1 Peter 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1Dẽ yĩngã, bas-y pʋ-toog fãa, la sɩlem fãa, la zãmbo, la sũ-kiiri, la paoogr goam buud fãa.

2Yɩ-y wa kom-peelse, n tʋlg Wẽnnaam goamã sẽn yaa wa bĩisim sẽn ka pulã, t'a bɩɩs yãmb tɩ y paam fãagre,

3sã n yaa tɩ yãmb pẽnega Zu-soabã n bãng tɩ b yaa sõama.

4Kolg-y Zu-soab a Zeezi sẽn yaa ‹kug-vɩɩg› ninsaalbã sẽn zãgsã, la sẽn yaa kugr Wẽnnaam sẽn yãke, la sẽn be yõod bãmb taoorã.

5La yãmb mens sẽn wẽnd kug-vɩɩsã, me-y y mens tɩ yɩ Sɩɩg-sõng roogo, la maan-kʋʋdb sẽn yaa sõama, n kõt Wẽnnaam maoong sẽn yaa Sɩɩg-sõng rẽnda, sẽn tat Wẽnnaam yam a Zeezi Kiris maasem yĩnga.

6Bala, Wẽnnaam gʋls-sõamyã pʋgẽ b yeelame yaa: Ade, mam dɩgenda kugr sẽn tar pãng Sɩyõ pʋgẽ, mam sẽn yãke, la m sẽn waooge. La ned ning sẽn tẽed-a kug-kãngã, a kõn paam yãnd ye.

7Dẽ yĩnga, bãmb kug-kãng bee yõod wʋsg ne yãmb sẽn tẽedã, la ne neb nins sẽn ka tẽedã, kugr ning tãn-metbã sẽn zagsã, kug-kãng lebga roogã pãng kugri, a soakã zĩigẽ. La a yaa kug-lakdg nebã yĩnga. La pĩig sẽn lubd nebã.

8Bãmb lakda kug-kãngã, b sẽn ka sakd Wẽnnaam goamã yĩnga. La Wẽnnaam dag n pĩnd n miime tɩ na n yɩɩ a woto ne-ba.

9La yãmb yẽ, yãmb yaa buud b sẽn tũusi, la naam maan-kʋʋdba, la buud sẽn welg toor Wẽnnaam yĩnga, neb Wẽnnaam sẽn da tɩ y moon n wilg sẽn bool-a yãmb n yiis likã pʋgẽ, n kẽes-y vẽenem sẽn be ziirã pʋgã tʋʋm sõama wã.

10Pĩnda, yãmb dag n ka Wẽnnaam neb ye, la moasã, yãmb yaa Wẽnnaam nebã. Yãmb sẽn dag n ka paam nimbãan-zoeerã, moasã, yãmb paama nimbãan-zoeere.

11Mam zo-nongdse, yãmb sẽn yaa sãamb la kaoos-wetã, mam sagenda yãmb tɩ y ra sak yĩngã ratem wẽnsã sẽn zabd ne sɩɩgã ye.

12Paam-y yel-manesem sẽn yaa sõama neb nins sẽn ka pʋʋsd Wẽnnaamã sʋka, tɩ baa b sẽn dõt yãmb zĩig ning fãa n yetẽ tɩ y yaa tʋʋm wẽns maandbã, bɩ b yã yãmb tʋʋm sõama wã n waoog Wẽnnaam, b waoongã daare.

13Zu-soabã maasem yĩnga, sak-y dũniyã nebã tõod fãa, sã n yaa rĩm-dãmba sẽn so pãnga,

14sã n yaa nanambs rĩmã sẽn tʋm tɩ b sɩbg neb nins sẽn maand wẽngã, la b waoog neb nins sẽn maand neerã.

15Bala, yaa Wẽnnaam daab tɩ yãmb sẽn maand neerã, y na kɩt tɩ yalembã bas b zɩɩlem goamã.

16Kẽn-y wa burkĩmba, la y ra sak tɩ yãmb lohormã yɩ pʋ-toog lillidg ye. Bɩ y tʋm wa Wẽnnaam tʋmtʋmdba.

17Waoog-y nebã fãa. Nong-y y ba-biisã, la y zoe Wẽnnaam. Waoog-y rĩmã.

18Tʋmtʋmdba, sak-y y zu-soben-dãmba la y zoe-ba. La ka zu-soben-dãmb nins sẽn yaa nin-sõamyã la sũ-bʋgsem dãmbã bal ye. Sak-y neb nins sẽn ya

19nin-toosã me. Bala, ned sã n sak namsg sẽn ka zems ne-a, a sẽn sakd Wẽnnaam yĩnga, yõwã bee barka.

20Sɩd me, yãmb sã n sak tɩ b nams yãmb y sẽn maan yel-wẽnd yĩnga, bõe waoogr n be be? La yãmb sã n maan tʋʋm sõama n sak namsg bõn-kãens yĩnga, yõwã bee bark Wẽnnaam taoore.

21Sɩd me, yaa bõn-kãng yĩng la b bool yãmba. Tɩ bõe, Kiris me namsa yãmb yĩnga, n bas mamsg ne yãmba, tɩ y tũ bãmb naoã.

22Bãmb ka tol n maan yel-wẽnd ye, la b ka tol n wʋm zĩrẽ goam sẽn yi bãmb noorẽ ye.

23Neb tʋʋ bãmba, la b ka tʋʋs n lebs ye. Neb namsa bãmba, la b ka zab ne-b ye. B basa b yɛlã sẽn kaood-a bʋʋd tɩrgã nugẽ.

24Kiris meng n deeg tõnd yel-wẽnã b yĩngã pʋgẽ da-pɩkã zugu, tɩ tõnd sẽn yaa wa kũum yel-wẽnã wɛɛngẽ wã, tõnd na vɩɩmd n maan tɩrlem. Yaa bãmb poglgã yĩng la yãmb paamd maagre.

25Bala, yãmb dag n wẽnda piis sẽn meneme, la moasã, yãmb lebgame n wa y sɩɩsã pe-kɩɩmã la b gũudã nengẽ.

← Chapter 1 Jump to: Chapter 3 →