Leviticus 26

Lao Bible (ฉบับอักษรลาว)

1“‘ຢຽມ ເມີ່ຍ ບົວ ເຍີຍ ເຕີ່ຍ-ປູງ ໄມ້ ຕູ໋ງ ໂຕສ໋ວ ຫາຍ ຫຍູ່ງ ໝິ່ວ-ຝັງ ໄຟ ຫລຽບ ຫາຍ ຫຍູ່ງ ເຍີຍ ຝັງ ເຕສີ໊ຍ ໄຟ ຫລະເປຢີ໊ຍ-ດ້ຽວ ໄຟ ຕສຸ ຕ້າຍ ເຍີຍ ຫລະເປຢີ໊ຍ ເຫວີ່ຍ ກັ້ນ ເກວີ່ຍ ເອຈ່ຍ ປ໋າຍ. ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.

2“‘ອ໋ອຍ ຕສຸ ກັນ ຫລົງ ເຢຍ ເຍີຍ ນອມໆ ຕີ້ງ ກົງ ຮນອຍ, ຢ່າ ອ໋ອຍ ຕສຸ ທ່າຍ ເຢຍ ເຍີຍ ສີງ ຕິ່ນ. ເຢຍ ເຊ ຕສ໊ຽວ.

3“‘ເຊ ກ໊ອງ ເມີ່ຍ ບົວ ກັນ ຫລົງ ເຢຍ ເຍີຍ ຫລີ່ງ, ໝວັງ ຫລົງ ເຢຍ ເຍີຍ ເລີ໌ຍ, ຢ່າ ເອີຍ ຈ໊ຽນ ໂຕສ໋ວ,

4ເຢຍ ອ໋ອຍ ຕສິ໋ວ ທສຸນ-ທສຽວ ປຸນ ລູ່ງ ຕຸ້ຍ ບຢູ່ງ. ເດົາ ຕສ່ຽວ ທສວດ ແກງ-ຕສວັ໋ງ. ປ໊ຽວ-ເດີ່ຍ ເຍີຍ ດຢັ໋ງ ຢ່າ ອ໋ອຍ ຕສຢັ້ງ ປ໊ຽວ.

5ເບ໊າະ ເບຢົ້າ ຕສ່ຽວ ຕຸ໊ ເບ໊າະ ເຖົາ ແກ໊ະ ອະຫງຸ່ນ ປ໊ຽວ ເຍີຍ ຕສຢັ້ງ ໂຫ່. ແກ໊ະ ອະຫງຸ່ນ ປ໊ຽວ ຢ່າ ຕຸ໊ ແກ໊ະ ເຖົາ ແອ໋ງ ຕສວັ໋ງ ກະນ້າຍ ເຍີຍ ຕສຢັ້ງ ໂຫ່. ເມີ່ຍ ບົວ ຕສ່ຽວ ມ່າຍ ຫຍັ່ນ ມ່າຍ ຮົບ ເປ໊ວ. ເມີ່ຍ ບົວ ຢ່າ ຕຸ໊ ແປ້ງ ອອນ ເຍີຍ ຢຽມ ເມີ່ຍ ບົວ ເຍີຍ ເຕີ່ຍ-ປູງ.

6“‘ເຢຍ ອ໋ອຍ ປຸນ ວົ້ວ ນອມ ເຕີ່ຍ-ປູງ ຖາຍ-ແປ້ງ. ເມີ່ຍ ບົວ ອ໋ອຍ ຕຸ໊ ເປວີ໋ຍ ເອຈ່ຍ ຢ່າ ໄມ້ ມ່າຍ ຫາຍ ເຕົ້າ ປຸນ ເມີ່ຍ ບົວ ກ້ຳ ເດສ໋ຍ. ເຢຍ ອ໋ອຍ ປຸນ ວົ້ວ ນອມ ເຕີ່ຍ-ປູງ ທສ້ຽວ ເຍີຍ ເຮ່ຍ ຕສ້ອຍ ຕສຸດ ເດສ່ງ. ເມີ່ຍ ບົວ ເຍີຍ ເຕີ່ຍ-ປູງ ຢ່າ ໄມ້ ມ່າຍ ເບ໊າະ ຈ໋າ ເຍີຍ ສີ່.

