົງ ຮນອຍ ມ່າຍ ຫວຸຍ. ນິ່ນ ບົວ ເຍີຍ ມຕສີງ ຂູງ ໝັ່ງ ຈ໊ຽນ ນິ່ນ ບົວ ເຍີຍ ອົງ-ຖາຍ ເຍີຍ ໝິ່ວ-ຝັງ.

25ເຢຍ ຕສ່ຽວ ເຕສ໊າະ ໄມ້ ເປ໋ນ ເຍີຍ ເລີ໌ຍ-ຫລັດ ປຸນ ນິ່ນ ບົວ, ເຊ ໄມ້ ໄຮ່ ປຸນ ມ່ຽນ ມ່າຍ ແໝ່ງ ຕສຢັ້ງ ເຍີຍ ເລີ໌ຍ.

26ເຢຍ ປຸນ ນິ່ນ ບົວ ຫລາຍ ນິ່ນ ບົວ ຝົ່ງ ຫໍ່ ເຕສ່ຍ ເຍີຍ ກະນ້າຍ ປຸນ ກັ້ນ ມ່າຍ ຫວຸຍ. ເຢຍ ປຸນ ນິ່ນ ບົວ ເຕສ໊າະ ນິ່ນ ບົວ ເຍີຍ ເຕົ້າໆ ຕອນ-ຫລະເກົ໊າ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່. ນ້າຍ ເຊ ເຫວີ່ຍ ປຸນ ນິ່ນ ບົວ ໂຢ໋ວ! ໄຫ່. ນິ່ນ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ’

27“ປ້າມ ມ່ຽນ ອ້າ! ເຫວີ່ຍ ນ້າຍ ອ໋ອຍ ຕສຸ ກ໊ອງ ບົ໋ວ ອິສະລາເອນ ເຍີຍ ເຕສີ໊ຍ-ຟຸນ, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ຢຽມ ນ້າຍ ເຕີ໋ຍ ສີ່ ເມີ່ຍ ບົວ ເຍີຍ ອົງ-ຖາຍ ແອ໋ງ ຄີ ເຢຍ, ເຫວີ່ຍ ຕສຸ ນິ່ນ ບົວ ບ໊ຽນ ໂຮຍ້ວ ປຸນ ເຢຍ.

28ເຢຍ ຕໍ້ ນິ່ນ ບົວ ເປັຍ ເຢຍ ໂຮ້ວ ຈ໊ຽນ ປຸນ ນິ່ນ ບົວ ເຍີຍ ເຕີ່ຍ-ປູງ ວົ້ວ ຕສັ່ນ, ນິ່ນ ບົວ ປວັດ ຫາຍ ນອມ ບົງ-ຮລັງ ໄຟ ຫາຍ ຕິ້ວ ມ່າຍ ນ່ອມ ທສ້ຳ ເຍີຍ ດຢັ໋ງ, ນິ່ນ ບົວ ຢຽມ ວົ້ວ ຝົ່ງ ຫໍ່ ເຕສ່ຍ ຢ່າ ຝົ່ງ ຫໍ່ ທສົວະ ເຢຍ ເຖຈຍ ເຈ໌ຍ ເຍີຍ ກະນ້າຍ. ນິ່ນ ບົວ ຢຽມ ວົ້ວ ປຸນ ດາງ ເຍີຍ ເຖຈຍ ຝາວ ຢ່າ ຢຽມ ວົ້ວ ເທສ້ຍ ເຕສ່ຍ.

29ເຢຍ ກ໊ອງ ບົ໋ວ ນິ່ນ ບົວ, ເມີ່ຍ ບົວ ມີ່ງ ວົ້ວ ເຕີ໋ຍ ຮລັງ ເຍີຍ ຕ໋ອງ ເຊ ຫາຍ ຫຍູ່ງ?”’” (ວົ້ວ ເຕີ໋ຍ ຮລັງ ເຍີຍ ຕ໋ອງ ເຫ່ວ ບາມາ ເຖົາ ອີ້ ຈ໋າ ຮນອຍ.)

