2 Timothy 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Dẽ, m biiga, keng f meng bark ning sẽn be a Zezi Kirist pʋgẽ wã pʋgẽ.

2Bũmb nins fo sẽn wʋm mam noorẽ kaset dãmb wʋsg taoorã, togs-b neb nins sẽn maand sɩda la sẽn tõe n zãms neb a taabã.

3Naag maam n nams wa a Zezi Kirist soda-sõngo.

4Sodaag ka kẽesd a toog nin-zaals vɩɩm yɛl pʋgẽ, a sã n dat tɩ ned ning sẽn dɩk-a yẽ sodaarã sũur yɩ noog ne-a ye.

5La reem-dɛɛmd ka paamd tõogr maanfo, a sã n ka tũ reemã soay fãa n deem ye.

6Ka-koaad ning sẽn namsd a yĩng n tʋmdẽ wã n tog n yɩ pipi n yãgs a koodã biisi.

7Wʋm m sẽn yetã võore. Bala, Zu-soabã na n weka fo yamã ne bũmb fãa.

8Tẽeg a Zezi Kirist yelle: bãmb vʋʋgame n bas kũum. Bãmb yaa a Daviid yagenga, wa koe-noogã sẽn yeelã.

9Yaa koe-no-kãng yĩng la mam namsda, hal tɩ b sẽb maam wa tʋʋm-wẽns maanda. La b ka sẽb Wẽnnaam goamã ye.

10Rẽ n kɩt tɩ mam sakd bũmba fãa nin-tũusidsã yĩnga, tɩ bãmb me tõe n paam fãagr ning sẽn be a Zezi Kirist pʋgẽ, la m paam ziir sẽn kõn sa.

11Gom-kãngã yaa sɩda: Tõnd sã n ki ne bãmba, tõnd na n vɩɩmda ne bãmb me.

12Tõnd sã n nang pãnga, tõnd na n dɩɩ naam ne bãmba. Tõnd sã n yeel tɩ d ka mi bãmba, bãmb me na yeel tɩ b ka mi tõnd ye.

13Tõnd sã n ka maand sɩda, bãmb yẽ paada sɩdã pʋgẽ. Bala, bãmb ka tõe n yeele, n leb n kɩɩs tɩ b ka yeel ye.

14Ad bũmb nins fo sẽn tog n tẽeg nebã, n togs-b Wẽnnaam taoor tɩ b gũus n lak ne no-koɛɛm gom-biis poorẽ t'a ka yõod baa bilf ye. B sẽn wat ne bũmb ninsi, yaa neb nins sẽn kelgdã sãoongo.

15Nang pãng n yals Wẽnnaam taoor wa ned sẽn bɩ, tʋmtʋmd sẽn kõn sulg a zug ne yãnd ye. Yɩ ned sẽn togsd sɩd koɛɛgã ne tɩrlem.

16Lak ne gom-vɩɩd sẽn ka kẽed ne wẽn-tũudmã yɛlã, bala, neb nins sẽn gomd gom-kãensã na n kell n kẽeda wẽngã pʋgẽ n paasdẽ.

17Bãmb goamã na n dɩɩ wa solenkẽega. A Himene ne a Filɛt bee bãmb dãmb sʋka.

18Bãmb bʋdg n basa sɩdã, n yetẽ tɩ kũum vʋʋgrã zoe n loogame, la b leebda neb kẽer tẽebo.

19Baoosgo, yẽbg-kãenkãe ning Wẽnnaam sẽn yẽbgã yasame, la gomd ning sẽn pʋgdã ning-a-la bãnde: Zu-soabã mii neb nins sẽn ya bãmb dẽndã, la ned ning fãa sẽn pʋt Zu-soabã yʋʋr tog n basa ka-tɩrlem.

20Yi-kãseng pʋgẽ, ka sãnem bɩ wanzuri lagd bal n be ye. Kẽer me bee be n ya ne raado wall ne tãndo. Teed kẽer tʋʋm bee waoogre, la kẽer me tʋʋmd yaa rẽgdo.

21Woto, ned sã n yɩlgd a meng n yiisd rẽg-kãensã, a na n yɩɩ laoko a tʋʋm sẽn be waoogre, laok sẽn welg toore, n be yõod a soaalã yĩnga, la sẽn tõe n tall n maan tʋʋm-sõng buud fãa.

22Zãag ne yãadem datem wẽnsã, la f bao tɩrlem, la tẽebo, la nonglem, la laafɩ ne neb nins sẽn pʋʋsd Zu-soabã ne sũy sẽn ya yɩlma.

23Zãgs no-koɛɛm sẽn ya yalemdo la sẽn ka yõodã, fo sẽn mi tɩ b wata ne zabã yĩnga.

24Wẽnnaam tʋmtʋmd yaool n ka tog ne zab ye, a tog n tara nonglem neba fãa yĩnga, la a tar zãmsg ne zɩɩb tʋkr kũuni.

25A tog n demsa no-koɛɛm wẽedbã ne sũ-bʋgsem, n maand tẽeb tɩ Wẽnnaam na n kɩtame tɩ b paam sũ-lebgre, n tõog n bãng sɩdã,

26tɩ b leb n paam yam-sõngo, la b tõog n yi rõatã kũusa sẽn yõg bãmba tɩ b sak-a wã pʋgẽ.

← Chapter 1 Jump to: Chapter 3 →