7ເມີ່ຍ ບົວ ອ໋ອຍ ຕສຸ່ນ ເມີ່ຍ ບົວ ເຍີຍ ວິນ-ວັ້ງ, ນິ່ນ ບົວ ຕສ່ຽວ ຢຽມ ເມີ່ຍ ບົວ ເຍີຍ ວົ້ວ ດ່າງ ແໝງ ຕສຸ ດສຸ ດ໊າວ ໄຕ໋.

8ເມີ່ຍ ບົວ ປຢາ ເຕົ້າ ອ໋ອຍ ຕສຸ່ນ ຢຽດ ແປ໊ະ ເຕົ້າ. ຢຽດ ແປ໊ະ ເຕົ້າ ອ໋ອຍ ຕສຸ່ນ ຢຽດ ຫວ່ານ ເຕົ້າ. ເມີ່ຍ ບົວ ເຍີຍ ວິນ-ວັ້ງ ຕສ່ຽວ ຢຽມ ເມີ່ຍ ບົວ ເຍີຍ ວົ້ວ ດ່າງ ແໝງ ຕສຸ ດສຸ ດ໊າວ ໄຕ໋.

9“‘ເຢຍ ອ໋ອຍ ຈັ໋ງ ເມີ່ຍ ບົວ, ເຖສີຍ ຟຸ ປຸນ ເມີ່ຍ ບົວ ມ່າຍ ເຕສີ໊ຍ-ຟຸນ ຫຮຢາງ ຈ໊ຽນ ຝາວ, ຢ່າ ອ໋ອຍ ເອີຍ ຈ໊ຽນ ເຢຍ ເຖສົາ ເມີ່ຍ ບົວ ຫລຽບ ເຈ໌ຍ ເຍີຍ ແຫງ່ງ ຫວ່າ.

10ເມີ່ຍ ບົວ ຖສໍ່ ຫຍັ່ນ ຈ໊ຽນ ໂລ໌-ເບຢົ້າ, ຕສູ໊ງ ອ໋ອຍ ຕສຸ ເຕສ໊າະ ທສວດ ໂລ໌ ເຍີຍ ເຫວີ່ຍ ປຸນ ມ່າຍ ຕ໋ອງ ຕັ໊ບ ຊຢັງ ເຍີຍ.

11ເຢຍ ອ໋ອຍ ຫລຽບ ເຢຍ ຢຽມ ເຍີຍ ຕ໋ອງ ຢຽມ ເມີ່ຍ ບົວ ບຸດົ໋ງ. ເຢຍ ຢ່າ ໄມ້ ດສອງ ເມີ່ຍ ບົວ.

12ເຢຍ ອ໋ອຍ ຢຽມ ເມີ່ຍ ບົວ ບຸດົ໋ງ ຢ່າ ໂຕສ໋ວ ເມີ່ຍ ບົວ ເຍີຍ ທິນ-ຮູ່ງ. ເມີ່ຍ ບົວ ຢ່າ ອ໋ອຍ ໂຕສ໋ວ ເຢຍ ເຍີຍ ແປະ ຝີງ.

13ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕົ້ງ ຕໍ້ ເມີ່ຍ ບົວ ທສວດ ອີຢິ໊ບ ເຕີ່ຍ-ປູງ ຕ້າຍ ເຫວີ່ຍ ປຸນ ເມີ່ຍ ບົວ ໄມ້ ຕສຸ ໂຕສ໋ວ ອີຢິ໊ບ ມ່ຽນ ເຍີຍ ໂນ່ວ. ເຢຍ ວວດ ເນົ້າ ເມີ່ຍ ບົວ ເຍີຍ ດຢັ໋ງ-ກ໌າ ປຸນ ເມີ່ຍ ບົວ ຕຸ໊ ໂຊ້ວ ຕສະ ຕ້າຍ ຢັ້ງ ເຈົ໊າ.

