Leviticus 23

Lao Bible (ฉบับอักษรลาว)

← Chapter 22 Jump to: Chapter 24 →

1ຕສ໊ຽວ ກ໊ອງ ບົ໋ວ ໂມເຊ,

2“ອ໋ອຍ ຕສຸ ບົ໋ວ ອິສະລາເອນ ມ່ຽນ, ‘ນ້າຍ ເຊ ເຢຍ, ຕສ໊ຽວ, ຕີ່ງ ຕ້າຍ ເຍີຍ ຕສິ໊ບ. ເມີ່ຍ ບົວ ອ໋ອຍ ຕສຸ ຕສຸ້ນ ບົ໋ວ ມ່ຽນ ເຊ ເຫວີ່ຍ ເຢຍ ເຍີຍ ຕສິ໊ບ, ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ.

3“‘ມ່າຍ ຈຸ໊ ຮນອຍ ໂຕສ໋ວ ກົງ. ຕະທສຽດ ຮນອຍ ເຊ ຕີ້ງ ກົງ ຮິດ ຂວນ ເຍີຍ ຮນອຍ. ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ ຢ່າ ໄມ້ ຕູ໋ງ ໂຕສ໋ວ ຫາຍ ຫຍູ່ງ ກົງ. ໄມ້ ກຸ໊ນ ເມີ່ຍ ບົວ ຢຽມ ຫາຍ, ເຊ ເປ໋ນ ຕສ໊ຽວ ເຍີຍ ຕີ້ງ ກົງ ຮນອຍ.

4“‘ນ້າຍ ເຊ ຕສ໊ຽວ ຕີ່ງ ຕ້າຍ ເຍີຍ ຕສິ໊ບ. ອ໋ອຍ ຕສຸ ຕສິ໋ວ ນ້າຍ ເຕີ໋ຍ ຕສິ໊ບ ເຍີຍ ຮນອຍ-ເຫຍັຍ ຕສຸ້ນ ບົ໋ວ ມ່ຽນ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ.

5ຕສີ້ ຫຮລາ, ຕສຽບ ເຝີຍ ວົ້ວ ຮນອຍ, ດສ໋ຽມ-ຢ້າງ ເຍີຍ ຕສຢັ້ງ ໂຫ່, ເປັຍ ຕສ໊ຽວ ເຍີຍ ເສຍ ແໝ່ງ ຕສິ໊ບ.

6ຕສຽບ ຮມ໌ ວົ້ວ ຮນອຍ, ເປັຍ ຕສ໊ຽວ ເຍີຍ ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ. ເສ່ຍ ຮນອຍ ກະຍົ໌ວ ໄມ້ ຕູ໋ງ ຫຍັ່ນ ອັນ ປີ໊ງ ເຍີຍ ອຈົ໊ວ.

7ຕ້າວ ຮນອຍ ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ, ຢ່າ ໄມ້ ຕູ໋ງ ໂຕສ໋ວ ຮນອຍໆ ໂຕສ໋ວ ເຍີຍ ກົງ.

8ເສ່ຍ ຮນອຍ ກະຍົ໌ວ ອ໋ອຍ ຕສຸ ຮນອຍໆ ຕໍ້ ກະນ້າຍ ມີ່ງ ຝົ່ງ ຫໍ່, ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ. ຕະທສຽດ ຮນອຍ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ ຢ່າ ໄມ້ ຕູ໋ງ ໂຕສ໋ວ ຫາຍ ຫຍູ່ງ ຮນອຍໆ ໂຕສ໋ວ ເຍີຍ ກົງ.’”

9ຕສ໊ຽວ ກ໊ອງ ບົ໋ວ ໂມເຊ,

10“ອ໋ອຍ ຕສຸ ບົ໋ວ ອິສະລາເອນ ມ່ຽນ, ‘ເມີ່ຍ ບົວ ເຖົາ ເຢຍ ອ໋ອຍ ຈິວ ປຸນ ເມີ່ຍ ບົວ ວົ້ວ ນອມ ເຕີ່ຍ-ປູງ, ຊຽວ ເບຢົ້າ ເຍີຍ ຕສຢັ້ງ ໂຫ່, ອ໋ອຍ ຕສຸ ຕໍ້ ຢຽດ ເຕສີ໊ຍ ຕ້າວ ຖອງ ເບຢົ້າ ຕ້າຍ ປຸນ ໄຊ ມ່ຽນ.

