Daniel 3

Malagasy MRV 2011 (La Bible en Malgache)

← Chapter 2 Jump to: Chapter 4 →

1Nanao sariolona volamena i Nebokadnezara mpanjaka, enimpolo hakiho* ny haavony, ary enina hakiho ny sakany. Natsangany teo amin’ny tany lemaka Dora tamin’ny faritanin’i Babilona ilay izy.

2Ary i Nebokadnezara mpanjaka nandefa iraka hamory ny solo-mpanjaka, ny mpanapaka, ny governora, ny mpanolotsaina, ny mpitahiry ny volam-panjakana, ny mpahay lalàna, ny mpitsara ary ny lehiben’ny fari-piadidiana rehetra mba hitokana ilay sariolona natsangan’i Nebokadnezara mpanjaka.

3Dia nivory hitokana ny sariolona izay natsangan’i Nebokadnezara mpanjaka ny solo-mpanjaka, ny mpanapaka, ny governora, ny mpanolotsaina, ny mpitahiry ny volam-panjakana, ny mpahay lalàna, ny mpitsara ary ny lehiben’ny fari-piadidiana rehetra ka nitsangana tandrifin’ny sariolona izay natsangan’i Nebokadnezara ireo.

4Dia nisy mpikabary niantso mafy hoe: Izao no lazaina aminareo, ry fokom-pirenena, ry firenena sy ny samihafa fiteny:

5Rehefa mandre ny fanenon’ny anjomara, ny sodina, ny lokanga, ny harpa, ny valiha, ny anjombona ary ny zavamaneno isan-karazany ianareo, dia miankohofa ka mivavaha amin’ny sariolona volamena izay natsangan’i Nebokadnezara mpanjaka.

6Ary na iza na iza no tsy miankohoka sy tsy mivavaka dia hatsipy avy hatrany ao anatin’ny lafaoro mirehitra afo.

7Koa tamin’ny fotoana nandrenesan’ny fokom-pirenena rehetra ny fanenon’ny anjomara, ny sodina, ny lokanga, ny harpa, ny valiha ary ny zavamaneno isan-karazany dia niankohoka sy nivavaka tamin’ilay sariolona volamena izay natsangan’i Nebokadnezara mpanjaka ny fokom-pirenena sy ny firenena ary ny samihafa fiteny rehetra.

8Tamin’izay dia nisy Kaldeana sasany nanatona ka niampanga ny Jiosy*.

9Niteny tamin’i Nebokadnezara mpanjaka izy ireo hoe: Ry mpanjaka ô, ho velona mandrakizay anie ianao!

10Ry mpanjaka ô, ianao dia efa nanao lalàna fa ny olona rehetra izay mandre ny fanenon’ny anjomara, ny sodina, ny lokanga, ny harpa, ny valiha, ny anjombona ary ny zavamaneno isan-karazany dia hiankohoka hivavaka amin’ny sariolona volamena;

11fa izay tsy miankohoka sy tsy mivavaka kosa dia hatsipy ao anatin’ny lafaoro mirehitra afo.

12Koa misy Jiosy izay nataonao ho tonian’ny raharaha momba an’i Babilona sy ny faritaniny, dia i Sadraka sy i Mesaka ary i Abed-Nego. Ireo lehilahy ireo dia tsy mba manaiky ny teninao akory, ry mpanjaka ô! Tsy mba manompo ny andriamanitrao izy na mivavaka amin’ny sariolona volamena izay natsanganao.

13Dia niteny tamin’ny havinirana sy ny hatezerana i Nebokadnezara, koa nasainy nalaina i Sadraka sy i Mesaka ary i Abed-Nego. Noentiny teo anatrehan’ny mpanjaka ary ireo lehilahy ireo

14ka niteny tamin’izy ireo i Nebokadnezara hoe: Moa fanahy ninianareo ve, ry Sadraka sy Mesaka ary Abed-Nego ny tsy mba anompoanareo ny andriamanitro, sy tsy ivavahanareo amin’ny sariolona volamena izay natsangako?

15Ankehitriny, vonona va ianareo hiankohoka sy hivavaka amin’ny sariolona izay nataoko rehefa mandre ny fanenon’ny anjomara, ny harpa, ny valiha, ny anjombona, ny sodina, ny lokanga ary ny zavamaneno isan-karazany? Fa raha tsy mety mivavaka mantsy ianareo dia hatsipy avy hatrany ho ao anatin’ny lafaoro mirehitra afo; ary iza moa izany Andriamanitra hahavonjy anareo amin’ny tanako izany?

16Dia namaly ny mpanjaka i Sadraka sy i Mesaka ary i Abed-Nego hoe: Ry Nebokadnezara, tsy misy antony tokony hamalianay anao akory ny amin’izany zavatra izany.

