Mark 14

Lao Bible (ฉบับอักษรลาว)

1ແອ໋ງ ມ່າຍ ອີ ຮນອຍ ຮນັ້ງ ຕສ່ຽວ ເຖົາ ເສຍ ແໝ່ງ ຕສິ໊ບ ເຖສົາ ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ. ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ຕ໊າ ຕສະເອີ໋ຍ ຮນັ້ງ ຫາຍ ນໍ ໄຮ່ ປີ໋ງ ຈ໊ຽນ ເຕສ໊າະ ເຢຊູ ໄຕ໋ ກວັ່ງ.

2ນິ່ນ ບົວ ກ໊ອງ, “ນ້າຍ ເຕີ໋ຍ ເຈ໋ຍ ຕສິ໊ບ ເຍີຍ ຮນອຍ ກະຍົ໌ວ, ບົວ ໄມ້ ຕູ໋ງ ແກ້ງ ເຕສ໊າະ. ກ້ຳ ເດສ໋ຍ ຕສວັ໋ງ ມ່ຽນ ໄຮ່ ຫລຸ່ນ ເດສ່ງ ມເປີຍ.”

3ເຢຊູ ຢຽມ ເບທານີ ລ໌າງ, ປຸ໊ດ ເຈ໋ຍ ກົ້ມ ຮູ້ ແປ່ງ ວົ້ວ ເຕົ້າ ຊີມົນ ເຍີຍ ເປຢົ໊າ. ຫຍັ່ນ ຈ໊ຽນ ຫຮນາງ ວົ້ວ ຕສັ່ນ, ມ່າຍ ເຕົ້າ ມເຊັຍ ຕອນ ຕໍ້ ນອມ ແປ້ງ ຕັ໊ບ ປວັ໊ງ ຈ໋າຍ ໄຫ່ ເຍີຍ ນາດາ ໂຢ້ວ ຕ້າຍ. ນິ່ນ ເບ໊າະ ຮູ້ ແປ້ງ ຢ່າ ໂຕ໋ ນ້າຍ ເຕີ໋ຍ ໂຢ້ວ ດາງ ຮຢຽດ ເຢຊູ ເຍີຍ ມອກ໊ອງ.

4ມ່າຍ ເຕີ໋ຍ ຢຽມ ວົ້ວ ເຍີຍ ມ່ຽນ ເຖຈຍ ເຈ໌ຍ ໄຫ່. ລ່ານ ຕສ່ຽວ ບົ໋ວ ລ່ານ, “ແປະໆ ຕສ໋າວ ໂຢ້ວ ດາງ ກວັ່ງ ໂຕສ໋ວ ຫາຍ ຫຍູ່ງ?

5ນ້າຍ ເຕີ໋ຍ ໂຢ້ວ ດາງ ໝ່າຍ ຕຸ໊ ຟາມ-ແປ໊ະ ຮນອຍ ກົງ-ຕສິ້ນ ເຍີຍ ຍ່ານ ປຸນ ມ່ຽນ ຈົ່ມ ມ່ຽນ ນີອາ.” ນິ່ນ ບົວ ຕສ່ຽວ ກ໊ອງ ເຮນ້ຍ ເຍີຍ ປຸນ ວົ້ວ ເຕົ້າ ມເຊັຍ ຕອນ.

6ມປ່າ ເຢຊູ ກ໊ອງ, “ໄມ້ ຕູ໋ງ ກ໊ອງ ນິ່ນ ມ່າະ! ເມີ່ຍ ບົວ ໂຕສ໋ວ ຫາຍ ຫຍູ່ງ ຫລະເຍົ້າ ນິ່ນ? ນິ່ນ ຮນັ້ງ ນ້າຍ ນໍ ໂຕສ໋ວ ປຸນ ເຢຍ ເຊ ຫລົງ ໄຫ່ ອ໊ະ.

7ເມີ່ຍ ບົວ ຕສັ່ນໆ ມ່າຍ ມ່ຽນ ຈົ່ມ ມ່ຽນ ເຖສົາ ເມີ່ຍ ບົວ ຢຽມ. ຫາຍ ຕສັ່ນ ອ໋ອຍ ໂຕສ໋ວ ຫລົງ ປຸນ ນິ່ນ ບົວ ເຊ ໂຕສ໋ວ ຕຸ໊ ເຍີຍ. ມປ່າ ເມີ່ຍ ບົວ ໄມ້ ຕຸ໊ ເຢຍ ຢຽດ ລິ໌ວ ເຖສົາ ເມີ່ຍ ບົວ ຢຽມ.

8ນ້າຍ ເຕົ້າ ມເຊັຍ ຕອນ, ເອີຍ ນິ່ນ ໄຮ່ ໂຕສ໋ວ ເຍີຍ, ນິ່ນ ຕສ່ຽວ ໂຕສ໋ວ ອ໊ະ. ນິ່ນ ໂຕ໋ ໂຢ້ວ ດາງ ຮຢຽດ ເຢຍ ເຍີຍ ຊິນ, ນິ່ນ ຈາ-ດ່າງ ໂຕສ໋ວ ເຫວີ່ຍ ຫລິ່ວ ເລີ໌ຍ ຕສັ໋ງ ເຢຍ.

9ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ໄມ້ ກຸ໊ນ ຢຽມ ລູ່ງ ເດ໊ຍ ຫາຍ ນອມ ຕ໋ອງ ຕສຸ້ນ ຄູ້ ຝຽນ, ມ່ຽນ ອ໋ອຍ ກ໊ອງ ນ້າຍ ເຕົ້າ ມເຊັຍ ຕອນ ໂຕສ໋ວ ເຍີຍ ເຈົ໊າ-ໂຫລ່ວ ເຫວີ່ຍ ຈັ໋ງ ເຖົາ ນິ່ນ.”

10ເຢຊູ ເຍີຍ ຕສຽບ ເຫຍີ່ຍ ເຕົ້າ ໄຊ-ກໍ໋ ມ່າຍ ເຕົ້າ, ບົ໋ວ ເຫ່ວ ຢູດາດ ອິສະຄາລິໂອດ. ຢູດາດ ມີ່ງ ລໍ໌ ໄຊ ມ່ຽນ ເປຢີ໊ຍ, ອ໋ອຍ ເຕສ໊າະ ເຢຊູ ໝ່າຍ ປຸນ ນິ່ນ ບົວ.

11ໄຊ ມ່ຽນ ເປຢີ໊ຍ ໄຮ໌ ນິ່ນ ຮນັ້ງ ນ້າຍ ນໍ ກ໊ອງ, ນິ່ນ ບົວ ອະເຮນີ້ຍ ໄຫ່ ຢ່າ ແລ໌ງ ປຸນ ຍ່ານ ນິ່ນ. ຢຽມ ໜ່າຍ ຕ້າຍ, ຢູດາດ ຕສ່ຽວ ລໍ໌ ຖຈັງ ເຕສ໊າະ ເຢຊູ ຈິວ ປຸນ ນິ່ນ ບົວ.

12ເຈ໋ຍ ໄມ້ ອັນ ປີ໊ງ ເຍີຍ ອຈົ໊ວ ເຍີຍ ຕສິ໊ບ ຕ້າວ ຮນອຍ, ຕົ້ງ ໄຕ໋ ປະກີ ຢູ້ງ ຕອນ ຫຍັ່ນ ເສຍ ແໝ່ງ ຕສິ໊ບ ວົ້ວ ຮນອຍ, ໄຊ-ກໍ໋ ບົວ ໜ່າຍ ເຢຊູ, “ໄຊ-ເຕ໋ຍ ອ໋ອຍ ເຢຍ ບົວ ຢຽມ ຫາຍ ເບ່ນ ເສຍ ແໝ່ງ ຕສິ໊ບ ເຍີຍ ຫຍັ່ນ ຮົບ ປຸນ ໄຊ-ເຕ໋ຍ ຫຍັ່ນ?”

13ເຢຊູ ຕສ່ຽວ ພ້າຍ ອີ ເຕົ້າ ໄຊ-ກໍ໋ ມີ່ງ ຢ່າ ບົ໋ວ ຕສຢັ໋ງ ນິ່ນ ບົວ, “ເມີ່ຍ ບົວ ອ໋ອຍ ຕສຸ ເປັຍ ຕສີ້ງ ຕສ່ຽວ ມ່າຍ ເຕົ້າ ມ່ຽນ ດາມ ຈ໊ຽນ ເນຍ-ຫະໂລ່ວ ຕສ້າງ ຈ໊ຽນ ວວມ ເຍີຍ, ຕ້າຍ ປວັ້ງ ເມີ່ຍ ບົວ. ອ໋ອຍ ຕສຸ ກັນ ນິ່ນ ມີ່ງ ອ໊ະ.

14ນິ່ນ ເປັຍ ຫາຍ ນອມ ເປຢົ໊າ, ອ໋ອຍ ຕສຸ ໜ່າຍ ກ໋າ ເປຢົ໊າ-ຕສ໊ຽວ, ‘ໄຊ-ເຕ໋ຍ ໜ່າຍ, ນິ່ນ ເຖສົາ ນິ່ນ ເຍີຍ ໄຊ-ກໍ໋ ອ໋ອຍ ຕສຸ ຢຽມ ຫາຍ ຖຈົງ ເປຢົ໊າ ຫຍັ່ນ ເສຍ ແໝ່ງ ຕສິ໊ບ ເຍີຍ ຫຮນາງ?’

15ເປຢົ໊າ-ຕສ໊ຽວ ຕສ່ຽວ ຕໍ້ ເມີ່ຍ ບົວ ຝາວ ມີ່ງ ໝັ່ງ ກູ້ ຫງວ່າຍ ວົ້ວ ດສັ້ງ ເປຢົ໊າ, ມ່າຍ ຖຈົງ ຈັ໊ງ ເຍີຍ. ຫຍູ່ງໆ ມ່າຍ ດສ້ອຍ. ເມີ່ຍ ບົວ ຢຽມ ໜ່າຍ ເຫວີ່ຍ ບົວ ເບ່ນ ອ໊ະ.”

16ໄຊ-ກໍ໋ ບົວ ຕສ່ຽວ ທສວດ ເຈົ໊າ ມີ່ງ ອ໊ະ. ເປັຍ ຕສີ້ງ ມີ່ງ, ປວັດ ຫຍູ່ງໆ ຕ໋ອຍ-ຕິ່ວ ເຢຊູ ກ໊ອງ ເຍີຍ ຫວ່າ. ນິ່ນ ບົວ ຕສ່ຽວ ຢຽມ ວົ້ວ ເບ່ນ ເສຍ ແໝ່ງ ຕສິ໊ບ ເຍີຍ ຫຮນາງ.

17ລູ່ງ ມ໌ານ-ຫຮມວັງ, ເຢຊູ ເຖສົາ ນິ່ນ ເຍີຍ ຕສຽບ ເຫຍີ່ຍ ເຕົ້າ ໄຊ-ກໍ໋ ຕ້າຍ.

18ຫຍັ່ນ ຈ໊ຽນ ຫຮນາງ ວົ້ວ ຕສັ່ນ, ເຢຊູ ກ໊ອງ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຢຽມ ເມີ່ຍ ບົວ ບຸດົ໋ງ ມ່າຍ ເຕົ້າ ອ໋ອຍ ໝ່າຍ ເຢຍ, ຕົ້ງ ຢຽດ ເຕົ້າ ເຖສົາ ເຢຍ ຈວັ່ງ ເຕ້ຍ ຫຍັ່ນ ຫຮນາງ ເຍີຍ ມ່ຽນ.”

19ໄຊ-ກໍ໋ ບົວ ເດສົ້າ ໄຫ່ ຕສ່ຽວ ຢຽດ ເຕົ້າ ຢຽດ ເຕົ້າ ເຍີຍ ໜ່າຍ ເຢຊູ, “ໄມ້ ເຕສີ໌ຍ ເຢຍ ຊ່າະ?”

20ເຢຊູ ເຕົາ, “ເຊ ເມີ່ຍ ບົວ ຕສຽບ ເຫຍີ່ຍ ເຕົ້າ ເຍີຍ ຢຽດ ເຕົ້າ, ຕົ້ງ ເຖສົາ ເຢຍ ຈວັ່ງ ດສ່ອມ ກົ໊ວະ ອຈົ໊ວ ເຍີຍ ຢຽດ ເຕົ້າ.

21ເຢຍ, ປ້າມ ມ່ຽນ ເຍີຍ ຕອນ, ອ໋ອຍ ຕສຸ ເກວີຍ ເສີຍ, ຮນັ້ງ ກີງ-ໂຊວ ກ໊ອງ ນໍ. ມປ່າ ໝ່າຍ ເຢຍ ວົ້ວ ເຕົ້າ ຕສູ໊ງ ອ໋ອຍ ຕສຸ ໂຄ້ວ ອ໊ະ. ນິ່ນ ໄມ້ ຕູ໋ງ ທສວດ ເສີຍ ເກົ້າ ຫລົງ.”

22ຫຍັ່ນ ຈ໊ຽນ ຫຮນາງ ວົ້ວ ຕສັ່ນ, ເຢຊູ ເຕສ໊າະ ອຈົ໊ວ ຕ້າຍ, ແລ໌ງ ຕສີ້ງ ລິ໌ວ ທິນ-ຮູ່ງ, ຕສ່ຽວ ແມະ ອກອຍ ປຸນ ນິ່ນ ເຍີຍ ໄຊ-ກໍ໋ ຢ່າ ກ໊ອງ, “ຕສິ໊ບ ຈ໊ຽນ ອ໊ະ. ນ້າຍ ເຊ ເຢຍ ເຍີຍ ຊິນ.”

23ເຢຊູ ແອ໋ງ ເຕສ໊າະ ຕສ໊ານ ອະຫງຸ່ນ ຕິ໊ວ ຕ້າຍ, ແລ໌ງ ຕສີ້ງ ທິນ-ຮູ່ງ ຢ່າ ທສຸ້ນ ປຸນ ນິ່ນ ບົວ ຮົບ. ນິ່ນ ບົວ ຢຽດ ຕສູ໊ງ ຕສ່ຽວ ຈວັ່ງ ວົ້ວ ນອມ ຕສ໊ານ ຮົບ.

24ເຢຊູ ແອ໋ງ ບົ໋ວ ນິ່ນ ບົວ, “ນ້າຍ ເຊ ເຢຍ ເຍີຍ ດສຢ໊າມ ເຫວີ່ຍ ຫລຽບ ເຈ໌ຍ ທິນ-ຮູ່ງ ເຍີຍ ແຫງ່ງ ຫວ່າ. ເຊ ເຫວີ່ຍ ມ່ຽນ ທສ້ຳ ຫລ່ຽວ ທສວດ ຕ້າຍ.

25ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຢຽມ ນ້າຍ ມີ່ງ, ເຢຍ ໄມ້ ຮົບ ນ້າຍ ອະຫງຸ່ນ ຕິ໊ວ. ຕສົ໊ວ ເຖົາ ຢຽມ ທິນ-ຮູ່ງ ເຍີຍ ກົ໊ວະ ວົ້ວ ນອມ ຮນອຍ ເຢຍ ເຖສົາ ເມີ່ຍ ບົວ ຊຢັງ-ຮົບ ເຈ໋ຍ.”

26ນິ່ນ ບົວ ປ໋າວ ລິ໌ວ ດສູງ ຕສ່ຽວ ທສວດ ຕ້າຍ, ມີ່ງ ວົ້ວ ກະລັ້ນ ບົງ.

