Song of Solomon 8

Lao Bible (ฉบับอักษรลาว)

← Chapter 7 Jump to:

1ປານ ໄມ້ ຕຸ໊ ເມີ່ຍ ໂຕສ໋ວ ເຢຍ ເຍີຍ ກໍ໋, ເຊ ຈວັ່ງ ມາ ຮົບ ຫຍໍ ເຍີຍ ມົ໌ວ-ຕ່ອຍ. ເຊ ກ໊ອງ ຮນັ້ງ ໜ່າຍ ເຢຍ ຢຽມ ກະເຫຍ່ຍ ແໝງ ປວັ້ງ ເມີ່ຍ, ເຢຍ ຕສ່ຽວ ຕສົມ ເມີ່ຍ, ຢ່າ ໄມ້ ມ່າຍ ຫາຍ ເຕົ້າ ໝັ່ງ ເຜຍ ເຢຍ.

2ເຢຍ ຕສ່ຽວ ຕໍ້ ເມີ່ຍ, ຕໍ້ ເມີ່ຍ ເປັຍ ເຢຍ ເຍີຍ ມາ ເຍີຍ ເປຢົ໊າ, ເຊ ຕໍ້ ມີ່ງ ເຖົາ ອຈ໋າວ ເຢຍ ວົ້ວ ເຕົ້າ. ເຢຍ ອ໋ອຍ ປຸນ ເມີ່ຍ ຮົບ ດາງ ເຍີຍ ກະນ້າຍ ເຜວ ຕ້າຍ ເຍີຍ ຕິ໊ວ, ປຸນ ເມີ່ຍ ຮົບ ເຢຍ ເຍີຍ ຕສິ ລ່ຽວ ປ໊ຽວ ເຍີຍ ຕິ໊ວ.

3ນິ່ນ ເຍີຍ ຕສ໋າຍ ເຈັ໊ຍ ປົ໌ວ ຢຽມ ເຢຍ ເຍີຍ ມອກ໊ອງ ກະເດ໊ຍ. ນິ່ນ ເຍີຍ ບຢ່າວ ເຈັ໊ຍ ປົ໌ວ ທຈຳ ຈ໊ຽນ ເຢຍ.

4ໂອ ເຢລູຊາເລມ ເຍີຍ ຕສວັ໋ງ ເຊັຍ ອ່າ, ເຢຍ ຂວິນ ເມີ່ຍ ບົວ, ໄມ້ ຕູ໋ງ ຫລະເຍົ້າ ເຢຍ ບົວ, ເຊວີ່ຍ ເຢຍ ບົວ ຮນ້ຳ ເຖົາ ປວັ໊ງ ໂຮຍ້ວ.

5ຫາຍ ເຕົ້າ ເປວີ່ຍ ຈ໊ຽນ ນິ່ນ ຮນ້ຳ ເຍີຍ ມ່ຽນ ຢຽມ ເຕີ່ຍ-ປູງ-ຮວາງ ຝາວ ຕ້າຍ? ເຢຍ ຢຽມ ປະຈ້າວ ດຢັ໋ງ ກະເດ໊ຍ ເຫ່ວ ເມີ່ຍ ເຍຍ. ຢຽມ ວົ້ວ ເມີ່ຍ ເຍີຍ ມາ ເຫວີ່ຍ ເມີ່ຍ ມຸນ ໂຄ້ວ, ຢຽມ ວົ້ວ ເມີ່ຍ ເຍີຍ ມາ ຢູ໌ງ ເມີ່ຍ ຕ້າຍ.

6ໂທ້ ປຸນ ເຢຍ ຢຽມ ເມີ່ຍ ເຍີຍ ໂຮຍ້ວ ຮນັ້ງ ເບ໊າະ ຈ໊ຽນ ຢ໋ຽນ ນໍ, ຮນັ້ງ ຢ໋ຽນ ຢຽມ ເມີ່ຍ ເຍີຍ ປົ໌ວ ໂຕສ໋ວ ນອມ ຈັ໋ງ-ໂຫ່, ເຫວີ່ຍ ຕສຸ ຮນ້ຳ ເຍີຍ ເຈົ໊າ ດົ່ງ ໄຕ່ ເຍີຍ ເຈົ໊າ ເຮ້ນ, ເໝວີ່ຍ ເຈັ໊ຍ ຫັ່ນ ດົ່ງ ຢ້ຽມ ເກນ ທສ້ຽວ. ນິ່ນ ອຈົບ ທສວດ ຮນັ້ງ ໂຕ໌ວ-ບຽດ, ຮນັ້ງ ຫຮຢາງ ໄຫ່ ເຍີຍ ໂຕ໌ວ.

