1 Peter 1

Mossi MPBU (WẼNNAAM SEBRE 2014)

Jump to: Chapter 2 →

1Maam a Pɩyɛɛr sẽn yaa a Zeezi Kiris tẽn-tʋmdã n tʋmd seb-kãngã Wẽnnaam nin-tũusdsã sẽn sãeeg n be Põ la Galasi la Kapadoos la Aazi ne Bitini soolem n lebg sãamb beenẽ wã.

2Yãmb yaa tõnd ba a Wẽnnaam neb b sẽn tũusi, wa sẽn zems bãmb sẽn pĩnd n bãngã, tɩ Sɩɩg-sõng welg-y toor tɩ y zĩnd pʋ-peelem n yɩ sakdb n paam t'a Zeezi zɩɩmã pek yãmba. Bɩ y paam bark la laafɩ wʋsgo.

3Pẽgr Wẽnnaam ning sẽn yaa tõnd Zu-soab a Zeezi Kiris ba. Bãmb nimbãan-zoeerã sẽn yaa kãsengã yĩnga, b kõo tõnd dogem paalg a Zeezi Kiris sẽn vʋʋg n bas kũumã maasem yĩnga, tɩ tõnd tar tẽeb pidsg gũudum

4sẽn vɩ, la d paam dogem-pʋɩɩr sẽn ka tõe n sãame, wall rẽgme, wall zelg ye. La b bĩng-a-la arzãn pʋg yãmb yĩnga,

5yãmb tẽebã yĩnga, Wẽnnaam pãngã zãada yãmba, tɩ yãmb na paam fãagr ning sẽn segl n sɛ, n na n puk yaoolem wakatã.

6Yãmb maanda sũ-noog bõn-kãng yĩnga, baa ne sẽn ya tɩlɛ tɩ yãmb paam makr buud toay-toay sẽn namsd yãmb moasã wakat bilf yĩngã.

7Yaa sẽn na yɩl n mak yãmb tẽebã n bãng a sẽn yaa a soaba. Sãnem yaa bõn-sãamdga, la baoosgo b makd-a-la ne bugum n getẽ. La yãmb tẽebã sẽn tar yõod wʋsg n yɩɩd sãnemã, b makd-a lame n getẽ, t'a Zeezi Kiris waoongã daare, bɩ y paam pẽgre la ziiri ne waoogre.

8Baa ne yãmb sẽn nan ka yã a Zeezi Kirisã, yãmb nonga bãmba. Baa yãmb sẽn nan ka yã bãmbã, yãmb tẽeda bãmba, n maand sũ-noog noor sẽn ka tõe n togse, la sẽn tar ziiri.

9Bala, yãmb paama y sɩɩsã fãagr tɩ yɩ y tẽebã keoore.

10Wẽnnaam no-rɛɛsdbã sẽn pĩnd n togs bark ning Wẽnnaam sẽn da bĩng yãmb yĩngã baoome la b vees n na n bãng fãag-kãnga võore.

11Wẽnnaam no-rɛɛsdbã maoome, n bao n na n bãng Kiris Sɩɩgã sẽn be bãmb pʋsẽ wã sẽn pĩnd n gomd Kiris namsgã, ne b waoongã sẽn na n pʋglã sẽn na n yɩ wakat ninga, la sẽn na n tũ ne bũmb ninga.

12La Wẽnnaam vẽnega b no-rɛɛsdbã tɩ b bãng tɩ bãmb sẽn deeg koɛɛg ningã ka bãmb mens yĩng ye, la yaa yãmb yĩnga la b ya bõn-kãens tʋmtʋmdba. Moasã, neb nins sẽn moon yãmb koe-noogã togsa yãmb bõn-kãens ne Sɩɩg-sõng sẽn yi arzãnã pãnga, la baa malegsã mens datẽ lame n wʋm a võore.

13Yaa woto yĩnga, yõk-y y tagsgo, yɩ-y gũus-m-mens-rãmba, la y paam tẽeb pidsg gũudum sẽn ya sõama zãng ne bark ning b sẽn na n kõ yãmb Kiris waoongã wakatã.

14Bɩ y yɩ kom-sakdse, la y ra sak wẽng ratem nins yãmb sẽn dag n sak wakat sẽn looge, y sẽn dag n be y zɩɩlmã pʋgã ye.

15La soab ning sẽn bool-a yãmbã sẽn yaa pʋ‑peelem soabã yĩnga, bɩ yãmb me welg toor n yɩ pʋ‑peelem dãmb y yel-manesemã buud fãa pʋgẽ.

16Bala, Wẽnnaam gʋls-sõamyã yetame: Bɩ y yɩ pʋ-peelem dãmba, bala, mam yaa pʋ-peelem soaba.

17Yãmb sã n pʋʋsd Wẽnnaam ning sẽn ka tũusd nebã, la sẽn kaood ned kam fãa bʋʋd wa sẽn zems a tʋʋmdã, bɩ y kẽn ne gũus-m-menga, yãmb sẽn ket n be dũniyã zug wakate.

18Sɩd me, yãmb miime tɩ ka ne bõn-sãamds sẽn wẽnd ligdi, wall sãnem, la b fãag yãmb n yiis vɩɩmã minind nins sẽn ka yõodã yãmb sẽn deeg y yaab-rãmba nengẽ wã pʋgẽ ye.

19La yaa ne Kiris zɩɩmã sẽn yaa sõama wʋsgã, Kiris yɩɩ wa pe-bil sẽn ka tar yelle, la sẽn ka

20tar bãnde, Wẽnnaam dag n pĩnd n yãka Kiris sẽn deng dũni naanego, la b waa yãmb yĩnga, yaoolem zamaana pʋgẽ.

21Kiris maasem yĩnga, yãmb tẽeda Wẽnnaam ning sẽn vʋʋg-a Kiris n bas kũum la b kõ-b waoogrã. Sẽn na yɩl tɩ yãmb tẽebã ne y teegrã zĩnd ne Wẽnnaam.

22Yãmb sẽn sak sɩdã n yɩlg y mensã, sẽn na n yɩlẽ n paam nonglem meng-meng ba-biisã yĩngã, bɩ y nong taab wʋsg ne y sũyã fãa,

23yãmb sẽn paam rogem-paalgã yĩnga, ka bõn-buud sẽn sãamd n kɩt tɩ yãmb paam dogem paalgã ye, la yaa bõn-buud sẽn ka sãamda, yaa Wẽnnaam goamã sẽn vɩ n paad wakat sẽn kõn sa wã.

24Bala, Ninsaal fãa wẽnda wa moodo, la a waoogrã fãa wẽnda wa mo-pui. Mood kʋɩtame la mo-pui sʋʋgdame

25La Zu-soabã goam paada wakat sẽn kõn sa. Yaa koe-kãng la koe-noogã b sẽn togs yãmbã.

Jump to: Chapter 2 →