Revelation 15

Mossi MPBU (WẼNNAAM SEBRE 2014)

← Chapter 14 Jump to: Chapter 16 →

1Dẽ poore, mam yãnda bãnd a to arzãn sẽn yaa kãseng n sek gesgo. Yaa malegs a yopoe sẽn da zãad tood a yopoe, yaoolem dãmbã. Bala yaa ne to-kãens la Wẽnnaam sũ-puugrã na n pidsi.

2La mam yãnda bũmb sẽn yaa wa ko-kãseng sẽn yaa nen-gɛtga, n kalem ne bugum. La mam yãnda neb nins sẽn tõog rũngã ne a bõn-naandgã la a yʋʋrã geel-bilã sẽn yɛs yĩngri, nen-gɛtgã sẽn wẽnd ko-kãsengã zugu. Bãmb da zãada Wẽnnaam pendse.

3Bãmb yɩɩnda Wẽnnaam tʋmtʋmd a Moyiis yɩɩllã, la pe-bilã yɩɩlle: Zu-soab a Wẽnnaam Sẽn‑Tõe‑Fãa, yãmb tʋʋmã yaa kãsemse la b bee neere! Soolem dãmbã rĩmã, yãmb tʋʋmã zemsame la b yaa sɩda.

4Zu-soaba, ãndã n ka na n zoe yãmba, la a ka na n waoog yãmb yʋʋrã? Bala, yãmb y yembr tãa n welg toore. La soolem dãmbã fãa na n wa wõgemda yãmb taoore, yãmb tɩrlmã sẽn pukã yĩnga.

5Rẽ poore, mam gesame, la b paka kaset fu-roogã yɩlgr zĩigã arzãn pʋga.

6Malegs nins sẽn da zãad tood a yopoe wã yii yɩlgr doogẽ wã. Bãmb dag n yera peen‑neer sẽn yaa pɛɛlg falll... fut sẽn yãgda. La b rag n sẽba b yãad ne sãnem sẽbdse.

7Ned a yembr bõn-vɩɩs a naasã sʋk kõo malegs a yopoe wã sãnem laas a yopoe sẽn pid ne Wẽnnaam sẽn vɩ zamaan woo zamaanã sũ-puugri.

8La yɩlgr doogã pida ne bug-zõose, Wẽnnaam ziirã ne b pãngã yĩnga, la ned baa a yembr da ka tõe n kẽ yɩlgr doogẽ wã ye, hal tɩ toodã malegs a yopoe wã sẽn zãadã sɛ.

← Chapter 14 Jump to: Chapter 16 →