17Indro Andriamanitra izay tompoinay dia mahavonjy anay amin’ny lafaoro mirehitra afo sady hamonjy anay amin’ny tananao, ry mpanjaka ô.

18Ary na tsy izany aza, aoka ho fantatrao, ry mpanjaka ô, fa ny andriamanitrao dia tsy hotompoinay, ary ny sariolona volamena natsanganao dia tsy hivavahanay.

19Dia feno hatezerana i Nebokadnezara ka niova tamin’i Sadraka sy i Mesaka ary i Abed-Nego ny endriny, ary nasainy nohafanaina ho impito mihoatra noho ny famana azy ny lafaoro.

20Izay lehilahy matanjaka indrindra tamin’ny miaramilany koa no nasainy namatotra an’i Sadraka sy i Mesaka ary i Abed-Nego ka nanipy azy ireo tao anatin’ny lafaoro mirehitra afo.

21Dia nafatotra ireo lehilahy ireo, nefa mbola teny aminy ihany ny lobany sy ny akanjony ary ny akanjobeny ivelany mbamin’ny fitafiany hafa koa, ary natsipy tao anatin’ny lafaoro mirehitra afo izy ireo.

22Noho ny teny hentitra nataon’ny mpanjaka dia natao faran’izay mahamay ny lafaoro ka matin’ny lelafo ireo lehilahy izay nanipy an’i Sadraka sy i Mesaka sy i Abed-Nego.

23Ary izy telo lahy ireo dia i Sadraka, i Mesaka ary i Abed-Nego kosa dia voatsipy am-patorana tao anatin’ny lafaoro mirehitra afo.

24Dia talanjona i Nebokadnezara mpanjaka ka nitsangana haingana ary niteny tamin’ny mpanolotsainany hoe: Moa tsy telo lahy mifatotra va no natsipintsika tao anatin’ny afo? Dia namaly ny mpanjaka izy ireo hoe: Marina izany, ry mpanjaka ô!

25Ary hoy izy: Koa nahoana aho no mahita efa-dahy tsy mifatotra, mandehandeha eo anaty afo, nefa tsy maninon-tsy maninona akory izy ireo! Ary ny fijery ilay fahefatra aza dia toy ny zanak’ireo andriamanitra.

26Dia nanatona ny varavaran’ny lafaoro nisy afo mirehitra i Nebokadnezara ka niantso hoe: Ry Sadraka sy Mesaka ary Abed-Nego, mpanompon’Andriamanitra Avo Indrindra! Mivoaha tao ianareo ka avia atỳ! Dia nivoaka avy tao anaty afo i Sadraka sy i Mesaka ary i Abed-Nego.

27Dia nifanatona ny solo-mpanjaka, ny mpanapaka, ny governora ary ny mpanolotsainan’ny mpanjaka ka nahita ireo lehilahy ireo; hitany fa tsy nanan-kery hampaninona ny tenany akory ny afo, tsy nisy singam-bolo nikainkona tamin’ny lohany, tsy nihetsika ny lobany, ary tsy nisy fofon’afo akory taminy.

28Hoy i Nebokadnezara: Isaorana anie ny Andriamanitr’i Sadraka sy i Mesaka ary i Abed-Nego, izay naniraka ny anjeliny hamonjy ny mpanompony izay natoky Azy ka nandika ny tenin’ny mpanjaka ary nanolotra ny tenany tsy hanompo na hivavaka amin’izay andriamanitra hafa, afa-tsy ny Andriamaniny ihany.

29Koa mamoaka izao lalàna izao aho: Ny fokom-pirenena sy ny firenena ary ny samihafa fiteny rehetra izay manao teny tsy mety momba ny Andriamanitr’i Sadraka sy i Mesaka ary i Abed-Nego dia hotetitetehina, ary hatao trano fivoahana ny tranony; fa tsy misy andriamanitra hafa mahavonjy tahaka izao.

30I Sadraka sy i Mesaka ary i Abed-Nego kosa dia nomen’ny mpanjaka toerana ambony tao amin’ny faritanin’i Babilona.

31Nampitondra teny ho any amin’ny fokom-pirenena sy ny firenena ary ny samihafa fiteny rehetra izay monina amin’ny tany manontolo i Nebokadnezara mpanjaka hoe: Hitombo anie ny fiadananareo!

32Sitrako ny hanambara ny famantarana sy ny fahagagana izay nataon’Andriamanitra Avo Indrindra tamiko.

33Akory ny halehiben’ny famantarana sy ny herin’ny fahagagana ataony! Ny fanjakany dia fanjakana mandrakizay, ary ny fanapahany dia hahatratra ny taranaka fara aman-dimby.

← Chapter 2 Jump to: Chapter 4 →