Ezekiel 24

Lao Bible (ฉบับอักษรลาว)

← Chapter 23 Jump to: Chapter 25 →

1ເຢຍ ບົວ ຕສຸ ທສ້າງ ມີ່ງ ຕະຈົ໊ວ ຫຮຍັງ, ຕສຽບ ຫຮລາ ແຊງ-ຕສຽບ, ເຢຍ ແອ໋ງ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

2“ປ້າມ ມ່ຽນ ອ້າ! ເມີ່ຍ ອ໋ອຍ ຕສຸ ເຕສ໊າະ ນ້າຍ ນອມ ຮນອຍ ເຟ້ຍ ຈ໊ຽນ. ຕສະເກ້ງ ເຟ້ຍ ນ້າຍ ນອມ ຮນອຍ ເຫວີ່ຍ ຕສຸ ຕົ້ງ ນ້າຍ ນອມ ຮນອຍ ບາບີລົນ ເຍີຍ ຮູ່ງ ເວີ່ຍ ຈ໊ຽນ ອ໋ອຍ ເບ໊າະ ເຢລູຊາເລມ.

3ອ໋ອຍ ຕສຸ ກ໊ອງ ຕິ້ວ ຫວ່າ-ເປີ໊ຍ ບົ໋ວ ວົ້ວ ເຕີ໋ຍ ໂຮຍ້ວ ແຫງ່ງ ເຍີຍ ເຕສີ໊ຍ-ຟຸນ. ບົ໋ວ ນິ່ນ ບົວ, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “‘“ເຕສ໊າະ ແທສງ ທາບ ຈ໊ຽນ ໂຕ໌ວ ກູ້ ຫງວ່າຍ, ທາບ ຈ໊ຽນ ໂຕ໋ ວວມ ຕັ໊ບ ກະຍົ໌ວ.

4ເຕສ໊າະ ອໍ໊ ຢຽດ ດຸ້ນ ຢຽດ ດຸ້ນ ຕັ໊ບ ຈ໊ຽນ, ຕົ້ງ ຢຽດ ຕສູ໊ງ ຫລົງ ເຈ໋ຍ ເຍີຍ ອໍ໊, ເຊ ປົ໌ວ-ຕສຸ້ຍ ເຖສົາ ເຕສົ໋າ-ຕສຸ້ຍ ເຍີຍ ອໍ໊. ເຕສ໊າະ ເກົ້າ ຫລົງ ເຈ໋ຍ ເຍີຍ ບູ໊ງ ຕັ໊ບ ປວັ໊ງ ແທສງ.

5ກິ໊ນ ປະກີ ຢູ້ງ ກວັ້ນ ກະຍົ໌ວ ເກົ້າ ຫລົງ ເຈ໋ຍ ເຍີຍ ປະກີ ຢູ້ງ. ເຕສ໊າະ ຕສ້າງ ດຸຍ ຈ໊ຽນ ໂຕ໌ວ-ເດສົ່າ ປຸນ ວວມ ເບວີ໋ຍ, ວ່ວນ ເຖົາ ບູ໊ງ ເມົາ.”

6“‘ເຫວີ່ຍ ຕສຸ ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “‘“ມ່າຍ ໄຕ໋ ມ່ຽນ ປຸນ ດສຢ໊າມ ຫລ່ຽວ ທສວດ ເຍີຍ ຕສີ້ງ ອ໋ອຍ ຕສຸ ໂຄ້ວ ອ໊ະ. ເຊ ຢຽດ ນອມ ກະຍົ໌ວ ເຈ໋ຍ ດສີ໋ງ ເຍີຍ ແທສງ, ດສີ໋ງ ຢ່າ ໄມ້ ໄຮ່ ດຸ໊ດ. ອ໋ອຍ ຕສຸ ເຕສ໊າະ ອໍ໊ ຢຽດ ດຸ້ນ ຢຽດ ດຸ້ນ ເຍີຍ ທສວດ, ຢ່າ ໄມ້ ຕູ໋ງ ກິ໊ນ ຫາຍ ດຸ້ນ.

7“‘“ເຫວີ່ຍ ຕສຸ ຕສີ້ງ ກະຍົ໌ວ ຖສໍ່ ມ່າຍ ໄຕ໋ ມ່ຽນ ປຸນ ດສຢ໊າມ ຫລ່ຽວ ທສວດ ເຍີຍ ສີ່, ວົ້ວ ເຕີ໋ຍ ດສຢ໊າມ ໂຕ໋ ຈ໊ຽນ ອຈັງ ເຍີຍ ຫລະເປຢີ໊ຍ-ຕສອງ ກູ້ ຫງວ່າຍ, ນິ່ນ ໄມ້ ໂຕ໋ ເອຈ່ຍ ເດົາ, ໄຮ່ ມ່າຍ ເນຍ-ບູງ ປວັງ ຈ໊ຽນ ເຍີຍ ຕ໋ອງ.

