Daniel 3

Mossi MPBU (WẼNNAAM SEBRE 2014)

← Chapter 2 Jump to: Chapter 4 →

1Rĩm a Nebukatnedzaar kɩtame tɩ b naan sãnem bõn-naandga, la a woglmã taa kãntɩɩg pis-yoobe, t'a yalmã yaa kãntɩɩg a yoobe. A Nebukatnedzaar kɩtame tɩ b tɩ lugl-a Dura tẽn-nabdrẽ wã, Babilond soolmã pʋga.

2Rĩm a Nebukatnedzaar tʋmame tɩ b tɩ bool tẽngã kug-zĩidbã, kombɛɛmbã, soolem kãsem-dãmbã, sagendbã, ligd-gũudbã, bʋ-kaoodbã, tõog yel-gɛtbã, ne soolem toay-toayã nanambs fãa, tɩ b wa tigim taab bõn-naandgã bark ningr yĩnga.

3Dẽ, tẽngã kug-zĩidbã, kombɛɛmbã, soolem kãsem-dãmbã, sagendbã, ligd-gũudbã, bʋ-kaoodbã, tõog yel-gɛtbã, ne soolem toay-toayã nanambs fãa, tigma taab bõn-naandgã a Nebukatnedzaar sẽn luglã taoore, n na n ning-a barka.

4Dẽ, rĩmã koe-moaandã zẽka a koɛɛg n yeele: «Yãmb fãa sẽn yaa tẽms toor-toore, ne buud toor-toore, la buud goam toor-toor nebã, kelg-y-yã! Ad rĩmã sẽn yet yãmba:

5Yãmb sã n wʋm baorgã ne wɩɩgã peebgo, la koalã ne pendsã, la ruudsã wẽebo, la tãntãadã peebgo, ne yʋʋm-teed buud toay-toay rãamde, bɩ y fãa wõgemd n waoog sãnem bõn-naandgã rĩm a Nebukatnedzaar sẽn luglã.

6La ned ning fãa sẽn kɩɩs-a n ka wõgemd n waoog bõn-naandgã, wakat-kãng bala, b na n loba a soab bugum wʋng sẽn wɩng wʋsg pʋgẽ.»

7Dẽ, tẽms toay-toayã ne buud toay-toayã, la buud goam toay-toayã nebã fãa sẽn wʋm baorgã ne wɩɩgã peebgã, la koalã ne pendsã, la ruudsã wẽebã, la tãntãadã peebgã, ne yʋʋm-teed buud toay-toayã rãamdã, b wõgemdame n waoog sãnem bõn-naandgã a Nebukatnedzaar sẽn luglã.

8La wakat-kãng bala, Kalde rãmbã kolga rĩmã n kãneg zʋɩf-rãmbã.

9Kalde rãmbã yeelame: «N-na! Wẽnd na kaoos-y-yã!

10Yãmb mengã n yeele, tɩ ned ning fãa sẽn na n wʋm baorgã ne wɩɩgã peebgã, la koalã ne pendsã la ruudsã wẽebã, la tãntãadã peebgã, ne yʋʋm-teed buud toay-toayã rãamdã, bɩ a wõgemd n waoog sãnem bõn-naandgã.

11La y yeelame me, tɩ ned ning sẽn ka sak n wõgemd-a n waoog sãnem bõn-naandgã, bɩ b lob a soabã wʋng sẽn wɩng wʋsg pʋgẽ.

12Ad-y zʋɩf-rãmb kẽer n be, n ka pʋʋsd yãmb wẽnnaam-dãmbã, la b ka waoogd yãmb sãnem bõn-naandgã y sẽn luglã me ye. Yaa a Sadrak ne a Mesak la a Abednego sẽn yaa zʋɩf-rãmb nins yãmb sẽn yãk tɩ b yɩ Babilond soolmã taoor-dãmbã, bãmb kɩɩsa tõog ning yãmb sẽn yãkã.»

13La bõn-kãng puuga rĩm a Nebukatnedzaar sũurã wʋsgo, t'a yeel tɩ b tall a Sadrak ne a Mesak la a Abednego n wa. La b tall-b lame n wa rĩmã taoore.

14Rĩm a Nebukatnedzaar yeela bãmb yaa: «Sadrake! Mesake! Abednego! Yaa sɩd tɩ yãmb yãka yam tɩ y ka na n waoog mam wẽnnaam-dãmbã ne sãnem bõn-naandgã mam sẽn luglã?

15Moasã bɩ y segl y mense, tɩ wakat ning b sẽn na n leb n peeb baorgã ne wɩɩgã, la b wẽ kondã ne pɛndgã la ruudgã, la b peeb tãntãoogã, la b wẽ yʋʋm-teedã buud fãa wã, bɩ y wõgemd n waoog sãnem bõn-naandgã mam sẽn luglã. La yãmb sã n ka sak n wõgemd n waoog-a, wakat-kãng bala, b na n loba yãmb wʋng sẽn wɩng wʋsg pʋgẽ. La d na gese, wẽnnaam-bʋg n na n wa fãag yãmb mam nugẽ.»

16A Sadrak rãmb yeela rĩmã yaa: «N-na! Ka tɩlɛ tɩ tõnd leok yãmb yel-kãngã wɛɛngẽ ye.

17Sã n yaa tɩ yãmb na n loba tõnd wʋngã bug-witim pʋgẽ, tõnd Wẽnnaam ningã tõnd sẽn tũudã tõe n fãaga tõndo, la bãmb na n fãaga tõnd wʋngã bug-witim pʋgẽ, la b fãag tõnd yãmb nugẽ.

18N-na! Baa tõnd Wẽnnaamã sã n ka fãag tõndo, tõnd ka na n wõgemd n waoog yãmb wẽnnaam-dãmbã ne y sãnem bõn-naandgã y sẽn luglã ye!»

19Dẽ, rĩm a Nebukatnedzaar sũurã puuga wʋsg ne a Sadrak rãmba, hal t'a nengã teke. La a yeelame tɩ b wɩng wʋngã t'a tʋʋlmã yɩɩg raasenkamã naoor a yopoe.

20Dẽ, rĩmã yeela a tãb-biis nins sẽn ya-b wẽbã tɩ b sẽb a Sadrak ne a Mesak la a Abednego, n lob wʋngã sẽn wɩng wʋsgã pʋgẽ.

21La wakat-kãng bala, b sẽba bãmb b tãabã ne b fu-yordã, la b zutã pɛɛlã ne b fu-yerdɩ a taabã, n lob bãmb wʋng sẽn wɩng wʋsgã pʋgẽ.

22Noor ning rĩmã sẽn dag n kõ wã sẽn yaa kãenkãe wã yĩnga, b wɩnga wʋngã tɩ loog nugu. Dẽ, bugmã kʋʋ neb nins sẽn tall a Sadrak ne a Mesak la a Abednego n tɩ lob bugmẽ wã.

23La nin-bãmb b tãabã b sẽn sẽbã, a Sadrak ne a Mesak la a Abednego lʋɩɩ wʋngã sẽn wɩng wʋsgã pʋgẽ.

24La wakat-kãng bala, rĩm a Nebukatnedzaar yɛɛsame n yik tao-tao. La a yeela a kug-zĩidbã yaa: «Ka neb a tãab la tõnd sẽn lob bugmẽ wã sɩda?» La b leoka rĩmã tɩ yaa woto bala.

25La rĩmã yeelame: «Mam yaool n nee neb a naas sẽn be bugmẽ wã n kẽnd tɩ bũmb ka sẽb-ba, la b ka namsd me ye. La a naasẽ soabã wẽnda wẽnnaam-dãmb biig a yembre.»

26Dẽ, rĩm a Nebukatnedzaar kolga wʋngã noor n bool yaa: «Sadrake, Mesake, Abednego, Wẽnnaam sẽn ka to tʋmtʋmdba, yi-y n wa-y ka!» La a Sadrak ne a Mesak la a Abednego yii bugmã pʋga.

27Rĩmã kug-zĩidbã ne a laog-gũudbã, la a soolem kãsem-dãmbã ne a sagendbã gũmame n na n ges-ba, la b mikame tɩ bugmã ka tõog n maan nin-bãmbã b tãabã bũmb ye. La ba b zoobdã ka gõoneme, bugmã ka sɩɩs b futã, la bugum yũug rag n ka tol n be b yĩngẽ wã me ye.

28Rĩm a Nebukatnedzaar zẽka a koɛɛg n yeel yaa: «Bɩ a Sadrak ne a Mesak la a Abednego Wẽnnaamã paam pẽgre. Bala, bãmb tʋma b malɛɛk t'a wa n fãag b tʋmtʋmdbã. A Sadrak ne a Mesak la a Abednego kɩsa sɩd ne b Wẽnnaamã, n kɩɩs rĩmã noore, n gẽneg b yõore, n ka sak n na n wõgemd n waoog Wẽnnaam a to tɩ sã n ka bãmb Wẽnnaamã bal ye.

29Moasã, ad noor ning mam sẽn kõte: Ned ning fãa, ba a sẽn yaa buud ning neda, wall a sẽn gomd buud goam ninga, a soabã sã n paoog a Sadrak ne a Mesak la a Abednego Wẽnnaamã, b na n bees-a lame, la b wã a zakã n kɩt t'a lebg raboogo. Bala, Wẽnnaam a to ka be n tõe n fãag ned wa Wẽnnaam-kãngã sẽn maanã ye.»

30Dẽ poore, rĩm a Nebukatnedzaar kɩtame tɩ b zẽk a Sadrak ne a Mesak la a Abednego n kõ-b naam Babilond soolmã pʋga.

31Rĩm a Nebukatnedzaar tʋma koɛɛg nebã buud fãa nengẽ, la soolem toay-toayã nengẽ, ne neb nins sẽn gomd goam buud toor-toorã fãa sẽn be dũniyã gill fãa zugã nengẽ, n yeel yaa: «Bɩ y vɩɩmd ne bãane!

32Mam gesame tɩ yaa neere, tɩ m wilg bõn-bãn ne bõn-yɛɛsds nins Wẽnnaam sẽn ka to wã sẽn maan n kõ maamã.

33Bãmb bõn-bãnã yaa kãsemse! La Bãmb bõn-yɛɛsdsã tara pãnga! Bãmb dɩta naam wakat sẽn ka sɛta. La Bãmb rĩungã paada zamaan woo zamaane!»

← Chapter 2 Jump to: Chapter 4 →