14“‘ມປ່າ ເຊ ກ໊ອງ ເມີ່ຍ ບົວ ໄມ້ ໝວັງ ເຢຍ, ຢ່າ ໄມ້ ເອີຍ ເຢຍ ເຍີຍ ຕິ້ວໆ ເລີ໌ຍ-ຫລັດ ໂຕສ໋ວ,

15ຢ່າ ເຊ ກ໊ອງ ເມີ່ຍ ບົວ ແຫງ່ງ ຈ໊ຽນ ເຢຍ ເຍີຍ ຫລີ່ງ, ໂຢ໋ວ ເຢຍ ຫັດ ເຍີຍ ຫວ່າ, ໄມ້ ກັນ ເຢຍ ເຍີຍ ຢຽດ ຕສູ໊ງ ເລີ໌ຍ, ຕສ່ຽວ ປຸນ ເຢຍ ເຍີຍ ແຫງ່ງ ຫວ່າ ດ໊ອດ,

16ເຢຍ ອ໋ອຍ ຮນັ້ງ ນ້າຍ ນໍ ໂຕສ໋ວ ປຸນ ເມີ່ຍ ບົວ. ເຢຍ ອ໋ອຍ ປຸນ ເມີ່ຍ ບົວ ລ່ຽມ ເຕສີ້ຍ ຕສຸ ຕົ້ມ ເຮີ້ຍ ສີ່, ປຸ໊ດ ແປ່ງ-ງ໌າຍ, ປຸ໊ດ ຊິນ ຈອມ ແປ່ງ, ມຕສີງ ກຸ໊ນ ໂຕສ໋ວ ກຸ໊ນ ບົ໊ວ, ແໝ່ງ ໝັ່ນໆ ໂຄວ ອກາຍ ເດສ່ງ. ເມີ່ຍ ບົວ ຢ່າ ແປະໆ ຕສວັ໋ງ ກະນ້າຍ ເຫວີ່ຍ ຕສຸ ເມີ່ຍ ບົວ ເຍີຍ ວິນ-ວັ້ງ ອ໋ອຍ ຕ້າຍ ຫຍັ່ນ ເດສ່ງ.

17ເຢຍ ອ໋ອຍ ບ໊ຽນ ຮມຽນ ປຸນ ເມີ່ຍ ບົວ. ເມີ່ຍ ບົວ ຕສ່ຽວ ເຊວີຍ ເມີ່ຍ ບົວ ເຍີຍ ວິນ-ວັ້ງ. ດສອງ ເມີ່ຍ ບົວ ວົ້ວ ເຕີ໋ຍ ອ໋ອຍ ຕຸ໊ ກຸ໊ນ ເມີ່ຍ ບົວ. ເມີ່ຍ ບົວ ອ໋ອຍ ເປຢົ໋າ ໄມ້ ກຸ໊ນ ໄມ້ ມ່າຍ ຫາຍ ເຕົ້າ ຕສຸ່ນ ອກາງ.

18“‘ເຊ ກ໊ອງ ເມີ່ຍ ບົວ ປວັ້ງ ລິ໌ວ ດົ່ງ ໜ່າຍ ເຍີຍ ສີ່ ຖສໍ່ ໄມ້ ໝວັງ ເຢຍ, ເຢຍ ຕສ່ຽວ ຕສິ໋ວ ເມີ່ຍ ບົວ ໂຕສ໋ວ ເຍີຍ ຕີ່ງ ຕສຸ໌ຍ ເຖົາ ເສ່ຍ ໂກ໊ວ.