30“ເຫວີ່ຍ ນ້າຍ ເມີ່ຍ ອ໋ອຍ ຕສຸ ກ໊ອງ ບົ໋ວ ອິສະລາເອນ ເຍີຍ ເຕສີ໊ຍ-ຟຸນ, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ເມີ່ຍ ບົວ ອ໋ອຍ ຮນັ້ງ ເມີ່ຍ ບົວ ເຍີຍ ອົງ-ຖາຍ ປຸນ ກັ້ນ ມ່າຍ ຫວຸຍ ຕສ່ຽວ ມີ່ງ ຕ່ອງ ເຈົ໊າ ປ໋າຍ ນິ່ນ ບົວ ກ້ຳ ເດສ໊ຍ ໄຫ່ ເຍີຍ ໝິ່ວ-ຝັງ ໄຟ?

31ເມີ່ຍ ບົວ ຝົ່ງ ຫໍ່ ເຍີຍ ຕສຢັ້ງ ໂຫ່ ຢ່າ ເຕສ໊າະ ເມີ່ຍ ບົວ ເຍີຍ ຕສີ້ງ ເຫຍີ່ຍ, ເຊ ເມີ່ຍ ບົວ ເຍີຍ ຕອນ, ຫລົ່ງ ໂຕ໌ວ ປົ໊ວ ເຕສ່ຍ, ເມີ່ຍ ບົວ ຫລາຍ ນ້າຍ ເຕີ໋ຍ ໝິ່ວ-ຝັງ ໂຕສ໋ວ ປຸນ ກັ້ນ ມ່າຍ ຫວຸຍ ເຖົາ ອີ້ ຈ໋າ ຮນອຍ. ໂອ ອິສະລາເອນ ເຍີຍ ເຕສີ໊ຍ-ຟຸນ ອ້າ! ເຢຍ ຫອບ ຕສຸ ປຸນ ເມີ່ຍ ບົວ ຕ້າຍ ໜ່າຍ ເຢຍ ໄຟ?”’ ຕສ໊ຽວ ທິນ-ຮູ່ງ ກ໊ອງ, ‘ເຢຍ ຕສຢັ໊ງ ຈ໊ຽນ ເຢຍ ກັ້ນ ເຍີຍ ແໝ່ງ ກ໊ອງ, ເຢຍ ໄມ້ ປຸນ ເມີ່ຍ ບົວ ຕ້າຍ ໜ່າຍ ເຢຍ.

32“‘ເມີ່ຍ ບົວ ຢຽມ ໂຮຍ້ວ ຮນ້ຳ ຕ້າຍ, “ເຢຍ ບົວ ອ໋ອຍ ຮນັ້ງ ກັ້ນ ຝີງ ມ່ຽນ ເຖສົາ ກັ້ນ ກົ໊ວະ ມ່ຽນ ປ໋າຍ ດຢັ໋ງ ເຖສົາ ຫລະເປຢີ໊ຍ.” ມປ່າ ນ້າຍ ເຕີ໋ຍ ສີ່ ຢຽດ ລິ໌ວ ໄມ້ ໄຮ່ ມ່າຍ.’

33“ຕສ໊ຽວ ທິນ-ຮູ່ງ ກ໊ອງ, ‘ເຢຍ ຕສຢັ໊ງ ຈ໊ຽນ ເຢຍ ກັ້ນ ເຍີຍ ແໝ່ງ ກ໊ອງ, ເຢຍ ອ໋ອຍ ຊູງ ເຢຍ ເຮ້ນ ໄຫ່ ເຍີຍ ປົ໌ວ, ຫລົ່ງ ຕົ້ມ ທຈະ, ຢ່າ ປຸນ ເຢຍ ເຍີຍ ກະເຖຈຍ ແປ໊ດ ທສວດ. ເຢຍ ຢ່າ ອ໋ອຍ ໂຕສ໋ວ ຮູ່ງ ກຸ໊ນ ເມີ່ຍ ບົວ.

34ເຢຍ ຕສູ໊ງ ອ໋ອຍ ຊູງ ເຢຍ ເຮ້ນ ໄຫ່ ເຍີຍ ປົ໌ວ, ຫລົ່ງ ຕົ້ມ ທຈະ, ຢ່າ ປຸນ ເຢຍ ເຍີຍ ກະເຖຈຍ ແປ໊ດ ທສວດ ປຸນ ເມີ່ຍ ບົວ ຟາດ ດສ໋ານ ເຍີຍ ຢຽມ ໝ່ານ ກົ໊ວະ ໝ່ານ ຝີງ ບຸດົ໋ງ ຕໍ້ ເມີ່ຍ ບົວ ທສວດ ຕ້າຍ ກັ໊ບ ຕສຸ໊ນ.

35ເຢຍ ອ໋ອຍ ຕໍ້ ເມີ່ຍ ບົວ ເປັຍ ມີ່ງ ຢຽມ ໝ່ານ ກົ໊ວະ ເຍີຍ ເຕີ່ຍ-ປູງ-ຮວາງ. ຢຽມ ໜ່າຍ ເຢຍ ຕສ່ຽວ ເຖສົາ ເມີ່ຍ ບົວ ຮມຽນ ຕ໋ອຍ ຮມຽນ ຊ້ຽມ ເມີ່ຍ ບົວ ເຍີຍ ຕສຸ໌ຍ.

36ເຢຍ ຢຽມ ອີຢິ໊ບ ເຍີຍ ເຕີ່ຍ-ປູງ-ຮວາງ ຊ້ຽມ ເມີ່ຍ ບົວ ເຍີຍ ອົງ-ຖາຍ ເຍີຍ ຕສຸ໌ຍ ຮນັ້ງ ຫາຍ ນໍ, ເຢຍ ຕສ່ຽວ ຮນັ້ງ ວົ້ວ ນໍ ຊ້ຽມ ເມີ່ຍ ບົວ ເຍີຍ ຕສຸ໌ຍ.’ ນ້າຍ ເຊ ຕສ໊ຽວ ທິນ-ຮູ່ງ ກ໊ອງ ເຍີຍ ຫວ່າ.

37‘ເຢຍ ອ໋ອຍ ປຸນ ເມີ່ຍ ບົວ ດສຸນ ເຈ໋ຍ ເຢຍ ເຍີຍ ປຢ໊າ ກະເດ໊ຍ, ປຸນ ເມີ່ຍ ບົວ ອ໋ອຍ ຕສຸ ເອີຍ ຈ໊ຽນ ເຖສົາ ເຢຍ ແລ໌ງ ເຈ໋ຍ ເຍີຍ ແຫງ່ງ ຫວ່າ.

38ເຢຍ ອ໋ອຍ ເຕສ໊າະ ທສວດ ເດສ່ງ ຢຽມ ເມີ່ຍ ບົວ ບຸດົ໋ງ ໂຮຍ້ວ ແຫງ່ງ ເຍີຍ ມ່ຽນ. ລ່ຽມ ບ໊ຽນ ໂຮຍ້ວ ປຸນ ເຢຍ ວົ້ວ ເຕີ໋ຍ, ເຢຍ ອ໋ອຍ ເຕສ໊າະ ນິ່ນ ບົວ ທສວດ ນິ່ນ ບົວ ຢຽມ ເຍີຍ ເຕີ່ຍ-ປູງ ມປ່າ ນິ່ນ ບົວ ໄມ້ ຕຸ໊ ເປັຍ ອິສະລາເອນ ເຕີ່ຍ-ປູງ. ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ’

39“ອິສະລາເອນ ເຍີຍ ເຕສີ໊ຍ-ຟຸນ ອ້າ! ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, ‘ເມີ່ຍ ບົວ ເຕົ້າໆ ແອ໊ະ, ເຊ ກ໊ອງ ເມີ່ຍ ບົວ ໄມ້ ໝວັງ ເຢຍ, ຢຽມ ນ້າຍ ມີ່ງ ກຸ໊ນ ມີ່ງ ປ໋າຍ ເມີ່ຍ ບົວ ເຍີຍ ໝິ່ວ-ຝັງ ມ່າະ! ມປ່າ ເມີ່ຍ ບົວ ໄມ້ ຕຸ໊ ແອ໋ງ ຫລົ່ງ ເມີ່ຍ ບົວ ຝົ່ງ ຫໍ່ ເຍີຍ ກະນ້າຍ ໄຟ ໝິ່ວ-ຝັງ ປຸນ ເຢຍ ເຍີຍ ທສີງ-ເດສ່ງ ບົ໋ວ ມ່າຍ ຫວຸຍ.’

