Colossians 4

Mossi Moore (KÃAB-PAALGÃ KOE-NOOGO)

← Chapter 3 Jump to:

1Zu-soben-dãmba, yao-y y tʋmtʋmdbã ne tɩrlem la wa sẽn zemse, yãmb sẽn mi tɩ yãmb me tara Zu-soab arzãn pʋgẽ wã yĩnga.

2Wɩng-y ne pʋʋsgo, modg-y ne-a, n paas bark pʋʋsgo.

3Pʋʋs-y tõnd yĩng me, tɩ Wẽnnaam pak sor tõnd koɛɛgã mooneg yĩnga, tɩ mam tõog n moon Kirist yel-solemdã koɛɛga, yel-solemd ning yĩng b sẽn balg maama,

4tɩ mam na gom a yell vẽeneg wa sẽn zems m sẽn tog n gom a yell to-to wã.

5Kɩt-y tɩ y yel-manesem ne neb nins sẽn ka be tẽeb pʋgẽ wã yɩ ne yam. Da bas-y weerã t'a loogdẽ ye.

6Kɩt-y tɩ yãmb goam tall bark wakat fãa n tar yamsem noom, tɩ yãmb na bãng y sẽn tog n leok ned kam fãa to-to tɩ zemse.

7Sã n ya ne mam mengã yelle, m ba-bi-nongr a Tisik sẽn ya Zu-soaba tʋmtʋmd sẽn maand sɩda, la sẽn ya mam tʋmd-n-taag Zu-soaba tʋʋmd pʋgẽ wã na n wilga yãmb bũmb fãa.

8Pʋs n yaa rẽ yĩng la mam tʋmd-a yãmb nengẽ, tɩ yãmb tõe n bãng tõnd yell sẽn ya to-to, la t'a bels yãmb sũyã.

9Mam tʋmda yẽnda ne d ba-bi-nongr a Onezɩm sẽn ya ned sẽn maand sɩd la a ya yãmb nedã y nengẽ. Bãmb na n wilga yãmb bũmb nins fãa sẽn maand ka wã.

10Mam bi-be-taag a Aristark ne a Mark sẽn yaa a Barnabas saam-biigã pʋʋsda yãmba. Mam wilga yãmb bũmb nins y sẽn tog n maan a Mark yĩnga. A sã n ta yãmb nengẽ, bɩ y reeg-a sõama.

11A Zezi b sẽn boond a soab t'a Zustusã me pʋʋsda yãmba. Zuif-rãmbã sʋka, yaa bãmb bal n naag maam n tʋmd Wẽnnaam soolmã yĩnga. Bãmb yɩɩ neb sẽn paas maam daoodo.

12A Epafras sẽn ya yãmb nedã pʋʋsd-y lame. Yẽ yaa Kirist Zezi tʋmtʋmda, n maood yãmb yĩng a pʋʋsg pʋgẽ n ka basdẽ ye, tɩ yãmb na bɩ n ta, la y bãng Wẽnnaam daabã sõama y sũurẽ, n yals kãenkãe.

13Mam kɩta yẽ kaset n yetẽ t'a maooda yãmb yĩng wʋsgo, yãmb ne neb nins sẽn be Laodise la Hiyerapolisã yĩnga.

14Ba-bi-nongr a Luk sẽn ya logtorã ne a Demas pʋʋsda yãmba.

15Pʋʋs-y ba-biisã sẽn be Laodise wã, ne a Nimfa la a Zezi tẽedbã sẽn tigimd yẽ zakẽ wã.

16Yãmb sã n wa n karem seb-kãngã n sɛ, bɩ y maan y sẽn tõe tɩ b karm-a a Zezi tẽedbã sẽn be Laodise wã me sʋka, la yãmb me karem sebr ning Laodise tẽedbã sẽn na n tʋm yãmbã.

17Yeel-y-yã a Arsɩp yaa: Gũus ne tʋʋmd ning fo sẽn deeg Zu-soabã nengẽ wã, n tõog tʋm-a sõama.

18Maam a Poll n gʋlsd ne m meng nug n pʋʋsd yãmba. Da yĩm-y tɩ b balga maam ye. Bɩ barkã zĩnd ne yãmba.

← Chapter 3 Jump to: