2 Chronicles 13

Madurese Bible 1994 (ALKETAB E DHALEM BASA MADURA)

← Chapter 12 Jump to: Chapter 14 →

1E taon se kapeng ballu bellas pamarenta'anna Rato Yerobeyam e Isra'il, Abiya jumenneng rato Yehuda,

2ban marenta e Yerusalim tello taon abidda. Ebuna iya areya Mikhaya pottrana Uriyel dhari kottha Gibeya. Saellana jareya Abiya laju aperrang ban Yerobeyam.

3Abiya makalowar parjurit pa' ratos ebu oreng, dineng Yerobeyam makalowar parjurit ballung atos ebu oreng.

4Pasukan se dhadhuwa' jareya dhep-adhebban e dhaera Pagunongan Efraim. Abiya ongga ka Gunong Zemara'im, laju aera' ka Yerobeyam ban ka oreng Isra'il, “Edhingngagi!

5Ba'na tao ja' PANGERAN, Allahna Isra'il la mabadha parjanjiyan ban Daud ja' Daud ban toronanna bakal marenta'a Isra'il salanjangnga. Janji jareya ta' ekenneng paburung.

6Maske bariya, Yerobeyam ana'na Nebat rowa aberonta' ka Sulaiman, ratona.

7Yerobeyam makompol reng-oreng se korang ajar, laju maksa Rehabeyam pottrana Sulaiman sopaja norodana karebba; e bakto jareya Rehabeyam gi' kana' gallu ban gi' ta' andhi' pangalaman daddi ta' bangal alaban.

8Sateya ba'na nyangka bisa alaban ka kakobasa'an se eparengngagi PANGERAN ka toronanna Daud, sabab pasukanna ba'na raja ban ba'na andhi' pe-sape emmas se bi' Yerobeyam egabay dibana ba'na.

9Mam-imamma PANGERAN toronanna Harun ban reng-oreng Lewi bi' ba'na la eojuk kabbi. Menangka gantena, sapa'a bai se terro daddiya imam, sokor ngeba sape settong otaba dumba papetto', bi' ba'na epadaddi imamma se banne Allah, sabab pajat kantha jareya carana sa-bangsa laenna mon ngangkat imamma. Tape sengko' ban tang bangsa ta' kantha jareya.

10Tape sengko' e dhinna' gi' paggun ngabdi ka GUSTE Allah, ta' mongkore Salerana. Se daddi tang imam paggun toronanna Harun, ban teptep ebanto reng-oreng Lewi.

11Sabban gi' laggu lem-malem mam-imam jareya ngobbar dupa ban ngatorragi kurban obbaran ka PANGERAN, sarta nyadhiya'agi roti sasajin, esaba' e meja se berse menorot agama. Sabban malem ngodhi'i mar-damar se esaba' e panongko'an emmas. Sengko' kabbi padha paggun atoro' ka papakonna PANGERAN, tape ba'na mongkore Salerana.

12Tang pamimpin Allah dibi' ban mam-imamma se badha e dhinna'. Mam-imam jareya la asadhiya nopeya tarompet menangka tandha ka tang bangsa sopaja nyerranga ba'na. He oreng Isra'il, ba'na ja' amosowan ban PANGERAN, Allahna bangatowana ba'na! Ba'na ta' kera mennang!”

13Sabatara jareya Yerobeyam ngerem sabagiyan dhari pasukanna epangaddhanga pasukan Yehuda dhari budhi, dineng se sabagiyanna epangadhebbi bangsa Yehuda jareya dhari adha'.

14E bakto pasukan Yehuda nangale'e ja' aba'na la ekeppong moso, laju padha aera' menta tolong ka PANGERAN. Para imam nope tarompet;

15saellana jareya pasukan Yehuda laju aera' ngoca'agi cerrengnga paperrangan sarta pas maju nyerrang, epimpin bi' Abiya. Sabatara reng-oreng Yehuda jareya aserro ka Allah, Allah makala Yerobeyam ban pasukan Isra'il,

16sampe' padha buru kabbi. Bi' Allah oreng Yehuda epamennang.

17Ce' rajana kakala'anna oreng Isra'il ka Abiya ban pasukanna jareya; lema ratos ebu parjuridda se paleng bagus mate kabbi.

18Oreng Yehuda mennang polana ngandellagi kakowadanna PANGERAN, Allahna bangatowana.

19E bakto nyerser pasukanna Yerobeyam, Abiya arebbu' pan-barampan kottha ban sa-disa se badha e sabingkerra. Tha-kottha jareya iya areya Betel, Yesana ban Efron.

20Saabidda pamarenta'anna Abiya, Yerobeyam ta' bisa mabali one kakobasa'anna. Dhi-budhina Yerobeyam jareya epate'e bi' PANGERAN.

21Sabaligga, Abiya sajan kobasa. Rajina pa' bellas oreng, pottra lalake'anna dhu lekor oreng ban pottra babine'anna nem bellas oreng.

22Careta laenna parkara Abiya, sarta sabarang se edhabuwagi ban elampa'agi, la ecathet e dhalem ketab Sajarana Nabbi Ido.

← Chapter 12 Jump to: Chapter 14 →