40ຕສ໊ຽວ ທິນ-ຮູ່ງ ກ໊ອງ, ‘ຢຽມ ເຢຍ ເຍີຍ ທສີງ-ເດສ່ງ ບົງ, ເຊ ອິສະລາເອນ ເຍີຍ ບົງ-ຮລັງ ເຍີຍ ຕ໋ອງ, ອິສະລາເອນ ເຍີຍ ຢຽດ ຕສູ໊ງ ເຕສີ໊ຍ-ຟຸນ, ເຊ ເຕົ້າໆ, ອ໋ອຍ ຢຽມ ວົ້ວ ນອມ ເຕີ່ຍ-ປູງ ຟູ-ສູ ເຢຍ. ຢຽມ ວົ້ວ ເຢຍ ອ໋ອຍ ຕສິ໊ບ ນິ່ນ ບົວ. ຢຽມ ວົ້ວ ເຢຍ ອ໋ອຍ ຫລົ່ງ ເມີ່ຍ ບົວ ຝົ່ງ ຫໍ່ ເຍີຍ ກະນ້າຍ ເຖສົາ ເມີ່ຍ ບົວ ກິ໊ນ ເກົ້າ ຫລົງ ເຈ໋ຍ ເຍີຍ ຕສີ້ງ ເຫຍີ່ຍ ເຖສົາ ຈ໊ຽນ ເມີ່ຍ ບົວ ຝົ່ງ ຫໍ່ ເຕສ່ຍ ທສີງ-ເດສ່ງ ເຍີຍ ກະນ້າຍ.

41ເຢຍ ຢຽມ ໝ່ານ ຝີງ ບຸດົ໋ງ ຕໍ້ ເມີ່ຍ ບົວ ທສວດ ຕ້າຍ ວົ້ວ ຕສັ່ນ, ຢ່າ ຢຽມ ເມີ່ຍ ບົວ ຕສຸ ຟາດ ດສ໋ານ ເຍີຍ ຢຽມ ກັ້ນ ກົ໊ວະ, ຕໍ້ ເມີ່ຍ ບົວ ຕ້າຍ ກັ໊ບ ຕສຸ໊ນ. ເຢຍ ຕສ່ຽວ ຕສິ໊ບ ເມີ່ຍ ບົວ ຮນັ້ງ ເປ໋ນ ຫອບ ໂຮຍ້ວ ເຍີຍ ເຖຈຍ-ດາງ. ເຢຍ ຢ່າ ອ໋ອຍ ຢຽມ ເມີ່ຍ ບົວ ບຸດົ໋ງ ຕອງ ຈ໊ຽນ ໝ່ານ ຝີງ ປຸນ ທສີງ ເຢຍ ທສີງ-ເດສ່ງ.

42ເຢຍ ຕໍ້ ເມີ່ຍ ບົວ ເປັຍ ອິສະລາເອນ ເຕີ່ຍ-ປູງ, ເຊ ເຢຍ ໂຮ້ວ ປຸນ ເມີ່ຍ ເຍີຍ ອົງ-ຖາຍ ເຍີຍ ເຕີ່ຍ-ປູງ ວົ້ວ ຕສັ່ນ ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ.

43ຢຽມ ວົ້ວ ເມີ່ຍ ບົວ ຕສ່ຽວ ຈັ໋ງ ຕສຸ ເມີ່ຍ ບົວ ເຍີຍ ເຈົ໊າ ເຖສົາ ເມີ່ຍ ບົວ ໂຕສ໋ວ ເຍີຍ ຢຽດ ຕສູ໊ງ ສີ່, ຕົ້ງ ເມີ່ຍ ບົວ ໂຕສ໋ວ ປຸນ ກັ້ນ ມ່າຍ ຫວຸຍ. ເມີ່ຍ ບົວ ຕສ່ຽວ ດສອງ ເມີ່ຍ ບົວ ກັ້ນ ຫລາຍ ເມີ່ຍ ບົວ ໂຕສ໋ວ ເຍີຍ ຢຽດ ຕສູ໊ງ ເອ໊າະ ສີ່.’

