Song of Solomon 1

Lao Bible (ฉบับอักษรลาว)

Jump to: Chapter 2 →

1ຊາໂລມອນ ເກົ້າ ຄູ່ ໝວັງ ເຈ໋ຍ ເຍີຍ ດສູງ.

2ໂທ້ ເມີ່ຍ ຫລົ່ງ ເມີ່ຍ ເຍີຍ ດສຸ້ຍ ຕສົມ ເຢຍ, ເຫວີ່ຍ ຕສຸ ເມີ່ຍ ຮນ້ຳ ເຢຍ ເຊ ເກົ້າ ຫລົງ ອະຫງຸ່ນ ຕິ໊ວ.

3ເມີ່ຍ ດສ໊າດ ຊິນ ເຍີຍ ໂຢ້ວ ຮວ່ວນໆ ເຍີຍ ດາງ, ເມີ່ຍ ເຍີຍ ເມ່ງ ຮນັ້ງ ໂຕ໋ ທສວດ ເຍີຍ ໂຢ້ວ ດາງ, ເຫວີ່ຍ ນ້າຍ ຕສວັ໋ງ ເຊັຍ ຮນ້ຳ ເມີ່ຍ.

4ໂທ້ ຕໍ້ ເຢຍ ເຖສົາ ເມີ່ຍ ມີ່ງ. ປຸນ ເຢຍ ບົວ ຊຽບໆ ເຍີຍ ມີ່ງ ມ່າະ! ຮູ່ງ ເຕ໋ຍ ຕໍ້ ເຢຍ ເປັຍ ນິ່ນ ເຍີຍ ເກນ. ເຢຍ ບົວ ຕສ່ຽວ ເຫວີ່ຍ ເມີ່ຍ ອຈຽນ-ໂຢ້ວ ອອນ-ເຫລາະ. ເຢຍ ບົວ ຕສ່ຽວ ອ໋ອຍ ເທສງ ເມີ່ຍ ດົ່ງ ໜ່າຍ ຮນ້ຳ ເຢຍ ເກົ້າ ທສ້ຳ ອະຫງຸ່ນ ຕິ໊ວ-ຄູ້. ຕສວັ໋ງ ມເຊັຍ ຕອນ ຮນ້ຳ ເມີ່ຍ ເຊ ຫອບ ເຍີຍ.

5ໂອ ເຢລູຊາເລມ ເຍີຍ ຕສວັ໋ງ ເຊັຍ ອ່າ, ໄມ້ ກຸ໊ນ ເຢຍ ເຈັ໊ຍ, ມປ່າ ເດສວີ່ຍ ເຍີຍ, ຮນັ້ງ ເຄດາ ເຍີຍ ດົ໊ບ-ລິ່ວ ຢ່າ ຮນັ້ງ ຊາໂລມອນ ເຍີຍ ຮູ່ງ ຕິ່ນ ເຍີຍ ແບະ ແກ້ງ ເດຍ.

6ໄມ້ ຕູ໋ງ ໝັ່ງ ເຜຍ ເຢຍ ເຫວີ່ຍ ຕສຸ ເຢຍ ເຈັ໊ຍ. ເຢຍ ເຈັ໊ຍ ເຫວີ່ຍ ຕສຸ ຫຍຸດ ພຸຍ. ເຖສົາ ເຢຍ ຈວັ່ງ ມາ ເຍີຍ ກໍ໋ ເຖຈຍ ເຈ໌ຍ ເຢຍ, ອ໊າບ ເຢຍ ໂກ໋ວ ອະຫງຸ່ນ ຫຮວີງ, ມປ່າ ເຢຍ ກັ້ນ ເຍີຍ ອະຫງຸ່ນ ຫຮວີງ ເຢຍ ໄມ້ ຕຸ໊ ໂກ໋ວ.

7ເຢຍ ເຍີຍ ໂຮຍ້ວ ຮນ້ຳ ເຍີຍ ມ່ຽນ ອ້າ! ໂທ້ ເມີ່ຍ ບົ໋ວ ເຢຍ, ເມີ່ຍ ຢຽມ ຫາຍ ນອມ ຕ໋ອງ ປູ໋ງ ປະກີ ຢູ້ງ? ລູ່ງ ອ໋ານ ເມີ່ຍ ປຸນ ເມີ່ຍ ເຍີຍ ປະກີ ຢູ້ງ ຮິດ ຂວນ ຫາຍ ນອມ ຕ໋ອງ? ເຢຍ ເຫວີ່ຍ ຫາຍ ຕິ່ວ ອ໋ອຍ ຕສຸ ຮນັ້ງ ບຢ໌ອງ ຈ໊ຽນ ຮມຽນ ເຍີຍ ມເຊັຍ ຕອນ ຢຽມ ເມີ່ຍ ເຍີຍ ຕ່ອຍ ເຍີຍ ປະກີ ຢູ້ງ ກວັ້ນ ກະເຮລນ?

