2 Samuel 14

Mizo OV

← Chapter 13 Jump to: Chapter 15 →

1Chutichuan, Zeruii fapa Joaba chuan lal rilru chu Absaloma chungah a chêng tih a lo hria a.

2Tichuan, Joaba chuan Tekoa khuaah mi a tîr a, chuta hmeichhe fing pakhat chu a va hruaitîr a, a hnênah, “Lusûn angah insiam la, lusûn puan sin la, sahriak pawh inthih lovin, hmeichhia rei tak mitthi sûn angin awm rawh.

3Tin, lal hnênah kal la, a hnênah hetiang hian thu va sawi ang che aw,” a ti a. Chutichuan, Joaba chuan thu a fah a.

4Tin, Tekoa khuaa hmeichhia chuan lal hnêna thu a sawi dâwn chuan hmaia lei siin a bawkkhup a, chibai a bûk a, “Aw lalpa, min pui rawh,” a ti a.

5Tin, lal chuan a hnênah, “Engtizia nge ni le?” a ti a. Tin, ani chuan a chhâng a, “Hmeithai ka ni tak tak a, ka pasal chu a thi tawh a.

6Tin, i bâwihnu hian fapa pahnih a nei a; an pahnih chuan lovah an insual a, tu mah ṭhelhtu an awm si lo va, a pakhat chuan pakhat chu a vua a, a tihlum ta a.

7Tin, ngai teh, an chhûngkua zawng zawng chuan i bâwihnu hi an do rawn a, ‘A unaupa thattu chu a unaupa a thah avânga kan thah ve theih nân min pe rawh khai; tichuan, roluahtu tûr pawh kan tiboral ang,’ an ti a; chutiang chuan ka meiling la awma chu an timit ang a, ka pasal chu hming nei lo leh lei chungah thlah rêng rêng nei lovin a awm mai dâwn a ni,” a ti a.

8Tin, lal chuan hmeichhe hnênah chuan, “I inah haw la, i chungchâng thûah chuan thu ka pe mai ang,” a ti a.

9Tin, Tekoa khuaa hmeichhia chuan lal hnênah chuan, “Aw lalpa, ka pu, bawhchhiatna mawh chu ka chungah leh ka pa chhûngte chungah tla mai rawh se; tin, lal leh lalṭhutthlêng chuan mawh phur suh se,” a ti a.

10Tin, lal chuan, “Tu pawh i chungah eng emaw sawi apiang chu ka hnênah rawn hruai la, an tawk leh tawh hlek lo vang che,” a ti a.

11Tin, ani chuan, “Thisen chhuahtute chungah phuba latuten tiboral tawh lo tûrin lal chuan Lalpa i Pathian chu hre reng rawh se aw; chuti lo zawng, ka fapa hi an tiboral dah ang e,” a ti a. Tin, ani chuan, “ Lalpa nunna chhâlin ka sawi e, i fapaa sam zai khat pawh leiah hian a tla lo vang,” a ti a.

12Chutichuan, hmeichhia chuan, “I bâwihnu hian lalpa ka pu hnênah thu kam khat chauh han sawi leh teh se aw,” a ti a. Tin, ani chuan, “Sawi ta che,” a ti a.

13Tin, hmeichhia chuan, “A nih leh eng vângin nge Pathian mite dodâla hetianga tih i tum? Hêng thu aṭang hian lal chu thiam loh chang angin a lang a ni, lal chuan a mi, tlân bova chu a hruai hâwn si loh avângin.

14Kan thi ngei ngei tûr a ni a; tin, tuisik leia baw hnu ruh theih tawh loh ang hi kan ni a. Pathianin nunna hi a la bo a ni lo va, tlân bova chu a laka mi hrang a nih loh nân rem a ruat a ni zâwk a ni.

15Chutichuan, lalpa ka pu hnêna he thu sawi tûra ka lo kal pawh hi mi ka hlauh vâng a ni a. Tin, i bâwihnu chuan, ‘Lal hnênah ka sawi phawt ang a, lal chuan a bâwihnu dîlna chu a hlawhtlintîr mahna.

16Lal chuan kei leh ka fapa hi Pathian roluah lo tûra tihboral tumtu laka i bâwihnu hi chhan chhuak tûrin a lo ngaihthlâksak ang chu,’ ka ti a.

17Chutichuan, i bâwihnu tân hian lalpa ka pu thu chu thlamuanawm tak ni sela, a chhia a ṭha lo thlei tûrin lalpa ka pu chu Pathian vântirhkoh ang mai a ni si a. Tin, Lalpa Pathian chu i hnênah awm rawh se ka ti a ni,” a ti a.