8ເຢຍ ເຕສ໊າະ ຕສີ້ງ ກະຍົ໌ວ ໄຕ໋ ມ່ຽນ ຫລ່ຽວ ທສວດ ເຍີຍ ດສຢ໊າມ ໂຕ໋ ນອມ ອຈັງ ເຍີຍ ຫລະເປຢີ໊ຍ-ຕສອງ ກູ້ ຫງວ່າຍ, ເຫວີ່ຍ ປຸນ ໄມ້ ໄຮ່ ທ້ອງ, ຕສ່ຽວ ທສົວະ ເຢຍ ເຖຈຍ ເຈ໌ຍ ຈ໊າວ ວິນ.”

9“‘ເຫວີ່ຍ ນ້າຍ ຕສ໊ຽວ ທິນ-ຮູ່ງ ກ໊ອງ, “‘“ໄຕ໋ ມ່ຽນ ປຸນ ດສຢ໊າມ ຫລ່ຽວ ທສວດ ເຍີຍ ຕສີ້ງ ອ໋ອຍ ຕສຸ ໂຄ້ວ ອ໊ະ. ເຢຍ ຟີ່ ຮນັ້ງ ເຍີຍ ອ໋ອຍ ເຕສ໊າະ ຕສ້າງ ດຸຍ ຈ໊ຽນ ທສ້ຳ ເຍີຍ.

10ຈາ ຕສ້າງ ທສ້ຳ, ຕ໊ຽມ ໂຕ໌ວ, ວ່ວນ ອໍ໊ ເມົາ, ໂຕ໋ ອໍ໊-ທອງ ທສວດ ຢ່າ ປຸນ ບູ໊ງ ລ໌າວ.

11ເຕສ໊າະ ແທສງ-ຂູງ ທາບ ຈ໊ຽນ ໂຕ໌ວ-ຖານ ກູ້ ຫງວ່າຍ, ປົ໊ວ ແທສງ ຈອມ ເຖົາ ຕົ້ງ ຊິ ແທສງ ຊິ ເດສ່ງ, ປຸນ ກະຍົ໌ວ ໄລ່ ຮລົບ ເຍີຍ ກະນ້າຍ ຢຸ ເດສ່ງ, ດສີ໋ງ ຢ່າ ປົ໊ວ ທຈຸຍ.

12ເຢຍ ແປະໆ ໂຕສ໋ວ ໂຄ້ວ ຮນັ້ງ. ໂຕ໌ວ ຕສູ໊ງ ປົ໊ວ ໄມ້ ດຸ໊ດ ນ້າຍ ເຕີ໋ຍ ໂຮ໌ ເຍີຍ ດສີ໋ງ.

13“‘“ນ້າຍ ເຕີ໋ຍ ດສີ໋ງ ເປີ໊ຍ ເມີ່ຍ ຫຮຢຽນ ເຍີຍ ເຈົ໊າ ເປ໋ນ ໄລ່ ຮລົບ ເຍີຍ ສີ່. ໄມ້ ກຸ໊ນ ເຢຍ ອ໋ອຍ ສາ ເມີ່ຍ ທສີງ-ເດສ່ງ, ເມີ່ຍ ໄມ້ ສາ ເມີ່ຍ ໂຕສ໋ວ ໄລ່ ຮລົບ ເຍີຍ ສີ່ ທສີງ-ເດສ່ງ. ເມີ່ຍ ຕສ່ຽວ ໄມ້ ໄຮ່ ແອ໋ງ ສາ ທສີງ-ເດສ່ງ ເຖົາ ເຢຍ ເຍີຍ ກະເຖຈຍ ຟິວ, ໄມ້ ໂນ໌ວ ເມີ່ຍ ອ໊ະ.

