1 Samuel 8

Maasai 2018 (BIBLIA SINYATI TE NKUTUK OO LMAASAI NATISIRAKI ENG'EJUK NAATA MBUKUI E DITROKANONI)

← Chapter 7 Jump to: Chapter 9 →

1Ore ake pee emoruau Samuel neitaa ilayiok lenyena ilarishak te Israel.

2Ore enkarna e ilo ayioni lenye kikau naa Yoel, ore enkarna o liare, neji Abija; neiguana apa ninche te Beer-sheba.

3Ore eyia eitu apa eibung lelo ayiok lenyena inkoitoi enyena, kake eibelekenyate aasujaa dupoto; neng'amaa ninche intokitin e ropare neboin esipata.

4Neitoki ilpayiani pooki loo Siraeli aaiturrurro te nebo nepuonu enetii Samuel te Rama,

5nejoki ninye, “Ng'ura, ira iyie moruo, ore ilayiok linono nemepuo too nkoitoi inono; ore naa taata tegelaki iyiook olaiguanani pee eitore iyiook anaa nkuapi pooki.”

6Kake eitu eitiship ina bae Samuel ina kata pee ejo ninche, “Inchoo iyiook olaiguanani pee eitore iyiook.” Neomon Samuel Olaitoriani.

7Nejoki Olaitoriani Samuel, “Toning'o oltoilo loo ltung'ana te nena pooki nikijoki ninche iyie; amu eitu ninche kiany iyie, kake aatanyaita ninche nanu pee maitoki aaku olaiguanani lenye.

8Ore te risioroto oo nkiaasin pooki naaitaasa ninche nanu, ebaiki ina olong apa nayawua ailepunye aitung'uaa Misiri o metabaiki ena olong, aaing'uaa nanu, neisiai kulie aitin, metaa easita sii ina te iyie.

9Ore naa taata, toning'o oltoilo lenye; nabo ake, nkoo ninche tuunoki, nintodol ninche inkoitoi e ilo aiguanani ooyooki aitore ninche.”

10Neliki Samuel irorei pooki lo Laitoriani lelo tung'ana ooikilikuanu olaiguanani te ninye.

11Nejo ninye, “Kuna eas ilo aiguanani oyooki aitore intae; keya ninye ilayiok linyi, negelaki ingarrin enyena neaku ilakedok loo mbartan enyena, neipirri ninche te dukuya ingarrin enyena;

12negelu te nkaraki kewan enye ilarikok loo nkalifuni o larikok loo maa onom, o kulikae pee etur enkurma enye o kulikae pee eikes enkurma enye, neitobir sii imasaa olarrabal o ntokitin oo ngarrin enyena.

13Neya ninye intoyie inyi aitaa nkaitobirak oo sonkoyoni, o nkayiarak o nkapejok oo mukateni.

14Neya ninye eneisul too nkurman inyi, o too sabibu o nkurman oo loirienito neisho ninche isinkan lenyena.

15Neya ninye ematua e tomon oo ntapa inyi o enoo sabibu neisho ninche ilkituaak lenyena o isinkan lenyena.

16Neya ninye isinkan linyi lewa o nkaisiaayiak inyi, o nkishu inyi naaisul, o sirkon linyi, nepik ninche esiaai enye.

17Neya ninye ematua e tomon oo nkerra inyi, niakuku intae irrindiki lenyena.

18Ore kenya ina olong niyietutu aaishir te nkaraki olaiguanani linyi, laa ninye itegelakita ate; kake meng'amaa kenya intae Olaitoriani teina olong.”

19Kake etanyaita iltung'ana einining ilo toilo le Samuel; nejo ninche, “A'a! Kake aikiyeu ake iyiook olaiguanani oitore iyiook,

20pee kitum sii iyiook aatotiu anaa inkuapi pooki, netum sii olaiguanani lang aitoria iyiook, nerikoo ninye iyiook, nearisho ninye too larrabali lang.”

21Ore ake pee eidip Samuel atoning'o irorei pooki loo ltung'ana, nelimu ninche pooki too nkiyiaa o Laitoriani.

22Nejoki Olaitoriani Samuel, “Toning'o oltoilo lenye, nigelaki ninche olaiguanani.” Neitoki Samuel ajoki iltung'ana le Israel, “Shomo pooki tung'ani enkanasa enye.”

← Chapter 7 Jump to: Chapter 9 →