Micah 5

Maori (Paipera Tapu 2012)

← Chapter 4 Jump to: Chapter 6 →

1Nā ināianei, ka whakahuihui ā-rōpū koe i a koe, e te tamāhine a ngā rōpū; kua oti tātou te whakapae e ia; ka patua e rātou ki te rākau te pāpāringa o te kaiwhakawā o Īharaira.

2“Nā, ko koe, e Pēterehema Ēparata, he iti nei i roto i ngā mano o Hūrā, e puta mai i roto i a koe tētahi māku hei kāwana mō Īharaira; ko ōna putanga nōnamata, nō ngā rā o tua iho.”

3Mō reira rātou ka tukua atu ai e ia, kia tae rā anō ki te wā e whānau ai tēnei e whakamamae nei; hei reira ngā toenga o ōna tuākana hoki ai ki ngā tama a Īharaira.

4Ā, ka tū ia, ka whāngai i tāna kāhui i runga i te kaha o Ihowā, i runga hoki i te nui o te ingoa o Ihowā, o tōna Atua; ā, ka noho rātou; nō te mea ākuanei ia ka nui, ki ngā pito rā anō o te whenua;

5ā, ko tēnei tangata hei maunga rongo mō tātou. Ina tae mai te Ahiriana ki tō tātou whenua, ā, ka takahi ki ō tātou whare kīngi, hei reira ara ai i a tātou hei whawhai ki a ia ētahi hēpara tokowhitu me ētahi tāngata rangatira tokowaru.

6Ā, ka whakamōtītia e rātou te whenua o Ahiria ki te hoari, te whenua hoki o Nimiroro i ōna tomokanga. Nā, ka whakaorangia tātou e ia i te Ahiriana, ina haere mai ia ki tō tātou whenua, ina takahi ia i roto i ō tātou rohe.

7Ā, ka rite ngā toenga o Hākopa i roto i ngā iwi maha ki te tōmairangi a Ihowā, ki ngā kōuaua i runga i te tarutaru; e kore nei e whanga ki te tangata, e kore anō e tatari ki ngā tama a te tangata.

8Nā, ka waiho te toenga o Hākopa i roto i ngā tauiwi, i roto i ngā iwi maha; ka rite ki te raiona i roto i ngā kararehe o te ngahere, ki te kūao raiona i roto i ngā kāhui hipi; nā, ki te tika atu ia i waenga, ka takatakahia e ia, ka haehaea, kāhore hoki he kaiwhakaora.

9Whakaarahia tōu ringa ki runga ake i ōu hoariri, hātepea atu hoki ōu hoariri katoa.

10“Nā, i taua rā,” e ai tā Ihowā “ka hātepea atu e ahau āu hōiho i roto i a koe, ka kore anō i ahau āu hāriata;

11ā, ka whakakorea atu e ahau ngā pā o tōu whenua, ka wāwāhia anō e ahau ōu pā kaha katoa;

12ka hātepea atu hoki e ahau ngā mākutu i roto i tōu ringa, ā, ka kore ngā tohunga māori i roto i a koe.

13Ka hātepea atu hoki e ahau āu whakapakoko, me āu pou whakaahua i roto i a koe; ā, e kore koe e koropiko i muri nei ki te mahi a ōu ringa.

14Ka hūtia anō e ahau āu Aherimi i roto i a koe; ā, ka hunā e ahau ōu pā.

15Ka rapua hoki e ahau he utu i ngā tauiwi i runga i te riri, i te weriweri, kīhai nei rātou i whakarongo.”

← Chapter 4 Jump to: Chapter 6 →