1 Thessalonians 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1M ba-biisi, yãmb mens miime tɩ tõnd waoongã yãmb nengẽ ka yɩ zaalem ye.

2La yãmb miime tɩ b namsa tõnd Filip, la tõnd yãa toog be. Rẽ kɩtame tɩ tõnd paam pɛl-kɛgeng ne d Wẽnnaamã, n na n moon yãmb Wẽnnaam koe-noogã maoor wʋsg pʋgẽ.

3Sagls nins tõnd sẽn sagl yãmbã ka yɩ tudgri, bɩ tags-rẽgd pʋgẽ, wall ne sɩlem ye.

4La a wa Wẽnnaam sẽn poes tõnd n na n kõ tõnd koe-noogã mooneg tʋʋmdã, tõnd ka gomd n na n noog ninsaalb sũy ye, la yaa tɩ noog Wẽnnaam sẽn feesd sũyã sũuri.

5Yãmb miime tɩ tõnd zɩ n gom n na n belg neb ye, tɩ tõnd zɩ n gom n dat n paam paoong ye. Wẽnnaam yaa d kaset soaba.

6Tõnd ka bao waoogr sẽn yit ninsaalb nengẽ, yãmb nengẽ, wall neb a taab nengẽ ye. Tõnd yaool n dag n tõe n modga yãmba, tõnd sẽn ya Kirist tẽn-tʋmdbã yĩnga.

7La tõnd sẽn zĩnd yãmb sʋkã, tõnd pida ne sũ-bʋgsem. A wa pag sẽn get a kamb yellã,

8tõnd da nongẽ lame n kõ yãmb Wẽnnaam koe-noogã ne nonglem. La ka rẽ bal ye. Tõnd da nongẽ n kõo d vɩɩmã me yãmb yĩnga, bala, yãmb lebga tõnd nin-nongdse.

9D ba-biisi, yãmb tẽra tõnd tʋʋmã ne d naongã: Tõnd moona yãmb Wẽnnaam koe-noogã, la tõnd tʋma yʋng ne wĩntoogo, tɩ d da wa n yɩ zɩɩb yãmb yĩng ye.

10Yãmb yaa kaset rãmba, la Wẽnnaam me yaa kaset soaba, tɩ tõnd yel-manesem ne yãmb sẽn ya tẽedbã yɩɩ sõama la tɩrga, tɩ rõdb kaẽ ye.

11Yãmb miime me tɩ tõnd yɩɩ wa ba-rãmb ne b kamba, yãmb yembr yembr yĩnga.

12Tõnd sagla yãmba, n bels yãmba, la d bõos yãmb tɩ y kẽn wa sẽn zemsd Wẽnnaam daabo, bãmb sẽn bool yãmb tɩ y paam pʋɩɩr ne bãmb soolem la b ziirã yĩnga.

13Tõnd pʋʋsda Wẽnnaam bark me n ka basdẽ ye, bala, yãmb sẽn deeg Wẽnnaam goamã tõnd sẽn togs yãmbã, yãmb ka reeg-a wa a yaa ninsaalb goam ye. Yãmb deeg-a-la wa a sẽn ya bũmb ning sɩd-sɩdã, Wẽnnaam goam sẽn tʋmd yãmb sẽn ya tẽedbã pʋgẽ.

14D ba-biisi, yãmb sɩd lebga Wẽnnaam dot nins sẽn be Zude soolmẽ wã togs-n-taase, la wẽnd-do-kãens bee Kirist Zezi pʋgẽ. Bala, yãmb tẽngã rãmb sẽn nams yãmb to-to wã, Zuif-rãmbã me namsa wẽnd-do-kãens rãmb a woto me.

15Zuif-rãmbã n kɩt tɩ b kʋ Zu-soab a Zezi la Wẽnnaam no-rɛɛsdbã, la b nams tõndo. B ka maand sẽn noom Wẽnnaam ye, la b kisa neba fãa.

16Bãmb gɩdgda tõnd tɩ d da moon bu-zẽmsã Wẽnnaam koɛɛgã, tɩ b paam fãagr ye. B sẽn maan a woto wã, b maana b yel-wẽnã n taase. La Wẽnnaam sũ-puugr baas n ta-b lame.

17D ba-biisi, tõnd sẽn zãag ne taab wakat bilf yĩnga, d nina ka ne taab ye, la d sũyã loee ne taaba. Tõnd data ne d sũyã fãa n leb n yã yãmb neng ne nenga.

18Dẽ kɩtame tɩ tõnd dag n dat n wa yãmb nengẽ. Naoor a yiib la maam a Poll yẽ dag n dat n wa yãmb nengẽ, la a Sʋtãan gɩdga tõndo.

19Tõnd saagr bee ne ãnna rãmba, la ãnna rãmb n ya tõnd sũ-noog la d waoogr maanf tõnd Zu-soab a Zezi taoore, la b waoongã wakate? Ka yãmb laa?

20N-ye! Yãmb yaa tõnd ziir la d sũ-noogo.

← Chapter 1 Jump to: Chapter 3 →