19ເຢຍ ອ໋ອຍ ໝຽດ ເດສ່ງ ເມີ່ຍ ບົວ ໂຮຍ້ວ ແຫງ່ງ, ໂຕສ໋ວ ເໝົາ ເຍີຍ ທຈະ. ເຢຍ ອ໋ອຍ ປຸນ ລູ່ງ ຮ໌ານ, ປຸນ ເດົາ ບັງ ແຫງ່ງ ເຍີຍ.

20ເມີ່ຍ ບົວ ຕສ່ຽວ ແປະໆ ດ໊ອດ ທຈະ, ເຫວີ່ຍ ຕສຸ ເມີ່ຍ ບົວ ເຍີຍ ເດົາ ໄມ້ ທສວດ ແກງ-ຕສວັ໋ງ. ວົ້ວ ນອມ ເຕີ່ຍ-ປູງ ເຍີຍ ດຢັ໋ງ ຢ່າ ໄມ້ ຕສຢັ້ງ ປ໊ຽວ.

21“‘ເຊ ກ໊ອງ ເມີ່ຍ ບົວ ຖສໍ່ ແຫງ່ງ ຈ໊ຽນ ໄມ້ ຄັ້ງ ໝວັງ ເຢຍ, ເຢຍ ຕສ່ຽວ ປຸນ ເຕສະ ໜ່ານ ຫ່ອຍ ເມີ່ຍ ບົວ ຕສິ໋ວ ເມີ່ຍ ບົວ ໂຕສ໋ວ ເຍີຍ ຈາ ຕີ່ງ ຕສຸ໌ຍ ເຖົາ ເສ່ຍ ໂກ໊ວ.

22ເຢຍ ອ໋ອຍ ປຸນ ເຮ່ຍ ຕສ້ອຍ ເປັຍ ເມີ່ຍ ບົວ ບຸດົ໋ງ. ນິ່ນ ບົວ ອ໋ອຍ ເປ໊ດ ເມີ່ຍ ບົວ ເຍີຍ ຝຸຈ໊ວຍ, ນະ ເມີ່ຍ ບົວ ເຍີຍ ແຊງ-ຄູ້, ປຸນ ເມີ່ຍ ບົວ ເຍີຍ ມ່ຽນ ໂຕສະ ເດສ່ງ, ເມີ່ຍ ບົວ ເຍີຍ ເຈົ໊າ ຕສູ໊ງ ຕສຸ ເປ໋ນ ເຈົ໊າ-ຮວາງ.

23“‘ເຊ ກ໊ອງ ຮນັ້ງ ນ້າຍ ນໍ ເບ໊າະ ອຈ໋າວ ມປ່າ ເມີ່ຍ ບົວ ຖສໍ່ ໄມ້ ໝວັງ ເຢຍ, ຖສໍ່ ແຫງ່ງ ຈ໊ຽນ ເຢຍ,

24ເຢຍ ກັ້ນ ອ໋ອຍ ແຫງ່ງ ຈ໊ຽນ ເມີ່ຍ ບົວ, ເຫວີ່ຍ ເມີ່ຍ ບົວ ໂຕສ໋ວ ເຍີຍ ຕສຸ໌ຍ ປຸນ ເມີ່ຍ ບົວ ຕສຸ ໂຄ້ວ ເຖົາ ເສ່ຍ ດສຸ່ນ.