18Tin, lal chuan a chhâng a, hmeichhe hnênah chuan, “Ka zawh apiang che chu ka lakah eng mah zêp suh ang che aw,” a ti a. Tin, hmeichhia chuan, “Lalpa ka pu chuan sawi ang hmiang,” a ti a.

19Tin, lal chuan, “Hêng thûah rêng rêng hian Joaban telna a nei em?” a ti a. Tin, hmeichhia chuan a chhâng a, “Lalpa ka pu, i thlarau nunna chhâlin ka sawi e, lalpa ka puin a sawi tawh chu tu mahin ding lamah emaw, vei lamah emaw an pumpelh thei lo vang. I chhiahhlawh Joaba chuan mi tîr a, hêng thu zawng zawng hi i bâwihnu a fah vek a ni.

20Thil awm dân tidanglam tûrin hêng thil hi i chhiahhlawh Joaba chuan a tih a ni; tin, ka pu chu khawvêla thil awm zawng zawng hre theiin Pathian vântirhkoh ang maiin a fing a ni,” a ti a.

21Tin, lal chuan Joaba hnênah, “Ngai teh, he thil hi ka remti ta e: va kal la, tlangvâl Absaloma chu va hruai leh rawh le,” a ti a.

22Tin, Joaba chu hmaia lei siin a bawkkhup a, chibai a bûk a, lal chu mal a sâwm a. Tin, Joaba chuan, “Aw lalpa ka pu, lalpa chuan a chhiahhlawh dîlna chu a hlawhtlintîr avângin, vawiinah hian i chhiahhlawh hian i mit ka tlung tih ka lo hre ta,” a ti a.

23Chutichuan, Joaba chu a tho va, Gesur-ah chuan a kal a, Absaloma chu Jerusalem-ah a hruai ta a.

24Tin, lal chuan, “Ama in lamah kal sela, ka hmêl chu rawn hmu suh se,” a ti a. Chutichuan, Absaloma chu ama in lamah chuan a kal a, lal hmêl chu a hmu ta lo va.

25Israel zawng zawng zîngah Absaloma ang rênga hmêlṭhata fak kai tu mah an awm lo va. A ke lêr aṭangin a chhîp thlengin sawisêlna rêng rêng a awm lo va.

26A lû a meh chuan (kum vei apiangin a mêt ṭhîn a, a sam chu a rih êm ṭhin avângin a mêt ṭhîn a ni) a sam chu a bûk ṭhîn a, lal bûk dâna sekel hnih a tling ṭhîn a ni.

27Tin, Absaloma chuan fapa pathum leh fanu pakhat a nei a, a fanu hming chu Tamari a ni a, hmeichhe hmêl ṭha tak a ni.

28Chutichuan, Absaloma chu kum hnih pumhlûm Jerusalem-ah a awm a; nimahsela, lal hmêl rêng rêng chu a hmu lo va.

29Chutichuan, Absaloma chuan lal hnêna tirh atân Joaba chu a chah a; nimahsela, a kal duh lo va. Tin, a chah nawn leh a, a kal duh chuang lo va.

30Chutichuan, a chhiahhlawhte hnênah, “I e u, Joaba lo chu ka lo kiang a ni a, barli a nei a, va hâl rawh u,” a ti a. Tichuan, Absaloma chhiahhlawhte chuan lo chu an va hâl ta a.

31Chutichuan, Joaba chu a tho va, Absaloma hnênah a inah a kal a, a hnênah, “Eng vângin nge i chhiahhlawhten ka lo an hâl?” a ti a.

32Tin, Absaloma chuan Joaba chu a chhâng a, “Ngai teh, ‘Eng atân nge Gesur aṭangin ka lo kal? Chutah chuan awm reng ila ka tân a ṭha zâwk tûr,’ tia lal hnêna tirh atân ka chah chia. Chuvângin, lal hmêl chu mi hmuhtîr rawh khai; tin, bawhchhiatna nei ka lo nih chuan mi tihlum mai ang hmiang,” a ti a.

33Chutichuan, Joaba chu lal hnênah chuan a kal a, a hrilh a. Tin, Absaloma chu a ko va, lal hnênah a kal a, lal hmaah chuan hmaia lei siin a bawkkhup a. Tin, lal chuan Absaloma chu a fâwp a.

← Chapter 13 Jump to: Chapter 15 →