11ໄຊ ມ່ຽນ ອ໋ອຍ ຕສຸ ເຕສ໊າະ ນ້າຍ ເຕສີ໊ຍ ເບຢົ້າ ຢຽມ ຕສ໊ຽວ ເຍີຍ ດສະຮມຽນ ທສຸ້ນ ກີງ ຝົ່ງ ຫໍ່, ຕສ໊ຽວ ຕສ່ຽວ ຕສິ໊ບ ເມີ່ຍ ບົວ. ຢຽມ ຕີ້ງ ກົງ ຮນອຍ ອກະຮ້າ ວົ້ວ ຮນອຍ, ໄຊ ມ່ຽນ ອ໋ອຍ ຕສຸ ທສຸ້ນ ກີງ ຕສ໊ຽວ.

12ທສຸ້ນ ນ້າຍ ເຕສີ໊ຍ ເບຢົ້າ ເຍີຍ ຮນອຍ ອ໋ອຍ ຕສຸ ຕໍ້ ເຕົ້າ ຕ໋ອຍ ຫຮຍັງ, ໄມ້ ຫວ່າຍ ຝັງ ເຍີຍ ປະກີ ຢູ້ງ ຕອນ ປົ໊ວ ເຕສ່ຍ ປຸນ ຕສ໊ຽວ.

13ແອ໋ງ ເຕສ໊າະ ເປຢີຍ ເມາະ ປ໋ຽນ ບ໊ວນ-ໝ່ວນ ຕສອບ ຈ໊ຽນ ກະລັ້ນ ໂຢ້ວ, ຫລົ່ງ ໂຕ່ວ ປົ໊ວ ເຕສ່ຍ ເວີ່ຍ ດາງ ເຍີຍ ເຖຈຍ ຫອບ ຕສ໊ຽວ ເຍີຍ ໂຮຍ້ວ. ຢ່າ ຝົ່ງ ຫໍ່ ຢຽດ ກ່ອງ ອະຫງຸ່ນ ຕິ໊ວ ເຖສົາ ຈ໊ຽນ ເທສ້ຍ ເຕສ່ຍ.

14ໄມ້ ຕູ໋ງ ຫຍັ່ນ ນ້າຍ ເຕີ໋ຍ ຊຢັງ-ເບຢົ້າ, ໄມ້ ກຸ໊ນ ຫຍັ່ນ ຍ໌ຽມ ໄຟ ຕສິ໊ ຕ້າຍ ໄຟ ໂຕສ໋ວ ເປ໋ນ ອຈົ໊ວ. ຕສົ໊ວ ເຖົາ ຕໍ້ ຝົ່ງ ຫໍ່ ປຸນ ທິນ-ຮູ່ງ ນ້າຍ ເຕີ໋ຍ ກະນ້າຍ ວົ້ວ ຮນອຍ ຖສີງ ຫຍັ່ນ. ໄມ້ ກຸ໊ນ ເມີ່ຍ ບົວ ຢຽມ ຫາຍ, ນ້າຍ ເຊ ເມີ່ຍ ບົວ ຕ່ອຍ ເຈ໋ຍ ຕ່ອຍ ອ໋ອຍ ຕສຸ ກັນ ເຍີຍ ເລີ໌ຍ.

15“‘ຢຽມ ຕີ້ງ ກົງ ຮນອຍ ອກະຮ້າ ວົ້ວ ຮນອຍ, ຕົ້ງ ຕໍ້ ເບຢົ້າ ເຕສີ໊ຍ ຕ້າຍ ທສຸ້ນ ກີງ ຝົ່ງ ຫໍ່ ວົ້ວ ຮນອຍ, ອ໋ອຍ ຕສຸ ຊ້າວ ປວັ໊ງ ເສ່ຍ ນອມ ເລີ໌ຍ-ປ໋າຍ.

16ຊ້າວ ປວັ໊ງ ຮມ໌ ຕສຽບ ຮນອຍ ເຖົາ ຕະທສຽດ ນອມ ຕີ້ງ ກົງ ຮນອຍ ອກະຮ້າ ວົ້ວ ຮນອຍ, ຕສ່ຽວ ຕໍ້ ຊຢັງ-ເບຢົ້າ ໂຕສ໋ວ ເຕສ່ຍ ເຍີຍ ລ່າງ ຕສິ ຝົ່ງ ຫໍ່ ປຸນ ຕສ໊ຽວ.