44ຕສ໊ຽວ ທິນ-ຮູ່ງ ກ໊ອງ, ‘ໂອ ອິສະລາເອນ ເຍີຍ ເຕສີ໊ຍ-ຟຸນ ອ້າ! ເຢຍ ເຫວີ່ຍ ເຢຍ ກັ້ນ ເຍີຍ ເມ່ງ ໂຕສ໋ວ, ໄມ້ ເຕສີ໌ຍ ເອີຍ ເມີ່ຍ ບົວ ໂຕສ໋ວ ເຍີຍ ຫວ່າຍ ສີ່ ເຖສົາ ໂຕສ໋ວ ເຍີຍ ເອ໊າະ ສີ່ ໂຕສ໋ວ ປຸນ ເມີ່ຍ ບົວ. ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ’”

45ເຢຍ ແອ໋ງ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

46“ປ້າມ ມ່ຽນ ອ້າ! ເມີ່ຍ ອ໋ອຍ ຕສຸ ຮວິນ ຮມຽນ ມີ່ງ ນ່າມ ປູງ ຕສຸ້ນ ກ໊ອງ ນ່າມ ປູງ ແໝງ ຢ່າ ໂຕ່ວ ຫວ່າ ກ໊ອງ ນ່າມ ປູງ ເຍີຍ ດຢັ໋ງ-ຫລົ່ມ.

47ອ໋ອຍ ຕສຸ ກ໊ອງ ບົ໋ວ ນ່າມ ປູງ ເຍີຍ ດຢັ໋ງ-ຫລົ່ມ, ‘ອ໋ອຍ ຕສຸ ໝວັງ ຕສ໊ຽວ ເຍີຍ ຫວ່າ. ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ເຢຍ ອ໋ອຍ ຢຽມ ເມີ່ຍ ກະຍົ໌ວ ຕ໊ຽມ ເຕສັຍ ໂຕ໌ວ, ຕສ່ຽວ ປົ໊ວ ທຈຸຍ ຢຽມ ເມີ່ຍ ບຸດົ໋ງ ເຍີຍ ຕິ້ວໆ ດຢັ໋ງ-ຍ໌ຽມ ເຖສົາ ຕິ້ວໆ ດຢັ໋ງ-ອກາຍ. ເຕສັຍ ຈ໊ຽນ ຫຮຢາງ ໄຫ່ ເຍີຍ ໂຕ໌ວ ຢ່າ ໄມ້ ໜ່ອຍ ຕຸ໊ ໄຕ່. ຢຽມ ນ່າມ ປູງ ເຖົາ ປ໊ະ ປູງ, ເຕົ້າໆ ເຍີຍ ຮມຽນ ອ໋ອຍ ຕສຸ ໂຕ໌ວ ປົ໊ວ ລ໌າວ.

48ຢຽດ ຕສູ໊ງ ປ້າມ ມ່ຽນ ຕສ່ຽວ ເຕສັ໊ຍ ຕຸ໊ ເຊ ເຢຍ, ຕສ໊ຽວ, ຕ໊ຽມ ເຕສັຍ ໂຕ໌ວ, ຢ່າ ໄມ້ ມ່າຍ ຫາຍ ເຕົ້າ ໜ່ອຍ ຕຸ໊ ໂຕ໌ວ ໄຕ່.”’”

49ເຢຍ ຕສ່ຽວ ກ໊ອງ, “ອ໊າ, ຕສ໊ຽວ ທິນ-ຮູ່ງ ອ້າ! ມ່ຽນ ຕສຢັ໊ງ ຈ໊ຽນ ເຢຍ ກ໊ອງ, ‘ນິ່ນ ໄມ້ ເຕສີ໌ຍ ຂູງ ກ໊ອງ ຫວ່າ-ເປີ໊ຍ ໄຟ?’”

← Chapter 19 Jump to: Chapter 21 →