14“‘“ເຢຍ, ຕສ໊ຽວ, ກ໊ອງ ລິ໌ວ ອ໊ະ. ຕສຢັ້ງ ໂຫ່ ອ໋ອຍ ເຖົາ, ເຢຍ ຕສະເກ້ງ ໂຕສ໋ວ ອ໊ະ. ເຢຍ ໄມ້ ຖຸຍ, ໄມ້ ຄໍ້-ລ່ຽນ ຢ່າ ໄມ້ ກ໊ອຍ ໂຮຍ້ວ. ເຢຍ ອ໋ອຍ ຕສິ໋ວ ເມີ່ຍ ໂຕສ໋ວ ເຍີຍ ເຈົ໊າ ເຖສົາ ໂຕສ໋ວ ເຍີຍ ສີ່ ຊ້ຽມ ເມີ່ຍ.”’ ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ.”

15ເຢຍ ແອ໋ງ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

16“ປ້າມ ມ່ຽນ ອ້າ! ເຢຍ ອ໋ອຍ ເຕສ໊າະ ຕົ້ງ ເມີ່ຍ ເຍີຍ ມຕສີງ ປວັດ ເກົ້າ ຮນ້ຳ ເຈ໋ຍ ເຍີຍ ມ່ຽນ, ປຸນ ນິ່ນ ລ່ຽມ ເຕສີ້ຍ ຕສຸ ໄຕ່. ມປ່າ ໄມ້ ຕູ໋ງ ເດສົ້າ, ໄມ້ ຕູ໋ງ ຍ້ຽມ ໄຟ ປຸນ ວວມ-ເໝວີ່ຍ ຫລ່ຽວ.

17ກຸ໊ນ ເທົ້າ ເຖຈຍ-ໂດະ ມປ່າ ໄມ້ ຕູ໋ງ ບຸຍ. ໄມ້ ຕູ໋ງ ເຫວີ່ຍ ໄຕ່ ມີ່ງ ເຍີຍ ມ່ຽນ ເດສົ້າ ຍ້ຽມ. ເມີ່ຍ ອ໋ອຍ ຕສຸ ເປວ ຈ໊ຽນ ມອກ໊ອງ-ເປວ, ຕາບ ຈ໊ຽນ ເຮ່, ຢ່າ ໄມ້ ຕູ໋ງ ປວັງ ດສຸ້ຍ ໄຟ ຫຍັ່ນ ເຫວີ່ຍ ເດສົ້າ ຍ້ຽມ ເບ່ນ ເຍີຍ ໄລ-ຫຮນາງ.”

18ຮນັ້ງ ໜ່າຍ ລູ່ງ ດອມ ເຢຍ ເຖສົາ ແປະ ຝີງ ກ໊ອງ ຫວ່າ. ລູ່ງ ມ໌ານ-ຫຮມວັງ ເຢຍ ເຍີຍ ເອົ໊າ ໄຕ່ ໝີ່ ອ໊ະ. ຕະເຫຍີ່ຍ ດອມ ເຢຍ ເອີຍ ຕສ໊ຽວ ຫັດ ເຍີຍ ຫວ່າ ໂຕສ໋ວ.

19ແປະ ຝີງ ຕສ່ຽວ ໜ່າຍ ເຢຍ, “ເມີ່ຍ ໄມ້ ບົ໋ວ ເຢຍ ບົວ ໄຟ? ເມີ່ຍ ຮນັ້ງ ນ້າຍ ນໍ ໂຕສ໋ວ, ເຫວີ່ຍ ເຢຍ ບົວ ມ່າຍ ຫາຍ ຫຍູ່ງ ເອີ໋ຍ ເລີ໌ຍ?”

20ເຢຍ ຕສ່ຽວ ບົ໋ວ ນິ່ນ ບົວ, “ເຢຍ ຕສິ໊ບ ຕສ໊ຽວ ເຍີຍ ຫວ່າ ກ໊ອງ,

21‘ເມີ່ຍ ອ໋ອຍ ຕສຸ ບົ໋ວ ອິສະລາເອນ ເຍີຍ ເຕສີ໊ຍ-ຟຸນ, ‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ໝັ່ງ ມ່າະ! ເຢຍ ອ໋ອຍ ປຸນ ເຢຍ ເຍີຍ ສີງ ຕິ່ນ ມ່າຍ ຫວຸຍ, ຕົ້ງ ເມີ່ຍ ບົວ ເຮ້ນ, ປູ໋ງ ຫວ່າ-ເໝົາ ເຍີຍ ຕ໋ອງ. ເຊ ມຕສີງ ປວັດ ອະເຮນີ້ຍ ເຍີຍ, ໂຮຍ້ວ ຢ່າ ອ໋ອຍ ເຍີຍ ຕ໋ອງ. ຕົ້ງ ເມີ່ຍ ບົວ ລ່ຽວ ຢຽມ ເຢລູຊາເລມ ເຍີຍ ນ່າມ ໂຍ໌ວ ຢ່າ ອ໋ອຍ ຕສຸ ດສຸ ດ໊າວ ໄຕ໋.

