1 Corinthians 11

Mossi MPBU (WẼNNAAM SEBRE 2014)

← Chapter 10 Jump to: Chapter 12 →

1Yɩ-y mam togs-n-taase, wa mam meng sẽn yaa Kiris togs-n-taagã.

2Mam pẽgda yãmba, yãmb sẽn tẽr mam yell bũmb fãa pʋgẽ wã yĩnga, la tɩ yãmb sakd bũmb nins mam sẽn yeel yãmb tɩ y maanã.

3Mam yaool n datame tɩ yãmb bãng tɩ Kiris yaa rao fãa Zu-soaba, la dao yaa pag zu-soaba, la tɩ Wẽnnaam yaa Kiris Zu-soaba.

4Rao ning fãa sẽn lud a zug n pʋʋs wall a togs bãngr goam paoogda a Zu-soabã.

5La pag fãa sẽn ka lud a zug n pʋʋs wall a togs bãngr goam paoogda a Zu-soabã. Yaa wa a sẽn põng a zugu.

6Pag sã n ka teeg a zug peende, bɩ a wõrs a zoobdã me. La sã n yaa tɩ pag zoobd wõrsg wall a zug põngr yaa yãnde, bɩ a teeg peende.

7Dao ka tog n teeg peend ye, a sẽn yaa Wẽnnaam ziir la b wẽnegã yĩnga. La pag yaa dao ziiri.

8Sɩd me, ka pag la b yãk n naan dao ye, la yaa rao la b yãk n naan paga.

9La b ka naan rao pag yĩng ye, yaa pag la b naan dao yĩnga.

10Dẽ n kɩt tɩ pag tog n ning ned sẽn so-a yẽnda wã bãnd a zugẽ, malegsã yĩnga.

11Baoosgo, Zu-soabã pʋgẽ, pag ka be tɩ rao kaẽ ye, la rao ka be tɩ pag kaẽ ye.

12Bala, a wa b sẽn yãk rao pʋgẽ n naan pagã, yaa pag me n dog raoa, la fãa yita Wẽnnaam nengẽ.

13Yãmb mens tags n gese, rẽ yĩnga, segdame tɩ pag pʋʋs Wẽnnaam n ka teeg a zug peende?

14Vɩɩmã meng sẽn yaa to-to wã ka zãmsd tõnd tɩ yaa yãnd ne rao tɩ paam zoob-wogdo,

15la tɩ pag sã n tar zoob-wogdo bee neer ne-a sɩda? Sɩd me, b kõ-a‑la zoobdã tɩ lud a zugã wa peende.

16Ned sã n minim kɩɩsgo, tõnd yẽ ka minim a woto, la Wẽnnaam doogã me ka minim ye.

17Mam sẽn kõt yãmb koe-kãensã wã, bũmb ning mam sẽn ka pẽgda, yaa tɩ yãmb sẽn tigimdã, ka tɩ y na yɩ sõama n yɩɩd ye, yaa tɩ yɩ wẽng n yɩɩda.

18Pipi, mam wʋmdame tɩ yãmb sã n wa n tigim taaba, welgr n be yãmb sʋka (la mam tẽeda koe-kãng bilfu).

19Yaa tɩlɛ tɩ welgr sɩd zĩndi, tɩ b na bãng neb nins sẽn zems pẽgr yãmb sʋkã.

20Dẽ, yãmb sẽn tigimd taabã, ka tɩ rɩ Zu-soabã rɩɩb ye.

21Bala, kẽer sẽn dengd b taab n dɩtẽ rɩta b mens rɩɩbo, tɩ nina zĩ ne kom, tɩ nina neng yilimd ne rãam.

22Yãmb ka tar yiy n na n dɩt be la y yũud be la? Bɩ yãmb ka nand Wẽnnaam doogã, la y rat n paoog neb nins sẽn ka tar bũmbã? Mam na n yeela yãmb tɩ bõe? Mam na n pẽga yãmba? Yel‑kãngã pʋgẽ yẽ, mam kõn pẽg yãmb ye.

23Bala, bũmb ning mam sẽn taas yãmbã, mam deeg-a la Zu-soabã nengẽ. Yʋng ning b sẽn yõk a Zeezi n kõ wã, Zu-soab a Zeezi dɩka buri,

24n pʋʋs Wẽnnaam barka, n yaool n kao-a n yeele: Yõwã yaa mam yĩng mam sẽn kõt yãmba. Maand-y woto n tẽegd mam yelle.

25B sẽn dɩ n sa me, a Zeezi dɩka bõn-yũudlã n yeele: Bõn-yũudl‑kãngã yaa kãab-paalg sẽn kãab mam zɩɩmã pʋgẽ: Maand-y a woto n tẽegd mam yell wakat fãa yãmb sẽn na yũ-a.

26Bala, wakat ning fãa yãmb sẽn wãbd bur‑kãngã, la y yũud bõn-yũudl‑kãngã, yãmb wilgda Zu-soabã kũum hal tɩ b lebg n wa.

27Yaa woto yĩng tɩ ned sã n wãb burã la a yũ Zu-soabã bõn-yũudlã ne paoogre, a beegda Zu-soabã yĩng ne b zɩɩmã.

28Woto yĩnga, bɩ ned fãa fees a menga, la a yaool n wãb burã la a yũ bõn-yũudlã.

29Bala, ned ning sẽn wãbd burã la a yũud bõn-yũudlã, la a ka nand Zu-soabã yĩnga, yaa bʋʋd a meng yĩng la a wãbd la a yũuda.

30Yaa rẽnda n kɩt tɩ bãad-rãmb la koms-rãmb yaa wʋsg yãmb sʋka, la tɩ neb wʋsg kiime.

31Tõnd sã n dag n kaoẽ d meng bʋʋdo, Wẽnnaam dag n kõn kaoẽ tõnd bʋʋd ye.

32La bʋʋd ning Wẽnnaam sẽn bʋʋdã pʋgẽ, b sɩbgda tõndo, tɩ b da wa n naag tõnd ne dũni wã n sɩbg ye.

33Woto yĩnga, m ba-biisi, yãmb sã n tigim taab n na n dɩ Zu-soabã kũum tẽegr dɩɩbã, bɩ y yals n gũ taaba.

34Kom sã n tar neda, bɩ a rɩ a yiri, tɩ y da wa n tigim taab n bao sɩbgr n kõ y mens ye. Mam sã n wa wa, m na ges yɛl a taabã yelle.

← Chapter 10 Jump to: Chapter 12 →