Colossians 1

Mossi MPBU (WẼNNAAM SEBRE 2014)

Jump to: Chapter 2 →

1Maam a poll sẽn yaa a Zeezi Kiris tẽn-tʋmd wa sẽn zems Wẽnnaam daabã ne ba-biig a Tɩmote

2n tʋmd seb‑kãnga Wẽnnaam nebã sẽn yaa tõnd ba-biis sẽn maand sɩd Kiris tũudma pʋgẽ n be Koloosã nengẽ. Bɩ y paam bark la laafɩ sẽn yit tõnd ba a Wẽnnaam nengẽ.

3Tõnd pʋʋsda tõnd Zu-soab a Zeezi Kiris ba a Wẽnnaam barka, la d pʋʋsd yãmb yĩng n ka basdẽ ye.

4Sɩd me, tõnd wʋmame tɩ b gomd yãmb tẽeb ne a Zeezi Kirisã yelle, la nonglem ning yãmb sẽn tar Wẽnnaam nebã fãa yĩngã yelle,

5tẽeb pidsg gũudum ning b sẽn bĩng yãmb yĩng arzãn pʋgẽ wã yĩnga. Sɩd koɛɛgã sẽn yaa koe-noogã sẽn pĩnd n kɩt tɩ yãmb bãngã.

6Koe-no-kãng taa yãmb nengẽ. A sẽn womd biis la a kẽngd taoor to-to dũniyã tɛk fãa wã, a maanda a woto me yãmb nengẽ hal sẽn sɩng ne daar ning yãmb sẽn wʋm la y bãng Wẽnnaam barkã wa sẽn zems sɩda,

7la sẽn zems sagls nins tõnd tʋmd-n-ta-nongr a Epafras sẽn gʋls yãmbã. Yẽnda yaa Kiris tʋmtʋmd sẽn moond sɩda, n tʋmd yãmb yĩnga.

8A wilga tõnd nonglem ning Sɩɩg-sõng sẽn kɩt tɩ yãmb tarẽ wã.

9Yaa woto yĩng n kɩt tɩ sẽn sɩng ne daar ning tõnd me sẽn wʋm kiba-kãngã wã, tõnd pʋʋsda Wẽnnaam yãmb yĩng n ka basdẽ ye, la d kot Wẽnnaam tɩ b pids yãmb sũyã ne bãmb daabã bãngre, la b kõ yãmb yam fãa, ne bãngr ning Sɩɩg-sõng sẽn kõtã.

10Kɩt-y tɩ y kẽnã waoogd Zu-soabã, tɩ y tõe n ta bãmb yam bũmb fãa pʋgẽ, la y wom biis ne tʋʋm‑sõama buud fãa, la y bɩ Wẽnnaam bãngr pʋgẽ.

11Tõnd kota Wẽnnaam, tɩ yãmb na paam pãng n paase, bãmb pãn-kãsengã maasem yĩnga, tɩ yãmb tõe n yɩ neb sẽn kẽngd taoor sɩd-sɩda, la sẽn tar sũ-mare.

12Pʋʋs-y tõnd ba a Wẽnnaam bark ne sũ-noogo, bãmb sẽn kɩt tɩ yãmb tõe n naag ne bãmb nebã n paam pʋɩɩr vẽenemã pʋgẽ wã yĩnga.

13Bãmb fãaga tõnd n yiis likã pãngẽ, n tall-d n kẽng b bi-ribl-nongrã soolmẽ,

14soab ning maasem yĩng tõnd sẽn paam fãagre, la yel-wẽna sugrã.

15Kiris yaa Wẽnnaam, soab ning ned sẽn ka tõe n yãnda wã wẽnego, la bũmb nins fãa b sẽn naanã dẽenem soaba.

16Bala, bãmb n naan bũmb nins fãa sẽn be yĩngr wall tẽng zugu, sẽn be yãab la sẽn ka tõe n yã, naam gɛyã, rĩm-dãmba, pãn-soaadba, la noyã. Bãmb n naan fãa b mengã yĩnga.

17Bãmb denga bũmba fãa n beẽ, la yaa bãmb pʋgẽ la bũmb fãa yalsd a zĩigẽ.

18Bãmb yaa Kiris tẽedbã sẽn yaa bãmb yĩngã zugu. Bãmb la bũmb fãa sɩngre, sẽn yɩ-a pipi n vʋʋg n bas kũum, tɩ bãmb tõe n yɩ dẽenem soab bũmb fãa pʋgẽ.

19Bala, a taa Wẽnnaam yam tɩ kɩt tɩ bãmb sẽn yaa bũmb ning fãa, bɩ a Zeezi me yɩ a woto,

20la b kɩt t'a Zeezi wa ne zems-n-taar bãmb a Wẽnnaam ne bũmb fãa sʋka, sã n yaa sẽn be tẽng zugu wall sẽn be yĩngri, n kɩt tɩ bãmb maasem yĩnga, bɩ laafɩ zĩndi, bãmb zɩɩmã sẽn daag da-pɩkã zugã yĩnga.

21La yãmb sẽn dag n yaa sãamb la y ya bɛɛb y tagsdã ne y tʋʋm-wẽnsã yĩng pĩndã,

22moasã, Wẽnnaam yiisa yell ning sẽn da be yãmb ne bãmb sʋkã, a Zeezi yĩn-kiidgã kũum maasem yĩnga, tɩ b tõe n tall yãmb n wa b taoor ne pʋ-peelem, tɩ y ka tar yelle, la tɩ rõdb kaẽ ye.

23Yãmb sã n sɩd pa tẽebã pʋgẽ, la y kɩ yẽg n yals kãenkãe tɩ bũmb da wa n zãag yãmb ne koe-noogã tẽeb pidsg gũudum ning yãmb sẽn wʋma, sẽn yaa koe-noog ning b sẽn moon ninsaalbã fãa sẽn be dũniyã zugã, koe-noog ning maam a Poll sẽn lebg a tʋmtʋmdã.

24Moasã, mam maanda sũ-noogo, m sẽn be namsg pʋg yãmb yĩngã yĩnga, la mam yĩngã pʋgẽ, m pidsda Kiris namsg nins sẽn paooge, b sẽn dag n tog n nams b tẽedbã sẽn yaa bãmb yĩngã yĩngã.

25Yaa Kiris tẽedbã yĩng la mam lebg karen-saamba. Wẽnnaam n ning mam zug tɩ m moon yãmb bãmb koɛɛgã zãnga.

26Koe-no-kãng yaa yel-solemd sẽn solg wakat fãa, la sẽn solg ne zamaan dãmba fãa, n yaool n puk-a moasã ne bãmb nebã.

27Wẽnnaam n tʋlg n kɩt tɩ b nebã bãng yel-solem-kãngã arzɛkã sẽn tar ziir bu-zẽmsã sʋkã, dat n togs tɩ Kiris sẽn be yãmb pʋsẽ wã, b na n pidsa tẽeb gũudum ning sẽn yaa ziirã.

28Yaa Kiris koɛɛg la tõnd moonda, n keoogd ned buud fãa la d zãmsd ned kam fãa ne yam buud fãa, tɩ tõnd tõe n kɩt tɩ ned kam fãa zems zãng Kiris tũudmã pʋgẽ.

29Yaa bõn-kãng yĩng la mam tʋmda, n tar bãmb pãngã sẽn maand a tʋʋmd mam pʋgẽ ne pãn‑kãsengã n maoodẽ.

Jump to: Chapter 2 →