Matthew 7

Mizo OV

← Chapter 6 Jump to: Chapter 8 →

1Sawisêl suh u, sawisêla in awm loh nân.

2In sawisêl ang bawkin an sawisêl ang che ua, in tehna ngai bawkin an tehsak leh ang che u.

3Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni?

4Engtin nge i unau hnênah, ‘I mit ata hmawlh tê tak tê kha mi lâk chhuahtîr rawh,’ i tih theih ang? Ngai teh, nangma mit ngeiah khanchhuk a awm reng si a.

5Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.

6Ui hnênahte thil thianghlim chu pe suh u; vawk hmaahte in tuikeplungte paih hek suh u, an chîl chhe hlauh ang a; hawiin an tai thlêr dah ang che u.

7Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u;

8tu pawh a dîl apiang chuan an hmu ṭhîn a; tu pawh a zawng chuan an hmu ṭhîn a; tu pawh a kik chu an hawnsak dâwn a ni.

9A nih leh, nangniho hi tu pawh in fapain chhangpêr dîl che u sela, tuin nge lung pe ang che u?

10A nih leh, sangha dîl che u sela, tuin nge rûl pe ang che u?

11Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a pe zâwk êm êm dâwn lo vem ni?

12Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u; chu chu dân thu leh zâwlneite thu a ni rêng si a.

13Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chumi lama lût chu tam pawh an tam hle a ni;

14nunnaa kalna kawngka chu a zîm a, a kawng pawh a chêp bawk a, a hmutute pawh tlêm tê an ni.

15Zâwlnei derte lakah fîmkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a.

16Anmahni chu an rahah in hre mai ang. Hruihlîngnei kûngah grêp rah an lo ngai em ni? Lênhlîngah pawh theipui an lo ngai em ni?

17Chutiang bawkin thing ṭha apiang a rah ṭha ṭhîn a; thing chhia erawh chu a rah chhe ṭhîn.

18Thing ṭha a rah chhe thei lo va, thing chhia lah a rah ṭha thei hek lo.

19Thing tin rah ṭha lo apiang chu an kit a, meiah an paih ṭhin.

20Chuvângin, anmahni chu an rahah in hre mai ang.

21‘Lalpa, Lalpa’ mi ti nazawng chu vânramah an lût lo vang a; ka Pa vâna mi duh zâwng titu erawh chu an lût ang.

22Chumi nîah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thilmak tam tak kan ti ṭhîn lo vem ni?’ an la ti ang.

23Chumi hunah chuan, ‘Nangni thil sual tite u, ka hre ngai lo va che u, ka hnên ata kal bo rawh u,’ tiin anni chu ka la hrilh ang.

24Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni.

25Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; nimahsela, a chim lo va; lungpui chunga rem tlat a nih avângin.

26Tin, mi tin, hêng ka thu hi hriaa zâwm lo apiang chu, mi â, ṭiauvut chung maia in satu nên tehkhin tûr a ni.

27Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; a chim ta a; a sawp chu nasa tak a ni,” a ti a.

28Tin, heti hi a ni a, Isuan chûng thu chu a sawi zawh veleh, mipuiten a thu zirtîr chu mak an ti hle a;

29lehkhaziaktute ang lova thuneihna nei âwm taka anmahni a zirtîr avângin.

← Chapter 6 Jump to: Chapter 8 →