27ເຢຊູ ກ໊ອງ ບົ໋ວ ນິ່ນ ເຍີຍ ໄຊ-ກໍ໋, “ເມີ່ຍ ບົວ ຢຽດ ຕສູ໊ງ ອ໋ອຍ ກວັ່ງ ຈ໊ຽນ ເຢຍ ເປຢົ໋າ, ເຫວີ່ຍ ຕສຸ ກີງ-ໂຊວ ເຟ້ຍ ຈ໊ຽນ ກ໊ອງ, ‘ທິນ-ຮູ່ງ ອ໋ອຍ ໄຕ໋ ປະກີ ຢູ້ງ ເຍີຍ ຕສ໊ຽວ, ປະກີ ຢູ້ງ ຕສ່ຽວ ດສ໋ານ ເດສ່ງ ໝີ່ ອ໊ະ.’

28ມປ່າ ເຢຍ ໄຕ່ ມີ່ງ ທິນ-ຮູ່ງ ແອ໋ງ ປຸນ ເຢຍ ນັ່ງ ຕ້າຍ, ເຢຍ ຕສ່ຽວ ມີ່ງ ກາລິລີ ແຊ້ງ ດ່າງ ເມີ່ຍ ບົວ.”

29ປີເຕ ບົ໋ວ ເຢຊູ, “ໄຊ-ເຕ໋ຍ ອ່າ, ໄມ້ ກຸ໊ນ ນິ່ນ ບົວ ຢຽດ ຕສູ໊ງ ກວັ່ງ ເມີ່ຍ, ເຢຍ ໄມ້ ກວັ່ງ.”

30ເຢຊູ ບົ໋ວ ປີເຕ, “ເຢຍ ກ໊ອງ ຕສຽນ ບົ໋ວ ເມີ່ຍ, ອີ້ ມ໌ວນ, ໄຈ ໄມ້ ແກ້ງ ອກ໋າຍ ອີ ດສຸ່ນ, ເມີ່ຍ ຕສູ໊ງ ໄມ້ ຫຍ່ຽມ ເຢຍ ປົວ ດສຸ່ນ.”

31ປີເຕ ແອ໋ງ ກ໊ອງ ເກົ້າ ແຫງ່ງ, “ໄມ້ ກຸ໊ນ ເຢຍ ຕສຸ ເຖສົາ ໄຊ-ເຕ໋ຍ ໄຕ່, ເຢຍ ຢຽດ ລິ໌ວ ຫຍ່ຽມ, ໄມ້ ກວັ່ງ ເມີ່ຍ.” ວົ້ວ ເຕີ໋ຍ ໄຊ-ກໍ໋ ຢຽດ ຕສູ໊ງ ຢ່າ ຟີ່ ຮນັ້ງ ເຍີຍ ກ໊ອງ.

32ນິ່ນ ບົວ ຕສ່ຽວ ມີ່ງ ເຖົາ ນອມ ຕ໋ອງ, ບົ໋ວ ເຫ່ວ ເກດເສມານີ. ເຢຊູ ບົ໋ວ ນິ່ນ ເຍີຍ ໄຊ-ກໍ໋, “ເມີ່ຍ ບົວ ເຕສວີ໌ຍ ຈ໊ຽນ ນ້າຍ ຕສົ໊ວ ເຢຍ ເຕົ໋າ ເກົ໋າ ໂອ່.”

33ນິ່ນ ຕສ່ຽວ ຕໍ້ ປີເຕ, ຢາກອບ, ໂຢຮັນ ເຖສົາ ຈ໊ຽນ ນິ່ນ ມີ່ງ. ວົ້ວ ຕສັ່ນ ເຢຊູ ໄຮ໌ ໂຮຍ້ວ ມຸນ, ເດສົ້າ ຕຸ໊ ໂຄ້ວ ໄຫ່.

34ເຢຊູ ບົ໋ວ ນິ່ນ ບົວ, “ເຢຍ ໄຮ໌ ຕສະເກ້ງ! ເດສົ້າ ໄຫ່, ຮນັ້ງ ໄຮ່ ໄຕ່ ເຍີຍ ນໍ. ເມີ່ຍ ບົວ ຢຽມ ນ້າຍ ກີງ ໂຮຍ້ວ ຕສົ໊ວ ຈ໊ຽນ ໂອ່.”

35ເຢຊູ ແອ໋ງ ເຈ໋ຍ ມີ່ງ ເຕີ໋ຍ ຕສ່ຽວ ບ໊າບ ເອຈ່ຍ ເດົາ ເຕົ໋າ ເກົ໋າ ໂທ້ ທິນ-ຮູ່ງ ເຊ ກ໊ອງ ໄຮ່ ນໍ, ປຸນ ນິ່ນ ໄຮ່ ຊິ້ມ ດຸ໊ດ ວົ້ວ ນອມ ສ່ຽວ ໂຄ້ວ ເຍີຍ ຕສຢັ້ງ ໂຫ່.

36ນິ່ນ ກ໊ອງ, “ອາ ເຕຍ ອ້າ! ອາ ເຕຍ! ໝ່ານ ສີ່ ເຕຍ ໄຮ່ ໂຕສ໋ວ ເຍີຍ. ໂທ້ ເຕສ໊າະ ອກອຍ ເຢຍ ອ໋ອຍ ຕສຸ ຮົບ ນ້າຍ ນອມ ຕສ໊ານ. ມປ່າ ໄມ້ ຕູ໋ງ ເອີຍ ເຢຍ ເຍີຍ ເອີ໋ຍ. ອ໋ອຍ ຕສຸ ເອີຍ ເຕຍ ເຍີຍ ເອີ໋ຍ ຮນັ້ງ.”

