2 Chronicles 9

Tshiluba Bible 1996 (MUKANDA WA MYIDI MUKULU)

← Chapter 8 Jump to: Chapter 10 →

1Mukalenga mukaji wa mu ditunga dia Saba kumvua lumu lua Shelomu. Nanku kuyaye mu Yerushalayime bua kujadika muvua lungenyi lua Shelomu, ne kumuela nkonku mikole. Mukalenga mukaji awu, kufika mu Yerushalayime ne tshisumbu tshinene tshia bantu bende. Uvua kabidi ne nyama ya tumelu miambule manananshi, tshiamu tshia mpawungi kilo mivule, ne mabue a mushinga mukole. Kufikaye kudi Shelomu, kumuela nkonku yonsu ivuaye mumane kulongolola.

2Shelomu kuandamuna ku nkonku yonsu ayi. Kavua mushiye nansha lumue kayi mubandamune to.

3Mukalenga mukaji wa ku Saba kujadika muvua Shelomu muakule ne lungenyi. Kukemaye bikole bua mushindu uvua nzubu wa bukalenga uvua Shelomu mudibakile,

4ne bua biakudia bivuabu bateke ku mesa, ne mushindu uvua balombodi ba mu bukalenga basombe ku mesa. Kukemaye kabidi bua bilamba bivuabu bavuale kudi bena mudimu bavua babanya biakudia ne bia kunua. Kumonaye muvua Shelomu ne bantu bavuaye nabu babuela mu nzubu wa Mvidi Mukulu, benda basamuna Maweja-Nangila. Mukalenga mukaji kukema bikole bua bintu bionsu abi, kupangaye ne mua kuakula.

5Pashishe, kuambilaye Shelomu ne: — Pamvua mu ditunga dianyi, mvua mumvue lumu luebe ne lua meji ebe audi nawu. Kadi pamvua tshiyi muanji kufika bua meme kudimuena, tshivua ngitaba bionsu bivuabu bangambila to. Kadi, bionsu abi bivua anu bia bushiwa. Kabidi bavua bangambile anu malu makese. Meji ebe mmmapite lumu luebe lumvua mumvue.

7Bena mudimu bebe, ne bantu badi mu nzubu webe wa bukalenga, mbena diakalenga! Bualu badi nebe matuku onsu. Badi bumvua miaku yebe ya meji ne ya lungenyi.

8Maweja-Nangila Mvidi Mukulu webe atumbe! Uvua mukusungule bua wewe kuikala mukalenga wa bena Izrayele mu dina diende! Maweja-Nangila udi wenza nanku bualu mmunange tshisamba etshi, mmusue bua tshikaleku kashidi. Mvidi Mukulu webe mmukuteke mukalenga, bua bena tshisamba etshi banemekangane, benzelangane bimpe.

9Pashishe, mukalenga mukaji wa ku Saba, kupesha mukalenga Shelomu tshiamu tshia mpawungi kilo bu binunu bisatu ne nkama itanu. Kumupeshaye kabidi ne manananshi a bungi, ne mabue a mushinga mukole. Katshia kabavua banji kumona manananshi a nanku mu ditunga dia bena Izrayele to.

10Bena mudimu ba mukalenga Irame, ne ba mukalenga Shelomu, bavua baye ku Ofire, kupingana ne tshiamu tshia mpawungi, mitshi ya santale, ne mabue a mushinga mukole.

11Mabaya a santale awu, mukalenga Shelomu kualonga panshi mu nzubu wa Mvidi Mukulu, ne mu nzubu wende wa bukalenga, bua bantu kuendelapu. Kuenzaye kabidi nawu biombelu, bisanji ne lunzenze bua bantu bavua bimba misambu. Biangatshile musangu awu too ne mpindiewu, kabena banji kumona kabidi bualu bua nanku mu ditunga dia bena Yuda to.

12Nanku, mukalenga Shelomu kupesha mukalenga mukaji wa ku Saba, bintu bionsu bivuaye ukengela ne bivuaye mulombe. Mukalenga Shelomu kumupesha bintu bipite bungi, bipite bivua mukalenga mukaji awu mumutuadile. Pashishe, mukalenga mukaji, ne bena mudimu bende bavuaye nabu, kupingana mu ditunga diabu.

13Mu tshidimu tshimue, mukalenga Shelomu uvua mupete tshiamu tshia mpawungi mu Yerushalayime kilo binunu makumi abidi.

14Tudi mua kusakidila kabidi milambu ivuabu bapete ku bintu bia mu matunga makuabu, bivuabu babueje mu ditunga, ne ku bia bangenda mushinga bakuabu. Tudi mua kusakidila kabidi biamu bia mpawungi ne biamu bitoke bia mushinga mukole, bivua bakalenga ba ditunga dia Arabiya ne balombodi ba ditunga bakadila mukalenga Shelomu.

15Mukalenga Shelomu kuenzeja ngabu minene nkama ibidi, milamakaja ne tshiamu tshia mpawungi. Bua ngabu yonsu bivua bikengela tshiamu tshia mpawungi kilo isambombu.

