2 Chronicles 15

Tshiluba Bible 1996 (MUKANDA WA MYIDI MUKULU)

← Chapter 14 Jump to: Chapter 16 →

1Mueyelu wa Mvidi Mukulu kutulukila Azariya, muana wa Odede.

2Kuyaye kumonangana ne Asa bua kumuambila ne: — Mukalenga Asa ne nuenu bonsu bena Yuda, ne bena Binyamine, nunteleje! Maweja-Nangila neikale nenu anu panuikala bamuitabe. Nuenu bamukebe, nenumupete. Nuenu bamubenge, yeye kabidi neanubenge.

3Bena Izrayele bavua basomba matuku a bungi kabayi ne Mvidi Mukulu mulelela, kabayi ne mutuangaji bua kubalongesha, kabayi ne mikenji.

4Kadi, mu makenga avuabu nawu, kupinganabu kudi Maweja-Nangila Mvidi Mukulu wa bena Izrayele. Bobu kumukeba, yeye kuanyisha bua bamusangane.

5Tshikondu atshi, bantu kabavua mua kuendakana mu ditunga ne ditalala to. Tshikondu atshi, bantu ba mu matunga onsu bavua anu mu mvita.

6Bantu ba mu tshisamba kampande bavua bashipangana ne ba mu tshisamba tshikuabu, ba mu tshimenga kampande bavua bashipangana ne ba mu tshimenga tshikuabu. Bualu Maweja-Nangila uvua mubanyoke, mubatumine bipupu bishilangane.

7Kadi nuenu mpindiewu, nuikale ne bukole, koleshayi muoyi, kanutekeshi mu maboku. Nebanufile bua mudimu unudi nuenza.

8Mukalenga Asa umvua miaku ivua muambi Azariya, muana wa Odede, muambe, kukolaye muoyi. Kumushaye mpingu yonsu ivua mu buloba bua bena Yuda ne bua bena Binyamine. Kuenzaye kabidi nanku mu bimenga bionsu bivuaye mukuate, bivua mu buloba bua mikuna ya Efrayime. Pashishe, kulongololaye tshilambuilu tshia Maweja-Nangila, tshivua mu nzubu wa Mvidi Mukulu.

9Bena Izrayele ba bungi ba mu bisamba bia Efrayime, Menashe ne Shimeyone, kulamatabu mukalenga Asa. Kusombabu mu bukalenga buende, katshia bamone ne: Mvidi Mukulu uvua nende. Mukalenga Asa kubabikidisha mu bisangilu, pamue ne bena tshisamba tshia Yuda ne tshia Binyamine bonsu.

10Bonsu kudisangisha mu Yerushalayime, mu ngondu muisatu wa tshidimu tshia dikumi ne tshitanu, tshivua Asa mu bukalenga bua bena Yuda.

11Dituku dia difika diabu, kulambulabu Maweja-Nangila ngombe nkama muanda mutekete ne mikoku binunu muanda mutekete. Ke bimuna bivuabu banyenga baluishi babu.

12Kuditshipabu kumpala kua bantu bonsu, bua kukumbaja ne muoyi wabu onsu, ne bukole buabu buonsu, tshidi Maweja-Nangila Mvidi Mukulu wa bankambua babu ujinga.

13Nanku, muntu yonsu, muana nansha muntu mukole, mukaji nansha mulume, uvua ubenga Maweja-Nangila Mvidi Mukulu wa Izrayele, bavua ne bua kumushipa.

14Bantu bonsu bavua baditshipa kudi Maweja-Nangila, kuelabu bibingu bikole, bakuma bikashi, bela ne mpungi, bimba ne nsengu.

15Bukalenga bua bena Yuda buvua ne disanka, bualu bantu bavua balaya nanku ne muoyi wabu mujima. Bonsu bavua bakeba Maweja-Nangila ne musangelu. Yeye kabidi uvua mudifile kudibu, mubapeshe ditalala ku mikalu yabu yonsu.

16Mukalenga Asa kubenga bua kabinyiki kakuende Maaka dina dia ne: “Mukalenga Muadi”. Bualu Maaka uvua ne meji mabi a kuenza lupingu lua mvidie mukaji Ashera. Mukalenga Asa kutuma diyi, bua banyangakaje lupingu alu, baluzaze, baloshile ku muelelu wa mayi a Sedrone.

17Kadi, mukalenga Asa, nansha yeye kayi munyangakaje miaba yonsu ivua bena Izrayele batendelela mvidie, uvua anu munange Maweja-Nangila ne muoyi wende mujima.

18Asa uvua uya kabidi mu nzubu wa Mvidi Mukulu ne milambu ya tshijila, ivuabu balambula Maweja-Nangila kudi tatuende Abiya, ne ivuaye ulambula yeye mene. Milambu eyi ivua: tshiamu tshitoke tshia mushinga mukole, tshiamu tshia mpawungi, ne bintu bikuabu bia mishindu mishilangane.

19Katshia Asa ubuela mu bukalenga, bidimu makumi asatu ne bitanu, mvita kayivua mienzeke kabidi to.

← Chapter 14 Jump to: Chapter 16 →