25ຫລາຍ ເມີ່ຍ ບົວ ປູ໋ງ ດ໊ອດ ເຖສົາ ເຢຍ ແລ໌ງ ເຍີຍ ແຫງ່ງ ຫວ່າ, ເຢຍ ອ໋ອຍ ປຸນ ເມີ່ຍ ບົວ ຕສຸ ເບ໊າະ ຈ໋າ ເຍີຍ ສີ່ ຈ໊າວ ວິນ. ເຊ ກ໊ອງ ເມີ່ຍ ບົວ ກັ໊ບ ຕສຸ໊ນ ຢຽມ ຕສີ້ງ ກະຍົ໌ວ, ເຢຍ ອ໋ອຍ ປຸນ ເມີ່ຍ ບົວ ປຸ໊ດ ຕົ້ມ ວວນ-ແປ່ງ. ເມີ່ຍ ບົວ ຕສູ໊ງ ອ໋ອຍ ຕສຸ ຈິວ ປຸນ ຢຽມ ເມີ່ຍ ບົວ ເຍີຍ ວິນ-ວັ້ງ ເຍີຍ ປົ໌ວ-ເດ໊ຍ.

26ເຢຍ ໂຕສ໋ວ ປຸນ ເມີ່ຍ ບົວ ເຍີຍ ລ່າງ ຕສິ ຕັ໋ງ ວົ້ວ ຕສັ່ນ, ຕສຽບ ເຕົ້າ ມເຊັຍ ຕອນ ອ໋ອຍ ຈວັ່ງ ຢຽດ ນອມ ໂດສ໋ ຕສິ໊ ອຈົ໊ວ. ອຈົ໊ວ ຢ່າ ອ໋ອຍ ຕສຸ ຕສິ໋ວ ເຮນ້ຍ-ຕ້າວ ດສຢັງ ປຸນ ອກອຍ. ເມີ່ຍ ບົວ ຕຸ໊ ຫຍັ່ນ ຢ່າ ຫຍັ່ນ ໄມ້ ເປ໊ວ.

27“‘ເຊ ກ໊ອງ ຕສຸ ດົ່ງ ໜ່າຍ ເມີ່ຍ ບົວ ຖສໍ່ ໄມ້ ໝວັງ ເຢຍ, ແຫງ່ງ ຈ໊ຽນ ເຢຍ,

28ເຢຍ ຕສ່ຽວ ເຖຈຍ ເຈ໌ຍ! ໄຫ່, ແຫງ່ງ ຈ໊ຽນ ເມີ່ຍ ບົວ, ເຫວີ່ຍ ເມີ່ຍ ບົວ ໂຕສ໋ວ ເຍີຍ ຕີ່ງ ຕສຸ໌ຍ ເຖົາ ເສ່ຍ ດສຸ່ນ.

29ເມີ່ຍ ບົວ ຕສ່ຽວ ຫຍັ່ນ ເມີ່ຍ ບົວ ເຍີຍ ຕອນ ເຍີຍ ອໍ໊, ຫຍັ່ນ ເມີ່ຍ ບົວ ເຍີຍ ເຊັຍ ເຍີຍ ອໍ໊.

30ເຢຍ ຢ່າ ອ໋ອຍ ໝຽດ ເມີ່ຍ ບົວ ຢຽມ ຮລັງ ຕສັ່ງ ຕສ້ຽນ ເຍີຍ ຕ໋ອງ, ໂຕສ໋ວ ປ່າຍ ເມີ່ຍ ບົວ ເຍີຍ ປົ໊ວ ຮູງ ເຕ້ຍ ຢ່າ ເຕສ໊າະ ເມີ່ຍ ບົວ ເຍີຍ ເຊີຍ ຕສອຍ ອັນ ຈ໊ຽນ ບາງ ວົ້ວ ເຕີ໋ຍ ໝິ່ວ-ຝັງ ກູ້ ຫງວ່າຍ. ເຢຍ ເຍີຍ ໂຮຍ້ວ ຢ່າ ອ໋ອຍ ດສອງ ໄຫ່ ເມີ່ຍ ບົວ.

