1 Samuel 16

Mizo Bible

← Chapter 15 Jump to: Chapter 17 →

1Chutichuan LALPA chuan Samuela hnenah, "Israel mite lal atan ka duh tawh loh ahnu Saula avang hian eng chen nge maw i lungngaih dawn le? A kiah hriak thun khat la, kal rawh, Beth-lehem mi Jesaia hnenah ka tir dawn che a ni; a fapate zinga mi lal atan ka ruat tawh reng a ni," a tia.

2Tin, Samuela chuan, "Engtin nge ka kal theih ang? Saula'n a lo hriat chuan min tihlum mai ang a sin" a ti a. Tin, LALPA chuan, "Bawngla hruai la, 'LALPA hnena inthawi tura lo kal ka ni,' ti ang che.

3Tin, inthawinaah chuan Jesaia chu ko la, tin, i tih tur chu ka hrilh ang chia; tin, a hming ka hrilh tura che chu hriak min thihsak ang che." a tia

4Tichuan Samuela chuan LALPA sawi ang chuan a ti a, Beth-lehem-ah chuan a kal ta a. Tin, khuaa upate chuan khur chungin amah an lo hmuak a, "Tha lam thua lo kal em i nih le?" an ti a.

5Tin, ani chuan, "Tha lam thu-ah ni e: LALPA hnena inthawi tura lo kal ka ni; intithianghlim u la inthawinaah lo kal ve rawh u," a ti a. Tin, Jesaia leh a fapate chu a tithianghlim a, inthawinaah chuan a ko a.

6Tin, heti hi a ni a, an lo kal chuan Eliaba chu a lo en a, "LALPA hriak thiha chu a hmaa awma hi a ni ngei mai," a ti a.

7Nimahsela LALPA chuan Samuela hnenah, "A hmel lam emwa, a san lam emaw en suh; ani hi chu ka duh lo a ni; LALPA hchuan mihring en dan angin a en ve si lo a; mihring hchuan pawn lam lan dan an en thin a, LALPA erawh chuan thinlung lam a en zawk thin a ni," a ti a.

8Tin, Jesaia chuan Abinadaba a han ko a, Samuela hmaah chuan a kaltir a. Ani chua, "Hei pawh hi LALPA thlan a la ni lo," a ti a.

9Tin, Jesaia chuan Sama a va kaltir leh a. Tin, ani chuan, "Hei pawh hi LALPA thlan a la ni lo cheu," a ti a.

10Tichuan Jesaia chuan a fapate pasarih Samuela hmaah chuan a kaltir a. Tin, Samuela chuan Jesaia hnenah, "LALPA'n hengho hi a thlang lo a ni," a ti a.

11Tin, Samuela chuan Jesaia hnenah, "Hetah hian i fate an awm kim vek em?" a ti a. Ani chuan, "A naupang ber a la awm a, ngai teh, beram a veng a ni," a ti a. Tin, Samuela chuan Jesaia hnenah, "Va kohtir rawh khai; a lo thlen hma loh chu kan kil dawn lo a ni," a ti a.

12Chutichuan a va kohtir a, a rawn hruai a. Ani chu sar veng vawng, mit meng mawi tak, hmeltha tak mai a ni a. Tin, LALPA chuan, "Tho la, hriak thih rawh, hei ngei hi a ni e," a ti a.

13Chutichuan Samuela chuan hriak bawm ki chu ala a, a unaute zingah chuan amah chu hriak a thih a; tichuan LALPA thlarau chu chu mi ni atang chuan nasa takin Davida chungah a lo thleng ta a. Chutichuan Samuela chu a tho a, Rama khuaah a kal ta a.

14Tin, LALPA thlarau chuan Saula chu a chhuahsan a, LALPA tirh ramhuaiin amah a tibuai a.

15Tin, Saula chhiahhlawhte chuan a hnenah, "Ngai teh, Pathian tirh ramhuaiin a tibuai che a ni a.

16Kan pu chuan i chhaihhlawh i hmaa awmte tingtang tum thiam tak zawn thu min pe rawh khai; tichuan Pathian tirh ramhuaiin a man hun chein a tum ang a, i tha mai ang," an ti a.

17Tin, Saula chuan a chhiahhlawhte hnenah chuan, "Tum thiam tak chu min han zawnsak u la, ka hnenah rawn hruai rawh u le," a ti a.

18Chutichuan tlangval pakhat chuan a chhang a, a hnenah, "Ngai teh, Beth-lehem mi Jasaia fapa pakhat chu ka hmu tawh a, chu mi chu tum thiam tak, mi huai tak, indo mi, thusawi thiam tak, hmel tha tak a ni a, a hnenah LALPA pawh a awm," a ti a.

19Chutichuan Saula chuan Jesaia hnenah chuan mi a tir a, "I fapa Davida beram venga awm chu ka hnenah han kaltir rawh," a ti a.

20Tin, Jesaia chuan sabengtung, chhang leh uain peng khat phur leh kel no a la a, a fapa Davida chu Saual pekah a kentir a.

21Tin, Davida chuan Saula hnen chu a va thleng a, a hmaah chuan a va ding a; Ani chuan a lo ngaina hle mai a, a ralthuam kengtuah a tang ta a.

22Tin, Saula chuan Jesaia hnenah, "Davida hi ka hnenah awm rawh se, ka mit a tlung hle mai," tia hrilh turin mi a tir a.Tin, heti hi ani a, Pathian tirh ramhuaiin Saula a man apiangin Davida chuan tingtang a la a, a tum thin a: chutichuan Saula chu a lo harh a, a tha leh thin a, tin, ramhuai chuan a chhuahsan thin a.

23Tin, heti hi ani a, Pathian tirh ramhuaiin Saula a man apiangin Davida chuan tingtang a la a, a tum thin a: chutichuan Saula chu a lo harh a, a tha leh thin a, tin, ramhuai chuan a chhuahsan thin a.

← Chapter 15 Jump to: Chapter 17 →