17ຢຽມ ເມີ່ຍ ບົວ ຢຽມ ເຍີຍ ຕ໋ອງ ອ໋ອຍ ຕສຸ ໂຕສ໋ວ ອີ ນອມ ອຈົ໊ວ. ຫລົ່ງ ເປຢີຍ ເມາະ ປ໋ຽນ ບ໊ວນ-ໝ່ວນ ອັນ ຈ໊ຽນ ປີ໊ງ. ອ໋ອຍ ຕສຸ ຕສິ໊ ຕສຢັ໋ງ ຕໍ້ ຕ້າຍ ໂຕສ໋ວ ຕ້າວ ຖອງ ລ່າງ ຕສິ ທສຸ້ນ ກີງ ຝົ່ງ ຫໍ່ ປຸນ ຕສ໊ຽວ.

18ອ໋ອຍ ຕສຸ ຕໍ້ ເສ່ຍ ເຕົ້າ ຕ໋ອຍ ຫຮຍັງ ໄມ້ ຫວ່າຍ ຝັງ ເຍີຍ ປະກີ ຢູ້ງ ຕອນ, ຢຽດ ເຕົ້າ ງົ່ງ ໂກ໊ວ ທສານ, ເຖສົາ ອີ ເຕົ້າ ຢູ້ງ ໂກ໊ວ, ເຖສົາ ນ້າຍ ເຕີ໋ຍ ອຈົ໊ວ ຢຽດ ເອຈ່ຍ ຝົ່ງ ຫໍ່. ນ້າຍ ເຕີ໋ຍ ແຊງ-ຄູ້ ອ໋ອຍ ຕສຸ ເຖສົາ ຈ໊ຽນ ເຕສ່ຍ ເຍີຍ ລ່າງ ຕສິ ເຖສົາ ເທສ້ຍ ເຕສ່ຍ ເຍີຍ ກະນ້າຍ ຢຽດ ເອຈ່ຍ ປົ໊ວ ເຕສ່ຍ ປຸນ ຕສ໊ຽວ, ເວີ່ຍ ດາງ ເຍີຍ ເຖຈຍ ຫອບ ຕສ໊ຽວ ເຍີຍ ໂຮຍ້ວ.

19ອ໋ອຍ ຕສຸ ຫລົ່ງ ເຕົ້າ ຢູ້ງ ໂກ໊ວ ເຕສ່ຍ ຟິ ຕສຸ໌ຍ, ເຖສົາ ອີ ເຕົ້າ ຕ໋ອຍ ຫຮຍັງ ເຍີຍ ປະກີ ຢູ້ງ ໂກ໊ວ ຕອນ ເຕສ່ຍ ເຫວີ່ຍ ຈິວ ທົງ.

20ໄຊ ມ່ຽນ ອ໋ອຍ ຕສຸ ເຕສ໊າະ ນ້າຍ ເຕີ໋ຍ ອີ ເຕົ້າ ຢູ້ງ ຕອນ ເຖສົາ ຈ໊ຽນ ຕ້າວ ຖອງ ລ່າງ ຕສິ ໂຕສ໋ວ ຕ້າຍ ເຍີຍ ອຈົ໊ວ ຢຽມ ຕສ໊ຽວ ເຍີຍ ດສະຮມຽນ ທສຸ້ນ ກີງ ໂຕສ໋ວ ທສຸ້ນ ກີງ ຝົ່ງ ຫໍ່ ເຍີຍ ກະນ້າຍ. ນ້າຍ ເຊ ຝົ່ງ ຫໍ່ ປຸນ ຕສ໊ຽວ ເວີ່ຍ ທສີງ-ເດສ່ງ ກະນ້າຍ, ເຊ ເປ໋ນ ໄຊ ມ່ຽນ ເຍີຍ.

