Job 30

Mossi MPBU (WẼNNAAM SEBRE 2014)

← Chapter 29 Jump to: Chapter 31 →

1La moasã, kom-bõoneg yaanda maam n laadẽ. Pĩnda mam yaool n dag n ka get b ba rãmbã wa neb sẽn zem baasã sẽn gũud mam piisã ye.

2Bõe pʋgẽ la bãmb tõe n naf maam? Bãmb ka leb n tar pãng ye.

3Naong ne kom kɩtame tɩ b faage. Bãmb tuu zĩ-pɛɛl ne yʋngo, n be namsg pʋgẽ n baood dɩɩbo.

4Bãmb dag n võoda weoogã mood sẽn be tuudã seesã, la b rag n ka tar dɩɩb n dɩtẽ tɩ sã n ka vidb ye.

5B rag n digda bãmb n yiisd nebã sʋka, la b rag n kaasda bãmb wa b sẽn digd wagda.

6Bãmb tɩ bee tãms sẽgsẽ ko-soodã pʋse. Bãmb tɩ bee tãms bogdẽ la pĩis pʋse.

7Bãmb kẽnda tuudã sʋk n kelemdẽ, la b samd taab gõosã tẽngre.

8Bãmb yaa nin-yood sẽn ka tar yʋʋr ye. B rig-b lame n yiis tẽngã pʋgẽ.

9La moasã, yaa maam n lebg b yɩɩle. Mam lebga yel-bũnd ne bãmba.

10Bãmb geta maam wa yel-beedo, n zãagd b mens ne maam. Bãmb tʋbsda mam nenga kolkood tɩ b toor kaẽ ye.

11Bala, Wẽnnaam yolsa mam tãpã n gãneg-m tẽnga. La moasã, nin-kãens ka leb n gũusd b mens ne maam ye.

12Nin-yoodã yika mam dɩtg n tusd maam. Bãmb tukda sãoong sor n tat maam n dat n sãam maam.

13Bãmb gɩta m sor n dat n sãam maam. La b ka baood ned sõngr ye.

14Bãmb zoet n wata wa b tũuda lalg sẽn wedg n na n kẽ, n tusd taab a tãndã zugu.

15Pelen-yɩk wẽnemd n zomba maam. B yiisa m waoogrã tɩ lebg wa sobg n dɩk-a. Mam sũ-noogã looga wa sawaodgo.

16La moasã, mam vɩɩmã sɛt n dabdame, tood daar n paam maam.

17Yʋngo, toog tara maam, m kõabã zabdame. Toog zabda maam n ka basdẽ ye.

18Wẽnnaam gãda m fuugã kokor n sẽbg maam

19bãmb luba maam begd pʋgẽ. Mam yaa wa wubsg ne tompeglem.

20Wẽnnaam, mam boond-y lame tɩ y wa sõng-ma, la y ka leokd ye. Mam sã n pʋʋs yãmba, y ka kelgd-m ye.

21Yãmb lebga nin-toaag ne maam. Yãmb namsda maam ne y nugã pãn-kãsengã.

22Yãmb kɩtame tɩ sobg rɩk maam n zẽk yĩngr n looge. Yãmb kɩtame tɩ y saaga na n ni n boog-ma.

23N-yẽe! Mam miime tɩ yãmb talla maam n taas kɩɩm-kulgu, zĩig ning nin-vɩɩsã fãa sẽn na n seg taabã.

24Ned sẽn na n sãam ka tẽegd a nug n kot sõngr sɩda? Ned sã n be toog pʋga, a ka bõosd sõngr sɩda?

25Mam ka yãb neb nins sẽn be namsg pʋgẽ wã sɩda? Nimbãan-ned nimbãaneg ka yõk maam sɩda?

26Mam dag n baooda sũ-noogo, la m paama sũ-sãanga. Mam dag n gũuda vẽenem la yaa lik la m paam yã.

27Mam sũur sãama hal wʋsgo. La sũ-sãams daar n paam maam.

28Mam lebgda sablga, la ka wĩndg n yõog-m ye. Mam yikda kʋʋng sʋk n kot sõngre.

29Mam lebga we-baas saam-biiga, naneend n lebg mam tũud-n-taase.

30Mam gãongã lebga sablg n fʋkdẽ. Mam kõabã wɩnga wʋsgo.

31Mam kʋndã lebga sũ-sãang yʋʋm-teoogo, la m wɩɩgã me lebga yãbr yʋʋm-teoogo.

← Chapter 29 Jump to: Chapter 31 →

Recommended Reading

Commentary Job Commentaries → Devotional Job Devotional Guide → Get This Bible Mossi MPBU (WẼNNAAM SEBRE ) Study Bible →