37ເຢຊູ ເຕົ໋າ ເກົ໋າ ລິ໌ວ, ຕສ່ຽວ ດສ໋ວນ ຕ້າຍ ປວັດ ວົ້ວ ເຕີ໋ຍ ປົວ ເຕົ້າ ໄຊ-ກໍ໋ ມອຈ້ອມ ເດສ່ງ ໝີ່ ອ໊ະ. ນິ່ນ ບົ໋ວ ປີເຕ, “ຊີມົນ ອ້າ! ເມີ່ຍ ມອຈ້ອມ ໝີ່ ອ໊ະ? ເມີ່ຍ ໄມ້ ໄຮ່ ກີງ ຈ໊ຽນ ຕສົ໊ວ ຢຽດ ນອມ ຕສຢັ້ງ ໂຫ່ ໄຟ?

38ອ໋ອຍ ຕສຸ ກີງ ຈ໊ຽນ ໂຮຍ້ວ ເຕົ໋າ ເກົ໋າ, ໂທ້ ທິນ-ຮູ່ງ ໄມ້ ຕູ໋ງ ປຸນ ເມີ່ຍ ບົວ ປວັ້ງ ຕສຸ ເສີຍ ໂຮຍ້ວ ເຍີຍ ສີ່. ເມີ່ຍ ບົວ ເຍີຍ ໂຮຍ້ວ ອ໋ອຍ ໂຕສ໋ວ ຫອບ, ມປ່າ ຊິນ ຕສັ່ງ ເມົາ ໄຫ່.”

39ເຢຊູ ແອ໋ງ ມີ່ງ ເຕົ໋າ ເກົ໋າ ດສຸ່ນ, ຢ່າ ຮນັ້ງ ຕສິ້ນ ດ່າງ ວົ້ວ ດສຸ່ນ ນໍ ກ໊ອງ.

40ນິ່ນ ແອ໋ງ ດສ໋ວນ ເຖົາ ໄຊ-ກໍ໋ ວົ້ວ, ປວັດ ນິ່ນ ບົວ ມອຈ້ອມ ໝີ່ ອ໊ະ, ເຫວີ່ຍ ຕສຸ ມຕສີງ ຫຍຸຍ! ໄຫ່, ໜູງ ໄມ້ ອກອຍ. ນິ່ນ ບົວ ຢ່າ ໄມ້ ຮິ້ວ ຕຸ໊ ອ໋ອຍ ຕສຸ ຮນັ້ງ ຫາຍ ນໍ ເຕົາ ເຢຊູ.

41ເຢຊູ ແອ໋ງ ດສ໋ວນ ຕະຟາມ ດສຸ່ນ, ບົ໋ວ ນິ່ນ ບົວ, “ເມີ່ຍ ບົວ ຖສໍ່ ຢຽມ ໜ່າຍ ເປວີ໋ຍ ມອຈ້ອມ ຮິດ ຂວນ? ເກົ໋າ ອ໊ະ. ຕສຢັ້ງ ໂຫ່ ເຖົາ ອ໊ະ. ເຢຍ, ປ້າມ ມ່ຽນ ເຍີຍ ຕອນ, ຕສຸ ຈິວ ປຸນ ຢຽມ ຕສຸ໌ຍ-ມ່ຽນ ເຍີຍ ປົ໌ວ-ເດ໊ຍ.

42ເຈ໌ຍ ຊິນ ຕ້າຍ, ບົວ ມີ່ງ ອ໊ະ. ໝັ່ງ ກ໋າ ວົ້ວ! ໝ່າຍ ເຢຍ ວົ້ວ ເຕົ້າ ມ່ຽນ ຕ້າຍ ເຖົາ ອ໊ະ.”

43ເຢຊູ ກ໊ອງ ຫວ່າ ຕສູ໊ງ ໄມ້ ແກ້ງ ເຊດ, ຕສຽບ ເຫຍີ່ຍ ເຕົ້າ ໄຊ-ກໍ໋ ເຍີຍ ຢຽດ ເຕົ້າ, ບົ໋ວ ເຫ່ວ ຢູດາດ, ລ່ຽມ ເຕສີ້ຍ ຕ້າຍ ເຖົາ ອ໊ະ. ແອ໋ງ ມ່າຍ ໄຊ ມ່ຽນ ເປຢີ໊ຍ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ມ່ຽນ ໂກ໋ ພ້າຍ ຕ້າຍ ເຍີຍ ມ່ຽນ ທສ້ຳ, ຕໍ້ ຈ໊ຽນ ດສຸ ດ໊າວ, ນັ້ນ ຈ໊ຽນ ດຢັ໋ງ-ດົ໋ນ, ກັນ ຈ໊ຽນ ຕ້າຍ.