21ຕົ້ງ ວົ້ວ ຮນອຍ ອ໋ອຍ ຕສຸ ຕສຸ້ນ ບົ໋ວ ມ່ຽນ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ ຢ່າ ໄມ້ ຕູ໋ງ ໂຕສ໋ວ ຫາຍ ຫຍູ່ງ ຮນອຍໆ ໂຕສ໋ວ ເຍີຍ ກົງ. ໄມ້ ກຸ໊ນ ເມີ່ຍ ບົວ ຢຽມ ຫາຍ, ນ້າຍ ເຊ ຕ່ອຍ ເຈ໋ຍ ຕ່ອຍ ເມີ່ຍ ບົວ ອ໋ອຍ ຕສຸ ກັນ ເຍີຍ ເລີ໌ຍ.

22“‘ເມີ່ຍ ບົວ ກ໊າດ ເບຢົ້າ, ໄມ້ ຕູ໋ງ ກ໊າດ ເຖົາ ຈົ່ມ ເດີ່ຍ-ເຮລນ, ຢ່າ ໄມ້ ຕູ໋ງ ເດສົ໌າ ເບຢົ້າ ດ໊ອດ. ອ໋ອຍ ຕສຸ ລ່ຽວ ປຸນ ມ່ຽນ ຈົ່ມ ມ່ຽນ ແອ໋ງ ເຖສົາ ເມີ່ຍ ບົວ ຢຽມ ເຍີຍ ກັ້ນ ຝີງ ມ່ຽນ. ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.’”

23ຕສ໊ຽວ ກ໊ອງ ບົ໋ວ ໂມເຊ,

24“ອ໋ອຍ ຕສຸ ບົ໋ວ ອິສະລາເອນ ມ່ຽນ, ‘ທສຽດ ຫຮລາ ແຊງ-ຢ໊ຽດ ຮນອຍ, ອ໋ອຍ ຕສຸ ຕີ້ງ ກົງ ຮິດ ຂວນ, ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ. ອ໋ອຍ ຕສຸ ປຢົ໊ມ ດສັດ ເຫວີ່ຍ ເຖງ ມ່ຽນ ຈັ໋ງ.

25ໄມ້ ຕູ໋ງ ໂຕສ໋ວ ຫາຍ ຫຍູ່ງ ຮນອຍໆ ໂຕສ໋ວ ເຍີຍ ກົງ. ຢ່າ ອ໋ອຍ ຕສຸ ຕໍ້ ຫລົ່ງ ໂຕ໌ວ ປົ໊ວ ເຕສ່ຍ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ. ’”

26ຕສ໊ຽວ ກ໊ອງ ບົ໋ວ ໂມເຊ,

27“ທສຽດ ຫຮລາ ແຊງ-ຕສຽບ ເຊ ຟິ ຕສຸ໌ຍ ຮນອຍ. ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ, ເຕສີຍ ໄມ້ ຫຍັ່ນ ຫາຍ ຫຍູ່ງ, ຢ່າ ຕໍ້ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ.

28ວົ້ວ ຮນອຍ ໄມ້ ຕູ໋ງ ໂຕສ໋ວ ຫາຍ ຫຍູ່ງ ກົງ ເຫວີ່ຍ ຕສຸ ເປ໋ນ ຟິ ຕສຸ໌ຍ ຮນອຍ, ເຊ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ດສະຮມຽນ, ເຖງ ເມີ່ຍ ບົວ ຟິ ຕສຸ໌ຍ ເຍີຍ ຮນອຍ.

29ຢຽມ ວົ້ວ ນອມ ຮນອຍ, ຫາຍ ເຕົ້າ ໄມ້ ເຕສີຍ ຕສ່ຽວ ຫຍັ່ນ ກະນ້າຍ ນໍ, ອ໋ອຍ ຕສຸ ຢຽມ ນິ່ນ ເຍີຍ ມ່ຽນ ບຸດົ໋ງ ຕສຸ ໄພ ກວັ່ງ.

30ຫາຍ ເຕົ້າ ຢຽມ ວົ້ວ ນອມ ຮນອຍ ໂຕສ໋ວ ຫາຍ ຫຍູ່ງ ກົງ, ເຢຍ ຕສ່ຽວ ໝຽດ ວົ້ວ ເຕົ້າ. ນິ່ນ ໄມ້ ຕຸ໊ ເຖສົາ ນິ່ນ ເຍີຍ ມ່ຽນ ຢຽມ.

