Joshua 13

Macedonian (Свето Писмо: Стандардна Библија 2006 (66 книги))

← Chapter 12 Jump to: Chapter 14 →

1Кога Исус остаре и навлезе во поодмината возраст, Господ му рече: „Ти остаре и веќе си во поодминати години, а останува уште многу да се завладее.

2Остануваат уште овие земји: сите филистејски предели и сите области на Гесуријците.

3Од Шихор кој е кон Египет до границите на Екрон на север, се смета како подрачје на Хананците. Тоа се пет филистејски кнежества со главни градови: Газа, Ашдод, Ашкелон, Гет и Екрон како и територијата на Авимците.

4На југ, пак, целата хананска земја и Меара Сидонска, до Афека и до аморејските предели,

5исто така целата земја Гевла и источен Ливан од Ваал-Гад, во подножјето на Ермон, до Емат.

6Сите планински жители од Ливан до Мисрефот-Маим, сите сидонци, Јас ќе ги избркам пред синовите Израелови. Па раздели му ја таа земја со ждрепка во наследство на Израел, како што ти заповедав;

7раздели ја оваа земја сега како дел од наследството на деветте племиња и на половината од Манасиевото племе.“

8А племето Рувимово и Гадово, со другата половина од Манасиевото племе, го добија својот дел од Мојсеј од онаа страна на Јордан, на исток, како што им беше дал Мојсеј, слугата Господов,

9од Ароер, кој е до устието на потокот Арнон, и од градот, кој е среде долината, целата висорамнина Медева дури до Дивон.

10Исто така сите градови на аморејскиот цар Сихон, кој царуваше во Есевон дури до пределите на Амоновите синови,

11како и Галаад и Гесурската и Маахатската област, и целата планина Ермон и целиот Башан до Салеха,

12целото царство Огово во Башан, кој царуваше во Аштарот и во Едреи. Само тој остана од гигантите, зашто Мојсеј нив ги победи и ги протера.

13Но Израеловите синови не ги избркаа жителите на Гесур и Маахат кои живеат меѓу Израелците и до ден-денешен.

14Само на Левиевото племе не му даде наследство; Господ, Израеловиот Бог, е негово наследство, како што му беше рекол Господ;

15на племето на Рувимовите потомци според родовите нивни Мојсеј им даде дел:

16нивните предели беа од Ароер на устието од реката Арнон, и градот, што е во долината Арнонска, како и висорамнината околу Медева,

17Есевон со сите градови на висорамнината: Дивон, Бамот-Ваал и Бет-Ваал-Меон.

18И Јахца и Кедемот, и Мефаат;

19и Кирјатаим, и Сивма и Церет-Шахор,

20и Бет-Пеор, и падините на Фазга и Бет-Јешимот;

21сите градови на висорамнината и целото царство на аморејскиот цар Сихон, кој царуваше во Есевон, и кого го победи Мојсеј, како и мидјанските старешини Евиј, и Рекем, и Цур, Ор и Рева, вазали на Сихон, што живееја во таа земја;

22исто така и врачот Валаам, Беоровиот син, го убија со меч Израеловите синови.

23Граница на пределите на Рувимовите синови беше Јордан. Тоа беше делот на Рувимовите синови според нивните племиња — нивните градови и селата.

24Мојсеј им даде наследство и на Гадовите синови, според нивните племиња:

25нивни предели беа Јазер и сите галаадски градови и половината од земјата на Амоновите синови до Ароер, кој е наспроти Рава;

26и земјите од Есевон до Рамат-Мицпа и Бетоним и од Маханаим до границата со Давир,

27а и во долината: Бет-Харам, и Бет-Нимра, и Сукот, и Цафон, остаток од царството на хешбонскиот цар Сихон; неговата територија беше од Јордан до Генисаретското Езеро — од онаа страна на Јордан, кон исток.

28Тоа е наследството на Гадовите синови според нивните племиња, — нивните градови и нивните села.

29Мојсеј му даде дел и на половината од Манасиевото племе, според родовите нивни;

30нивни предели беа: од Маханаим, и целото царство Башанско, и целиот Башан на башанскиот цар Ог и сите Јаирови населби во Башан — шеесет градови;

31а половината од Галаад, и Аштарот и во Едреи, градови царски на Ог Башански, тие им беа дадени на синовите од Махир, Манасиев син, а тоа значи на Махировите синови, според родовите нивни.

32Тоа е наследството што им го даде Мојсеј во Рамнините Моавски од онаа страна на Јордан, спроти Ерихон, кон исток.

33А на Левиевото племе Мојсеј не им даде дел: Самиот Господ, Бог Израелов, е нивни дел, како што им беше рекол Тој.

← Chapter 12 Jump to: Chapter 14 →