Colossians 4

Mossi MPBU (WẼNNAAM SEBRE 2014)

← Chapter 3 Jump to:

1Zu-soben-dãmba, yao-y y tʋmtʋmdbã ne tɩrlem la wa sẽn zemse, yãmb sẽn mi tɩ yãmb me tara Zu-soab arzãn pʋgẽ wã yĩnga.

2Wɩng-y ne pʋʋsgo, modg-y ne-a, n paas bark pʋʋsgo.

3Pʋʋs-y tõnd yĩng me, tɩ Wẽnnaam pak sor tõnd koɛɛgã mooneg yĩnga, tɩ mam tõog n moon Kiris yel-solemdã koɛɛga, yel-solemd ning yĩng b sẽn balg maamã,

4tɩ mam na gom a yell vẽeneg wa sẽn zems m sẽn tog n gom a yell to-to wã.

5Kɩt-y tɩ y yel-manesem ne neb nins sẽn ka be tẽeb pʋgẽ wã yɩ ne yam. Da bas-y weerã t'a loogdẽ ye.

6Kɩt-y tɩ yãmb goam tall bark wakat fãa n tar yamsem noom, tɩ yãmb na bãng y sẽn tog n leok ned kam fãa to-to tɩ zemse.

7Sã n yaa ne mam mengã yelle, m ba-bi-nongr a Tisik sẽn yaa Zu-soaba tʋmtʋmd sẽn maand sɩda, la sẽn yaa mam tʋmd-n-taag Zu-soaba tʋʋmd pʋgẽ wã na n wilga yãmb bũmb fãa.

8Pʋs n yaa rẽ yĩng la mam tʋmd-a yãmb nengẽ, tɩ yãmb tõe n bãng tõnd yell sẽn yaa to-to, la t'a bels yãmb sũyã.

9Mam tʋmda yẽnda ne d ba-bi-nongr a Onezɩm sẽn ya ned sẽn maand sɩd la a ya yãmb nedã y nengẽ. Bãmb na n wilga yãmb bũmb nins fãa sẽn maand ka wã.

10Mam bi-be-taag a Aristark ne a Mark sẽn yaa a Barnabaas saam-biigã pʋʋsda yãmba. Mam wilga yãmb bũmb nins y sẽn tog n maan a Mark yĩnga. A sã n ta yãmb nengẽ, bɩ y reeg-a sõama.

11A Zeezi b sẽn boond a soab t'a Zustuusã me pʋʋsda yãmba. Zʋɩf-rãmbã sʋka, yaa bãmb bal n naag maam n tʋmd Wẽnnaam soolmã yĩnga. Bãmb yɩɩ neb sẽn paas maam daoodo.

12A Epafras sẽn yaa yãmb nedã pʋʋsd-y lame. Yẽnda yaa a Zeezi Kiris tʋmtʋmda, n maood yãmb yĩng a pʋʋsg pʋgẽ n ka basdẽ ye, tɩ yãmb na bɩ n ta, la y bãng Wẽnnaam daabã sõama y sũurẽ, n yals kãenkãe.

13Mam kɩta yẽnda kaset n yetẽ t'a maooda yãmb yĩng wʋsgo, yãmb ne neb nins sẽn be Laodiise la Hiyerapoliisã yĩnga.

14Ba-bi-nongr a Luk sẽn yaa logtorã ne a Demaas pʋʋsda yãmba.

15Pʋʋs-y ba-biisã sẽn be Laodiise wã, ne a Nimfa la a Kiris tẽedbã sẽn tigimd yẽnda zakẽ wã.

16Yãmb sã n wa n karem seb-kãngã n sɛ, bɩ y maan y sẽn tõe tɩ b karm-a Kiris tẽedbã sẽn be Laodiise wã me sʋka, la yãmb me karem sebr ning Laodiise Kiris tẽedbã sẽn na n tʋm yãmbã.

17Yeel-y-yã a Arsɩp yaa: Gũus ne tʋʋmd ning fo sẽn deeg Zu-soabã nengẽ wã, n tõog tʋm-a sõama.

18Maam a Poll n gʋlsd ne m meng nug n pʋʋsd yãmba. Da yĩm-y tɩ b balga maam ye. Bɩ barkã zĩnd ne yãmba.

← Chapter 3 Jump to:

Recommended Reading

Commentary Colossians Commentaries → Devotional Colossians Devotional Guide → Get This Bible Mossi MPBU (WẼNNAAM SEBRE ) Study Bible →