Nahum 3

Mizo Bible

← Chapter 2 Jump to:

1Thisen chhuah hmang khawpui chu a chung a pik e! Dawt leh inrawknain a khat vek a; an sa seh chu a chat lak lo.

2Vuakin vai rik te, tawlailir ke in nghawr ri te, sakawr zuang te, tawlailir tlan hlawk hlawk te nen;

3Sakawr chung chuang mi sakawra chuangte, khandaih tle zawk zawkte, fei tle zawr zawrte nen; mi thah awm rem rumte, ruang awm rei ruite nen: ruangin kin tih reng a nei lo; an ruangte chu an chhuih a:

4Chung chu, nawhchizuar hmeltha, dawithiamnu, uirena avanga hnam hralh a, a dawi chinna avanga chhungkaw hralhtu uirena nasa tak avanga lo awm a ni.

5Sipaihote LALPA chuan heti hian a ti: Ngai teh, ka do che a ni; i hmai lamah i puan ka hlim ang a; i saruakna hnamte hnenah leh i mualphona lal ramte hnenah ka entir ang.

6Bawlhhlawh tenawm takin ka theh ang che a, zahthlak takin ka siam ang che a, ennawm atan ka dah ang che.

7Tin, heti hi a ni ang a, a hmu apiang che i lakah an tlan bo ang a, Ninevi khua chu a lo ram ta a ni: tu nge sun ang? Khawi ata nge i tan thlamuantute ka zawn tak ang? an ti ang.

8Nile lui luan hual No-amon, a kulh atan tuipui hmang a, a in hung nana tuidil hmang aiin i chak zawk em ni?

9Ethiopia leh Aigupta chu a chakna ani a, chu chu tawp chin nei lo a ni; Put leh Lubim chu nangmah tanpuitute an ni.

10Chuti chung pawh chuan lak boin a awm a, a salah a tang a: kawtthler tin tawpah a naupang te te chu an paih sawmsak a: a mitha te tan thum an vawr a, a milian zawng zawngte chu khaidiatin phuar an ni.

11Nangpawh i rui bawk ang a, thuhrukin i awm ang; hmelma avangin kulh nghet i zawng bawk ang.

12I kulh zawng zawngte chu theipui kung, rah hmin hmasa pu ang an ni ang a: an nghin phawtchuan eitu kaah an tla lut thin.

13Ngai teh,i chhunga i mipuite chu hmeichhia an ni a; i hmelma te tan i ram kawng-ka chu a in hawng huai a: i in kalhna thir tlawnte chu meiin a kang ral a ni.

14Hual vela i awm chhung atan tui chawi la, i kulhte tinghet rawh; hlumawmnaah chuan kalla, lungcharna chu chil la, leirawhchanna thuk chu tinghet rawh.

15Chutah chuan meiin a kangral ang che a, khandaihin a sathlum ang che a, thingnget angin a tiboral ang che: thingnget angin intitam la, khaukhuap angin intitam rawh.

16I sumdawngtute chu van arsi aia tamin i tipung a: thingngetin a thla azar a, a thlawk bo ang hian an bo zo ta.

17I mi lallukhum khumte chu khaukhuap ang an ni a, i sipaihotute chu khaw vawh nia pala khau rual fu khawm ang an ni, amaherawhchu ni a lo chhuak a, an thlawk bo a, an awmna hmun reng hriat a ni lo.

18Aw Assuria lal, i beram vengtute chu an muthlu e: i miliante chu an chawl a: i mipuite chu tlangahte an darh zo a, hruai khawmtu tumah an awm lo.I na damna tur a awm lo a; i hliam chu a nasa hle a ni: i thawm hria apiangin kut an ben khum che; i suahsualnain a chim fo loh tu nge awm?

19I na damna tur a awm lo a; i hliam chu a nasa hle a ni: i thawm hria apiangin kut an ben khum che; i suahsualnain a chim fo loh tu nge awm?

← Chapter 2 Jump to: