Ezekiel 34

Madurese Bible 1994 (ALKETAB E DHALEM BASA MADURA)

← Chapter 33 Jump to: Chapter 35 →

1PANGERAN adhabu ka sengko',

2“He, manossa se ta' langgeng, cale to-rato Isra'il, ban kabala apa se ekoca'agi Sengko', GUSTE Allah Se Mahatenggi ka to-rato jareya, ‘Palang ba'na, reng-oreng ngowan Isra'il. Ba'na pera' mekkere aba'na dibi', ta' mekkere ba-dumbana.

3Bi' ba'na susuna eenom, buluna ekagabay kalambi, ban dumba se paleng lempo esambelli pas ekakan. Ba'na ta' tao ngoros ba-dumbana.

4Se ta' kowat bi' ba'na ta' epeyara, se sake' ta' etambai, se loka ta' ebetbet, se posang ban elang ta' esare ban ta' egiba mole. La'-mala' ba'na kejjem ka ba-dumbana jareya.

5Sarrena tadha' se ngowan, ba-dumba jareya asalebbudan ban daddi kakanna burun alas galak.

6Daddi Tang ba-dumba ajalan san-kassannagi e mo'-gumo' se tenggi ban e nong-gunong; asalebbudan ka saantero bume, tadha' se mekkere ban tadha' se nyare.

7Daddi, reng-oreng ngowan, edhingngagi apa se ekoca'agi Sengko', PANGERAN Se Mahatenggi, ka ba'na reya:

8Bit Tang nyama, Allah se odhi', edhingngagi pagu-onggu! Tang ba-dumba la eceppa' ban ekakan burun alas galak, polana tadha' se ngowan. Ba'na Tang reng-oreng ngowan ta' marduli ba-dumba jareya. Ba'na pera' mekkere aba'na dibi', banne mekkere ba-dumbana.

9Daddi mara edhingngagi, he, Tang reng-oreng ngowan,

10Sengko', GUSTE Allah Se Mahatenggi ngoca'a ka ba'na, ja' Sengko' reya mosona ba'na. Tang ba-dumba rowa bi' Sengko' ekala'a pole dhari ba'na, ta' eparcaja'agiya ka ba'na pole; bi' Sengko' ba'na ta' ebagi pole mekkere aba'na dibi'. Tang ba-dumba bi' Sengko' epasalamedda dhari ba'na sopaja ta' daddi kakanna ba'na pole.’ ”

11GUSTE Allah Se Mahatenggi adhabu, “Sengko' dibi' nyareya Tang ba-dumba, ban meyara'a ba-dumba jareya,

12akantha oreng ngowan se nyare ban makompol ba-dumbana se asalebbudan sarta pas meyara ba-dumbana jareya. Bi' Sengko' egiba'a mole dhari man-dhimman kennengnganna ba-dumba jareya asalebbudan e are se petteng ban na'as rowa.

13Bi' Sengko' epakalowara dhari antarana sa-bangsa ban ra-nagara manca, pas epakompola sarta egiba'a mole ka nagarana dibi'. Bi' Sengko' eowana e nong-gunong ban e ra-cora Isra'il, ban etontona ka lon-talon se nyaman rebbana.

14Onggu, ba-dumba jareya bi' Sengko' esadhiya'ana lon-talon se landhu e pagunongan ban e ra-cora Isra'il. E jadhiya ba-dumba jareya bakal aistirahada ban aman ngakan rebbana.

15Sengko' dibi' se ngowana ba-dumba jareya ban nyadhiya'agiya kennengnganna aistirahat; Sengko', GUSTE Allah Se Mahatenggi la ngoca'.

16Se elang bi' Sengko' esareya, se posang egiba'a mole, se loka ebetbedda, se sake' etamba'ana; tape se lempo ban se baras bi' Sengko' epateyana, sabab Sengko' reya oreng ngowan se ajalannagi sabarang se becce'.

17Mara edhingngagi, Tang ba-dumba! Sengko', GUSTE Allah Se Mahatenggi ngoca' ka ba'na ja' Sengko' ahakimana ba'na bang-sebang, ban malaena se becce' dhari se jahat, malaena ba-dumba dhari embi'.

18E antarana ba'na badha se gi' arassa korang maske la maabi' rebba se paleng becce', daddi gi' nyek-ngenyek rebba se ta' ekakan aba'na! Aeng se benneng eenom, ban se ta' eenom laju epalekko!

19Tang ba-dumba laenna kodu ngakan rebba se la enyek-enyek ban ngenom aeng se la lekko.

20Daddi Sengko', GUSTE Allah Se Mahatenggi ngoca'a ka ba'na, he, ba-dumba se lempo, ja' Sengko' dhatengnga daddiya hakim e antarana ba-dumba se kowat ban se ta' kowat.

21Ba'na thok-nyothok ban nyodhuk dumba se sake' sampe' tapesa dhari ambalanna dumba jareya.

22Tape Sengko' dibi' masalamedda Tang ba-dumba, sopaja ta' ekennenga ekejjemme pole. Sengko' ahakimana Tang ba-dumba gan settong ban malaena se becce' dhari se jahat.

23Sengko' ngangkada rato se akantha Daud Tang abdi, se ngowana ban meyara'a ba-dumba jareya kadibi'an; Sengko' ta' ngangguya oreng ngowan laen kajabana se settong jareya.

24Sengko', PANGERAN, daddiya Allahna ba-dumba jareya, ban rato se akantha Daud Tang abdi rowa se bakal daddiya pangobasana. Sengko' Pangeran la ngoca'.

25Sengko' mabadha'a aparjanjiyan bi' ba-dumba jareya, se daddiya tanggunganna kaamananna. Sengko' ngojuga sakabbinna burun alas se galak dhari saantero nagara, sampe' Tang ba-dumba bisa aman enneng e lon-talon ban tedhung e las-alas.

26Sengko' aberkadana Tang ba-dumba jareya, ban ngedinana ba-dumba jareya enneng e sabingkerra Tang gumo' se socce. Mon teppa' parlo, ba-dumba jareya bi' Sengko' epatoronana ojan.

27Ka'-bungka'an bakal abuwa'a, gal-teggal bakal madhatengnga hasel, ban sakabbinna oreng bakal amana enneng e tanana dibi'. Mon rantay se nale'e Tang ommat la epapegga' bi' Sengko', ban bi' Sengko' reng-oreng jareya la epabebas dhari reng-oreng se ngadunor Tang ommat jareya, reng-oreng jareya tao ja' Sengko' reya PANGERAN.

28Tang ommat jareya ta' kera ebigal pole bi' sa-bangsa se ta' tao ka Sengko', ban ta' kera eceppa' burun alas se galak. Tang ommat jareya bakal nyamana odhi'na, ban ta' kera tako' ka sapa'a pole.

29Sengko' malandhuwa gal-teggalla sampe' ta' tao badha kalaparan pole e nagara jareya. Tang ommat ta' kera eya-seya pole bi' sa-bangsa laen.

30Daddi sakabbinna oreng pas tao ja' Isra'il reya Tang ommat ban ja' Sengko' ngaobi aba'na. Sengko', GUSTE Allah Se Mahatenggi la ngoca'.

31Onggu, ba'na reya Tang ba-dumba se saambalan se epakane Sengko'. Ba'na Tang ommat, ban Sengko' Allahna ba'na. Sengko', GUSTE Allah Se Mahatenggi la ngoca'.”

← Chapter 33 Jump to: Chapter 35 →