Hebrews 10

Mizo CL

← Chapter 9 Jump to: Chapter 11 →

1Dân chuan thil ṭha lo awm tûrte hlimthla, a tak ni lo, a lem chauh a ken avângin, kum tina inthawina pângngai an hlan fote chuan a hlântute chu engtin mah a tifamkim thei lo va ni.

2Tifamkim thei sela, inthawina hlântute hi tihthianghlim an nih tawha, suala inhriatna an neih tawh si loh chuan inthawina hlan an bânsan daih tawh dâwn lâwm ni?

3Chutih ahnêkin he inthawina hian an sual tih kum tin a hriat nawntîr ṭhîn a ni.

4Kêlpa leh bâwngpate thisen chuan sualte tibo thei rual a ni lo.

5Chuvângin, khawvêla a lo luh lai khân heti hian a ti: Inthawina leh thilhlan i duh lo va, Ka tân taksa mi buatsaihsak zâwk a.

6Pum hâl inthawina leh sual tâna inthawina I lâwm hek lo.

7Chu veleh, keiin, “Aw Pathian, ngai teh, lehkhabu ziala ka chanchin an ziak ang khân I duhzâwng ti tûrin ka lo kal e,” ka ti a.

8A hmasaa, ‘Inthawina te, thilhlan te, pum hâl inthawina leh sual tâna inthawinate i duh lo va, i lâwm hek lo,’ tih hi Dân thupêk ang taka inthawina hlan ṭhin kha a ni.

9“Chu veleh, ngai teh, i duhzâwng ti tûrin ka lo kal e,” a tih leh tâk hi, inthawinain a rawn thlâk ta tihna a ni.

10Isua Krista chuan Pathian duhzâwng anga, kumkhua atân ṭum khat a taksa a hlan avângin tihthianghlim kan ni ta a ni.

11Puithiamte chuan dingin kâwla ni chhuak chhiara rawngbâwlin inthawina pângngai an hlân fo va; mahse, chûng inthawina chuan engtin mah sual a tibo thei si lo.

12Ani erawh hi chu, chatuan atân sual thawina vawi khat a hlan hnuin, Pathian ding lamah a han ṭhu ta a.

13A hmêlmate a ke nghahchhana siam an nih hun chu a nghâk ta a ni.

14Vawi khat a inhlanna khân a tihthianghlimte chu chatuan atân a tifamkim ta a ni.

15Thlarau Thianghlim pawhin heti hian min hriattîr:

16“Chûng nia an hnêna ka thuthlun tûr chu hei hi a ni,” Lalpan a ti: “An thinlungah ka Dânte ka dah ang a, An rilruah ka ziak bawk ang,” tia a sawi hnu khân,

17“An sualte leh an bawhchhiatnate ka hre reng tawh lo vang,” a ti a.

18Tichuan, sualte ngaihdam a nih tawh si chuan sual tâna thil hlan a ngai tawh lo.

19Tichuan, unaute u, Isua thisen zârah Hmun Thianghlim Bera luhna kawng thar leh nung,

20daidanna puanzâr kal tlangna kawng chu min hawnsak ta a, chu puanzâr chu a taksa kha a ni.

21Tichuan, Pathian chhûngte tân Puithiam Ropui tak kan neih avângin

22sual inthiam lohna rilru sil faisaka awma, kan taksa pawh tuifîma bual faiin, thinlung tak leh rinna nghet tak nên Pathian chu i hnaih ang u.

23Beiseina thurin kan pawm hi nghîng lovin i chelh tlat ang u. A tiamtu chu a rinawm si a.

24Hmangaihna ngah tûr leh thil ṭha ti tûra inchawhthawh dân i ngaihtuah ang u.

25Ṭhenkhatin inkhâwm thlahthlam an chîng angin chîng ve lo ila, i infuih zâwk ang u; ni chu a lo hnai ta tih in hriat avângin i uar lehzual ang u.

26Thutak hriatna kan neih tawh hnu pawha kan sual luih zêl si chuan, sualte la bo thei inthawina a awm tawh dâwn lo va;

27rorêlna leh amah dodâltute tiboral tûr Pathian thinurna mei, thlaphâng taka nghah ngawt loh chu hmabâk dang kan nei lo.

28Mosia Dân pawisa lotute chu thuhretu pahnih pathum thuin khawngaihna tel miah lova tihhlum an ni ṭhîn.

29Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau sawichhetu chu nasa lehzuala hrem tûrah in ngai lo vem ni?

30“Phuba rêng rêng keima lâk tûr a ni, keimân ka thungrûl ang,” tih leh “Lalpan a mite a ngaihtuah ang,” titu hi kan hre si a.

31Pathian nung kut tuar chu râpthlâk tak a ni.

32Hmâna tihêna in awm hnua hrehawm nasa tak in tuar lai nite kha hre reng rawh u.

33A chângin vântlâng ennawm atân hmuhsit leh tihduhdah in tuar a, a châng phei chuan chutiang tuarte tuarna chu in ṭâwmpui ve a.

34Kawlbunte chu in lainat a, in thil neih an lâksak che u pawhin lâwm takin in tuar a; thil ṭha zâwk, awm hlen tûr chu in nei tih in hriat avângin.

35Chutichuan, in huaina kha hloh suh u, lâwmman ropui tak a nei dâwn a ni.

36Pathian duhzâwng ti tûr leh a thiltiam dawng tûr chuan in chhel a ngai a ni.

37Rei lo tê-ah lo kal tûra chu a lo kal dâwn, a muang lo vang.

38Rin vânga thiam ka chantîr chu a nung ang, a hnungtawlh erawh chuan ka rilruin amahah lâwmna rêng a nei lo vang.

39Keini zawng boral tûra tawlh kîr thei kan ni tawh lo va, nunna hum tûra rinna chelh tlattute kan ni zâwk e.

← Chapter 9 Jump to: Chapter 11 →