Jeremiah 18

Mizo OV

← Chapter 17 Jump to: Chapter 19 →

1Lalpa lak ata Jeremia hnêna thu lo thleng chuan,

2“Tho la, bêlvawtu inah chuan zuk kal la, chutah chuan ka thute ka hriattîr ang che,” a ti a.

3Tichuan, bêlvawtu inah chuan ka zuk kal ta a, a bêl siamna khâwlah chuan a lo thawk a.

4Hluma bêl a siam lai chu a lo ṭhat loh chuan, bêlvawtu chuan ṭha a tih angin bêl dangah a din leh mai ṭhîn a.

5Tichuan, Lalpa thu chu ka hnênah a lo thleng leh a:

6“Aw Israel chhûngte u, he bêlvawtu tih ang hian ka ti thei lo che u em ni?” tih hi Lalpa thuchhuak a ni. Ngai teh u, bêlvawtu kuta hlum ang mai hian ka kutah in awm a ni, aw Israel chhûngte u.

7Eng tikah pawh hnam emaw ram emaw chungchâng thûah, “Ka pawt chhuak ang a, ka ṭhiat ang a, ka tichhia ang,” tiin lo sawi pawh ni ila,

8chu hnam chuan a chung thu ka sawi avânga a thil ṭha lo a hawisan chuan a chunga thil ṭha lo tih ka tum chu ka lamlêt ang.

9Tin, eng tikah pawh hnam emaw ram emaw chungchâng thûah, “Ka siam ang a, ka din ang,” tiin lo sawi pawh ni ila,

10ka ṭawngka chhuak ngaithla lova ka mit hmuha thil tha lo a tih chuan a tâna thil ṭha tih ka tum chu ka lamlêt bawk ang.

11“Chuvângin, Juda mite leh Jerusalem-a chêngte hnênah chuan, ‘ Lalpan heti hian a ti: Ngai teh u, in chungah thil ṭha lo ka suangtuah a, ka phiar mêk che u a ni, mi tinin an awm dân ṭha lo hawisan sela, in awm dân leh in thiltihte siam ṭha rawh u, va ti phawt rawh.’

12Nimahsela, anni zawngin, ‘A âwm lo ve! Mahni remruat ang angin kan awm ang a, mi tin mahni rilru ngawltâwt sual ang zêlin kan che ang,’ ” an ti ṭhîn a ni.

13Chuvângin, Lalpa chuan heti hian a ti: “Hnam dangte zâwt teh mah u, hetiang rêng tu nge hre ngai? Nula Israel chuan thil ṭihbaiawm tak a tih tâk hi.

14Lebanon vûr chuan a tlâng chhîp a kiansan ngai em ni? Kâwlvalênchham tui dai a luang kang ngai em ni?

15Ka mite erawh chuan mi theihnghilh a, Eng mah lo mai hnênah rimtui an hâl a; Chûng chuan an hmasâng kawngah a petektîr, Kawngpui ni lo ṭumkawng lam an zawh a,

16An tiṭiau zo ta e - a ram chu, Kumkhuaa chek khum tûrin. Veivâk apiangin mak tiin an lû an thing.

17Khawchhak thlipui angin hmêlma hmaah ka theh darh ang, An vânduai nîah chuan ka hmêl ni lo, Ka tukkhum ka entîr ang.”

18Tin, anni chuan, “Hawh u, Jeremia hi i phiar ang u, puithiam lak ata dân a reh dâwn si lo va, mi fing lak ata thurâwn a reh hek lo vang a, zâwlnei lak ata thu a reh bawk hek lo vang. Hawh u, i sawi chhe bawrh bawrh ang u khai, a thu rêng rêng i ngaihsak miah lo vang u,” an ti a.

19Mi ngaihsak la, aw Lalpa, Mi dodâltute thu hi bengvâr ang che.

20Sual hi thil ṭha rulhna em ni ngai? Anni zawngin ka nunna atân hum an hiat si. An laka i thinurna tikiang tûr leh An tâna thil ṭha sawi tûra I hmaa ka din ṭhin kha hre reng ang che.

21Tichuan, an fate chu ṭâmpui mitthi tawhtîr la, Khandaih chakna tawntîr rawh; An nupuite fa lû hlohvin hmeithai rawh se. An mipate hripuiin thi sela, An tlangvâlte pawh indonaah khandaihin.

22Rûntute an hnên i thlentîr phutin, An in ata ṭap thâwm thang rawh se. Mi man tûrin hum an hiat si a, Ka ke awh nân thang an kam si a.

23Mahse, nangin aw Lalpa, Mi that tûra an mi phiarna zawng zawng i hria e. An khawlohna ngaidam suh la, I mit hmuhan an sualna thai bo hek suh ang che. I hmaah chuan tlu hlawm sela, I thinur nîah chuan ti nek ang che.

← Chapter 17 Jump to: Chapter 19 →