Lamentations 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Kayto! Sãnemã ka leb n pɩnd ye. Sãnem halaalã tekame. B sãeega kug sẽn welg toorã n pid so-tiisã fãa.

2Sɩyõ kom-dibli wã sẽn tar yõod wa sãnem halaalã, kayto! B geta bãmb wa yagd laas sẽn yaa yagb nus tʋʋmde.

3Baa we-baas basda b bĩis tɩ b kamb yẽsme, la mam buudã sẽn yaa mam nin-nongdsã lebga nin-toos wa we-raoogẽ naneendo.

4Ko-yũud tara bi-pɛɛlg hal t'a zelemd tabend a ragsendaka. Kom-bãooneg kota rɩɩbo, la ned ka kõt bãmb ye.

5Neb nins sẽn da rɩt rɩ-noodã kiida soayã zutu. Neb nins sẽn dog n tuk naarã vɛɛsda tãmpʋʋr n baood rɩɩbo.

6Mam buudã sẽn yaa mam nin-nongdsã yel-wẽnã yɩɩda Sodom nebã rẽnda, b luba Sodom nebã wakat yɛng pʋgẽ tɩ ned nug ka sɩɩs bãmb ye.

7B na-biisã rag n yaa neeb n yɩɩd neeze, bãmb peelmã rag n yɩɩda bĩisim, bãmb yĩngã rag n yaa miuug wa koray. Bãmb nens rag n pɩnda wa safɩɩr kugri.

8Bãmb nensã sobga wa saala. Ned sã n yãnd bãmb sor zugu, a ka leb n tõe n bãng-b ye. Bãmb gãong tabendeda b kõabã n kʋɩt wa raado.

9B sẽn kʋʋd-b rãmb ne zabr sʋʋgã n são kom sẽn kʋʋd b-rãmbã. Bãmb pãng sɛtame tɩ b lʋɩt tẽnga, bala, pʋtã bõn-koaadl biis ka leb n beẽ ye.

10Mam buudã sẽn yaa mam nin-nongdsã sãoong wakate, baa pagb nins sẽn dag n yaa nimbãan-zoɛtbã, b rɩgsa b kambã ne b nus n dʋg n wãbe.

11Sẽn-Ka-Saab basame tɩ b sũurã fudg n tãag a tɛka. Bãmb kiiga b sũ-puugrã tʋʋlem n widg bugum Sɩyõ tẽngã pʋgẽ, tɩ bugmã rɩ a yẽbgrã fãa zãnga.

12Dũniyã rĩm-dãmbã la neb nins fãa sẽn be tẽng zugã ka tẽ tɩ namsdbã ne bɛɛbã na n tũu Zeruzalɛm tẽngã rignoyẽ n kẽ ye.

13Bõn-kãng yaa a no-rɛɛsdbã yel-wẽnã yĩnga, la a maan-kʋʋdbã kongr yĩnga, bãmb sẽn daag nin-tɩrsã zɩɩm a pʋgẽ wã yĩnga!

14Bãmb dag n yeebda wa zoens sẽn be soay zutu. Zɩɩm dẽgma bãmb tɩ ned ka tõe n sɩɩs bãmb fut ye.

15Nebã kelmame n yeel bãmb yaa: «Lak-y-yã, rẽgdo!» «Loog-y-yã, loog-y ka n da sɩɩs bũmb ye!» Bãmb sẽn wa n zoet n yeebdẽ wã, buud a taabã nebã rag n yetame yaa: «Bãmbã ka na n pa kaanẽ n kaoos ye.»

16Sẽn-Ka-Saab meng kɩtame tɩ bãmb sãeege. Bãmb ka waoog maan-kʋʋdbã, la b ka zoe nin-kẽembã nimbãaneg ye.

17Tõnd dag n gũuda sõngr zaalem, tɩ d nin pãng booge. Tõnd dag n gũuda buud a to fãagre, la a ka fãag tõnd ye.

18Bãmb dag n gũusda tõnd sẽn dabdẽ, sẽn na n yɩl n gɩdg tõnd tɩ d da kẽng d zĩisẽ wã ye. Tõnd sɛɛb wakat rag n kolgdame, la tõnd dasmã rag n pidame. Tõnd sɛɛb taame!

19Tõnd digdbã zoeta tao-tao n yɩɩd sɩls sẽn yɩgd yĩngri. Bãmb diga tõnd ne pãng tãmsã zutu. Bãmb solgame n bẽd tõnd we-raoog pʋgẽ.

20Sẽn-Ka-Saab sẽn yãk a soab t'a yaa tõnd vɩɩmã gũudã lʋɩɩ bãmb bogdã pʋsẽ. Yẽnda yaa soab ning tõnd sẽn dag n gomd a yell n yetẽ tɩ tõnd na n zĩnda yẽnda maasmẽ n vɩɩmd buud a taabã sʋkã.

21Edom nebã sẽn yaa mam nin-nongdsã bee Uts tẽnga, maan-y sũ-noog n kɩdme. Bõn-yũudlã na n taa yãmb nengẽ me. Yãmb me na n yũ-a lame n tɩge, n piid y futã n kẽn y zaala.

22Sɩyõ nebã sẽn yaa mam nin-nongdsã, yãmb kongrã sɩbgr sɛɛme. Bãmb ka na n leb n yiis yãmb n tɩ kẽes yembd yɛs ye. Edom nebã, b na n sɩbga yãmb y kongrã yĩnga. B na n puka yãmb yel-wẽnã.

← Chapter 3 Jump to: Chapter 5 →