7ວວມ ທສ້ຳ ໄມ້ ໄຮ່ ໝຽດ ຮນ້ຳ ເຍີຍ ໂຮຍ້ວ, ວວມ ຢ໋ຽມ ຢ່າ ໄມ້ ໄຮ່ ຕສ໋ຽມ ໄຕ່. ເຊ ກ໊ອງ ຫາຍ ເຕົ້າ ຕໍ້ ນິ່ນ ເຍີຍ ຈາ-ຕີ້ງ ກະນ້າຍ ຢຽດ ຕສູ໊ງ ອ໋ອຍ ຢ່ຽນ ຮນ້ຳ ເຍີຍ ໂຮຍ້ວ, ວົ້ວ ເຕົ້າ ຕສ່ຽວ ຕສຸ ຕສວັ໋ງ ມ່ຽນ ໝັ່ງ ເຜຍ ເຖົາ ຕ້າວ.

8ເຢຍ ບົວ ມ່າຍ ເຕົ້າ ໝົ່ວ-ໄຝ, ນິ່ນ ເຍີຍ ຫຍໍ ໄມ້ ແກ້ງ ໂຮລ, ມ່ຽນ ຕ້າຍ ໂທ້ ນິ່ນ ວົ້ວ ຮນອຍ, ເຢຍ ບົວ ເຫວີ່ຍ ເຢຍ ບົວ ເຍີຍ ໝົ່ວ ອ໋ອຍ ຕສຸ ຮນັ້ງ ຫາຍ ນໍ ໂຕສ໋ວ?

9ເຊ ກ໊ອງ ນິ່ນ ເປ໋ນ ຕສີ້ງ ຫລາດ, ເຢຍ ບົວ ຕສ່ຽວ ຢຽມ ກູ້ ຫງວ່າຍ ເຖສີຍ ຍ່ານ ລ່າວ. ເຊ ກ໊ອງ ນິ່ນ ເປ໋ນ ແກ້ງ, ເຢຍ ບົວ ຫລົ່ງ ສີດາ ຕສົ້ງ ດຢັ໋ງ-ເປ໊ນ ເວີ່ຍ ຈ໊ຽນ.

10ເຢຍ ເຊ ຕສີ້ງ ຫລາດ, ເຢຍ ເຍີຍ ຫຍໍ ຢ່າ ຮນັ້ງ ລ່າວ. ເຫວີ່ຍ ນ້າຍ, ຕສິ໋ວ ເຢຍ ຮນ້ຳ ເຍີຍ ມ່ຽນ ເຍີຍ ມຕສີງ ໝັ່ງ, ເຢຍ ປຸນ ນິ່ນ ຕຸ໊ ແປ້ງ ອອນ.

11ຊາໂລມອນ ມ່າຍ ດສົງ ອະຫງຸ່ນ ຫຮວີງ ຢຽມ ບາອັນຮາມົນ. ນິ່ນ ເຕສ໊າະ ນິ່ນ ເຍີຍ ອະຫງຸ່ນ ຫຮວີງ ປຸນ ມ່ຽນ ໂກ໊ວ. ຫຮວີງ-ກະຍົ໌ວ ເຍີຍ ປ໊ຽວ, ເຕົ້າໆ ໂກ໋ວ ຫຮວີງ ເຍີຍ ມ່ຽນ ອ໋ອຍ ຕສຸ ທສວດ ຢຽດ ທສິນ ນອມ ຕສິ້ນ ປຸນ ນິ່ນ.

12ມປ່າ ເຢຍ ກັ້ນ ມ່າຍ ເຢຍ ກັ້ນ ເຍີຍ ອະຫງຸ່ນ ຫຮວີງ ຢຽມ ເຢຍ ເຍີຍ ດສະຮມຽນ. ໂອ ຊາໂລມອນ ອ່າ, ວົ້ວ ເຕີ໋ຍ ຢຽດ ທສິນ ນອມ ຕສິ້ນ ເຊ ປຸນ ເມີ່ຍ, ວົ້ວ ເຕີ໋ຍ ຫຍີ່ ແປ໊ະ ນອມ ປຸນ ໂກ໋ວ ປ໊ຽວ ເຍີຍ ມ່ຽນ.

13ໂອ ຢຽມ ຫຮວີງ ກະຍົ໌ວ ເຍີຍ ເຊັຍ ອ້າ! ເຖສົາ ເຢຍ ໂຕສ໋ວ ຕ່ອຍ ເຍີຍ ມ່ຽນ ອ໋ອຍ ໝວັງ ເມີ່ຍ ເຍີຍ ຊີງ-ເຖຈຍ. ໂທ້ ປຸນ ເຢຍ ໝວັງ ໄຮ໌ ເມີ່ຍ ເຍີຍ ເຖຈຍ.

14ເຢຍ ຮນ້ຳ ເຍີຍ ມ່ຽນ ອ້າ! ໂທ້ ເມີ່ຍ ຊຽບໆ ເຍີຍ ຕ້າຍ ຮນັ້ງ ເຕົ້າ ຈູງ, ໄຟ ຮນັ້ງ ເຕົ້າ ໄອຈ້ ໂກ໊ວ ຫລຸນ ກັນ ເມ້ຍ ດາງ ເຍີຍ ບົງ ຕ້າຍ.

← Chapter 7 Jump to: