Lamentations 5

Mossi MPBU (WẼNNAAM SEBRE 2014)

← Chapter 4 Jump to:

1Sẽn-Ka-Saabo, tẽeg-y bũmb ning sẽn paam tõndã yelle. Tags-y la y ges tõnd yãndã yelle.

2B rɩka tõnd pʋɩɩrã n kõ sãambã, tõnd sẽn ka mi-b rãmbã reega tõnd yiyã n sooge.

3Tõnd yaa kɩɩbs sẽn ka ba, la d ma-rãmbã yaa wa pʋg-kõapa.

4Tõnd daada koom ne ligd n yũuda. Tõnd yaooda ligd n yaool n paam d raado.

5Neb nins sẽn digd tõndã paama tõnd n yõke. Tõnd yɛɛ zãnga, la b ka basd tõnd tɩ d vʋʋs ye.

6Tõnd tẽega d nus n tees Ezɩpt ne Asiiri sẽnẽ n na n paam dɩɩb n dɩ.

7Tõnd ba-rãmbã kongame, bãmb ka leb n be ye, la yaa tõnd n deegd bãmb yel-wẽnã sɩbgre.

8Yembs n so tõndo, la ned ka sẽn na n fãag tõnd bãmb nusẽ ye.

9Tõnd gẽnegda d yõy n baood dɩɩbo, la neb bee we-raoog pʋgẽ ne sʋʋs n dat n kʋ tõndo.

10Komã wɩnga tõnd wʋsg hal tɩ tõnd gãndã yõog wa wʋng bugum sẽn dɩ.

11Bãmb yõga pagbã n sãam bãmb Sɩyõ tẽngã pʋgẽ. La b maana pʋg-sadbã me woto Zʋʋda tẽmsã pʋsẽ.

12Bãmb yõga nanambsã n luuli. Bãmb ka waoog nin-kẽembã ye.

13B kɩtame tɩ kom-bɩɩsã tʋk neere, la kom-dibli wã tʋka raad n lengdẽ.

14Nin-kẽembã ka leb n kẽnd tẽngã noor ye. La kom-bɩɩsã ka leb n yɩɩnd ye.

15Tõnd sũ-noogã sɛɛme. Tõnd saoogã lebga sũ-sãanga.

16Tõnd maanfã sẽn dag n fõg tõnd zugã lʋɩɩme. Toog bee tõnd zutu, bala, tõnd kongame.

17Bõn-kãng yĩng n kɩt tɩ tõnd namsd d sũyã pʋse, tɩ tõnd nensã sobda.

18Bala, Sɩyõ tãngã sãamame, tɩ waas gõod beenẽ.

19La yãmba, Sẽn-Ka-Saabo, yãmb paada wakat sẽn ka sɛta. Yãmb naam geerã na n paa zamaan fãa.

20Bõe yĩng tɩ yãmb na n yĩm tõnd yell wakat fãa? Bõe yĩng tɩ yãmb na n bas tõnd n kaoos wakat wʋsgo?

21Sẽn-Ka-Saabo, bɩ y wẽnemd tõnd neng n tees yãmba, la tõnd na leb n wa yãmb nengẽ. Leb-y n kõ-y tõnd dasem nins sẽn yaa wa kʋdem-wẽndẽ dẽnda.

22Yãmb basa tõnd zãng fasɩ bɩ, yãmb sũurã puuga ne tõnd hal tɩ loog bɩ?

← Chapter 4 Jump to: