Micah 7

Maori (Paipera Tapu 2012)

← Chapter 6 Jump to:

1Auē te mate i ahau! He rite hoki ahau ki ngā kohikohinga o ngā hua raumati, ki ngā hamunga i te wā e whawhaki karepe ana. Kāhore he tautau hei kai; e hiahia ana tōku wairua ki te hua piki mātāmua.

2Kua ngaro te tangata tapu i runga i te whenua, kāhore hoki he tangata tika i roto i ngā tāngata; kei te whanga katoa rātou ki te toto; kei te whai rātou i tōna hoa, i tōna hoa ki te kupenga.

3Kei runga ō rātou ringa i te mea kino kia mahia mārietia e rātou; ka tono te rangatira, kei te tatari hoki te kaiwhakawā kia utua; ā, ko te tangata nui, e puaki ana i a ia te nanakia o tōna wairua; nā, whiria tahitia ake e rātou.

4Ko te tangata pai o rātou, rite tonu ki te tūmatakuru; ko te mea tino tika, kino atu i te taiepa tātarāmoa. Kua tae mai te rā o āu tūtei, arā te rā e whiua ai koe; ko āianei rātou pōkaikaha ai.

5Kaua e whakapono ki te hoa, kaua e whakawhirinaki ki te kaiārahi; kaiponuhia ngā tatau o tōu māngai ki te wahine e takoto nā i tōu uma.

6E whakaiti ana hoki te tama ki te pāpā, e whakatika atu ana te kōtiro ki tōna whaea, te hunaonga ki tōna hungawai wahine; ko ngā hoariri o te tangata ko ngā tāngata o tōna whare.

7Tēnā ko ahau, ka titiro ahau ki a Ihowā; ka tatari ahau ki te Atua o tōku whakaoranga; tērā tōku Atua e rongo ki ahau.

8Kei whakamanamana ki ahau e tōku hoariri; ki te hinga ahau, ka ara anō ahau; ki te noho ahau i te pōuri, ko Ihowā hei whakamārama mōku.

9Māku e waha te riri, o Ihowā, kua hara nei hoki ahau ki a ia; kia tohe rā anō ia i tāku tohe, kia whakarite rā anō i tāku whakawā. Ka whakaputaina ahau e ia ki waho ki te mārama, ā, ka kite ahau i tōna tika.

10Kātahi tōku hoariri ka kite, ā, ka taupokina e te whakamā; i kī mai rā hoki ia ki ahau, “Kei hea a Ihowā, tōu Atua?” Ka kite ōku kanohi i taua wahine; ākuanei ia takahia ai, pērātia ai me te paru o ngā ara.

11He rā hei hanganga mō ōu taiepa! Ā taua rā ka matara rawa atu te tikanga i whakatakotoria.

12Ā taua rā ka haere mai rātou ki a koe, mai i Ahiria me ngā pā o Īhipa, mai i Īhipa ki te awa, mai i tētahi moana ki tētahi, i tētahi maunga ki tētahi maunga.

13Otiia ka ururuatia te whenua, he mea mō te hunga e noho ana i reira, mō ngā hua hoki o ā rātou mahi.

14Whāngaia tāu iwi ki tāu rākau, ngā hipi o tōu kāinga tupu, e noho mokemoke nei i te ngahere i waenganui o Karamere; kia kai rātou ki Pahana, ki Kireara, kia pērā me ngā rā o mua.

15“Ka rite ki ngā rā i haere mai ai koe i te whenua o Īhipa, ka whakaaturia e ahau ki a ia ngā mea whakamīharo.”

16Ka kite ngā iwi, ka whakamā ki tō rātou mārohirohi katoa; ka kōpania tō rātou māngai ki tō rātou ringa, ā, ka turi ō rātou taringa.

17Ka mitimiti rātou i te puehu, ānō he nākahi; ka oho wiri mai rātou i ō rātou piringa kōpiri, ānō ko ngā mea ngōkingōki o te whenua; ka haere wehi mai rātou ki a Ihowā, ki tō tātou Atua, ā, ka mataku ki a koe.

18Ko wai he Atua hei rite mōu, e muru nei i te hē, e whakarere noa nei i te poka kē o ngā mōrehu o tōna wāhi tupu? E kore ia e kawe tonu i tōna riri ā ake ake, nō te mea e ngākau nui ana ia ki te tohu tangata.

19Tērā ia e tahuri anō, ka aroha ki a tātou; ka pēhia e ia ō tātou kino ki raro ki ōna waewae. Ka pangā anō e koe ō rātou hara ki ngā rire o te moana.

20Ka whakatutukitia e koe te mea tika ki a Hākopa, te aroha ki a Āperahama, ko tāu i oati ai ki ō mātou mātua i ngā rā ō mua.

← Chapter 6 Jump to: