1 Chronicles 27

Tshiluba Bible 1996 (MUKANDA WA MYIDI MUKULU)

← Chapter 26 Jump to: Chapter 28 →

1Tudi tutela mpindiewu mena a bena Izrayele bavua benza mudimu kua mukalenga Davide: bamfumu ba meku, balombodi ba bisumbu binene ne bikese bia tshiluilu, ne baludiki ba ditunga. Bavua balongolola midimu ya bisumbu bia bena mvita, bua bikale benza mudimu ku tshidimu ku tshidimu ngondu umue. Tshisumbu tshionsu tshivua ne bantu binunu makumi abidi ne binayi.

2Bamfumu bavua babalombola bavua nenku: Ngondu wa kumpala: bavua balombola bena mvita kudi: Yashobame, muana wa Yabdiyele, wa mu diku dia Perese, uvua ulombola tshisangilu tshia bamfumu ba bena mvita ngondu awu. Ngondu muibiidi: bavua balombola bena mvita kudi Dodayi, muena Akowa; bavua bamuambuluisha kudi mulombodi wa bena mvita Miklote. Ngondu muisatu: bavua balombola bena mvita kudi Benaya, muana wa mutuangaji munene Yoyada, uvua wa mu “Tshisumbu tshia bantu Makumi asatu.” Benaya mumane kupeta muanzu wa mfumu mu “Tshisumbu tshia bantu Makumi asatu,” Amizabade, muanende, kumupingana mu bulombodi bua bena tshisumbu tshia bena mvita ba mu ngondu awu. Ngondu muinayi: bavua balombola bena mvita kudi Ashayele, muanabu ne Yowabe. Muanende Zebadya wakamupingana. Ngondu muitanu: bavua balombola bena mvita kudi Shamute, wa mu diku dia Izra. Ngondu muisambombu: bavua balombola bena mvita kudi Ira, muana wa Ikeshe, wa mu Tekowa. Ngondu wa muanda mutekete: bavua balombola bena mvita kudi Elese, wa mu Palone, wa mu tshisamba tshia Efrayime. Ngondu wa muanda mukulu: bavua balombola bena mvita kudi Sibkayi wa mu Usha, wa mu diku dia Zera. Ngondu wa tshitema: bavua balombola bena mvita kudi Abiyezere, wa mu Anatote, wa mu tshisamba tshia bena Binyamine. Ngondu wa dikumi: bavua balombola bena mvita kudi Marayi, wa mu Netofa, wa mu diku dia Zera. Ngondu wa dikumi ne umue: bavua balombola bena mvita kudi Benaya, wa mu Piratone, wa mu tshisamba tshia Efrayime. Ngondu wa dikumi ne muibidi: bavua balombola bena mvita kudi Eldayi, wa mu Netofa, wa mu diku dia Otniyele.

3Bamfumu ba bisamba bia bena Izrayele bavua nenku: Tshisamba tshia Rubene: Eliyezere, muana wa Zikri. Tshisamba tshia Shimeyone: Shefatya, muana wa Maaka.

4Tshisamba tshia Levi: Ashabiya, muana wa Kemuwele. Mfumu wa ndelanganyi ya Arone: Sadoke.

5Tshisamba tshia Yuda: Eliku, muanabu ne Davide. Tshisamba tshia Isakare: Omri, muana wa Mikayele.

6Tshisamba tshia Zebulone: Ishemaya, muana wa Obadya. Tshisamba tshia Naftali: Yerimote, muana wa Azriyele.

7Tshisamba tshia Efrayime: Osheya, muana wa Azaziya. Tshitupa tshia tshisamba tshia Menashe tshidi ku luseke ludi diba dibuelela lua Yardene: Yowele, muana wa Pedaya.

8Tshitupa tshia tshisamba tshia Menashe tshidi ku luseke ludi diba dipatukila lua Yardene, tshivua tshisomba mu Ngilaade: Ido, muana wa Zekarya. Tshisamba tshia Binyamine: Yashiyele, muana wa Abnere.

9Tshisamba tshia Dane: Azarele, muana wa Yerowame. Ke muvua bamfumu ba bisamba bia bena Izrayele nanku.

10Mukalenga Davide kavua mubadike bansongalume ba bena Izrayele bavua ne bidimu bishadile ku makumi abidi to. Bualu Maweja-Nangila uvua mudianjile kumanyisha ne: neavudije bena Izrayele bungi bu mitotu ya kulu.

11Yowabe, muana wa Seruya, ukavua mutuadije kubadika bena Izrayele, kadi kavua mujikije mudimu ewu to. Bualu Maweja-Nangila uvua mufikile bena Izrayele munda bua mudimu ewu. Nenku ke padibu kabayi bafunde bungi bua bena Izrayele mu mukanda udibu babikila ne Mukanda wa malu menza kudi mukalenga Davide.

12Azmavete, muana wa Adiyele, uvua mutangidi wa mpetu ya bukalenga mu Yerushalayime. Yonatane, muana wa Oziyase, uvua mutangidi wa bibutshilu bionsu bia mu ditunga, nansha bia mu bimenga, nansha bia mu misoku, ne bia mu bibumba muvuabu bateke batentekedi.

13Ezri, muana wa Kelube, uvua mutangidi wa bonsu bavua benza mudimu wa budimi mu ditunga.

14Shimeyi wa mu Rama, uvua mutangidi wa madimi onsu a mvinyo. Zabdi wa mu Shefame, uvua mutangidi wa bibutshilu bionsu bia maluvu a mvinyo.

15Baale-Anane wa Bete-Ngedere, uvua mutangidi wa madimi a mitshi ya olive ne ya sikomore, avua mu mpata. Yowashe uvua mutangidi wa miaba idibu bateka mafuta.

16Shitrayi, wa mu Sarone, uvua mutangidi wa ngombe ivua idia mu mpata, pabuipi ne tshimenga tshia Sarone. Shafate, muana wa Adlayi, uvua mutangidi wa ngombe ivua mu mpata mikuabu.

17Obile, muena Ishemayele, uvua utangila nyama ya tumelu. Yediya wa mu Meronote, uvua ulama nyama ya mpunde mikaji.

18Yazize, muena mu Agri, uvua ulama bisumbu bia mikoku ne bia mbuji. Aba bonsu ke bavua balombola balami ba bintu bia mukalenga Davide.

19Yonatane, mansebende wa Davide, uvua muntu wa lungenyi, mulonge malu mavule. Ke uvua mufidi wa ngenyi wa mukalenga Davide. Yekiyele, muana wa muena Akmoni, ke uvua mulongeshi wa bana ba mukalenga Davide.

20Akitofele uvua kabidi mufidi wa ngenyi wa mukalenga. Ushayi, muena Arki, uvua mulunda wa mfumu, wenda nende miaba yonsu.

21Yoyada, muana wa Benaya, ne Abiyatare, ke bavua bapingana Akitofele mu mudimu awu. Yowabe uvua mfumu mulombodi wa tshiluilu tshia bukalenga.

← Chapter 26 Jump to: Chapter 28 →