44ໝ່າຍ ເຢຊູ ວົ້ວ ເຕົ້າ ຈາ-ດ່າງ ບົ໋ວ ຕສຢັ໋ງ ວົ້ວ ເຕີ໋ຍ, ນິ່ນ ອ໋ອຍ ໂຕສ໋ວ ນອມ ຈັ໋ງ-ໂຫ່ ປຸນ ນິ່ນ ບົວ ຮິ້ວ ຕຸ໊ ເຢຊູ. ນິ່ນ ກ໊ອງ, “ເຢຍ ຕສົມ ຫາຍ ເຕົ້າ, ເຊ ຕົ້ງ ເມີ່ຍ ບົວ ອ໋ອຍ ເຕສ໊າະ ວົ້ວ ເຕົ້າ ອ໊ະ. ເຕສ໊າະ ນິ່ນ, ໂກ໋ວ ຫລົງ, ເຄນ ຈ໊ຽນ ມີ່ງ ອ໊ະ.”

45ຢູດາດ ຢ໊ຽດ ເຖົາ ຕສ່ຽວ ແປງ ຕສະ ເຍີຍ ມີ່ງ ເຢຊູ ວົ້ວ ຢ່າ ກ໊ອງ, “ໄຊ-ເຕ໋ຍ ອ້າ!” ແອ໋ງ ຕສົມ ນິ່ນ ເຍີຍ ຮມຽນ.

46ວົ້ວ ເຕີ໋ຍ ມ່ຽນ ຕສ່ຽວ ເອຈ່ຍ ປົ໌ວ ເຕສ໊າະ ເຢຊູ ທຈຳ ຈ໊ຽນ ອ໊ະ.

47ມປ່າ ມ່າຍ ເຕົ້າ ໂຊ້ວ ກະເຮລນ ເຍີຍ ມ່ຽນ ແປງ ນິ່ນ ເຍີຍ ດສຸ ດ໊າວ ທສວດ, ຮງະ ຕົ້ມ ໄຊ ມ່ຽນ ເຍີຍ ໂນ່ວ, ໄພ ຕສຸ ໂນ່ວ ເຍີຍ ຢຽດ ປູງ ມນ່ອມ ດຸ໊ດ ມີ່ງ.

48ເຢຊູ ຕ໋ອຍ ນິ່ນ ບົວ ກ໊ອງ, “ເມີ່ຍ ບົວ ປວັດ ເຢຍ ຮນັ້ງ ຕສະ ແປງ ຖສີງ ຕ້າຍ ຕໍ້ ຈ໊ຽນ ດສຸ ດ໊າວ ເຖສົາ ດຢັ໋ງ-ດົ໋ນ ຕ້າຍ ເຕສ໊າະ ເຢຍ?

49ເຢຍ ຮນອຍໆ ເຖສົາ ເມີ່ຍ ບົວ ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ ອຈ໋າວ ມ່ຽນ, ເມີ່ຍ ບົວ ຢ່າ ໄມ້ ເຕສ໊າະ ເຢຍ. ມປ່າ ເຟ້ຍ ຈ໊ຽນ ກີງ-ໂຊວ ເຍີຍ ຫວ່າ ອ໋ອຍ ຕສຸ ທສວດ ຕ້າຍ ຕ໋ອຍ-ຕິ່ວ.”

50ໄຊ-ກໍ໋ ບົວ ຢຽດ ຕສູ໊ງ ຕສຢັງ ໜ່າຍ ກວັ່ງ ຈ໊ຽນ ນິ່ນ ເປຢົ໋າ ເດສ່ງ ໝີ່ ອ໊ະ.

51ມ່າຍ ເຕົ້າ ໂຮ່ວ ແຊງ, ຂູງ ຜົງ ຄວ້າຍ ຫລະມ່າ ເດຍ, ກັນ ຈ໊ຽນ ເຢຊູ ມີ່ງ. ວົ້ວ ເຕີ໋ຍ ມ່ຽນ ຕສ່ຽວ ອ໋ອຍ ເຕສ໊າະ ນິ່ນ,

52ມປ່າ ນິ່ນ ກວັ່ງ ຈ໊ຽນ ຫລະມ່າ ເດຍ ວົ້ວ, ແລ່ງ ແກ໊ງ ເຍີຍ ເປຢົ໋າ.

53ເຕສ໊າະ ເຢຊູ ວົ້ວ ເຕີ໋ຍ ຕໍ້ ເຢຊູ ມີ່ງ ຕົ້ມ ໄຊ ມ່ຽນ ເຍີຍ ເປຢົ໊າ. ຕສວັ໋ງ ໄຊ ມ່ຽນ ເປຢີ໊ຍ ເຖສົາ ມ່ຽນ ໂກ໋ ເຖສົາ ອຈ໋າວ ເລີ໌ຍ ເຍີຍ ຟິນ-ແຊງ ຢ່າ ກັ໊ບ ຕສຸ໊ນ ວົ້ວ.

54ປີເຕ ກັນ ຈ໊ຽນ ມີ່ງ ມປ່າ ເລີ່ຍ ໂກ ເຕີ໋ຍ ເຍີຍ, ຕສ່ຽວ ເຖົາ ຕົ້ມ ໄຊ ມ່ຽນ ເຍີຍ ເປຢົ໊າ. ນິ່ນ ເປັຍ ຫລາດ ກະຍົ໌ວ, ເຖສົາ ຕສົ໊ວ ເປຢົ໊າ ເຍີຍ ແປງ ເຕສວີ໌ຍ ຈ໊ຽນ ດສ໋າວ ໂຕ໌ວ.