22ເຖົາ ວົ້ວ ຕສັ່ນ ເມີ່ຍ ບົວ ອ໋ອຍ ຕສຸ ໂຕສ໋ວ ຮນັ້ງ ເຢຍ ໂຕສ໋ວ. ໄມ້ ຕຸ໊ ປວັງ ດສຸ້ຍ ຢ່າ ໄມ້ ຕຸ໊ ຫຍັ່ນ ເດສົ້າ ຍ້ຽມ ເຍີຍ ມ່ຽນ ເຍີຍ ຫຍັ່ນ ຮົບ.

23ເມີ່ຍ ບົວ ຖສໍ່ ອ໋ອຍ ຕສຸ ເປວ ຈ໊ຽນ ເມີ່ຍ ບົວ ເຍີຍ ມອກ໊ອງ-ເປວ, ຕາບ ຈ໊ຽນ ເຮ່, ໄມ້ ຕູ໋ງ ເດສົ້າ ຍ້ຽມ. ຫລາຍ ເມີ່ຍ ບົວ ເຍີຍ ຕສຸ໌ຍ, ເມີ່ຍ ບົວ ເຍີຍ ຊິນ ຕສັ່ງ ອ໋ອຍ ໂຄ້ວ ຈ໊ຽນ ເອຈ່ຍ, ລ່ານ ເຖສົາ ລ່ານ ອຈຸ້ນ ຈ໊ຽນ ຢຽມ.

24ເອເສເຄນ ຕສ່ຽວ ເປ໋ນ ນອມ ຈັ໋ງ-ໂຫ່ ປຸນ ນິ່ນ ບົວ ໝັ່ງ. ຕະຟ່ານ ນິ່ນ ຮນັ້ງ ຫາຍ ນໍ ໂຕສ໋ວ, ເມີ່ຍ ບົວ ອ໋ອຍ ຕສຸ ຮນັ້ງ ວົ້ວ ນໍ ໂຕສ໋ວ. ນ້າຍ ເຕີ໋ຍ ສີ່ ທສວດ ເຍີຍ ຕສຢັ້ງ ໂຫ່, ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ ທິນ-ຮູ່ງ. ”’

25“ປ້າມ ມ່ຽນ ອ້າ! ເຢຍ ເຕສ໊າະ ທສວດ ນິ່ນ ບົວ ວ້ວນ ເຍີຍ ຕ໋ອງ, ຕົ້ງ ນິ່ນ ບົວ ເຂົາ ຕຸ໊ ອຈຽນ-ໂຢ້ວ ເຖສົາ ອຈັງ-ຫລ່າງ ເຍີຍ ຕ໋ອງ, ນິ່ນ ບົວ ເຍີຍ ມຕສີງ ປວັດ ອະເຮນີ້ຍ ເຍີຍ, ໂຮຍ້ວ ຢ່າ ອ໋ອຍ ເຍີຍ, ລ່ຽມ ນິ່ນ ບົວ ເຍີຍ ນ່າມ ໂຍ໌ວ ຢ່າ ເຕສ໊າະ ມີ່ງ.

26ວົ້ວ ຮນອຍ ມ່າຍ ເຕົ້າ ເປຢົ໋າ ດຸ໊ດ ສີ່ ເຍີຍ ມ່ຽນ ອ໋ອຍ ຕ້າຍ ເຕສ໊າະ ນ້າຍ ເຕີ໋ຍ ເຈົ໊າ ກ໊ອງ ປຸນ ເມີ່ຍ ໝວັງ.

27ຕົ້ງ ວົ້ວ ຮນອຍ, ເມີ່ຍ ຕອງ ຈ໊ຽນ ເປຢົ໋າ ສີ່ ວົ້ວ ເຕົ້າ ມ່ຽນ ໄຮ່ ກ໊ອງ ຫວ່າ ອ໊ະ. ຢຽມ ໜ່າຍ ມີ່ງ ເມີ່ຍ ໄມ້ ຫຮງົງ. ຮນັ້ງ ໜ່າຍ ເມີ່ຍ ຕສ່ຽວ ເປ໋ນ ນອມ ຈັ໋ງ-ໂຫ່ ປຸນ ນິ່ນ ບົວ ໝັ່ງ. ນິ່ນ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ”

← Chapter 23 Jump to: Chapter 25 →