Song of Solomon 2

Madurese Bible 1994 (ALKETAB E DHALEM BASA MADURA)

← Chapter 1 Jump to: Chapter 3 →

1Abdidalem namong mawar dhari Saron, kembang kacobung e ra-cora.

2Akantha kembang kacobung e ombut se adhuri, kantha jareya tang kakase e antarana para pottre.

3Akantha bungkana appel e tengngana ka'-bungka'an e alas, kantha jareya tang kakase e antarana lalake'an. Sengko' senneng ngaop e baba'anna, buwana padha manes rassana.

4Sengko' egiba ka kennengnganna pesta, pangabassa ka sengko' noduwagi taresnana.

5Mara, ra, sengko' reya pakowattagi bi' manesan buwana anggur, paseggerragi sengko' reya bi' buwana appel, sabab sengko' reya sake' asmara.

6Tanang kacerra nagenne tang cethak, tanang kanganna agellu' tang badan.

7Mara ajanji, e, babine'an Yerusalim, demi dang-keddang ban manjangan e ra-ara, ja' ba'na ta' agangguwa kataresna'an reya, sabellunna katekkan se daddi pangaterrona.

8Edhingngagi! Tang kakase rabu, akantha budhu'na manjangan otabana keddang. Ca'-lonca'an e nong-gunong, ca'-kenca'an e mo'-gumo'. Abas, rowa' ngadek e budhina geddhung, socana re-sareyan, nyorne' dhari ca'-raca'na candhela.

10Edhingngagi, tang kakase adhabu ka sengko'. Mara dha' enna', le', mara dha' enna'!

11Abas, mosem cellep la lebat nembara' la lobar.

12E teggal bang-kembang padha mekkar; mosem notto la napa'; oreng ngedhing monyena keteran e tanana sengko' ban ba'na.

13Bungkana ara la molae badha buwana; bungkana anggur aro'oman kembangnga. Mara dha' enna', le', mara dha' enna'.

14O, tang dara se badha e ke'-lekke'na bato, e pangeteggan e bung-lambungnga gunong se durjet, mara patao robana ba'na ka sengko', mara pakaedhing sowarana, sabab robana ba'na raddin, sowarana tenne.

15Pega' rang-garangan rowa, rang-garangan ne'-kene' se marosak kebbun anggur, sabab tang kebbun anggur teppa'na ngembang.

16Tang kakase reya tang andhi', ban sengko' reya kaagunganna; salerana se ngowan ba-dumbana e antarana bang-kembang kacobung

17sampe' angen laggu molae dhateng, ban jang-bajangan elang. Ngereng abali, kakase, pakadi keddang, pakadi budhu'epon manjangan e Pagunongan Beter.

← Chapter 1 Jump to: Chapter 3 →