2 Timothy 4

Mossi Moore (KÃAB-PAALGÃ KOE-NOOGO)

← Chapter 3 Jump to:

1Mam yeta foom Wẽnnaam taoore, la Kirist Zezi sẽn na n kao nin-vɩɩs la kũum bʋʋdã taoore, la bãmb waoongã ne b rĩungã yʋʋr yĩnga,

2tɩ f moon koɛɛgã, tɩ f wɩng ne togsg wakat fãa, sã n yaa a togsg wakat wall ka a wakate. Mao tɩ nebã reeg tɩ gomdã yaa sɩda. Leng la f sagl ne sũ-mare la zãmsgo.

3Bala, wakat n wat tɩ nebã ka na n leb n dat n wʋm sɩd koɛɛgã ye. La bãmb mensã yĩns ratem yĩnga, la kelgr yamleoog sẽn tar-bã yĩnga, b na n tigsa karen-saam-dãmb wʋsgo.

4B na n yẽda b tʋbã ne sɩdã kelgre, la b yok-b ne soalmã kelgre.

5La foom, gũus f meng ne bũmb fãa. Sak namsgo. Maan koe-noogã mooneg tʋʋmde. Maan f tʋʋmdã neere.

6Bala, mam zoe n lebga wa koom b sẽn na n base, la mam loogr wakat kolgame.

7Mam zaba zab-sõngo, mam zoee zoeesã n taase, mam talla tẽebo.

8Moasã, Wẽnnaam bĩnga tɩrlem maanfã mam yĩnga. Zu-soabã sẽn ya bʋ-kaood tɩrgã na n kõ-a-la maam da-kãngã. La ka maam bal la b na n kõ ye, yaa neb nins fãa sẽn na nong bãmb pukrã.

9Nang pãng n wa mam nengẽ tao-tao.

10Bala, a Demas basa maam n looge, a sẽn nong moasã dũni wã yĩnga. A kẽnga Tesaloniki. A Kersãns kẽnga Galasi, t'a Tit kẽng Dalmasi.

11Yaa a Luk a yen tãa bal n be ne maam. Peeg a Mark n wa-ne, bala, a bee yõod ne maam m tʋʋmdã pʋgẽ.

12Mam tʋma a Tisik Efɛɛse.

13Fo sã n wa watẽ, bɩ f zã m fu-bedrã m sẽn bas Torwasã, a Karpus yirã, ne sɛba n wa, la sẽn yɩɩd fãa, yaa gãn-nomdsã.

14Yõak a Alegsãndr maana maam wẽng wʋsgo. Zu-soabã na n lebs-a-la a tʋʋm yaoodo.

15Fo me gũus ne-a t'a kɩɩsa tõnd goamã ne a pãng fãa.

16Mam sẽn yals bʋʋdã zĩigẽ pipi wã, ned baa a yen ka zĩnd ne maam ye, la b fãa loog n basa maam. Bɩ Wẽnnaam da geelg b sẽn maanã ye.

17Yaa Zu-soabã n zĩnd ne maam, n kõ-m pãnga, tɩ mam togs koɛɛgã zãnga, tɩ bu-zẽmsã wʋme. La b fãaga maam gɩgemdã noorẽ.

18Zu-soabã na n yolsa maam ne tʋʋm-wẽng fãa, la b na n fãaga maam n kẽes b soolmẽ. Bãmb n so ziir wakat sẽn ka sɛta. Ãmina!

19Pʋʋs a Akilas ne a pag a Piriska, la a Onezifoor zaka rãmba.

20A Erast paa Korẽnte, la mam basa a Torfim Mile t'a ya bãada.

21Mao n wa sẽn deng waoodã wẽnde. A Ebulus ne a Pudẽns, la a Linus ne a Kolodya, la ba-biisã fãa pʋʋsda foom.

22Bɩ Zu-soabã zĩnd ne foom. Bɩ Wẽnnaam barkã zĩnd yãmb zutu.

← Chapter 3 Jump to: