2 Samuel 22

Mizo OV

← Chapter 21 Jump to: Chapter 23 →

1Tin, Davida chuan a hmêlma zawng zawng kut ata leh Saula kut ata Lalpan a chhan chhuah ni chuan, he hla thu hi Lalpa hnênah a sawi a.

2Tichuan, ani chuan, “ Lalpa chu ka lungpui leh ka kulhpui leh mi chhanhimtu a ni a, ka ta ngei a ni;

3Ka lungpui Pathian, amah chu ka ring ang; Ka phaw leh ka chhandamna ki, ka kulhbîng sâng leh ka inhumhimna a ni; Ka chhandamtu, nangin pâwngnawrna lak ata mi chhandam ṭhîn a.

4Fak tlâk Lalpa chu ka ko vang a; Chutichuan, mi dotute lakah chhandamin ka awm ang.

5Thihna fâwn chuan min hual vêl a, Pathian ngaihsak lohna tui lian chuan mi tihlau va.

6Seol hruihrualte chuan mi phuar vêl a; Thihna thangte chuan mi âwk a.

7Ka manganin Lalpa chu ka ko ṭhîn a, A ni, ka Pathian chu ka au ṭhîn; Ani chuan a biak in aṭang chuan ka aw a hria a; Tin, ka au thâwm chu a bengah a lût ta a.

8Chu veleh lei hi a nghîng a, a khûr ta a. A thinur avângin vân innghahnate lamin a khûrin a nghîng ta a.

9A hnâr aṭang chuan meikhu a chho ta ngut ngut a, A kâa chhuak mei chuan a kâng ta hluah hluah a; Chu chuan meihawl pawh a tialh ta dur dur a.

10Tin, ani chuan vânte pawh a tikûn a, a chhuk ta a; A ke hnuaiahte chuan thim chhah mup hi a awm a.

11Cherub chungah a chuang a, a thlâwk ta a; A ni, thli thlaahte chuan an hmu a.

12Tin, thim chu amah hual vêlna bûktêah a siam a, Tuite, vâna chhûm chhah mupte chu fâwk khâwmin.

13A hmaa ênna avâng chuan meilingte chu a alh a.

14Lalpa chu vânah khian a lo ri dur dur a, Chungnungbera chuan a aw a chhuah a.

15Tin, thalte chu a kâp chhuak a, anniho chu a tidarh a; Kâwl te a phêttîr a, a tibuai ta nuaih hlawm a.

16Chu veleh Lalpa zilhhauna avânga, A hnâra thaw chhuakin a chhêm vak avâng chuan, Leilung nghahchhante chu tihlanin a awm ta a.

17Ani chuan chung lam aṭangin a rawn ban a, mi chelh a; Tui tam tak ata mi hnûk chhuak a;

18Mi dotu chak tak lakah chuan mi chhan him a, Mi hawtute lakah pawh; keia tân chuan an chak lutuk si a.

19Anni chuan ka vânduai ni chuan mi bei a; Nimahsela, Lalpa chu ka innghahna ber a ni.

20Ani chuan hmun thâwl takah mi hruai chhuak a; Ka chunga a lâwm avângin mi chhan him ta a ni.

21Lalpa chuan ka felzia ang zêlin ka chungah a ti a; Ka kutte a thianghlimzia ang ngeiin mi rûl a ni.

22Lalpa kawngte chu ka zawh a, Ka Pathian hnên ata chu sual takin ka kal bo ngai si lo va.

23A rorêlna zawng zawng chu ka hmaah a awm ṭhîn a; A thuruatte lah chu ka hawisan ngai si lo va.

24Ama lakah chuan sawisêl bo ka ni bawk a, Ka khawlohna ata ka inthiarfihlîm ṭhîn a.

25Chuvângin, Lalpa chuan ka felzia ang zêlin mi lo rûl ta a; A mit hmuha ka thianghlimzia ang zêlin.

26Mi khawngaih thei tak lakah chuan khawngaih thei takin i intilang ang a, Mi ṭha famkim lakah chuan ṭha famkimin i intilang ang a;

27Mi thianghlim lakah chuan thianghlimin i intilang ang a; Tin, mi luhlul lakah chuan luhlulin i intilang ang.

28Hrehawm tuar mite chu i chhandam ang a; Mi chapote erawh chu i tihtlâwm theih nân an chungah i mit a fu reng a.

29Aw Lalpa, ka khâwnvâr i ni si a; Lalpa chuan ka thimna hi a tiêng ang.

30Nangma ṭanpuiin râl ka bawh si a; Ka Pathian ṭanpui bawkin kulh ka zuan khûm a ni.

31Pathian zawng a kawng chu a ṭha famkim a; Lalpa thu chu fiah a ni tawh; Amah ringtu zawng zawngte tân chuan ani chu phaw a ni.

32Lalpa lo chu tu nge Pathian awm ni? Kan Pathian lo chu tu nge lungpui awm ni?

33Pathian chu ka kulhpui nghet tak a ni a, Ka kawng a tiṭha famkim ṭhîn.

34Ka kete chu zukpui ke angin a siam a, Ka hmun sângahte mi awmtîr ṭhîn.

35Ka kutte hi râl kâp tûrin a zirtîr ṭhîn a; Chutichuan, ka bânte hian dâr thal ngul a kuai zo hial a.

36Nangin i chhandamna phaw chu mi pe bawk a; I inngaihtlâwmnain mi siam lian ta.

37Ka hnuaia ka ke pênna chu i tizau va; Tichuan, ka kete hi a tleng lo.

38Mi dotute chu ka ûm pha a, ka tiboral a; Tihboral dêra an awm hma loh chuan ka kîr hek lo.

39An thawh leh theih lohna tûrin ka tiboral dêr a, ka sât chhawk a; A ni, ka ke hnuaiah an tlu ta a.

40Nangin inbeihna atân chuan chaknain ka taiah mi hrêng si a; Mi rawn beitute chu ka hnuaiah i tudawl ta a.

41Mi hawtute chu ka tihboral theihna tûrin, Nangin mi dotute chu mi hnuchhawnin i awmtîr ta bawk a.

42An hawi vêl a; nimahsela, chhandamtu tûr tu mah an awm lo va; Lalpa ngei chu an han en a; nimahsela, a chhâng si lo.

43Chu veleh leia vaivut ang maiin ka vaw sawm dep a; Kawtlai chirhdiak ang maiin ka tipherh a, ka theh darh vek a.

44Nangin ka mite sualna lakah pawh mi chhan him ta a; Hnam tin lû ni tûrin mi vawng ṭha a. Ka hriat ngai loh hnam chuan ka rawng an bâwl tawh ang.

45Hnam dangte chu ka hnênah an inpe ang a; Ka chanchin an hriat veleh ka thu an zâwm ang.

46Hnam dangte chu an chuai ang a, An kulhbîng atate chu khûr chungin an lo chhuak ang.

47Lalpa chu a nung reng e! Ka Lungpui chu fakin awm sela! Mi chhandamna Lungpui, Pathian chu chawimawiin awm rawh se!

48Phuba mi lâksaktu leh Hnam tin ka hnuaia tudawltu Pathian ngei chu a ni;

49Mi dotute lak ata mi la chhuak a. A ni, nangin mi beitute chung lamah chuan mi chawi kâng a; Mi nunrâwng lak ata chu mi chhan him ṭhîn a.

50Chuvângin, aw Lalpa, hnam tin zîngah chuan lâwmthu ka hrilh ang chia, I hming fakin ka zai bawk ang.

51Ani chuan chhandamna ropui tak a lal a pe thîn a; A hriak thiha chungah, Davida leh a thlahte chung ngeiah chuan, Kumkhuain a ngilneihzia a lantîr ang,” a ti a.

← Chapter 21 Jump to: Chapter 23 →