31ເຢຍ ອ໋ອຍ ປຸນ ເມີ່ຍ ບົວ ເຍີຍ ຕສີ້ງ ເປ໋ນ ຕສີ້ງ ຮວາງ, ໂຕສ໋ວ ຫວ່າຍ ປ໋າຍ ຕສ້ຽນ ເຍີຍ ຕ໋ອງ. ເມີ່ຍ ບົວ ຕໍ້ ກະນ້າຍ ຕ້າຍ ເຕສ່ຍ ໂຕສ໋ວ ດາງ ເຍີຍ ເຖຈຍ ເຢຍ ຢ່າ ໄມ້ ອະເຮນີ້ຍ.

32ເຢຍ ອ໋ອຍ ປຸນ ເຕີ່ຍ-ປູງ ເປ໋ນ ເຕີ່ຍ-ປູງ-ຮວາງ, ລ່ຽມ ຕ້າຍ ຢຽມ ຈ໊ຽນ ເຍີຍ ວິນ-ວັ້ງ ອ໋ອຍ ບົວະ ຮ່ອງ ໄຫ່.

33ເຢຍ ອ໋ອຍ ໂຕສ໋ວ ປຸນ ເມີ່ຍ ບົວ ດສ໋ານ ມີ່ງ ຢຽມ ໝ່ານ ກົ໊ວະ ບຸດົ໋ງ, ຢ່າ ອ໋ອຍ ແປງ ດສຸ ດ໊າວ ທສວດ ໄພ້ ຕສຸ່ນ ເມີ່ຍ ບົວ. ເມີ່ຍ ບົວ ເຍີຍ ເດົາ ຕສ່ຽວ ເປ໋ນ ເດົາ-ຮວາງ. ເມີ່ຍ ບົວ ເຍີຍ ຕສີ້ງ ຢ່າ ເປ໋ນ ຕສີ້ງ ຮວາງ.

34ຮນັ້ງ ໜ່າຍ, ເມີ່ຍ ບົວ ຢຽມ ວິນ-ວັ້ງ ເຍີຍ ເຕີ່ຍ-ປູງ, ເມີ່ຍ ບົວ ເຍີຍ ເຕີ່ຍ-ປູງ ເປ໋ນ ເດົາ-ຮວາງ ເຍີຍ ຕສຢັ້ງ ໂຫ່, ເດົາ ຕສ່ຽວ ຕຸ໊ ເຈ໋ຍ ນິ່ນ ເຍີຍ ຕີ້ງ ກົງ ຫຮຍັງ. ເຖົາ ວົ້ວ ຕສັ່ນ, ເດົາ ຕສ່ຽວ ຕຸ໊ ຮິດ ຂວນ, ອຈຽນ-ໂຢ້ວ ເຍີຍ ເຈ໋ຍ ນິ່ນ ເຍີຍ ຕີ້ງ ກົງ ຫຮຍັງ.

35ເຕີ່ຍ-ປູງ ເປ໋ນ ເດົາ-ຮວາງ ດົ່ງ ຫາຍ ເລົ່າ ຕສ່ຽວ ຕຸ໊ ຮິດ ດົ່ງ ວົ້ວ. ເຊ ເດົາ ຕຸ໊ ຮິດ ຂວນ ຮນັ້ງ ເມີ່ຍ ບົວ ຢຽມ ຈ໊ຽນ ເຈ໋ຍ ຕີ້ງ ກົງ ຫຮຍັງ, ເດົາ ໄມ້ ຕຸ໊ ຮິດ ຂວນ ນໍ.

36“‘ເມີ່ຍ ບົວ ເຕສ່ງ ເອຈ່ຍ ເຍີຍ ມ່ຽນ, ເຢຍ ອ໋ອຍ ປຸນ ຢຽມ ວິນ-ວັ້ງ ເຍີຍ ເຕີ່ຍ-ປູງ, ໂຮຍ້ວ ກ້ຳ ເດສ໋ຍ ຈ໊ຽນ ຢຽມ. ໄຮ໌ ດສຢ໋າວ ປ່ວນ ຢຽດ ຄວ້າຍ ດຢັ໋ງ-ນ່ອມ ບຸຍ ຕສ່ຽວ ແຮະ ນິ່ນ ບົວ ເປຢົ໋າ. ນິ່ນ ບົວ ອ໋ອຍ ຖິວ ຮນັ້ງ ເປຢົ໋າ ດສຸ ດ໊າວ. ນິ່ນ ບົວ ຢ່າ ອ໋ອຍ ດອບ, ໄມ້ ກຸ໊ນ ໄມ້ ມ່າຍ ຫາຍ ເຕົ້າ ຕສຸ່ນ ອກາງ.

