Job 15

Mossi MPBU (WẼNNAAM SEBRE 2014)

← Chapter 14 Jump to: Chapter 16 →

1Tema tẽng rao a Elifaaz yeelame:

2«Rẽ yĩnga, yam soab leokda ne bãng-vɩʋʋg la? A gomda gom-vɩɩd wa yaang sobg la?

3A ka tog n gom goam sẽn ka yõod n bao bʋʋm ye. Yaa goam sẽn ka tar võore.

4Fo mengã sãamda wẽnnaam zoeese, la fo gɩdgdame tɩ b ka tõe n pʋʋs Wẽnnaam ye.

5Bala, yaa fo beegrã n so f noorã tɩ f gomda. La fo gomda wa neb nins sẽn tar-b yamã.

6Ka maam n mongd f bʋʋm ye, yaa fo no-goamã n mongd-f bʋʋm. Yaa fo mengã noorã n gomd n paalgd foom.

7Fo renga ninsaalbã fãa n dog la? Fo renga tãmsã n beẽ la?

8Fo wʋma Wẽnnaam yel-solgdsã la? Fo rɩka yamã n na n bao f meng sõngr bal la?

9Fo mii bõe tɩ tõnd ka miẽ? Fo wʋmda bõe võor tɩ tõnd ka wʋmdẽ?

10Neb n be tõnd sʋk n kʋʋl tɩ b zoobd pelge, tɩ b yʋʋmã yɩɩd fo ba wã yʋʋmã.

11Wẽnnaam belsgã ka sek foom, b sẽn bels foom ne gom-nood nins tõnd sẽn gom ne foomã ka seke?

12Bõe yĩng tɩ f sũur yikdẽ tɩ f nin wẽgsd a woto?

13Yaa bõe tɩ f sũur puug ne Wẽnnaam tɩ f gomd goam a woto?

14Ninsaal yaa bõe n tõe n yeel t'a yaa yɩlemde? Pag sẽn dog a soab buudã fãa yaa bõe n tõe n yeel t'a yaa tɩrga?

15Ade, Wẽnnaam sã n ka kɩs sɩd ne b pʋ-peelem dãmbã, la bãmb sã n ges saasẽ dãmbã wa koangdba,

16ninsaal yaa yel-beedo, n yaa bõn-põosg n yɩɩda. Ninsaal yũuda ka-tɩrlmã wa koom!

17Kelg maam tɩ m bilg-fu! Mam na n togsa foom mam sẽn yãnde.

18Yaa yam dãmbã sẽn dag n zãms b yaab-rãmbã nengẽ, n togs n ka solgã.

19Yaa bãmb bal la b rag n kõ tẽngã tɩ sãan ba a yembr dag n nan ka pɩʋʋg b sʋk ye.

20Nin-wẽng paamda toog a vɩɩmã tɛka. Baa nin-toaag yʋʋm sõor sẽn yaa to-to,

21yẽnda wʋmda bʋrg n yɛɛsdẽ. Yẽnda sẽn vɩ ne bãanã wakate sẽn sãamd-a bũmb fãa wã wa n zaba ne yẽnda!

22Yẽnda ka tẽed t'a na n tõog n põsa likẽ wã ye, bala, zabr sʋʋg n gũud-a.

23Yẽnda yeebd n baooda a rɩɩbo. A miime tɩ lik wakat n be taoor n gũud yẽ.

24Yel-pakrã ne yɩɩrã n pida yẽnda ne yɛɛsgo, a siga yẽnda zug wa rĩm sẽn sũ tãp n na n tɩ zab zabre.

25Bala, yẽnda zẽka a nug n na n zab ne Wẽnnaam, yẽnda rɩka a zug n wẽ ne Pãng-Soabã.

26Yẽnda kenga a sũuri, n zãad a gãn-tagdã, n zoet n na tɩ zab ne Wẽnnaam.

27A nengã pida ne kaam n põeeda, t'a lʋgã yɛdge.

28La yẽnda na n zĩnda tẽms b sẽn sãam pʋsẽ, la rot neb sẽn yi n bas tɩ yaa rabood n dat n lʋɩ pʋsẽ.

29Yẽnda ka na n tol n yɩ rakãagr ye. A paoongã ka na n fɩɩg yɛs ye. La yẽnda ka na n kɩ yẽg tẽngã pʋg ye.

30Yẽnda ka na n tõog n yi lik pʋgẽ ye. Bugmã na n kʋɩɩsa a wil-poalã, la Wẽnnaam noor pemsem na n tus-a lame n lake.

31Bɩ yẽnda ra belg a meng n teeg wẽng ye! Bala, a rolbã na n yɩɩ wẽnga.

32Bõn-kãng na n pidsame t'a wakatã nan ka ta ye. A wilã ka na n paam n tob ye.

33Yẽnda na n yɩɩ wa reezẽ tɩɩg biis sẽn sʋʋg n ket n yaa kãse, la b na n kɩtame t'a sʋʋg wa oliiv tɩɩg puud sẽn sʋʋgde.

34Neb nins sẽn yaa wẽn-kɩɩsdbã ka na n paam dogem ye. La bugum na n dɩɩ zãmb dãmbã fu-roto.

35Sẽn tʋt-a wẽnem pʋga, a na n doga wẽnga, la a na n kɩtame tɩ zãmbã sẽn be a pʋgẽ wã yi.»

← Chapter 14 Jump to: Chapter 16 →

Recommended Reading

Commentary Job Commentaries → Devotional Job Devotional Guide → Get This Bible Mossi MPBU (WẼNNAAM SEBRE ) Study Bible →