1 Kings 6

Mizo OV

← Chapter 5 Jump to: Chapter 7 →

1Tin, heti hi a ni a, Israela thlahte Aigupta ram ata an chhuah achin kum zali leh sawmriatna kum, Israel-hote chunga Solomona a lal kum lina, Ziv thla, thla hnihnaah chuan Lalpa in sak chu a ṭan a.

2Tin, Solomonan Lalpa tâna in a sak chu a dung lam tawng sawmruk a ni a, a vâng lam chu tawng sawmhnih a ni a, a sân lam chu tawng sawmthum a ni.

3Tin, chumi ina hmun thianghlim hma lama hulhliap chu a in vâng lam chen, tawng sawmhniha sei a ni a, a hma lama mi vâng lam chu tawng sâwm a ni.

4Tin, in atân chuan tukverh zîm tê thil kawkalh awmin a siam a.

5Tin, a in bang vêlin, biak in bang vêlah pawh, biakna hmun bang vêlah pawh chumi in bang si chuan in chhâwng nei a sa a; tin, a vêl chuan pindan a siam a.

6A chhâwng hnuaihnung ber chu a vâng lam tawng nga a ni a, a laita chu a vâng lam tawng ruk a ni a, a pathumna chu a vâng lam tawng sarih a ni; kalkhangte chu in banga inrawlh ngai lovin pâwn lamah chuan a vêlin in bangah chuan a nghahna a siam vâng a ni.

7Tin, in chu, an sak lai chuan lung a laihna hmuna chher sa veka sak a ni; tichuan, an sak chhûng zawng chu tuboh ri te, hreipui ri te, thîr hriamhrei ri rêng rêngte chumi inah chuan hriat a ni lo.

8Pindan laita berte kawngka chu chumi in ding lampangah chuan a awm a. A laitaah chuan rahka vialah an lâwn chho va; tin, a laita aṭang chuan a pathumnaah.

9Chutichuan, in chu a han sa a, a zo ta a; in chu sidar khanchhuk leh a phêkin a khuh a.

10Tin, in chhâwng neite chu a in si vekin tawng nga ṭheuhva sângin a sa a; chûngte chu in nên chuan sidar thinga zawm a ni.

11Tin, Lalpa thu chu Solomona hnênah a lo thleng a,

12“He in i sak lai mêk chungchâng thu hi - ka thuruatte i pawma, ka rorêlte i zawma, ka thupêk zawng zawngte zâwm tûra i pawm phawt zawngin, i pa Davida hnêna ka lo sawi tawh, ka thu kha i chungah hian ka tinghet ang.

13Tin, Israela thlahte zîngah hian ka chêng ang a, ka mi Israel-hote hi ka thlahthlam lo vang,” tiin.

14Tichuan, Solomona chuan in chu a sa a, a zo ta a.

15In chhûng lam bangah chuan sidar thing phel a hmang a; a chhuat aṭanga chung lam thlengin a chhûng lamah chuan thing a bel vek a; a chhuatah chuan fâr thing phel a phah belh a.

16Tin, kawmchâr lam tawng sawmhnih chu a chhuat aṭanga a bangte chenin sidar thing phel vekin a siam a; biakna hmun, hmun thianghlim ber atân pawh a chhûng lamah chuan a hmang a.

17Tin, in, biakna hmun bula biak in chu a dung lam tawng sawmli a ni.

18Tin, in chhûng lamah chuan a kuhmûm leh a pâr parh lema ker mawi sidar thing a awm a. A vai chuan sidar thing vek a ni a; lung rêng rêng a lang lo.

19Tin, Lalpa thuthlunna bâwm dahna tûrin chumi inah a chhûnga biakna lamah chuan hmun a buatsaih a.

20Tin, chumi biakna hmun chhûng chu a dung lam tawng sawmhnih, a vâng lam tawng sawmhnih, a sân lam tawng sawmhnih a ni a. Chu chu rangkachak hlîr hlak tîin a luan a; tin, sidar maichâm chu a luan bawk a.

21Chutichuan, Solomona chuan chumi in chhûng chu rangkachak hlîr hlak tîin a luan a. Pindan chhûngril ber luhna kawngkaah chuan rangkachak khaidiat a thlung a, rangkachakin a luan a.

22Tin, in chu a zaa a peih thlengin a pumin rangkachak tîin a luan zêl a; biakna hmuna maichâm pum pui pawh chu rangkachak tîin a luan a.

23Tin, biakna hmunah chuan tawng sâwm ve vea sâng, cherub pahnih olive thingin a siam a.

24Tin, cherub thla pakhat chu tawng nga a ni a, cherub thla lehlam chu tawng nga bawk a ni: thla pakhat hmâwr aṭanga a thla lehlam hmâwr inkâr chu tawng sâwm a ni.

25Cherub pakhat pawh chu tawng sâwm a ni a; cherub-te chu intiat chiah leh pian dân inang ve ve chiah an ni.

26Cherub pakhat sân zâwng chu tawng sâwm a ni a, cherub pakhat pawh chu chumi chen bawk chu a ni.

27Tin, cherub-te chu in chhûngril zâwkan chuan a dah a; tin, cherub-te thla chu a inzâr a, pakhat thla chuan bang lehlam a va dek a, cherub pakhat thla pawhin bang lehlam chu a dek bawk a. Chumi in lai takah chuan an thla leh an thla chu a insi a.

28Tin, cherub-te chu rangkachak tîin a luan a.

29Tin, in bang zawng zawngte chu a vêlin cherub te, tûm thing leh pangpâr parh lem ker mawite in chhûng lam leh pâwn lamah chuan a siam a.

30Tin, a in chhuat chu chhûng lam leh pâwn lamah rangkachak tîin a luan a.

31Tin, biakna hmun luhna atân olive thing kawngkhâr a siam a; kawngka lû chung leh kawngka biangte chu a bang hmun ngaa ṭhena hmun khat tiat a ni.

32Tichuan, olive thingin kawngkhâr pahnih a siam a; chumiah chuan cherub-te, tûm thing leh pangpâr parh lemte ker mawiin a siam a, chûng chu rangkachak tîin a luan a; tin, cherub-te leh tûm thingte chu rangkachak a hnawih a.

33Tin, biak in luhna atân a bang hmun lia ṭhena hmun khat tiatin olive thing kawngka ban a siam a.

34Fâr thingin kawngkhâr pahnih a siam bawk a; kawngkhâr pakhata phêk hnih chu thlep thei a ni a, kawngkhâr pakhata phêk hnih pawh chu thlep thei a ni.

35Chûngahte chuan cherub-te, tûm thing leh pangpâr parh lemte a ker a; chûng ker mawi chu mâm takin rangkachak tîin a luan a.

36Biak in hung chhûng kawtlai chhûngril zâwk chu lung chher chhâwng thum leh sidar thing phel thuah khatin a siam a.

37A kum lina, Ziv thlaah chuan Lalpa in lungphûm chu rem a ni a.

38Tin, kum sâwm leh kum khatna, Bul thla, thla riatnaah chuan in chu ruahman ang chiahin a engkim chu peih vek a ni a. Chutichuan, kum sarih a sa a ni.

← Chapter 5 Jump to: Chapter 7 →