Joshua 15

Madurese Bible 1994 (ALKETAB E DHALEM BASA MADURA)

← Chapter 14 Jump to: Chapter 16 →

1Ga-kalowarga e dhalem suku Yehuda narema bagiyanna tana se tes-batessa kantha reya: E bagiyan lao' sampe' gan konco' paleng lao'na ra-ara beddhi Zin e batessa Edom;

2molae dhari konco' lao'na Tase' Mate,

3terros ka lao' lebat e reng-erengnga gunong e Akrabim sampe' gan Zin. Saterrossa lebat lao'na Kades-Barnea, terros lebat Hezron, ongga ka Adar, pas abiluk ka bagiyan se nojju ka Karkar.

4Dhari jadhiya terros pole ka Azmon, pas noro' penggirra songay e batessa Messer, sampe' gan Tase' Tengnga. Jareya garis bates bagiyan lao'na dhaera se ebagi ka suku Yehuda. Ban garis bates jareya daddi bates lao'na saantero nagara Isra'il keya.

5E bagiyan temor batessa iya areya Tase' Mate, terros ka dhaja sampe' gan mowarana Songay Yordan. E bagiyan dhaja batessa molae dhari mowarana Songay Yordan jareya,

6ongga ka Bet-Hogla, pas terros ka batessa Cora Yordan. Dhari jadhiya bates bagiyan dhaja jareya ongga terros ka attas sampe' gan Bato Bohan (Bohan reya ana'na Ruben),

7pas terros ka Cora Kasossa'an sampe' ka Debir, pas abiluk pole ka dhaja ka bagiyan se nojju ka Gilgal e kennengngan se dhep-adhebban ban reng-erengnga gunong e Adumim e bagiyan lao'na cora jareya. Dhari jadhiya terros pole ka somberra aeng En-Semes, pas terros ka En-Rogel,

8laju ongga lebat e Cora Hinom e bagiyan lao'na gumo' kennengnganna kottha Yerusalim, kotthana oreng Yebus. Dhari jadhiya batessa nojju ka konco'na gumo' jareya e bara'na Cora Hinom, e konco' dhajana Cora Refa'im,

9pas terros ka somberra aeng Me-Neftoah, sampe' ka tha-kottha e seddi'na Gunong Efron. Dhari jadhiya garis batessa dhaera jareya abiluk ka Ba'ala (iya areya Kiryat-Yearim),

10ban ngobengnge bagiyan bara'na Ba'ala ka Pagunongan Edom, terros ka bagiyan dhajana Gunong Yearim (iya areya Gunong Kesalon), toron ka Bet-Semes, pas terros ka Timna.

11Dhari Timna, garis bates jareya terros ka bagiyan dhajana Gunong Ekron, laju abiluk ka Sikron, lebat e Gunong Ba'ala, terros ka Yabne'el, ban ambu e Tase' Tengnga,

12se daddi garis bates bagiyan bara'na baba kakobasa'anna suku Yehuda. E dhaera jareya badha reng-oreng dhari ga-kalowarga e dhalem suku Yehuda

13Menorot dhabuna PANGERAN ka Yusak, sabagiyan dhari dhaerana Yehuda ebagi ka Kaleb pottrana Yefune dhari suku Yehuda. Kaleb jareya narema Hebron, iya areya kottha andhi'na Arba, eppa'na Enak.

14Toronanna Enak iya areya oreng Sesai, Ahiman ban Talmai. Reng-oreng jareya bi' Kaleb eojuk kabbi dhari Hebron.

15Dhari jadhiya Kaleb nyerrang reng-oreng se neng e Debir. (Kottha jareya lamba' biyasana enyamae Kiryat-Sefer.)

16Dhabuna Kaleb, “Pa'-sapa'a se bisa arebbu' Kiryat-Sefer, olle akabin ban tang ana', Akhsa.”

17Otniyel, ana'na taretanna Kaleb se anyama Kenas, arebbu' kottha jareya; daddi bi' Kaleb laju epabine'e pottrana se anyama Akhsa jareya.

18E bakto apangantan, Otniyel ce' maksana nyoro Akhsa menta tana ka eppa'na. Daddi Akhsa pas toron dhari hemarra, bi' Kaleb etanyae apa se ekaterro.

19Saodda Akhsa, “Kaula terro gadhuwana ber-somberra aeng. Sabab tana paparengnga sampeyan ka kaula ka'issa' badha e kennengngan se kerreng.” Daddi bi' Kaleb laju eparenge somberra aeng e bagiyan olo ban somberra aeng e bagiyan onjur.

20Areya' tana se ebagi ka ga-kalowarga e dhalem suku Yehuda se epadaddi andhi'na.

← Chapter 14 Jump to: Chapter 16 →