2 Chronicles 14

Madurese Bible 1994 (ALKETAB E DHALEM BASA MADURA)

← Chapter 13 Jump to: Chapter 15 →

1Saellana Rato Abiya seda ban esareyagi e pasareyanna to-rato e Kottha Daud, laju egante bi' Asa, pottrana. E bakto eparenta Asa, nagara Yehuda taremtem sapolo taon abidda.

2Asa adil ban becce', daddi masenneng panggaliyanna PANGERAN.

3Ba-mezbana bangsa laen epanyese, bariya keya kennengnganna panyemba'anna brahalana. Gu-tuguna dibana epaancor, ban ga-canggana arcana Dewi Asyera epagujur.

4Ra'yat Yehuda epakon odhi' menorot kasokanna PANGERAN, Allahna bangatowana, sarta epakon atoro' ka sakabbinna pangajaran ban papakonna.

5Kennengnganna panyemba'anna brahala ban kennengnganna pangobbaranna dupa epanyese kabbi dhari tha-kottha Yehuda. Daddi karaja'an jareya e bakto eparenta Asa kabadha'anna taremtem,

6daddi Asa ngenneng maddek teng-binteng e tha-kottha Yehuda. Pan-barampan taon abidda tadha' perrang, sabab PANGERAN apareng kataremtemman.

7Dhabuna Asa ka ra'yat Yehuda, “Mara tha-kottha e nagara reya pakowat, e sakalenglengnga pobuwi geddhung ban ra-manara sarta labang saketheng se badha lang-palangnga. Nagara reya ekenneng kobasae bi' ba'na polana ba'na norodi kasokanna Allah. Allah alindhunge ba'na ban apareng kaamanan ka saantero nagarana ba'na reya.” Daddi reng-oreng jareya laju molae ajalannagi lalakon jareya sampe' mare; gabayanna epabagus.

8Se tamaso' tantarana Rato Asa reya oreng Yehuda se asanjata tameng ban tombak tello ratos ebu oreng, ban oreng Benyamin se asanjata tameng, gandhiba ban pana dhu ratos ballung polo ebu oreng. Jareya kabbi parjurit se ngal-bangal sarta la elate.

9E settong bakto badha oreng Sudan anyama Zerah alorok Yehuda ngeba pasukan, bannya'na sajuta oreng parjurit ban kareta perrang tello ratos meggi'. Pasukan Sudan jareya maju sampe' gan Maresa.

10Asa laju kalowar ngadhebbi Zerah, se kadhuwa jareya laju padha ngator barisan e Cora Zefata e seddi'na Maresa.

11Asa laju adu'a ka GUSTE Allahna, “GUSTE, namong Junandalem se kengeng nolonge oreng se ta' gadhuwan kakowadan e dhalem ngadhebbi oreng se kowat. Nyo'ona tolong samangken abdidalem, GUSTE Allah, Pangeran kaula! Abdidalem nyandhara ka Junandalem, sareng kalaban asmaepon Junandalem abdidalem sadaja badhi kalowara aperranga sareng pasukanna moso se talebat rajana ka'dhinto. GUSTE, Junandalem Allah abdidalem. Ja' kantos Junandalem epakala sareng manossa.”

12Asa ban tantara Yehuda laju nyerrang tantara Sudan. Tantara Sudan jareya bi' PANGERAN epakala, sampe' kabbi padha buru.

13Asa ban tantarana nyerser moso se buru jareya sampe' gan Gerar. Tantarana Sudan ce' bannya'na se mate sampe' ta' andhi' kakowadan, sabab epaancor bi' PANGERAN sarta bi' tantara Yehuda; tantara Yehuda jareya arampas rang-barangnga tantara Sudan sampe' ce' bannya'na. Saellana jareya tantara Yehuda maancor tha-kottha e dhaera e sabingkerra Gerar, sabab ra'yadda e jadhiya padha katako'en ka PANGERAN. Tha-kottha jareya bi' tantara Yehuda erampase kabbi; ollena barang rampasanna ce' bannya'na.

15Tantara Yehuda jareya gi' nyerrang keya parkemahanna reng-oreng se meyara ebin; dumba ban ontana bannya' se eangko'. Saellana jareya kabbi laju padha mole abali ka Yehuda.

← Chapter 13 Jump to: Chapter 15 →