31ທສິນ-ໝ່ານ ໄມ້ ຕູ໋ງ ໂຕສ໋ວ ຫາຍ ຫຍູ່ງ ກົງ. ໄມ້ ກຸ໊ນ ເມີ່ຍ ບົວ ຢຽມ ຫາຍ, ນ້າຍ ເຊ ຕ່ອຍ ເຈ໋ຍ ຕ່ອຍ ຢຽດ ລິ໌ວ ອ໋ອຍ ຕສຸ ກັນ ເຍີຍ ເລີ໌ຍ.

32ນ້າຍ ເວີ່ຍ ເມີ່ຍ ບົວ ເປ໋ນ ນອມ ຕີ້ງ ກົງ ຮິດ ຂວນ ເຍີຍ ຮນອຍ. ເມີ່ຍ ບົວ ອ໋ອຍ ຕສຸ ເຕສີຍ ໄມ້ ຫຍັ່ນ ຫາຍ ຫຍູ່ງ. ທສຽດ ຫຮລາ ແຊງ-ຈົ໊ວ, ດສ໋ຽມ-ຢ້າງ ເຍີຍ ຕສຢັ້ງ ໂຫ່, ເຖົາ ຕະເຫຍີ່ຍ ຮນອຍ ດສ໋ຽມ-ຢ້າງ ເຍີຍ ຕສຢັ້ງ ໂຫ່, ອ໋ອຍ ຕສຸ ຕີ້ງ ກົງ ຮິດ ຂວນ.”

33ຕສ໊ຽວ ກ໊ອງ ບົ໋ວ ໂມເຊ,

34“ອ໋ອຍ ຕສຸ ບົ໋ວ ອິສະລາເອນ ມ່ຽນ, ‘ເຖົາ ທສຽດ ຫຮລາ ຕສຽບ ຮມ໌ ວົ້ວ ຮນອຍ, ເປັຍ ຕສ໊ຽວ ເຍີຍ ບຢໍ໊ ລິ່ວ ຕສິ໊ບ, ຢ່າ ອ໋ອຍ ຕສຸ ເຈ໋ຍ ປວັ໊ງ ເສ່ຍ ຮນອຍ.

35ຕ້າວ ຮນອຍ ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ. ຢ່າ ໄມ້ ຕູ໋ງ ໂຕສ໋ວ ຫາຍ ຫຍູ່ງ ຮນອຍໆ ໂຕສ໋ວ ເຍີຍ ກົງ.

36ເສ່ຍ ຮນອຍ ກະຍົ໌ວ ອ໋ອຍ ຕສຸ ຮນອຍໆ ຕໍ້ ຫລົ່ງ ໂຕ໌ວ ປົ໊ວ ເຕສ່ຍ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ. ຕະເປ໊ດ ຮນອຍ ອ໋ອຍ ຕສຸ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ ຢ່າ ຕໍ້ ຫລົ່ງ ໂຕ໌ວ ເຕສ່ຍ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ. ນ້າຍ ເຊ ເຊດ ເມວີ໌ຍ ເຍີຍ ຫວຸ່ຍ. ໄມ້ ຕູ໋ງ ໂຕສ໋ວ ຫາຍ ຫຍູ່ງ ຮນອຍໆ ໂຕສ໋ວ ເຍີຍ ກົງ.

37(“‘ນ້າຍ ເຕີ໋ຍ ຢຽດ ຕສູ໊ງ ເຊ ຕສ໊ຽວ ຕີ່ງ ຕ້າຍ ເຍີຍ ຕສິ໊ບ. ເມີ່ຍ ບົວ ອ໋ອຍ ຕສຸ ຕສຸ້ນ ບົ໋ວ ມ່ຽນ ກັ໊ບ ຕສຸ໊ນ ໂຕສ໋ວ ເລີ໌ຍ-ປ໋າຍ, ຕໍ້ ຫລົ່ງ ໂຕ໌ວ ປົ໊ວ ເຕສ່ຍ ເຍີຍ ກະນ້າຍ ຝົ່ງ ຫໍ່ ປຸນ ຕສ໊ຽວ. ເຊ ຕໍ້ ປົ໊ວ ເຕສ່ຍ ເຍີຍ ກະນ້າຍ, ເຕສ່ຍ ເຍີຍ ລ່າງ ຕສິ, ຕະຟ່ານ ເຕສ່ຍ ເຍີຍ ກະນ້າຍ ເຖສົາ ເທສ້ຍ ເຕສ່ຍ ເຍີຍ, ເອີຍ ຈ໊ຽນ ເລີ໌ຍ ຢຽດ ຮນອຍ ມ່າຍ ຢຽດ ຮນອຍ ເຍີຍ ເຕສ່ຍ.

