Colossians 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Sɩd me, mam datame tɩ yãmb bãng zab-kãseng ning mam sẽn zabd yãmb yĩngã, la neb nins sẽn be Laodise, la neb nins fãa sẽn nan ka yã mam nengã yĩnga.

2Mam maoodame tɩ b sũya tõe n paam belsgo, tɩ b tõe n lagem taab nonglem pʋgẽ n paam yam n bãng sɩd-sɩda, n bãng Wẽnnaam yel-sõmdã sẽn ya Kiristã.

3Yam vẽnegr ne bãngrã arzegsã fãa solga Kirist pʋgẽ.

4Mam togsda bõn-kãng tɩ ned da wa n belg yãmb ne sɩlem n tõog ye.

5Bala, baa mam yĩngã sã n zãr ne yãmba, mam yam bee ne yãmba, mam sũur yaa noog mam sẽn ne yel-manesem sõngã sẽn be yãmb sʋkã, la yãmb tẽebã sẽn ya kãenkãe Kirist pʋgẽ wã yĩnga.

6Woto yĩnga, yãmb sẽn deeg Zu-soab a Zezi Kiristã, kẽn-y ne bãmba.

7Kɩ-y yẽga, n yals kãenkãe Kirist pʋga, n tall tẽeb kãenkãe wa sẽn zems zãmsg nins b sẽn dag n zãms yãmbã, la y pʋʋs bark wʋsgo.

8Gũus-y tɩ ned da belg yãmb ne zãmsg buudu, la ninsaalb minind n zãag ye, bõn-kãens yaa dũniyã yɛla, la a ka Kirist rẽnd ye.

9Bala, Wẽnnaam sẽn ya bũmb ningã fãa, Kirist me yaa a woto b yĩngã pʋgẽ.

10La yãmb tara bũmb fãa bãmb pʋg tɩ seke, bãmb sẽn ya nanams fãa Naaba la noeyã fãa Zu-soabã.

11Bãmb pʋgẽ me, b kẽesa yãmb bãongo, la ka bãong sẽn kẽes ne ninsaalb nus ye, rat n togs tɩ yaa Kirist bãong sẽn kɩt tɩ yãmb bas y yĩngã ratma.

12Yãmb muma ne Kirist, b sẽn lis yãmbã pʋgẽ, la b naaga yãmb bãmb pʋgẽ n vʋʋg n bas kũum, yãmb sẽn tẽ Wẽnnaam pãngã sẽn vʋʋg Kirist n bas kũumã yĩnga.

13Pĩnda, yãmb sẽn dag n ya bɛɛgdb y kongrã ne y sẽn ka kẽ bãong y yĩngã pʋgẽ wã yĩngã, Wẽnnaam kõo yãmb vɩɩm ne Kirist n kõ tõnd beegrã fãa sugri.

14Bãmb yẽesa tõod nins b sẽn da gʋls n kaood tõnd bʋʋdã la sẽn da mongd tõnd bʋʋma Wẽnnaam menesa tõ-kãng wakat ning b sẽn ka a Zezi da-pɩkã zugã.

15Kirist sãama pãens rãmba ne noeyã pãnga, n wilg neba fãa tɩ b tõog-b-la ne da-pɩkã.

16Dẽ wã yĩnga, da sak-y tɩ ned kao yãmb bʋʋd ne yãmb sẽn dɩt bũmb ning wɛɛngẽ wall y sẽn yũud bũmb ninga, wall kibsa wall kiu-paalga wall vʋʋsg daar wɛɛngẽ ye.

17Bõn-kãens fãa yaa bũmb nins sẽn na n wa wã mamsg bala, la bũmba meng-meng yaa Kirist.

18Da sak-y tɩ ned sẽn maand wa a yaa sik-m-meng soaba la sẽn pʋʋsd malegs belg yãmb wa a sẽn date, n kɩt tɩ y kong y zoeesa keoor ye. Ned a woto buud teegda yãab buud toay-toaya, t'a ninsaalem tagsdã kɩt t'a pid ne wuk-m-meng zaalem

19la a ka tongd a meng ne zug ning sẽn sõngd yĩngã tõrã ne a kõb-sũgdsã la a gĩina t'a bɩt bɩʋʋng sẽn yit Wẽnnaam nengẽ wã ye.

20Sã n yaa tɩ yãmb kii ne Kirista, tɩ Kirist yols yãmb ne tẽeb buud toay-toayã yembdo, bõe tɩ yãmb bas tɩ b leb n modgd yãmb tɩ y sak tõod a woto sẽn ya:

21"Da rɩk-y ye! Da lemb-y ye! Da sɩɩs-y ye!"

22Bõn-kãens b sẽn tar n tʋmdẽ wã sãamdame. Bõn-kãens yaa yeelsem la zãmsg ninsaalb sẽn tar n zãmsd taaba.

23Yaa sɩd tɩ ned sã n get yeelsmã ne zãmsgã, b wẽnda wa b yaa yam tʋʋma, b sẽn wilgd wẽn-tũudum sẽn maand ne yamleoogo, la sik-m-menga, la tõog-m-menga. La b yaool n ka tar yõod n tõe n sõng ned t'a tõog a yĩngã ratem wẽng ye.

← Chapter 1 Jump to: Chapter 3 →