8ເກົ້າ ເດສວີ່ຍ ເຈ໋ຍ ເຍີຍ ເຊັຍ ອ່າ, ເຊ ກ໊ອງ ເມີ່ຍ ໄມ້ ຮິ້ວ ນໍ, ຕສິ້ມ ຈ໊ຽນ ປະກີ ຢູ້ງ ກວັ້ນ ເຍີຍ ເຕີ້ຍ ມີ່ງ. ກຸ໊ນ ປູ໋ງ ເມີ່ຍ ເຍີຍ ຢູ້ງ ຢຽມ ໂກ໋ວ ຢູ້ງ ມ່ຽນ ເຍີຍ ດົ໊ບ-ລິ່ວ ກະເຮລນ.

9ເຢຍ ຮນ້ຳ ເຍີຍ ເຊັຍ ອ້າ! ເຢຍ ເປີ໊ຍ ເມີ່ຍ ຮນັ້ງ ຟາໂລ ຮູ່ງ ທໍ ເທສຍ ເຍີຍ ມ໌າ ເດສວີ່ຍ.

10ເມີ່ຍ ເຍີຍ ອີ ປູງ ຂຳ-ປຸຍ ມ່າຍ ຕສອງ ເດສວີ່ຍ ເຍີຍ ກະນ້າຍ, ເມີ່ຍ ເຍີຍ ຈາງ ຕັ້ງ ຈ໊ຽນ ຖສຸນ ຕ້າຍ ເຍີຍ ໂຕສວ-ປູ໊.

11ເຢຍ ບົວ ອ໋ອຍ ຫລົ່ງ ຈຽມ ໂຕສ໋ວ ຊຽວ-ເຊດ ປຸນ ເມີ່ຍ, ແອ໋ງ ຫລົ່ງ ຍ່ານ ຮຢຽດ ຜຸຍ ຈ໊ຽນ.

12ຮູ່ງ ເຕ໋ຍ ເຕສວີ໌ຍ ຈ໊ຽນ ນິ່ນ ເຍີຍ ເຕ້ຍ ເຍີຍ ຕສຢັ້ງ ໂຫ່, ເຢຍ ເຍີຍ ໂຢ້ວ ດາງ ທສວດ ດາງ ເຍີຍ ເຖຈຍ ປວັ໊ງ.

13ເຢຍ ຮນ້ຳ ເຍີຍ ຕອນ ເຫວີ່ຍ ເຢຍ ເຊ ຮນັ້ງ ຢຽດ ບົວະ ມູຢໍ່ ດາງ, ຕສັ່ນໆ ຢຽມ ເຢຍ ເຍີຍ ຫລະຄວດ.

14ເຢຍ ຮນ້ຳ ເຍີຍ ຕອນ ເຫວີ່ຍ ເຢຍ ເຊ ຮນັ້ງ ຢຽດ ຈ້ອຍ ຝົ່ງ ຟິນ ປຢັ້ງ ຢຽມ ເອນເກດີ ເຍີຍ ອະຫງຸ່ນ ຫຮວີງ ກະຍົ໌ວ.

15ເຢຍ ຮນ້ຳ ເຍີຍ ເຊັຍ ອ່າ, ເມີ່ຍ ເດສວີ່ຍ ໄຫ່. ເມີ່ຍ ຕສະເກ້ງ! ເດສວີ່ຍ. ເມີ່ຍ ເຍີຍ ມຕສີງ ຮນັ້ງ ແປະ ກົ໊ບ ນໍ.

16ເຢຍ ຮນ້ຳ ເຍີຍ ຕອນ ອ້າ! ເມີ່ຍ ເດສວີ່ຍ ໄຫ່, ເມີ່ຍ ຕສະເກ້ງ! ເດສວີ່ຍ. ບົວ ເຍີຍ ໂຖສວ ເຊ ເມ້ຍ-ຍ໌ຽມ.

17ບົວ ເຍີຍ ເປຢົ໊າ ເຍີຍ ຕູ໌ງ-ແຮ່ງ ເຊ ສີດາ ຕສົ້ງ ດຢັ໋ງ. ຕສົ້ງ ດຢັ໋ງ ໂຕສ໋ວ ບົວ ເຍີຍ ແຊ່ງ ຊ້ຽວ.

Jump to: Chapter 2 →