37ລ່ານ ອ໋ອຍ ດິ໊ ຕສຸ ລ່ານ ດອບ ຮນັ້ງ ເປຢົ໋າ ດສຸ ດ໊າວ ນໍ, ໄມ້ ກຸ໊ນ ໄມ້ ມ່າຍ ຫາຍ ເຕົ້າ ຕສຸ່ນ. ນິ່ນ ບົວ ຕສູ໊ງ ໄມ້ ມ່າຍ ທຈະ ເຖສົາ ເມີ່ຍ ບົວ ເຍີຍ ວິນ-ວັ້ງ ເບ໊າະ ຈ໋າ.

38ເມີ່ຍ ບົວ ອ໋ອຍ ຢຽມ ຝີງໆ ມ່ຽນ ບຸດົ໋ງ ຕສຸ ໝຽດ. ເມີ່ຍ ບົວ ເຍີຍ ວິນ-ວັ້ງ ເຍີຍ ເຕີ່ຍ-ປູງ ຢ່າ ອ໋ອຍ ນະ ເມີ່ຍ ບົວ.

39ເມີ່ຍ ບົວ ເຕສ່ງ ເອຈ່ຍ ເຍີຍ ມ່ຽນ, ຫລາຍ ກັ້ນ ໂຕສ໋ວ ເຍີຍ ຕສຸ໌ຍ ເຖສົາ ອົງ-ຖາຍ ເຍີຍ ຕສຸ໌ຍ, ອ໋ອຍ ຢຽມ ວິນ-ວັ້ງ ເຍີຍ ເຕີ່ຍ-ປູງ ໝັ່ນໆ ຕສຸດ ເດສ່ງ ໝີ່ ອ໊ະ.

40“‘ມປ່າ ເຊ ກ໊ອງ ນິ່ນ ບົວ ຫຍ່ຽມ ກັ້ນ ເຍີຍ ຕສຸ໌ຍ ເຖສົາ ນິ່ນ ບົວ ເຍີຍ ອົງ-ຖາຍ ເຍີຍ ຕສຸ໌ຍ, ເຊ ນິ່ນ ບົວ ປ໌າມ ເຢຍ, ແຫງ່ງ ຈ໊ຽນ ເຢຍ,

41ເຢຍ ຖສີງ ແຫງ່ງ ຈ໊ຽນ ນິ່ນ ບົວ, ຕໍ້ ນິ່ນ ບົວ ເປັຍ ວິນ-ວັ້ງ ເຍີຍ ເຕີ່ຍ-ປູງ ວົ້ວ ຕສັ່ນ, ເຊ ກ໊ອງ ນິ່ນ ບົວ ໂຮຍ້ວ ແຫງ່ງ ເຍີຍ ມ່ຽນ, ຕສັ໊ດ ກັ້ນ ເອຈ່ຍ ຢ່າ ຕສິ໋ວ ນິ່ນ ບົວ ປ໌າມ ເຍີຍ ຕສຸ ຕີ່ງ ລິ໌ວ ຕສຸ໌ຍ,

42ເຢຍ ຕສ່ຽວ ຈັ໋ງ ເຖົາ ເຢຍ ເຖສົາ ຢາໂຄບ ຫລຽບ ເຍີຍ ແຫງ່ງ ຫວ່າ, ເຖສົາ ອີສັກ ຫລຽບ ເຍີຍ ແຫງ່ງ ຫວ່າ, ຢ່າ ເຖສົາ ອັບລາຮຳ ຫລຽບ ເຍີຍ ແຫງ່ງ ຫວ່າ. ເຢຍ ຢ່າ ຈັ໋ງ ເຖົາ ວົ້ວ ນອມ ເຕີ່ຍ-ປູງ ອ໊ະ.

