1 Thessalonians 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Tõnd wa n ka leb n tõe n gũ yɛs ye. Dẽ n kɩt tɩ tõnd yãk yam tɩ ya tõnd bal n na pa Atɛn.

2La tõnd tʋma d ba-biig a Tɩmote sẽn ya tõnd tʋmd-n-taag Wẽnnaam tʋʋmdã pʋgẽ, n moond Kirist koe-noogã, t'a wa n paas yãmb raoodo, la a sagl yãmb y tẽebã sõngr yĩnga,

3tɩ namsg ning sẽn paamd yãmb moasã wã da wa n vigs ned baa a yembr ye. Bala, yãmb mens miime tɩ nams-kãens yaa tõnd pʋɩɩre.

4Wakat ning tõnd sẽn dag n be ne yãmbã, tõnd pĩnd n yeela yãmb tɩ d na n paama namsgo. La yãmb miime tɩ yaa rẽ n wa wã.

5Dẽ n kɩt tɩ mam sẽn ka leb n tõe n gũ n kaoosã yĩnga, mam tʋma a Tɩmote t'a wa n sok yãmb tẽebã yelle, mam sẽn zoet dabeem tɩ makdã na n mak yãmb tɩ tõnd tʋʋmdã lebg zaalmã yĩnga.

6La moasã, a Tɩmote yii yãmb nengẽ n lebg n wa tõnd nengẽ, la a waa ne yãmb tẽebã la y nonglmã koe-noodo, la koe-nood tɩ yãmb ket n tẽra tõnd yell sõama, la y raab tɩ leb n yã tõndo, wa tõnd me sẽn dat n yã yãmbã.

7Woto, m ba-biisi, baa ne tõnd sẽn be tood la namsg pʋgẽ wã, tõnd paama belsg ne yãmb kibarã, y tẽebã yĩnga.

8Moasã, tõnd vɩɩme, yãmb sẽn paad Zu-soaba pʋgẽ kãenkãe wã yĩnga.

9Tõnd ka tõe n pʋʋs Wẽnnaam bark n sa yãmb yĩnga, sũ-noog ning tõnd sẽn maand Wẽnnaam taoor yãmb yĩngã yĩng ye.

10Yʋng ne wĩndga, tõnd bõosda Wẽnnaam ne d sũyã fãa tɩ d tõe n yã yãmb nengã, la d kɩt tɩ y paam bũmb ning sẽn paoog yãmb tẽebẽ wã.

11Bɩ Wẽnnaam meng sẽn ya tõnd ba wã, la tõnd Zu-soab a Zezi pak d sorã tɩ d ta yãmb nengẽ.

12Bɩ Wẽnnaam kɩt tɩ yãmb nonglem taab yĩnga, la neba fãa yĩngã lebg kãseng n puugi, wa nonglem ning tõnd sẽn tar yãmb yĩngã.

13Woto, bɩ Wẽnnaam paas yãmb raoodo, tɩ y ra paam rõdb y sũyã pʋsẽ ye, la y zĩnd sõmblem tõnd ba a Wẽnnaam taoore, daar ning tõnd Zu-soab a Zezi sẽn na n wa ne nin-sõamy wã.

← Chapter 2 Jump to: Chapter 4 →