38ນ້າຍ ເຊ ໄມ້ ຝຸນ ເປັຍ ຕສ໊ຽວ ເຍີຍ ຕີ້ງ ກົງ ຮນອຍ ເຕສ່ຍ ເຍີຍ ກະນ້າຍ, ເຖສົາ ຝົ່ງ ຫໍ່ ເຍີຍ ຕສີ້ງ ເຫຍີ່ຍ, ເຖສົາ ຈ໊າວ ຊູງ ແລ໌ງ ແຫງ່ງ ຫວ່າ ເຍີຍ ເຖສົາ ທສວດ ຟິມ ເຕສ່ຍ ປຸນ ຕສ໊ຽວ ເຍີຍ ຢຽດ ຕສູ໊ງ ກະນ້າຍ.)

39“‘ເມີ່ຍ ບົວ ຊຽວ ປ່າ ທສຸນ-ແກງ, ຢຽມ ທສຽດ ຫຮລາ ຕສຽບ ຮມ໌, ອ໋ອຍ ຕສຸ ເຈ໋ຍ ຕສ໊ຽວ ເຍີຍ ຕສິ໊ບ ປວັ໊ງ ເສ່ຍ ຮນອຍ. ຕ້າວ ຮນອຍ ເຊ ເວີ່ຍ ຮິດ ຂວນ ຮນອຍ. ຕະເປ໊ດ ຮນອຍ ຢ່າ ເວີ່ຍ ຮິດ ຂວນ ຮນອຍ.

40ຕ້າວ ຮນອຍ ອ໋ອຍ ຕສຸ ຕໍ້ ຫລົງ ເຈ໋ຍ ເຍີຍ ດຢັ໋ງ ເຍີຍ ປ໊ຽວ ເຖສົາ ຕາວ-ນ່ອມ, ເຖສົາ ມ່າຍ ດຢັ໋ງ-ນ່ອມ ທສ້ຳ ເຍີຍ ອກວ້າ, ເຖສົາ ຊຸ້ຍ-ລ່ຽມ ດຢັ໋ງ-ອກວ້າ,ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ດສະຮມຽນ, ອຈຽນ-ໂຢ້ວ ເໜົ່າ ຫຍິດ ເສ່ຍ ຮນອຍ.

41ໂມ໌ວ ຫຮຍັງ ເຖົາ ທສຽດ ຫຮລາ ອ໋ອຍ ຕສຸ ເຈ໋ຍ ຕສ໊ຽວ ເຍີຍ ຕສິ໊ບ ເສ່ຍ ຮນອຍ. ນ້າຍ ເຊ ຕ່ອຍ ເຈ໋ຍ ຕ່ອຍ ຢຽດ ລິ໌ວ ອ໋ອຍ ຕສຸ ກັນ ເຍີຍ ເລີ໌ຍ.

42ເມີ່ຍ ບົວ ອ໋ອຍ ຕສຸ ຢຽມ ລິ່ວ ເສ່ຍ ຮນອຍ. ຢຽດ ຕສູ໊ງ ປ໊ວນ-ຝີງ ອິສະລາເອນ ມ່ຽນ ອ໋ອຍ ຕສຸ ຢຽມ ລິ່ວ

43ເຫວີ່ຍ ປຸນ ເມີ່ຍ ບົວ ເຍີຍ ເຕສີ໊ຍ-ຟຸນ ຮິ້ວ ຕຸ໊, ເຢຍ ຕໍ້ ອິສະລາເອນ ມ່ຽນ ທສວດ ອີຢິ໊ບ ເຕີ່ຍ-ປູງ ວົ້ວ ຕສັ່ນ ເຢຍ ປຸນ ນິ່ນ ບົວ ຢຽມ ລິ່ວ. ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.’”

44ຮນັ້ງ ໜ່າຍ ໂມເຊ ຕສ່ຽວ ກ໊ອງ ບົ໋ວ ອິສະລາເອນ ມ່ຽນ ຮິ້ວ ຕຸ໊ ຕສ໊ຽວ ຕີ່ງ ຕ້າຍ ເຍີຍ ຫຍູ່ງໆ ຕສິ໊ບ.

← Chapter 22 Jump to: Chapter 24 →