43ມປ່າ ນິ່ນ ບົວ ອ໋ອຍ ຕສຸ ກວັ່ງ ນິ່ນ ບົວ ເຍີຍ ເຕີ່ຍ-ປູງ. ໄມ້ ມ່າຍ ນິ່ນ ບົວ ຢຽມ ເຍີຍ ຕສຢັ້ງ ໂຫ່, ເດົາ ຕສ່ຽວ ເຮ່ນ, ອຈຽນ-ໂຢ້ວ ເຍີຍ ຮິດ ຂວນ. ຫລາຍ ນິ່ນ ບົວ ເອກ້ມ ເຢຍ ເຍີຍ ເລີ໌ຍ-ຫລັດ, ດສອງ ເຢຍ ເຍີຍ ຫລີ່ງ, ນິ່ນ ບົວ ອ໋ອຍ ຕສຸ ຕສິ໋ວ ນິ່ນ ບົວ ປ໌າມ ເຍີຍ ຕສຸ໌ຍ ຕສຸ ຕີ່ງ ຕສຸ໌ຍ.

44ໄມ້ ກຸ໊ນ ຮນັ້ງ ໜ່າຍ, ນິ່ນ ບົວ ຢຽມ ວິນ-ວັ້ງ ເຍີຍ ເຕີ່ຍ-ປູງ, ເຢຍ ໄມ້ ໂຢ໋ວ ນິ່ນ ບົວ, ໄຟ ດສອງ ນິ່ນ ບົວ ເຫວີ່ຍ ເຕສ໊າະ ນິ່ນ ບົວ ໝຽດ ເດສ່ງ. ເຊ ກ໊ອງ ຮນັ້ງ ນ້າຍ ໂຕສ໋ວ, ເຢຍ ເຖສົາ ນິ່ນ ບົວ ຫລຽບ ເຈ໌ຍ ເຍີຍ ແຫງ່ງ ຫວ່າ ຕສ່ຽວ ປ່າ ໝີ່ ອ໊ະ. ເຢຍ ເຊ ຕສ໊ຽວ, ນິ່ນ ບົວ ເຍີຍ ທິນ-ຮູ່ງ.

45ເຢຍ ອ໋ອຍ ເຫວີ່ຍ ນິ່ນ ບົວ ເຍີຍ ກອນ ຈັ໋ງ ເຢຍ ເຖສົາ ນິ່ນ ບົວ ເຍີຍ ອົງ-ຖາຍ ຫລຽບ ເຍີຍ ແຫງ່ງ ຫວ່າ, ຕົ້ງ ເຢຍ ຕອງ ຈ໊ຽນ ຝີງໆ ມ່ຽນ ຕໍ້ ທສວດ ອີຢິ໊ບ ເຕີ່ຍ-ປູງ ເຫວີ່ຍ ໂຕສ໋ວ ນິ່ນ ບົວ ເຍີຍ ທິນ-ຮູ່ງ. ເຢຍ ເຊ ຕສ໊ຽວ. ’”

46ນ້າຍ ເຕີ໋ຍ ຫລີ່ງ ເຖສົາ ເລີ໌ຍ-ຫລັດ ເຖສົາ ຕິ້ວໆ ເລີ໌ຍ ເຊ ຕສ໊ຽວ ຢຽມ ຊີນາຍ ບົງ, ຫລົ່ງ ໂມເຊ ເຫວີ່ຍ ອິສະລາເອນ ມ່ຽນ ຫລຽບ ຕ້າຍ.

← Chapter 25 Jump to: Chapter 27 →