16Uvua muenzeje kabidi ngabu mikese nkama isatu, milamakaja ne tshiamu tshia mpawungi. Bavua benza ngabu yonsu ne kilo isatu ya tshiamu tshia mpawungi. Shelomu kuteka ngabu yonsu ayi mu nzubu kuabu binyika ne: “Ditu dia Lebanone ”.

17Mukalenga Shelomu kuenzeja nkuasa munene wa bukalenga, mulengeja ne mubanga, mulamika tshiamu tshia mpawungi menemene.

18Nkuasa wa bukalenga awu, uvua pa tshibandilu tshivua ne bidiatshilu bisambombu. Nkuasa uvua kabidi ne tshibandilu tshikuabu tshia kudiatshila makasa, tshivua tshia tshiamu tshia mpawungi, tshilamakaja ne nkuasa. Nkuasa awu uvua kabidi ne maboku eku ne eku. Bavua bateka bimfuanyi bibidi bia nyama ya ntambue, etshi ku luseke, tshikuabu ku lunga.

19Bimfuanyi bikuabu bia nyama ya ntambue dikumi ne bibidi, bavua babiteka ku bidiatshilu aku: nyama ya ntambue isambombu ku dia balume, mikuabu isambombu ku dia bakaji. Kabavua banji kuenza bintu bia bukalenga bia mushindu ewu mu ditunga dikuabu to.

20Makopu onsu a mukalenga Shelomu, avua anu a tshiamu tshia mpawungi. Kabidi bintu bionsu bia kudila bivua mu nzubu, uvuabu binyika ne: Ditu dia Lebanone, bivua anu bia tshiamu tshia mpawungi menemene. Kabavua benza bintu bia tshiamu tshitoke tshia mushinga mukole to. Bualu mu tshikondu tshia Shelomu, tshiamu tshitoke tshia mushinga mukole, katshivua ne lumu.

21Mukalenga Shelomu uvua ne matu avuaye utuma mitantshi mile, avuabu bita kudi bena mudimu ba Irame. Pavua bidimu bisatu bipite, matu awu avua apingana mambule tshiamu tshia mpawungi, tshiamu tshitoke tshia mushinga mukole, mibanga, nyama ya nkima, ne nyunyi ya mu matunga makuabu.

22Nanku, mukalenga Shelomu uvua mupite bakalenga bonsu ba pa buloba, ku bubanji ne ku lungenyi.

23Bualu, Mvidi Mukulu uvua mumupeshe lungenyi lua bungi. Nanku, bamfumu bavua bafuma nseke yonsu bua kuebeja Shelomu malu.

24Ku tshidimu tshionsu, bantu bonsu aba, bavua bakadila Shelomu bintu bia kumusankisha nabi: bintu bia tshiamu tshitoke tshia mushinga mukole, bia tshiamu tshia mpawungi, bilamba bia kuluangana nabi mvita, manananshi, nyama ya tubalu, nansha ya mpunde.

25Shelomu uvua ne bikumbi bivuaye mua kulamina nyama ya tubalu, ne matempu a mvita binunu binayi. Uvua ne nyama ya tubalu binunu dikumi ne bibidi. Uvua mulame imue nyama ya tubalu mu Yerushalayime muvuaye musombe. Nyama mikuabu, kuyabanyaye mu bimenga bivua ne bikumbi bilongolola bua kuyilama.

26Bamfumu bonsu bavua ku bumfumu bua mukalenga Shelomu, biangatshile ku musulu munene wa Perate, too ne ku ditunga dia bena Peleshete, kabidi too ne ku mukalu wa ditunga dia bena Ejipitu.

27Nanku, mu tshikondu tshia mukalenga Shelomu, mu Yerushalayime muvua tshiamu tshitoke tshia mushinga mukole bungi bu nsoka. Muvua kabidi mitshi ya sedre ya bungi bu mitshi ya sikomore idi itoloka mu mpata ku muelelu wa Mayi manene.

28Nyama ya tubalu ya Shelomu, ivua ifumina ku Ejipitu ne ku matunga makuabu.

29Malu makuabu a Shelomu a ku ntuadijilu too ne a ku ndekelu kua bukalenga buende, mbaafunde mu mikanda idibu binyika ne: Malu adi muambi Natane muenze, Miaku ya muambi Akiya wa mu Shilo, ne Bualu buvua Maweja-Nangila muleje muambi Yedo. — Mu mukanda wa muambi Yedo, mbafundemu malu a Yerobowame, muana wa Nebate, mukalenga wa bena Izrayele. —

30Shelomu uvua mushale mu bukalenga mu Yerushalayime bidimu makumi anayi, ulombola bisamba bionsu bia bena Izrayele.

31Shelomu mumane kufua, kumujikabu pabuipi ne muaba uvuabu bajike tatuende mu Tshimenga tshia Davide. Nanku muanende wa balume Robowame kumupingana ku bukalenga.

← Chapter 8 Jump to: Chapter 10 →