55ໄຊ ມ່ຽນ ເປຢີ໊ຍ ເຖສົາ ກຸ໊ນ ສີ່ ຫວຸ່ຍ ເຍີຍ ຕສວັ໋ງ ມ່ຽນ ອ໋ອຍ ລໍ໌ ຕສອງ-ເຕສ໋ງ ໂກ໋ ເຢຊູ ເຫວີ່ຍ ໄຕ໋ ນິ່ນ, ມປ່າ ລໍ໌ ໄມ້ ຕຸ໊ ຫາຍ ຫຍູ່ງ ຕສອງ-ເຕສ໋ງ.

56ມ່າຍ ມ່ຽນ ທສ້ຳ ເຍີຍ ໂຕສ໋ວ ຈ໊າ ຕສອງ-ເຕສ໋ງ ໂກ໋ ນິ່ນ, ມປ່າ ນິ່ນ ບົວ ກ໊ອງ ເຍີຍ ຫວ່າ ໄມ້ ຕ໋ອຍ.

57ແອ໋ງ ມ່າຍ ເຕີ໋ຍ ມ່ຽນ ໂຊ້ວ ເຈ໌ຍ ຕ້າຍ ໂຕສ໋ວ ຈ໊າ ຕສອງ-ເຕສ໋ງ ໂກ໋ ເຢຊູ. ນິ່ນ ບົວ ກ໊ອງ,

58“ເຢຍ ບົວ ໄຮ໌ ນິ່ນ ກ໊ອງ, ‘ເຢຍ ອ໋ອຍ ເຕສ໊າະ ມ່ຽນ ເຍີຍ ປົ໌ວ ໂຕສ໋ວ ຕ້າຍ ນ້າຍ ນອມ ຕສັ່ງ ທິນ-ຮູ່ງ ເຍີຍ ເປຢົ໊າ ແທສະ ເດສ່ງ. ອກະຮ້າ ປົວ ຮນອຍ ເຢຍ ແອ໋ງ ກັ້ນ ເຖສີຍ ນອມ, ຕົ້ງ ໄມ້ ເຕສີ໌ຍ ມ່ຽນ ເຍີຍ ປົ໌ວ ໂຕສ໋ວ ເຍີຍ.’”

59ມປ່າ ລ່ຽມ ນິ່ນ ບົວ ກ໊ອງ ນ້າຍ ເຕີ໋ຍ ຕສອງ-ເຕສ໋ງ ເຍີຍ ຫວ່າ ໄມ້ ຕ໋ອຍ.

60ຕົ້ມ ໄຊ ມ່ຽນ ຢຽມ ຕສວັ໋ງ ມ່ຽນ ເຍີຍ ດສະຮມຽນ ໂຊ້ວ ເຈ໌ຍ ຕ້າຍ ໜ່າຍ ເຢຊູ, “ນ້າຍ ເຕີ໋ຍ ມ່ຽນ ຮນັ້ງ ນ້າຍ ນໍ ໂກ໋ ເມີ່ຍ, ເມີ່ຍ ໄມ້ ເຕົາ ໄຟ?”

61ມປ່າ ເຢຊູ ໄມ້ ໂຄ ໂລ. ຢຽດ ໂຈ໋ວ ຢ່າ ໄມ້ ເຕົາ. ຕົ້ມ ໄຊ ມ່ຽນ ແອ໋ງ ໜ່າຍ ເຢຊູ, “ວົ້ວ ຫຍູ່ງ, ເມີ່ຍ ໂຕສ໋ວ ກີຕູ່, ຕົ້ງ ມ່ຽນ ເທສງ ວົ້ວ ເຕົ້າ ທິນ-ຮູ່ງ ເຍີຍ ຕອນ ໄຟ?”

62ເຢຊູ ເຕົາ, “ເຕສີ໌ຍ ເຍີຍ. ເມີ່ຍ ບົວ ຢຽດ ຕສູ໊ງ ຢ່າ ອ໋ອຍ ຕຸ໊ ປວັດ ເຢຍ, ປ້າມ ມ່ຽນ ເຍີຍ ຕອນ, ເຕສວີ໌ຍ ຈ໊ຽນ ເນິ່ນ ເຈ໋ຍ ເຍີຍ ທິນ-ຮູ່ງ ເຍີຍ ບຢ່າວ ແໝງ, ຢ່າ ຢຽມ ວົ້ວ ລູ່ງ ເຍີຍ ບ໋ວນ ເອຈ່ຍ ຕ້າຍ.”

63ຕົ້ມ ໄຊ ມ່ຽນ ໄຮ໌ ນ້າຍ ເຕີ໋ຍ ຫວ່າ ຕສ່ຽວ ເປ໊ດ ນິ່ນ ກັ້ນ ເຍີຍ ລຸຍ ຢ່າ ກ໊ອງ, “ບົວ ໄມ້ ຕສຸ ລໍ໌ ຫາຍ ເຕົ້າ ໂຕສ໋ວ ຕສອງ-ເຕສ໋ງ ອ໊ະ.

64ເມີ່ຍ ບົວ ໄຮ໌ ນິ່ນ ຄີ ທິນ-ຮູ່ງ. ເມີ່ຍ ບົວ ອ໋ອຍ ຮນັ້ງ ຫາຍ ນໍ ຕີ່ງ ນິ່ນ?” ນິ່ນ ບົວ ຢຽດ ຕສູ໊ງ ຕີ່ງ ນິ່ນ ຕ່ອງ. ຕສີ່ ຕຸ໊ ໄຕ່ ອ໊ະ.

65ມ່າຍ ເຕີ໋ຍ ຢຽມ ວົ້ວ ເຍີຍ ມ່ຽນ ຕສ່ຽວ ທຸ້ຍ ວວມ-ດສຸ້ຍ ແນດ ເຢຊູ, ແອ໋ງ ປວັງ ຈ໊ຽນ ນິ່ນ ເຍີຍ ຮມຽນ, ເບ໊າະ ນິ່ນ, ຢ່າ ກ໊ອງ, “ໄທສ ກ໋າ! ຫາຍ ເຕົ້າ ເບ໊າະ ເມີ່ຍ?” ແປງ ຢ່າ ໄບ໋ ນິ່ນ ເຍີຍ ຮມຽນ.

66ປີເຕ ຖສໍ່ ຢຽມ ຈ໊ຽນ ກະເດ໊ຍ, ຫລາດ ກະຍົ໌ວ, ມ່າຍ ຕົ້ມ ໄຊ ມ່ຽນ ເຍີຍ ຢຽດ ເຕົ້າ ມເຊັຍ ໂປວ ຕ້າຍ.

67ນິ່ນ ປວັດ ປີເຕ ຢຽມ ວົ້ວ ດສ໋າວ ໂຕ໌ວ ຕສ່ຽວ ນຸໆ ເຍີຍ ໝັ່ງ ຈ໊ຽນ ນິ່ນ ກ໊ອງ, “ເມີ່ຍ ຢ່າ ກັນ ວົ້ວ ເຕົ້າ ນາຊາເລດ ມ່ຽນ, ເຢຊູ.”

68ມປ່າ ປີເຕ ໄມ້ ຫຍ່ຽມ. ນິ່ນ ເຕົາ, “ເຢຍ ໄມ້ ຮິ້ວ ຢ່າ ໄມ້ ເມ່ງ ແປະ ເມີ່ຍ ກ໊ອງ ຫາຍ ຫຍູ່ງ.” ປີເຕ ຕສ່ຽວ ທສວດ ເຖົາ ຫລາດ ແກ້ງ. ວົ້ວ ຕສັ່ນ ໄຈ ຕສ່ຽວ ອກ໋າຍ ອ໊ະ.

69ວົ້ວ ເຕົ້າ ມເຊັຍ ໂປວ ປວັດ ນິ່ນ ຢຽມ ວົ້ວ ແອ໋ງ ບົ໋ວ ໂຊ້ວ ກະເຮລນ ວົ້ວ ເຕີ໋ຍ ມ່ຽນ, “ນ້າຍ ເຕົ້າ ມ່ຽນ ເປ໋ນ ວົ້ວ ກວັ້ນ ມ່ຽນ ເຍີຍ ຢຽດ ເຕົ້າ.”

70ມປ່າ ປີເຕ ແອ໋ງ ໄມ້ ຫຍ່ຽມ. ຢຽດ ຕສັ່ນ ເຈ໋ຍ, ໂຊ້ວ ກະເຮລນ ວົ້ວ ເຕີ໋ຍ ມ່ຽນ ແອ໋ງ ໂກ໋ ປີເຕ ກ໊ອງ, “ເມີ່ຍ ຕສະເກ້ງ ເປ໋ນ ວົ້ວ ກວັ້ນ ມ່ຽນ ເຍີຍ ຢຽດ ເຕົ້າ ອ໊ະ, ເຫວີ່ຍ ຕສຸ ເມີ່ຍ ເຊ ກາລິລີ ມ່ຽນ.”

71ປີເຕ ຕສ່ຽວ ໂດ໊ວ ເຈ໌ຍ ຕສ໋ຽວ ກ໊ອງ, “ເຊ ກ໊ອງ ເຢຍ ກ໊ອງ ໄມ້ ຕສຽນ ນໍ, ແລ໌ງ ປຸນ ທິນ-ຮູ່ງ ຕີ່ງ ເຢຍ ເຍີຍ ຕສຸ໌ຍ ອ໊ະ. ເຢຍ ຕສະເກ້ງ! ໄມ້ ຮິ້ວ ຕຸ໊ ເມີ່ຍ ບົວ ກ໊ອງ ວົ້ວ ລ່ານ ມ່ຽນ.”

72ລ່ຽມ ເຕສີ້ຍ ໄຈ ຕສ່ຽວ ອກ໋າຍ ຕະເຫຍີ່ຍ ດສຸ່ນ. ປີເຕ ຈັ໋ງ ຕສຸ ເຢຊູ ບົ໋ວ ເຈ໋ຍ ນິ່ນ, “ໄຈ ໄມ້ ແກ້ງ ອກ໋າຍ ອີ ດສຸ່ນ, ເມີ່ຍ ໄມ້ ຫຍ່ຽມ ເຢຍ ປົວ ດສຸ່ນ.” ປີເຕ ຈັ໋ງ ຕສຸ ວົ້ວ ເຕີ໋ຍ ຫວ່າ ຕສ່ຽວ ຍ້ຽມ ຕຸ໊ ໂຄ້ວ ໄຫ່.

← Chapter 13 Jump to: Chapter 15 →